ໂດຍນອນຢູ່ທາງທິດຕາເວັນຕົກສາຍພູ ຕາມດ໋າວ ຫ່າງຈາກໃຈກາງນະຄອນຫຼວງ ຮ່າໂນ້ຍ ປະມານ 70 ກິໂລແມັດ ໄປທາງທິດຕາເວັນຕົກສຽງໃຕ້, ແຕ່ດົນນານມາແລ້ວ ເຕິຍທຽນ ເປັນທີ່ຮູ້ຈັກກັນດີ ແມ່ນໜຶ່ງໃນບັນດາສູນກາງການເຫຼື້ອມໃສທີ່ສຳຄັນຂອງດິນແດນແຫ່ງບັນພະບຸລຸດ ຝູເຖາະ. ຢູ່ແຫ່ງນີ້ໄດ້ຕິດພັນກັບການເຫຼື້ອມໃສໄຫວ້ບູຊາພະແມ່ຂອງຊາດ ເຊິ່ງແມ່ນຜູ້ມີຄຸນງາມຄວາມດີຊ່ວຍເຈົ້າຊີວິດ ຮຸ່ງ ສ້າງສາປະເທດຊາດ. ຢູ່ ເຕິຍທຽນ ການເຫຼື້ອມໃສພື້ນເມືອງປະສານເຂົ້າກັບສາສະໜາພຸດ ອັນໄດ້ສ້າງເປັນເຂດຈິດວິນຍານພິເສດ. ຢູ່ແຫ່ງນີ້ການອະນຸລັກຮັກສາກໍ່ມີຫຼາຍລະດັບຈຸດສຸມຄື ວິຫານທົງ, ວິຫານເກົ້າ, ວິຫານໂກ, ວິຫານເທື້ອງ ແລະ ກຸ່ມປູຊະນີຍະສະຖານຫໍບູຊາພະແມ່ສາມພະນາງ. ນາງ ເລທິຈິງ ຜູ້ນຳທ່ຽວສັງກັດຄະນະຄຸ້ມຄອງອູ່ໄຟຟ້າ ເຕິຍທຽນ ໃຫ້ຮູ້ວ່າ:
“ເຂດປູຊະນີຍະສະຖານລະດັບຊາດນີ້ ກໍ່ມີສາມວັດເກົ່າແກ່ທີ່ມາກ່ອນນີ້ກວ່າ 800 ປີ ແລະ ໄດ້ຮັບການກໍ່ສ້າງແຕ່ສະໄໝລາດຊະວົງ ຫຼີ, ລາດຊະວົງ ເຈິ່ນ. ນອກຈາກນັ້ນກໍ່ຍັງມີບັນດາພະວິຫານທີ່ເກົ່າແກ່ຖືກຕັ້ງຢູ່ຕາມຕີນພູຮອດເນີນ ແທັກບ່ານ”.
ໃນບໍລິເວນທີ່ຮົກເຮື້ອນີ້, ລະບົບວິຫານ ວັດວາອາຮາມທີ່ເກົ່າແກ່ໄດ້ປາກົດຂຶ້ນ ອັນໄດ້ດຶງດູດແຂກທ່ອງທ່ຽວຈາກສາລະທິດມາຢ້ຽມຊົມຢ່າງຫຼວງຫຼາຍ
ເຕິຍທຽນ ໄດ້ກາຍເປັນສະຖານທີ່ທ່ອງທ່ຽວທີ່ລື້ງເຄີຍໃນການເດີນທາງທ່ອງທ່ຽວວັດທະນະທຳ - ຈິດວິນຍານ. ແຂກທ່ອງທ່ຽວມານີ້ບໍ່ພຽງແຕ່ໄດ້ຢ້ຽມຊົມທິວທັດທຳມະຊາດເທົ່ານັ້ນ ຫາກຍັງເຫັນປະຈັກຕາບໍລະເວນທີ່ແຕກຕ່າງອີກດ້ວຍ. ອ້າຍ ຫງວຽນແທັງຕຸ່ງ ແຂກທ່ອງທ່ຽວມາຈາກ ຮ່າໂນ້ຍ ເປີດເຜີຍວ່າ:
“ມື້ນີ້ຂ້າພະເຈົ້າກໍ່ໄດ້ກັບຄືນມາຢ້ຽມຢາມ ເຕິຍທຽນ ນີ້ແມ່ນເຂດໄຫວ້ບູຊາພະແມ່ຂອງຊາດ. ຄວາມປະທັບໃຈທຳອິດ ເມື່ອມານີ້ກໍ່ແມ່ນບັນຍາກາດທີ່ປອດໂປ່ງ ແລະ ຮູ້ສຶກສະຫງົບສຸກທີ່ສຸດ”.
ບັນຍາກາດຢູ່ແຫ່ງນີ້ ດ້ວຍປ່າໄມ້ຂຽວອຸ່ມທຸ່ມ ຫ້ວຍນ້ຳເຢັນສະບາຍ ແລະ ບັນດາເສັ້ນທາງຫີນຄົດງໍໄປຕາມເນີນພູ. ບໍລິເວນນີ້ກໍ່ແມ່ນໝາກຜົນຂອງໄລຍະຮັກສາ ແລະ ເສີມຂະຫຍາຍຄຸນຄ່າມໍລະດົກຜ່ານຫຼາຍລຸ້ນຄົນ. ເຂດປູຊະນີຍະສະຖານທິວທັດທຳມະຊາດ ເຕິຍທຽນ ໄດ້ຮັບການຢັ້ງຢືນແມ່ນປູຊະນີຍະສະຖານລະດັບຊາດ ນັບແຕ່ປີ 1991 ແລະ ໄດ້ຮັບການຮັບຮອງແມ່ນສະຖານທີີ່ປະຫວັດສາດ ແລະ ທິວທັດທຳມະຊາດລະດັບຊາດພິເສດ ເມື່ອປີ 2015. ທ່ານ ບຸ່ຍຊວັນເຈື່ອງ ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວແຂວງ ຝູເຖາະ ໃຫ້ຮູ້ວ່າ:
“ລະບົບສະຖານທີ່ວັດທະນະທຳປະຫວັດສາດຂອງແຂວງ ຝູເຖາະ ໃນປັດຈຸບັນ ມີບໍລິເວນຂອງແຂວງ ຝູເຖາະ ແລະ ຫວິງຟຸກ ເມື່ອກ່ອນນີ້. ໃນນັ້ນລະບົບສະຖານທີ່ປະຫວັດສາດໄດ້ຮັບການຢັ້ງຢືນລະດັບຊາດ ກໍ່ຄືລະດັບຊາດພິເສດ ນີ້ກໍ່ແມ່ນຈຸດທີ່ພົ້ນເດັ່ນທີ່ສຳຄັນສຳລັບແຂກທ່ອງທ່ຽວມາຊອກຫາກົກເຄົ້າເຫງົ້າກໍຂອງຊາດກໍ່ຄືຄົ້ນຫາຄວາມເປັນເອກະລັກຢູ່ສະຖານທີ່ແຫ່ງນີ້"
ໃນທ່າມກາງເຂດພູຜາປ່າໄມ້, ເຕິຍທຽນ ຍັງຄົງຕົວຢູ່ຫັ້ນ, ນີ້ແມ່ນສະຖານທີ່ ເຊິ່ງແຂກທ່ອງທ່ຽວແຕ່ລະຄົນເມື່ອມາຢາມ ແລະ ອອກຈາກໄປນັ້ນກໍ່ລ້ວນແຕ່ມີຄວາມຮູ້ສຶກສະຫງົບງຽບ ແລະ ປະທັບໃຈທີ່ສຸດ.
