ຫໍພິພິດທະພັນປະຫວັດສາດແຫ່ງຊາດຫວຽດນາມ, ສະຖານທີ່ທັດສະນະສຶກສາອັນດູດດືມ

(vovworld)-ຕົ້ນເດືອນ 10/2013, ຫໍພິພິດທະພັນປະຫວັດສາດແຫ່ງຊາດຫວຽດນາມ ແມ່ນສະຖານທີ່ດຳເນີນກອງປະຊຸມສະຫະສະມາຄົມບັນດາຫໍພິພິດທະພັນອາຊີ ຄັ້ງທີ 4

(vovworld)-ຕົ້ນເດືອນ 10/2013, ຫໍພິພິດທະພັນປະຫວັດສາດແຫ່ງຊາດຫວຽດນາມ ແມ່ນສະຖານທີ່ດຳເນີນກອງປະຊຸມສະຫະສະມາຄົມບັນດາຫໍພິພິດທະພັນອາຊີ ຄັ້ງທີ 4 (ANMA4). ນີ້ບໍ່ພຽງແຕ່ແມ່ນຄວາມເປັນກຽດສຳລັບປະເທດເຈົ້າພາບຫວຽດນາມ ເທົ່ານັ້ນ ຫາກຍັງສະແດງໃຫ້ເຫັນຄວາມສົນໃຈ, ການຕີລາຄາຈາກບັນດາຫໍພິພິດທະພັນຢູ່ ອາຊີ ສຳລັບການເຄື່ອນໄຫວຕ່າງໆຂອງຫໍພິພິດທະພັນປະຫວັດສາດແຫ່ງຊາດຫວຽດນາມອິກດ້ວຍ.

ໂດຍຕັ້ງຢູ່ເຂດໃຈກາງນະຄອນຫລວງ ຮ່າໂນ້ຍ, ຫໍພິພິດທະພັນປະຫວັດສາດແຫ່ງຊາດ ຫວຽດນາມ ບໍ່ພຽງແຕ່ແມ່ນກິດຈະກຳສະຖາປັດຕະຍະກຳຝລ່ັງ ທີ່ງາມຕາເທົ່ານັ້ນ ຫາກຍັງໄດ້ຮັບການຕີລາຄາຈາກນັກທ່ອງທ່ຽວສາກົນວ່າ ແມ່ນຫນຶ່ງໃນບັນດາຫໍພິພິດທະພັນອັນດູດດື່ມຢູ່ພາກພື້ນອາຊີຕາເວັນອອກສຽງໃຕ້ ແລະ ອາຊີ ອີກດ້ວຍ.

ຫໍພິພິດທະພັນປະຫວັດສາດແຫ່ງຊາດໄດ້ຮັບການສ້າງຕັ້ງຂຶ້ນ ບົນພື້ນຖານໂຮມຫໍພິພິດທະພັນປະຫວັດສາດຫວຽດນາມ ແລະ ຫໍພິພິດທະພັນປະຕິວັດຫວຽດນາມເຂົ້າເປັນຫນຶ່ງດຽວເມື່ອປີ 2001. ນີ້ກໍແມ່ນກິດຈະກຳສະຖາປັດຕະຍະກຳ ຫໍພິພິດທະພັນຊື່ງໄດ້ຮັບການກໍ່ສ້າງຢູ່ຫວຽດນາມແຕ່ດົນນານມາແລ້ວ. ໃນນັ້ນ ກິດຈະກຳ ຫໍພິພິດທະພັນປະຫວັດສາດຫວຽດນາມ ຕັ້ງຢູ່ເລກ 1 ຖະຫນົນ ຈາງຕຽນ ຮ່າໂນ້ຍ, ແມ່ນແຫ່ງທີ່ໄດ້ຮັບການກໍ່ສ້າງກວ່າໝູ່ ບົນພື້ນຖານສືບທອດຂອງ ຫໍພິພິດທະພັນ Loui Fino ທີ່ຂຶ້ນສະຖາບັນຄົ້ນຄ້ວາຂອງຝລັ່ງກ່ຽວກັບບັນດາປະເທດອາຊີ ຖືກກໍ່ສ້າງເມ່ືອປີ 1926. ສ່ວນ ຫໍພິພິດທະພັນ ປະຕິວັດຫວຽດນາມ ກ່ອນນີ້ຕັ້ງຢູ່ເລກທີ 25 ຖະຫນົນ ຕົງດານ ກໍແມ່ນສຳນັກງານຂອງພະແນກພາສີ ອິນດູຈີນ ໂດຍຊາວຝລັ່ງກໍ່ສ້າງເມື່ອປີ 1917. ຫໍພິພິດທະພັນສອງແຫ່ງດັ່ງກ່າວ ຖືກຕັ້ງຢູ່ອ້ອມແອ້ມໂຮງລະຄອນໃຫຍ່ ຮ່າໂນ້ຍ ອັນໄດ້ສ້າງເປັນກຸ່ມສະຖາປັດຕະຍະກຳທີ່ສວຍງາມ ແຕ່ລະມື້ໄດ້ດຶງດູດຜູ້ເຂົ້າຢ້ຽມຊົມເປັນຈຳນວນຫລວງຫລາຍ. ດຣ ຫວູແມ້ງຮ່າ, ຮອງຜູ້ອຳນວຍການ ຫໍພິພິດທະພັນປະຫວັດສາດແຫ່ງຊາດຫວຽດນາມ ຖືວ່າ:

“ຄວາມໝາຍຂອງການສ້າງຕັ້ງ ຫໍພິພິດທະພັນແຫ່ງດັ່ງກ່າວແມ່ນຕາມຄຳເຫັນຂອງບັນດາຜູ້ຊ່ຽວຊານ, ນັກວິທະຍາສາດ. ສະນັ້ນ ເລື່ອງໂຮມ ຫໍພິພິດທະພັນສອງແຫ່ງເຂົ້າເປັນຫນຶ່ງດຽວແມ່ນຄວາມມຸ່ງມາດຂອງບັນດານັກວິທະຍາສາດກໍຄືຂອງພັກ, ລັດ ເພື່ອເຮັດແນວໃດໃຫ້ມີ ຫໍພິພິດທະພັນແຫ່ງຫນຶ່ງທີ່ສອ່ງແສງໃຫ້ເຫັນໄລຍະປະຫວັດສາດນັບພັນປີຂອງຊາດຫວຽດນາມ ຈາກຍຸກດຶກດຳບັນຈົນເຖິງປະຈຸບັນ. ແລະ ບົດບາດຫນ້າທີ່ຂອງມັນຕ້ອງໄດ້ຍົກໃຫ້ສູງຂຶ້ນ ບົນພື້ນຖານເນື້ອໃນການເຄື່ອນໄຫວໃນເງື່ອນໄຂໃຫມ່.”

ຫໍພິພິດທະພັນປະຫວັດສາດແຫ່ງຊາດຫວຽດນາມ
ພາບ:vov

ດ້ວຍເນື້ອທີ່ວາງສະແດງເກືອບ 4.000 ຕາລາງແມັດ, ມີເອກະສານ, ວັດຖຸພັນນັບ 10.000 ຢ່າງ, ຫໍພິພິດທະພັນປະຫວັດສາດແຫ່ງຊາດຫວຽດນາມ ໄດ້ແນະນຳວິວັດການສ້າງສາ ແລະ ພັດທະນາສັງຄົມຫວຽດນາມ ແຕ່ຍຸກດຶກດຳບັນກ່ອນນີ້ 30.000-40.000 ປີ, ໄລຍະທຳອິດແຫ່ງການສ້າງສາປະເທດຊາດ(ກ່ອນນີ້ 4000 ປີ), ຕະຫລອດຮອດບັນດາສະໄຫມສັກດີນາ, ບັນດາການຕໍ່ສູ້ຍາດເອົາເອກະລາດຂອງຊາດຫວຽດນາມ, ການລຸກຮືຂຶ້ນໃນທົ່ວປະເທດ ແລະ ສະຖາປະນາປະເທດ ສາທາລະນະລັດປະຊາທິປະໄຕ ຫວຽດນາມ ເມື່ອວັນທີ 2/9/1945. ຫໍພິພິດທະພັນກໍໄດ້ແນະນຳບັນດາການຕໍ່ຕ້ານກູ້ຊາດ, ໝາກຜົນແຮງງານຂອງປະຊາຊົນຫວຽດນາມໃນການສ້າງສາປະເທດຊາດກ້າວເຂົ້າສູ່ໄລຍະປ່ຽນແປງໃຫມ່ຂອງປະເທດຊາດ. ນອກຈາກບັນດາວັດຖຸພັນ, ເອກະສານ ທີ່ໄດ້ນຳມາວາງສະແດງ, ຫໍພິພິດທະພັນປະຫວັດສາດແຫ່ງຊາດຍັງຮັກສາເອກະສານ, ວັດຖຸພັນທີ່ລຳ້ຄ່າກວ່າ 150.000 ຢ່າງ. ດຣ ຫວູແມ້ງຮ່າ ໃຫ້ຮູ້ວ່າ:

“ໃນການຮັບຮອງວັດຖຸພັນອັນລຳ້ຄ່າຂອງປະເທດຊາດ, ຫໍພິພິດທະພັນປະຫວັດສາດໄດ້ຮັບການຮັບຮອງຈາກນາຍົກລັດຖະມົນຕີວ່າ ມີວັດຖຸພັນອັນລຳ້ຄ່າ 10 ຢ່າງຂອງປະເທດຊາດ. ນີ້ແມ່ນວັດຖຸພັນຫນຶ່ງດຽວ, ມີຄຸນຄ່າວັດທະນະທຳທີ່ດີເດັ່ນຂອງຫວຽດນາມ. ຄື ກອງທອງ ດົງເຊີນ, ຖັງທອງ ດາວທີ້ງ. ນີ້ແມ່ນບັນດາວັດຖຸພັນທີ່ເປັນເອກະລັກສະເພາະ, ນອກນັ້ນຍັງ ມີວັດຖຸພັນອື່ນອັນລຳ້ຄ່ານັບແຕ່ໄລຍະປະຖົມບູຮານຕະຫລອດຮອດປະຈຸບັນ ແລະ ບັນດາວັດຖຸພັນໃນຍຸກໃກ້ນີ້, ຕົວຢ່າງ:ປຶ້ມບັນທຶກປະຈຳວັນໃນຄຸກຂອງປະທານໂຮ່ຈິມີນ.”

ລະບົບວາງສະແດງຂອງ ຫໍພິພິດທະພັນປະຫວັດສາດແຫ່ງຊາດ ຫວຽດນາມແມ່ນປະຕິບັດຕາມຫລັກການວາງສະແດງຕາມລາຍສະຖິຕິປະຈຳປີ, ຖືວັດຖຸພັນເປັນພາສາຕົ້ນຕໍ, ສົມທົບລະຫວ່າງການວາງສະແດງຕາມແຕ່ລະໄລຍະ ແລະ ເຫດການປະຫວັດສາດ ກັບການວາງສະແດງວັດຖຸພັນຕາມທິດວາງສະແດງເປີດ ສ້າງເງື່ອນໄຂເພື່ອວາງສະແດງບັນດາວັດຖຸພັນໃຫມ່, ເຮັດໃຫ້ໂສມຫນ້າການວາງສະແດງຍາມໃດກໍໃຫມ່ອ່ຽມ, ດຶງດູດຜູ້ຊົມ. ຫວ່າງແລ້ວນີ້ ຫໍພິພິດທະພັນປະຫວັດສາດແຫ່ງຊາດວາງສະແດງວັດຖຸພັນເກືອບ 150 ຢ່າງ ຂຶ້ນກັບມໍລະດົກສາສະຫນາພຸດ ແລະ ຕະກຽງບູຮານຫວຽດນາມ ຕາມຮູບການເຕັກໂນໂລຊີ 3 D(ມີຕີ). ນີ້ເປັນຄັ້ງທຳອິດ ຫໍພິພິດທະພັນແຫ່ງຫນຶ່ງຢູ່ຫວຽດນາມ ວາງສະແດງຕາມຮູບການດັ່ງກ່າວ ບົນພື້ນຖານສຳພັດກັບເຕັກໂນໂລຊີທີ່ກ້າວຫນ້າໃນໂລກ. ອ້າຍຮ່ວາງກວກຫວຽດ, ພາລະກອນຢູ່ ຫໍພິພິດທະພັນປະຫວັດສາດແຫ່ງຊາດ ໃຫ້ຮູ້ວ່າ:

“ພວກຂ້າພະເຈົ້ານຳລະບົບແນະນຳລວງຕາ ດ້ວຍພາສາອັງກິດ, ພາສາຫວຽດ ແລະ ຫລາຍພາສາເພື່ອໃຫ້ຜູ້ຊົມສາມາດສຳພັດກັບຂໍ້ມູນຂ່າວສານໄດ້. ຢູ່ໃນບັນດາຫ້ອງວາງສະແດງແບບລວງຕາ ພວກຂ້າພະເຈົ້າໃຊ້ບັນດາຮູບຈຳລອງ 3 D, ກ້າວຫນ້າທີ່ສຸດໃນໂລກ, ເຮັດໃຫ້ນັກທ່ອງທ່ຽວສາມາດກຳໄດ້ຂໍ້ມູນຢ່າງມີຊີວິດຊີວາກວ່າ.”

ຊື່ງແມ່ນຫນື່ງໃນບັນດາກິດຈະກຳສະຖາປັດຕະຍະກຳທີ່ສວຍງາມ, ຫໍພິພິດທະພັນປະຫວັດສາດແຫ່ງຊາດ ຍັງມີລະບົບວາງສະແດງອຸດົມສົມບູນ ດ້ວຍການເຄື່ອນໄຫວສະເພາະຂະແຫນງ, ຫົວເລື່ອງສະເພາະເປີດກວ້າງ, ຫໍພິພິດທະພັນປະຫວັດສາດແຫ່ງຊາດຫວຽດນາມບໍ່ພຽງແຕ່ແມ່ນສະຖານທີ່ຮັກສາສິ່ງຍອດຢ້ຽມຂອງອະດີດຕະການ ຫາກຍັງສະແດງໃຫ້ເຫັນຄວາມເອກອ້າງທະນົງໃຈ, ມູນເຊື້ອວັດທະນະທຳປະຫວັດສາດຂອງປະເທດຊາດ ແລະແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຊົມເປັນຈຳນວນຫລວງຫລາຍ. ສະເພາະ 10 ເດືອນ ປີ 2013 ນີ້ ຈຳນວນນັກທ່ອງທ່ຽວມາຢ້ຽມຊົມ ຫໍພິພິດທະພັນປະຫວັດສາດແຫ່ງຊາດ ຂຶ້ນເຖິງ 63.000 ເທື່ອຄົນ. ໂດຍມີການເຄື່ອນໄຫວ ຕິດພັນກັບການທ່ອງທ່ຽວ, ຍູ້ແຮງການເຊື່ອມຕໍ່ກັບບັນດາ ຫໍພິພິດທະພັນແຫ່ງອື່ນພາຍໃນພາກພື້ນ, ຫໍພິພິດທະພັນປະຫວັດສາດແຫ່ງຊາດ ຫວຽດນາມ ພວມກາຍເປັນຈຸດນັດພົບອັນດູດດ່ືມຂອງນັກທ່ອງທ່ຽວພາຍໃນ ແລະ ຕ່າງປະເທດ.