ວັນທີ 22/5, ຜູ້ມີສິດເລືອກຕັ້ງຫວຽດນາມຈະໄປປ່ອນບັດເລືອກຕັ້ງ ສະມາຊິກສະພາແຫງຊາດຊຸດທີ 14 ແລະ ສະມາຊິກສະພາປະຊາຊົນອາຍຸການ 2016-2021. ບັດເລືອກຕັ້ງແຕ່ລະໃບ ບໍ່ພຽງແຕ່ເປັນການຢັ້ງຢືນສິດພົນລະເມືອງຂອງປະເທດເອກະລາດ, ເສລີພາບ ແລະ ປະຊາທິປະໄຕເທົ່ານັ້ນ, ຫາກຍັງແມ່ນການສະແດງໃຫ້ເຫັນຄວາມເຊື່ອໝັ້ນ, ການຝາກຝັງຄວາມຮັບຜິດຊອບຂອງຜູ້ມີສິດເລືອກຕັ້ງນັບລ້ານຄົນໃນທົ່ວປະເທດສຳລັບບັນດາຜູ້ໄດ້ຮັບເລືອກຕັ້ງ.
 ທ່ານ ຫງວຽນວັນຟາ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ (baomoi.com) |
ສິດປ່ອນບັດເລືອກຕັ້ງ ແລະ ອອກສະໝັກຮັບເລືອກຕັ້ງແມ່ນບັນດາສິດການເມືອງອັນເປັນພື້ນຖານຂອງພົນລະເມືອງຊຶ່ງໄດ້ລະບຸໃນລັດຖະທຳມະນູນ. ຈາກ ລັດຖະທຳມະນູນປີ 1946 ຊຶ່ງແມ່ນ ລັດຖະທຳມະນູນສະບັບທຳອິດຂອງຫວຽດນາມ ຈົນເຖິງ ລັດຖະທຳມະນູນປີ 2013 (ໃນມາດຕາ 27). ກ່າວຄຳເຫັນເນື່ອງໃນໂອກາດຂ່ຳນັບຮັບຕ້ອນບັນດາຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 1, ທ່ານປະທານໂຮ່ຈິມິນເຄີຍເວົ້າວ່າ : “ ບັດເລືອກຕັ້ງແມ່ນມີຄຸນຄ່າອັນສູງສົ່ງ, ເປັນສັນຍານສະແດງໃຫ້ເຫັນວ່າ ປະຊາຊົນເຮົາໄດ້ກາຍເປັນເຈົ້າຂອງປະເທດຊາດຢ່າງແທ້ຈິງ. ເພາະສະນັ້ນ, ສຳລັບຜົນປະໂຫຍດລວມຂອງປະເທດຊາດ ກໍຄືຜົນປະໂຫຍດສະເພາະຂອງແຕ່ລະຄົນນັ້ນ, ຜູ້ມີສິດເລືອກຕັ້ງຕ້ອງເຮັດຫຼ້ອນໜ້າທີ່ຂອງຕົນ, ໝາຍຄວາມວ່າ ຕ້ອງບອກເຕືອນກັນໄປບ່ອນບັດໃນວັນເລືອກຕັ້ງທົ່ວປະເທດ ”
ບັດເລືອກຕັ້ງແຕ່ລະໃບປຽບເໝືອນສີລາລຶກເພື່ອສ້າງພື້ນຖານກໍ່ສ້າງປະເທດຊາດໃຫ້ໝັ້ນຄົງເຂັ້ມແຂງ
ເນື່ອງໃນໂອກາດວັນເລືອກຕັ້ງທົ່ວປະເທດຄັ້ງທຳອິດເມືອ່ປີ 1946, ທ່ານປະທານໂຮ່ຈິມິນ ໄດ້ເວົ້າວ່າ “ ບັດເລືອກຕັ້ງແຕ່ລະໃບປຽບເໝືອນສີລາລຶກເພື່ອສ້າງພື້ນຖານກໍ່ສ້າງປະເທດຊາດໃຫ້ນັບມື້ນັບໝັ້ນຄົງເຂັ້ມແຂງ”. ບົນເນື້ອໃນຈິດໃຈ ວັນເລືອກຕັ້ງທົ່ວປະເທດເມື່ອປີ 1946 ແລະ ວັນເລືອກຕັ້ງສະພາແຫ່ງຊາດຊຸດຕໍ່ໆໄປ, ພັກ ແລະ ລັດຫວຽດນາມຍາມໃດກໍເຊີດຊູການເສີມຂະຫຍາຍຈິດໃຈ, ເຈດຈຳນົງເປັນເຈົ້າຂອງປະຊາຊົນ. ທ່ານຮອງສາດສະດາຈານ ດຣ ຫງວຽນຈ້ອງຟຸກ ອະດີດຫົວໜ້າສະຖາບັນປະຫວັດສາດພັກ ( ສະຖາບັນການເມືອງແຫ່ງຊາດໂຮ່ຈິມິນ)ໃຫ້ຮູ້ວ່າ :
“ ໂດຍຜ່ານ ບັດເລືອກຕັ້ງຂອງຕົນ, ຜູ້ມີສິດເລືອກຕັ້ງແຕ່ລະຄົນປະກອບສ່ວນກໍ່ສ້າງລັດໃຫ້ ນັບມື້ນັບໝັ້ນຄົງເຂັ້ມແຂງ. ແລະ ກໍຜ່ານບັດເລືອກຕັ້ງ ກໍເປັນການສະແດງນ້ຳໃຈຮັກຊາດ, ເຈດຈຳນົງເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ນ້ຳໃຈສາມັກຄີ, ສ້າງສາ ແລະ ພັດທະນາປະເທດຊາດ. ການເລືອກຕັ້ງ ສະມາຊິກສະພາແຫງຊາດຊຸດທີ 14 ໃກ້ຈະມາເຖິງແລ້ວ, ຕາມຂ້າພະເຈົ້າແລ້ວ, ຄວນເສີມຂະຫຍາຍນ້ຳໃຈນີ້”
ທ່ານ ຫງວຽນວັນຟາ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ ກົດໝາຍໄດ້ກຳນົດວ່າ ໄປປ່ອນບັດເລືອກຕັ້ງ ແມ່ນບໍ່ພຽງແຕ່ແມ່ນປະຕິບັດສິດຂອງຕົນເທົ່ານັ້ນ, ຫາກຍັງແມ່ນພັນທະຂອງພົນລະເມືອງອີກດ້ວຍ. ທ່ານ ຫງວຽນວັນຟາ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ ເນັ້ນໜັກວ່າ :
“ຜູ້ມີສິດປ່ອນບັດເລືອກຕັ້ງໄດ້ເລືອກເອົາບັນດາຜູ້ທີ່ເປັນຄົວແທນໃຫ້ແກ່ຕົນເຂົ້າເຮັດວຽກໃນບັນດາອົງການສຳນັກງານອຳນາດແຫ່ງລັດຢູ່ຂັ້ນສູນກາງ ແລະທ້ອງຖິ່ນ. ເປັນອັນວ່າ ບັນດາ ຜູ້ມີສິດເລືອກຕັ້ງຄວນຮັບຮູ້ໃນການກໍ່ສ້າງລັດ, ອຳນາດການປົກຄອງດ້ວຍການໄປປ່ອນບັດຢ່າງຄົບຖ້ວນ. ພິເສດຄວນເອົາໃຈໃສ່ຄົ້ນຄ້ວາຊີວະປະຫວັດຫຍໍ້, ບັນດາບັນຫາທີ່ກ່ຽວຂ້ອງເຖິງບັນດາຜູ້ອອກສະໝັກຮັບເລືອກຕັ້ງໂດຍລະອຽດ ເພາະວ່າໃນພາບດຽວ, ພວກເຮົາຕ້ອງດຳເນີນການປ່ອນບັດໃນ 4 ຂັ້ນ, ທັງສະພາແຫ່ງຊາດ, ສະພາປະຊາຊົນຂັ້ນແຂວງ, ເມືອງ ແລະ ຕາແສງ ”
ເອົາໃຈໃສ່ເຖິງໂຄງການດຳເນີນງານຂອງ ຜູ້ອອກສະໝັກຮັບເລືອກຕັ້ງ
ໂດຍຮັບຮູ້ຢ່າງຈະແຈ້ງກ່ຽວກັບຄວາມສຳຄັນໃນການເລືອກເອົາຜູ້ແທນເຂົ້າໃນບັນດາອົງການສຳນັກງານອຳນາດແຫ່ງລັດ, ຜູ້ມີສິດເລືອກຕັ້ງຫຼາຍຄົນໄດ້ມີຄວາມເອົາໃຈໃສ່ພິເສດເຖິງ ໂຄງການດຳເນີນງານຂອງບັນດາຜູ້ອອກສະໝັກຮັບເລືອກຕັ້ງ. ທ່ານດິງຊວນເງີ້ຍ ຜູ້ມີສິດເລືອກຕັ້ງຢູ່ເມືອງບາດິງ ແບ່ງປັນວ່າ :
“ສະມາຊິກສະພາແຫງຊາດຕ້ອງໃກ້ຊິດຕິດແທດກັບປະຊາຊົນ, ເກັບກຳຄຳເຫັນຂອງປະຊາຊົນເພື່ອສ່ອງແສງເຖິງສະພາແຫ່ງຊາດ, ຕ້ອງເຮັດຈັ່ງຊັ້ນ ຈຶ່ງສາມາດເຮັດຫຼ້ອນໜ້າທີ່ຂອງຕົນ. ບັນດາ ຜູ້ອອກສະໝັກຮັບເລືອກຕັ້ງຕ້ອງມີ ໂຄງການດຳເນີນງານເພື່ອລາຍງານຕໍ່ປະຊາຊົນຢ່າງຈະແຈ້ງ”
ສ່ວນທ່ານຝ້າມຮີຖຸ ຜູ້ມີສິດເລືອກຕັ້ງຢູ່ເມືອງດົງດາ, ຮ່າໂນ້ຍ ຖືວ່າ :
“ ຢາກຮູ້ວ່າ ຜູ້ແທນມີຄວາມສາມາດຫຼືບໍ່ນັ້ນ, ພວກຂ້າພະເຈົ້າຈະຮັບຟັງແຜນຄາດຄະເນວຽກງານຂອງເຂົາເຈົ້າ. ຕ້ອງເບິ່ງວ່າ ເຂົາເຈົ້າຈະເຮັດຄືແນວໃດເພື່ອກໍ່ສ້າງທ້ອງຖິ່ນ. ຄວາມມຸງຫວັງຂອງປະຊາຊົນແມ່ນຢາກໃຫ້ປະເທດຊາດພັດທະນາເສດຖະກິດ, ມີສະຖຽນລະພາບທາງດ້ານການເມືອງ ສັງຄົມ, ປົກປັກຮັກສາປະເທດຊາດ, ເຂດໝູ່ເກາະທະເລ, ຕ້ານການສໍ້ລາດບັງຫຼວງ, ການຟຸມເຟືອຍ ແລະ ເສີມຂະຫຍາຍປະຊາທິປະໄຕ ”
ບັດເລືອກຕັ້ງແຕ່ລະໃບແມ່ນສິດຜົນປະໂຫຍດ ແລະ ຄວາມຮັບຜິດຊອບຂອງພົນລະເມືອງ. ເພາະສະນັ້ນ, ວັນທີ 22/5 ທີ່ຈະມາເຖິງ, ການທີ່ຜູ້ມີສິດເລືອກຕັ້ງໄປປ່ອນບັດເລືອກເອົາບັນດາຜູ້ທີ່ສົມເປັນຕົວແທນໃຫ້ແກ່ເຈດຈຳນົງ, ຄວາມມຸງມາດປາດຖະໜາຂອງປະຊາຊົນເຂົ້າໃນສະພາແຫງຊາດ ແລະ ສະພາປະຊາຊົນຂັ້ນຕ່າງໆ ກໍເປັນພະຍານຫຼັກຖານທີ່ຈະແຈ້ງເພື່ອຢັ້ງຢືນສິດພົນລະເມືອງຂອງປະເທດແຫ່ງເອກະລາດ, ເສລີພາບ ແລະ ປະຊາທິປະໄຕ, ເສີມຂະຫຍາຍສິດເປັນເຈົ້າຂອງຕົນໃນລະດັບສູງສຸດ.