(vov5) - ດອກ​ເໝີຍ​ສີ​ເຫຼືອງ ພ້ອມ​ກັບ​ໃບ​ໄມ້​ສີ​ຂຽວພວມ​ເບັ່ງ​ບານ​ອອກ, ເປັນ​ສັນ​ຍານ​ທີ່ວ່າ ລະ​ດູ​ບານ​ໃໝ່​​ໄດ້ວຽນ​ມາ​ຢູ່​ໝູ່​ເກາະ​ຕ່າງໆ​ໃນ​ເຂດ​ທະ​ເລ​ທາງ​ທິດ​ຕາ​​ເວັນ​ຕົກ​ສຽງ​ໃຕ້​ຂອງ​ປະ​ເທດ. ນີ້​ກໍ່​ແມ່ນ​ໂອ​ກາດ​ເພື່ອ​ໃຫ້​ທະ​ຫານ​ເຮືອ​ເຂດ 5 ນຳເອົາ​ຂອງ​ຂວັນ​ຈາກ​ດິນ​ຕໍ່​ແຜນ​​ໄປ​ຍັງໝູ່​ເກາະ ເພື່ອ​ມອບໃຫ້​ນັກ​ຮົບ​ຢູ່​ທີ່ນີ້​ໄດ້ຕ້ອນ​ຮັບ​ບຸນ​ປີ​ໃໝ່​ປະ​ຈຳ​ຊາດ (ບຸນ​ເຕັດ)​ ​​​ດ້ວຍ​ຄວາມອົບ​ອູ່ນ​ ແລະ ເຕັມ​ໄປ​ດ້ວຍ​ສາຍ​ໃຈ​ທີ່​ຮັກ​ແພງ​ລະ​ຫວ່າງທະ​ຫານ ແລະ ປະ​ຊາ​ຊົນ. ບັນ​ດາ​ກ່ຳ​ປັ່ນ​ທີ່ອອກ​ໄປຍັງເຂດ​ໝູ່​ເກາະນັ້ນ ​ໄດ້​ເປັນ​ຂົວ​ເຊື່ອມ​ຕໍ່​ລະ​ຫວ່າງ​ດິນ​ຕໍ່​ແຜ່ນ ກັບ​ຫ​ມູ່​ເກາະຢູ່​ຫ່າງ​ໄກ​ສອກຫຼີກ - ແຫ່ງ​ທີ່​ບັນ​ດາ​ນັກ​ຮົບ​ກອງ​ທັບ​ເຮືອ​ພວມ​ປະ​ຕິ​ບັດ​ໜ້າ​ທີ່​ປ້ອງ​ກັນ​ເຂດ​ທະ​ເລ, ໝູ່​ເກາະ​ທີ່​ສັກ​ກະ​ລະ​ບູ​ຊາ​ຂອງ​ປະ​ເທດ​ຊາດ.

ເກາະ ໂຖ​ຈູ ເຊິ່ງ​ແມ່ນ​ເກາະ​ປ້ອມໜ້າ ຢູ່ທາງ​ທິດ​ຕາ​ເວັນ​ຕົກ​ສຽງ​ໃຕ້​ຂອງ​ປະ​ເທດ

(ພາບອິນເຕີແນດ)

ມາ​ຢ້ຽມ​ຢາມ​ບັນ​ດາ​ກົມ​ກອງ​ທີ່​ຂຶ້ນ​ກັບ​ເຂດ 5 ຂອງກອງ​ທັບ​ເຮືອ​ໃນ​ຊຸມ​ວັນ​ໄກ້​ຈະ​ຮອດ​ບຸນ​ປີ​ໃໝ່. ຢູ່​ແຫ່ງ​ໃດ​ກໍ່​ເຫັນ​ບັນ​ຍາ​ກາດ​​ຟົດ​ຟື້ນ​ມ່ວນ​ຊື່ນ ເພື່ອ​ກະ​ກຽມ​ຕ້ອນ​ຮັບ​ບຸນ​ປີ​ໃໝ່. ບັນ​ດາ​ຄ້າຍ​ທະ​ຫານ​ຖືກ​ສ້ອມ​ແປງ​ຢ່າງ​ສະ​ອາດ, ສວຍ​ງາມ. ດອກ​ໄມ້​ໃນ​ສວນ​ກໍ່​ເບັ່ງ​ບານ​ອອກ​ກົງ​ກັບ​ໂອ​ກາດ​ບຸນ​ປີ​ໃໝ່. ນັບ​ແຕ່​ຮຸ່ງ​ເຊົ້າ, ຢູ່​ເກາະ ໂຖ​ຈູ ເຊິ່ງ​ແມ່ນ​ເກາະ​ປ້ອມໜ້າ ຢູ່ທາງ​ທິດ​ຕາ​ເວັນ​ຕົກ​ສຽງ​ໃຕ້​ຂອງ​ປະ​ເທດ, ພະ​ນັກ​ງານ, ນັກ​ຮົບ ໄດ້​ພ້ອມ​ກັນ​ບົວ​ລະ​ບັດ, ຫົດ​ນ້ຳ​ໃຫ້​ດອກ​ກ້ວຍໄມ້​ທີ່​ພວມ​ເບັ່ງ​ບານ​ດ້ວຍ​ສີ​ສັນ​ສົດ​ໄສ. ນັກ​ຮົບ ຫງວຽນ​ວັນ​ກິງ, ບ້ານ​ເກີດ​ຢູ່​ແຂວງ​ຮ່າ​ຕິ້ງ, ໃຫ້​ຮູ້​ວ່າ: ນີ້​ແມ່ນ​ເທື່ອ​ທຳ​ອິດ​ທີ່​ອ້າຍ​ຕ້ອນ​ຮັບ​ບຸນ​ປີ​ໃໝ່​ໄກ​ຈາກ​ຄອບ​ຄົວ,

“ບຸນ​ປີ​ໃໝ່ຢູ່​ບ້ານ​ແມ່ນ​ມີ​ໝູ່​ເພື່ອນ, ຍາດ​ຕິ​ພີ່​ນ້ອງ. ​ເຖິງ​ວ່າຫາ​ກໍ່​ມາ​ຮັບ​ໜ້າ​ທີ່​ຢູ່​​ເກາະ​ໂຖ​ຈູ ກໍ່ຕາມ, ແຕ່​ຂ້າ​ພະ​ເຈົ້າ​ພັດ​ໄດ້ຮັບ​ຄວາມ​ເອົາ​ໃຈ​ໃສ່​​ເບິ່ງ​ແຍງຈາກ​ຂັ້ນ​ເທິງ ແລະ ເພື່ອນ​ຮ່ວມ​ກົມ​ກອງ, ດັ່ງ​ນັ້ນ​ຈຶ່ງ​ມີ​ຄວາມ​ອູ່ນ​ອ່ຽນ​ໃຈ​ ​ເພື່ອປະ​ຕິ​ບັດ​ໜ້າ​ທີ່. ອ້າຍນ້ອງຢູ່​ທີ່​ນີ້ດຳ​ລົງ​ຊີ​ວິດ​ປອງດອງ​ກັນ ແລະ ມີ​ຄວາມ​ສະ​ໜິດ​ສະ​ໜົມ​ນຳກັນ. ມື້​ວານນີ້, ອ້າຍ​ນ້ອງ​ໃນ​ກົມ​ກອງ​ຫາ​ໄດ້​ດອກ​ເໝີຍ​ທີ່​ສວຍ​ງາມ​ຢູ່​ໃນ​ປ່າ​ເພື່ອ​ຕັ້ງ​ໃນ​ຫໍ​ປະ​ຊຸມ ແລະ ຫໍ​່ເຂົ້າ​ຕົ້ມ 10 ໜ່ວຍເພື່ອ​ຕ້ອນ​ຮັບ​ບຸນ​ປີ​ໃໝ່. ປະ​ຈຸ​ບັນ, ກົມ​ກອງ​ໄດ້​ກະ​ກຽມ​ວຽກ​ງານ​ທັງ​ໝົດ​ສຳ​ເລັດ​ແລ້ວ​ເພື່ອ​ຕ້ອນ​ຮັບ​ບຸນ​ປີ​ໃໝ່”.

ນັກຮົບຢູ່ເກາະໂຖຈູກະກຽມຕ້ອນຮັບບຸນປີໃໝ່

(ພາບອິນເຕີແນດ)

ສຳ​ລັ​ບ ​ຮ້ອຍ​ເອກ ຈ້ຽວ​ວັນ​ຕ໋​ວຽນ, ນັກ​ເຕັກ​ນິກ ຮາ​ດາ, ​ຜູ້ທີ່ມາ​ເຮັດ​ວຽກ​ຢູ່​ເກາະແຫ່ງ​ນີ້ເປັນ​ເວ​ລາກວ່າ​ 17 ປີ​ແລ້ວໄດ້ເລົ່າ​ສູ່​ຟັງ​ວ່າ, ບຸນ​ປີ​ໃໝ່​ທີ່​ໜ້າ​ຈົດ​ຈຳ​ທີ່​ສຸດ​ແມ່ນ​ບຸນ​ປີ​ໃໝ່​ປີ 2007, ເມື່ອ​ອ້າຍ​ຕົກ​ລົງ​ນຳ​ຄອບ​ຄົວ​ມາ​ດຳ​ລົງ​ຊີ​ວິດ​, ກໍ່​ຮ່າງ​ສ້າງ​ຕົວ​ຢູ່​ເກາະ​ແຫ່ງນີ້ ດ້ວຍ​ຄວາມ​ທຸກ​ຍາກ​ລຳ​ບາກຫຼາຍ​ຢ່າງ. ມາ​ຮອດ​ປະ​ຈຸ​ບັນ, ອ້າຍ​ໄດ້​ມີ​ເຮືອນ​ຕຶກຫຼັງ​ໜຶ່ງ​ຢູ່​ມໍ່​ກັບ​ກົມ​ກອງ​ແລ້ວ, ສ່ວນ​ລູກ​ເຕົ້າ​ກໍ່ໄດ້​​ໄປຮ່ຳ​ຮຽນ​ຢູ່​​ເຂດດິນ​ຕໍ່​ແຜ່ນ, ສ່ວນ​ເມຍ​ກໍ່ມີ​ຮ້ານ​ຄ້າ​ນ້ອຍໆ ເພື່ອ​ຫາ​ເງິນ​ລ້ຽງ​ຊີບ. ອ້າຍ​ຕ໋​ວຽນ ໃຫ້​ຮູ້​ວ່າ:

“ໃນ​ຊຸມ​ປີ​ມໍ່ໆ​ມານີ້, ໂດຍ​ໄດ້​ຮັບ​ຄວາມ​ເອົາ​ໃຈ​ໃສ່​ຈາກ​ພັກ, ລັດ, ພວກ​ຂ້າ​ພະ​ເຈົ້າ​ຈຶ່ງ​ໄດ້​ຕ້ອນ​ຮັບ​ບຸນ​ປີ​ໃໝ່​ດ້ວຍ​ຄວາມ​ເບິນ​ບານ​ມ່ວນ​ຊື່ນ ບໍ່​ຕ່າງ​ຫ​ຍັງ​ກັບ​ຢູ່​ເຂດ​ດິນ​ຕໍ່​ແຜ່ນ, ການ​ພົວ​ພັນ​ລະ​ຫວ່າງ​ປະ​ຊາ​ຊົນ​ກັບ​ທະ​ຫານ​ກໍ່​ມີ​ຄວາມ​ສະໜິດ​ຕິດ​ພັນກວ່າ. ​ອ້າຍ​ນ້ອງ​ໃນ​ກົມ​ກອງ​ກໍ່​ຮັກ​ແພງ​ກັນປຽບ​ເໝືອນອ້າຍ​ນ້ອງ​ໃນ​ຄອບ​ຄົວ​ດຽວ​ກັນ. ຄ່ຳ​ຄືນ​ສົ່ງ​ທ້າຍ​ປີ​ເກົ່າ​ຕ້ອນ​ຮັບ​ປີ​ໃໝ່, ພວກ​ຂ້າ​ພະ​ເຈົ້າ​ໄດ້​ຈັດ​ງານ​ພົບ​ປະ​ແລກ​ປ່ຽນ​ກັບ​ຄະ​ນະ​ຊາວ​ໜຸ່ມ, ຈັດ​ການ​ສະ​ແດງ​ສິ​ລະ​ປະ. ຄວາມ​ປາ​ຖະ​ໜາ​ຂອງ​ນັກ​ຮົບ​ພວກ​ຂ້າ​ພະ​ເຈົ້າ​ແມ່ນ​ຢາກ​ໃຫ້​ຊີ​ວິດ​ຂອງ​ປະຊາຊົນທຸກ​ຄົນ​ນັບ​ມື້​ນັບ​ດີ​ຂຶ້ນ. ສ່ວນນັກຮົບ​ພວກ​ຂ້າ​ພະ​ເຈົ້າ​ກໍ່​ຫວັງວ່າ​ເງື່ອນ​ໄຂ​ດ້ານ​ວັດຖຸ ​ແລະ ການ​ດຳລົງ​ຊີວິດ​ຢູ່​ເຂດ​ເກາະ​ນີ້​ຈະ​ໄດ້​ຮັບ​ການ​ຍົກ​ສູງ​ຂຶ້ນ”.

ການເພີ່ມພູນຜະລິດຜົນຂອງປະຊາຊົນໃນເກາະໂຖຈູ

(ພາບອິນເຕີແນດ)

ຢູ່​ເກາະ ໂຖ​ຈູ, ພັນ​ໂທ ຟ້າ​ມວັນ​ຮູ​ຍ, ຜູ້​ບັນຊາ​ການກອງພັນ​ໃຫຍ່ໂຖ​ຈູ, ​ໃຫ້​ຮູ້​ວ່າ, ທາງ​ກົມ​ກອງ​ໄດ້​ມີ​ແຜນການ​ລາດຕະ​ເວັນ​ໃນ​ໂອກາດ​ບຸນປີ​ໃໝ່​ແລ້ວ, ສ້າງ​ເງື່ອນ​ໄຂ​ໃຫ້​ອ້າຍ​ນ້ອງ​ກະກຽມ​ຕ້ອນຮັບ​ບຸນປີ​ໃໝ່​ບົນ​ຈິດ​ໃຈ​ເບິ​ກບານ​ມ່ວນ​ຊື່ນ, ປອດ​ໄພ, ປະຢັດ ​ແລະ ກຽມພ້ອມ​ສູ້​ຮົບ​ໃນ​ທຸກ​ສະພາບ​ການ ​ເພື່ອ​ຮັກສາ​ອະທິປະ​ໄຕ​ເຂດທະ​ເລ​ໝູ່​ເກາະ .

”ບຸນປີ​ໃໝ່​ນີ້, ພວກ​ຂ້າພະ​ເຈົ້າ​ໄດ້​ມີ​ການ​ປ່ຽນ​ໃໝ່​ຫຼາຍ​ຢ່າງ​​ໃນ​​ການ​ຜັນ​ຂະຫຍາຍ​ໜ້າ​ທີ່ ກ່ຽວ​ກັບ​ຊີວິດ​ທາງ​ດ້ານ​ວັດຖຸ ​ແລະ ຈິດ​ໃຈ ກໍ່​ຄື​ການ​ລາດຕະ​ເວນ, ດ້ວຍ​ຄວາມ​ຮັບຜິດຊອບ​ສູງ​ກວ່າ. ​ໃນ​ໂອກາດ​ບຸນປີ​ໃໝ່, ພວກ​ຂ້າພະ​ເຈົ້າ​ກໍ່​ສົມທົບ​ກັບ​ຄະນະ​ກຳມະການ​ປະຊາຊົນ​, ຄະນະ​ຊາວ​ໜຸ່ມຕາ​ແສງ ຈັດ​ຕັ້ງ​ການ​ເຄື່ອນ​ໄຫວ​ລະ​ຫຼິ້ນ​ພື້ນ​ເມືອງ, ສະ​ແດງ​ສິລະ​ປະ, ​ແຂ່ງຂັນ​ກິລາ”.

ນັກຮົບຢູ່ເກາະໂຖຈູຍາມໃດກໍ່ກຽມພ້ອມ​ສູ້​ຮົບ​​ເພື່ອ​ຮັກສາ​ອະທິປະ​ໄຕ​ເຂດທະ​ເລ​ໝູ່​ເກາະ

(ພາບອິນເຕີແນດ)

ທ່ານ ຫງວຽນ​ທ້າຍ​ຫວຽດ, ຮອງ​ປະທານ​ຄະນະ​ກຳມະການ​ປະຊາຊົນ​ຕາ​ແສງ​ອານ​ເຊີນ, ​ໃຫ້​ຮູ້​ວ່າ ​ພາ​ເຂົ້າ​ສົ່ງ​ທ້າຍ​ປີ​ເກົ່າ ຕ້ອນຮັບ​ປີ​ໃໝ່ ​ໂດຍ​ສະຖານີ ຮາ​ດາ ​ແລະ ປະຊາຊົນ​ຈັດ​ຕັ້ງ ​ເພື່ອ ຂໍ​ລາພະ​ນັກ​ງານ, ນັກຮົບ​ບາງ​ຄົນ​ກັບ​ເມືອ​ບ້ານ​ຕ້ອນຮັບ​ປີ​ໃໝ່ ກໍ່​ມີ​ອາຫານ​ຫຼາຍ​ເຍື່ອງ​ທີ່​ເປັນ​ສັນຍາ​ລັກ​ຂອງ​ບຸນ​ເຕັດ​ຄື​​: ເຂົ້າຕົ້ມ, ຢໍ່, ພັກ​ບົວ​ສົ້ມ, ປາ…

”​ເພື່ອ​ຮັບປະກັນ​ໃຫ້​ພໍ່​ແມ່​ປະຊາຊົນ​ໄດ້​ຕ້ອນຮັບ​ບຸນປີ​ໃໝ່​ໃນ​ຄວາມ​ເບີກບານ​ມ່ວນ​ຊື່ນ, ທະຫານ ​ແລະ ປະຊາຊົນ​ໄດ້​ມີ​ງານ​ພົບ​ປະ​ແລກປ່ຽນ, ສະ​ແດງ​ສິລະ​ປະ​ກັບ​ກອງ​ປ້ອງ​ກັນຊາ​ຍ​ແດນ, ທະຫານ​ເຮືອ… ທີ່​ຕັ້ງ​ທັບ​ໃນ​ບໍລິ​ເວນ​ຕາ​ແສງ. ນອກນັ້ນ, ບຸນປີ​ໃໝ່​ນີ້, ພວກ​ຂ້າພະ​ເຈົ້າ​ຍັງ​ສ້າງ​ຕັ້ງ​ຄະນະ​ປະຕິບັດ​ງານ​​ໄປ​ຢ້ຽມຢາມ, ມອບ​ຂອງຂວັນ​ໃຫ້​ບັນດາ​ຄອບຄົວ​ທີ່​ທຸກ​ຍາກ, ຄອບຄົວ​ໃນ​ເປົ້າ​ໝາຍ​ນະ​ໂຍບາຍ​ອີກ​ດ້ວຍ”

ລະດູບານ​ໃໝ່​ໄດ້​ວຽນມາ​ອີກ​ວາລະ​ໜຶ່ງ ​ແລະ ຢູ່​ເຂດ​ເກາະ​ທີ່​ຫ່າງ​ໄກ​ທາງ​ທິດຕາ​ເວັນ​ຕົກ​ສຽງ​ໃຕ້​ຂອງ​ປະ​ເທດ, ມີ​ພະນັກງານ, ນັກຮົບ​ຫຼາຍ​ຄົນຍັງ​ຄົງສືບ​ຕໍ່​ປະຕິບັດ​ໜ້າ​ທີ່​ ບໍ່​ໄດ້​ກັບ​ເມືອ​ບ້ານ​ຕ້ອນຮັບ​ບຸນປີ​ໃໝ່​ພ້ອມ​ກັບ​ຄອບຄົວ. ສຳລັບ​ເຂົາ​ເຈົ້າ​ແລ້ວ, ​ເຖິງ​ວ່າ​ຈະ​ຢູ່​ໄກ​ຈາກ​ຄອບຄົວ​ກໍ່ຕາມ ​ແຕ່​ຢູ່​ເກາະ​ແຫ່ງ​ນີ້ ຍັງ​ມີ​ຄວາມ​ອົບ​ອູ່​ນຂອງ​ລະດູບານ​ໃໝ່ ​ແລະ ອາລົມ​ຈິດ​ຂອງ​ເພື່ອ​ນຮ່ວມ​ກົມ​ກອງຢູ່.