ການພົບປະລະຫວ່າງພັນລະຍາລັດຖະມົນຕີກະຊວງການຕ່າງປະເທດແລະພະນັກງານກະຊວງການຕ່າງປະເທດສອງປະເທດລາວ ແລະ ຫວຽດນາມ
ທ່ານ ນາງອາລູນີ ກົມມະສິດ ແລະ ທ່ານ ນາງ ຫງວຽນງວຽດງາ
(ພາບ: daidoanket.vn/)
|
(vovworld) - ໂດຍໄດ້ຮັບຄຳເຊີນຂອງ ທ່ານ ນາງອາລູນີ ກົມມະສິດ ພັນລະຍາຂອງທ່ານລັດຖະມົນຕີກະຊວງການຕ່າງປະເທດລາວ ສະເຫຼີມໄຊ ກົມມະສິດ, ທ່ານ ນາງ ຫງວຽນງວຽດງາ ພັນລະຍາຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຟ້າມບິ່ງມິງ, ປະທານກິດຕິມະສັກກຸ່ມແມ່ຍິງປະຊາຄົມອາຊຽນປະຈຳຮ່າໂນ້ຍ, ໄດ້ນຳໜ້າຄະນະພະນັກງານຍິງກະຊວງການຕ່າງປະເທດຫວຽດນາມໄປຢ້ຽມຢາມລາວ ໃນລະຫວ່າງວັນທີ 17-18/10/2016. ໃນການຢ້ຽມຢາມ ທ່ານ ນາງ ຫງວຽນງວຽດງາ ແລະ ຄະນະພະນັກງານຍິງກະຊວງການຕ່າງປະເທດຫວຽດນາມ ໄດ້ເຂົ້າຢ້ຽມຂ່ຳນັບທ່ານ ນາງ ຄຳເມິງ ວໍລະຈິດ, ພັນລະຍາຂອງທ່ານເລຂາທິການໃຫຍ່, ປະທານປະເທດສປປລາວ, ທ່ານ ນາງ ນາລີ ສີສຸນິດ, ພັນລະຍາຂອງທ່ານນາຍົກລັດຖະມົນຕີລາວ; ທ່ານ ນາງ ອາລູນີ ກົມມະສິດ ພັນລະຍາຂອງທ່ານລັດຖະມົນຕີກະຊວງການຕ່າງປະເທດລາວ ພ້ອມກັບບັນດາພະນັກງານຍິງກະຊວງການຕ່າງປະເທດລາວ. ທີ່ການພົບປະ, ທ່ານ ນາງ ຫງວຽນງວຽດງາ ຕີລາຄາສູງຄຸນນະທາດ ແລະ ບົດຮຽນໃນການແກ້ໄຂບັນດາບັນຫາການພົວພັນຕ່າງປະເທດສອງຝ່າຍ ແລະ ຫຼາຍຝ່າຍ ຂອງບັນດາເອື້ອຍນ້ອງກະຊວງການຕ່າງປະເທດລາວ, ປະກອບສ່ວນເປີດກວ້າງ, ເພີມທະວີການພົວພັນຕ່າງປະເທດຂອງລາວ ແລະ ຍົກສູງອິດທິພົນຊື່ສຽງ, ທີ່ຕັ້ງບົດບາດຂອງລາວໃນເວທີສາກົນ. ທ່ານ ນາງ ຫງວຽນງວຽດງາ ເຊື່ອໝັ້ນວ່າ: ແມ່ຍິງສອງປະເທດຫວຽດນາມ-ລາວ ຈະສືບຕໍ່ຮ່ວມແຮງຮ່ວມໃຈກັນປະກອບສ່ວນເຂົ້າໃນການປົກປັກຮັກສາ, ເພີ່ມພູນຄູນສ້າງສາຍພົວພັນອັນດີງາມທີ່ມີມາແຕ່ດົນນານລະຫວ່າງປະຊາຊົນສອງປະເທດ. ຄະນະຜູ້ແທນຍິງຫວຽດນາມກໍ່ມີການແລກປ່ຽນ ແລະ ເຮັດວຽກກັບສະຫະພັນແມ່ຍິງກະຊວງການຕ່າງປະເທດລາວ, ພົບປະກັບສະຫະພັນແມ່ຍິງນະຄອນຫຼວງວຽງຈັນ.