ຜູ້ຊົມເຂົ້າຮ່ວມງານວາງສະແດງ “ມະຫາໄຊລະດູບານໃໝ່ 1975 - ກຳລັງແຮງຫວຽດນາມ"
(ພາບ: Thái Thuần/TTXVN)
|
(vovworld) - ໃນຊຸມວັນຜ່ານມາ, ທ້ອງຖີ່ນຕ່າງໆໃນທົ່ວປະເທດຈັດຕັ້ງການເຄື່ອນໄຫວທີ່ມີຄວາມໝາຍຫຼາຍຢ່າງເພື່ອ ສະເຫຼີມສະຫຼອງ 40 ປີ ແຫ່ງວັນປົດປ່ອຍພາກໃຕ້, ໂຮມປະເທດຊາເປັນເອກະພາບ. ຢູ່ນະຄອນໂຮ່ຈີມິນ, ຕອນຄຳ່ວັນທີ 24/4, ໄດ້ດຳເນີນລາຍການສະແດງສິລະປະ ແລະ ພົບປະແລກປ່ຽນກັບບັນດາຕົວພະຍານປະຫວັດສາດຂອງຂະບວນການນັກສຶກສາ, ນັກຮຽນໄຊງ່ອນ - ຢາດິ້ງ. ດຣ ເຈືອງມິງຍຶດ, ແມ່ນໜຶ່ງໃນບັນດາຕົວພະຍານປະຫວັດສາດທີ່ເຂົ້າຮ່ວມລາຍການ, ໃຫ້ຮູ້ວ່າ:
“ນີ້ແມ່ນລາຍການທີ່ມີຄວາມໝາຍທີ່ສຸດ, ມັນໄດ້ວາດພາບຄືນກ່ຽວກັບປະຫວັດສາດ, ມູນເຊື້ອແຫ່ງການຕໍ່ສູ້ຂອງປະຊາຊົນຫວຽດນາມໃນໄລຍະບຸກໂຈມຕີລຸກຮຶ້ຂຶ້ນຂະໜາດໃຫຍ່ ແລະ ໄລຍະພາກໃຕ້ໄດ້ຮັບການປົດປ່ອຍ. ຂ້າພະເຈົ້າຫວັງວ່າລຸ່ນໜຸ່ມໃນປະຈຸບັນຍາມໃດກໍ່ຮັກສາມູນເຊື້ອປະຕິວັດກໍ່ຄືບັນຍາກາດບຸກໂຈມຕີອັນສະຫງ່າອົງອາດຂອງລະດູບານໃໝ່ປີ 1975ໄວ້ ຕະຫຼອດໄປ“.
ໃນວັນດຽວກັນ, ຢູ່ຫໍພິພິດທະພັນປະຫວັດສາດກອງທັບຫວຽດນາມ ກໍ່ໄຂງານວາງສະແດງ “ມະຫາໄຊລະດູບານໃໝ່ 1975 - ກຳລັງແຮງຫວຽດນາມ“. ງານວາງສະແດງວາດພາບກ່ຽວກັບການບຸກໂຈມຕີ ແລະ ລຸກຮຶ້ຂຶ້ນໃນລະດູບານໃໝ່ 1975 ດ້ວຍກຳລັງແຮງສັງລວມຂອງສົງຄາມປະຊາຊົນຫວຽດນາມ, ພາຍໃຕ້ການຊີ້ນຳນຳພາຂອງພັກກອມມູນິດຫວຽດນາມ ແລະ ປະທານໂຮ່ຈີມິນ ຜູ້ຍິ່ງໃຫຍ່.
ແລະກໍ່ໃນວັນດຽວກັນ, ແຂວງດັກນົງ, ວິ້ງຟຸກ, ແລະ ຮ່ານາມ ໄດ້ຈັດຕັ້ງງານພົບປະແລກປ່ຽນ. ນັກຮົບເກົ່າທີ່ເຄີຍເຂົ້າຮ່ວມການສູ້ຮົບກ່ອນປີ 1975 ແລະ ລຸ່ນໜຸ່ມ ເພື່ອພ້ອມກັນທົບທວນຄືນເຫດການວັນທີ 30/4, ຄວາມໝາຍປະຫວັດສາດຂອງບັ້ນຮົບ ໂຮ່ຈີມິນ, ມະຫາໄຊໃນລະດູບານໃໝ່ 1975, ນຳຫວຽດນາມກ້າວເຂົ້າສູ່ສັງກາດໃໝ່ແຫ່ງສັນຕິພາບ, ເອກະລາດ, ເອກະພາບຢ່າງສົມບຸນ.