ພາບປະກອບ
|
(vovworld) - ຕອນເຊົ້າວັນທີ 20/3, ຄະນະເລຂາສູນກາງພັກກອມມູນິດຫວຽດນາມ ໄດ້ມີການເຮັດວຽກກັບຄະນະຊີ້ນຳໂຄງການກໍ່ສ້າງທົດລອງຮູບແບບຊົນນະບົດໃໝ່, ຮັບຟັງໝາກຜົນແຫ່ງການປະຕິບັດໂຄງການໄລຍະ 2009 – 2011. ທ່ານ ຫງວຽນຟູ໋ຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາ ເປັນປະທານການເຮັດວຽກ. ເຂົ້າຮ່ວມການເຮັດວຽກມີທ່ານປະທານປະເທດ ເຈືອງເຕີນຊາງ, ຫົວໜ້າຄະນະຊີ້ນຳໂຄງການກໍ່ສ້າງທົດລອງຊົນນະບົດໃໝ່ສູນກາງ. ຕາມບົດລາຍງານແລ້ວ, ພາຍຫຼັງ 3 ປີຜັນຂະຫຍາຍໂຄງການກໍ່ສ້າງຊົນນະບົດໃໝ່, ບັນດາເນື້ອໃນກໍ່ສ້າງຊົນນະບົດໃໝ່ລ້ວນແຕ່ໄດ້ຮັບການຜັນຂະຫຍາຍ ແລະ ບັນລຸໄດ້ຄວາມຕ້ອງການທີ່ໄດ້ວາງອອກໂດຍພື້ນຖານ. ມາຮອດປະຈຸບັນ, ມີ 8 ໃນຈຳນວນ 11 ຕາແສງປະຕິບັດທົດລອງໄດ້ສຳເລັດບັນດາມາດຕະຖານກ່ຽວກັບພື້ນຖານໂຄງລ່າງໂດຍພື້ນຖານ, ເຮັດໃຫ້ສົມໜ້າຊົນນະບົດມີການປ່ຽນແປງຢ່າງຈະແຈ້ງ ແລະ ມີການກະທົບໂດຍກົງເຖິງການພັດທະນາເສດຖະກິດ, ປັບປຸງ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນ. ກ່າວຄຳເຫັນທີ່ການເຮັດວຽກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ:
“ອາດເວົ້າໄດ້ວ່າ, ໂຄງການກໍ່ສ້າງຊົນນະບົດໃໝ່ແມ່ນດີຫຼາຍ. ໄລຍະຜ່ານມາ, ພວກເຮົາສຸມໃສ່ກໍ່ສ້າງຊົນນະບົດໃໝ່, ແມ່ນຖືກຕ້ອງແລ້ວ ແຕ່ຕ້ອງເອົາໃຈໃສ່ເຖິງລັກສະນະຮອບດ້ານໃນວິວັດການປະຕິບັດ. ທີ່ 2 ແມ່ນ: ເພື່ອກໍ່ສ້າງຊົນນະບົດໃໝ່ໃຫ້ໄດ້ນັ້ນຄວນສືບຕໍ່ເພີ່ມເຕີມ, ສ້າງສຳເລັດ, ຫັນເປັນລະອຽດບັນດາມາດຕະຖານຮູບແບບຊົນນະບົດໃໝ່ລວມ ແລະ ໃຫ້ແກ່ແຕ່ລະເຂດ ແລະ ກຳນົດມາຕະຖານໃດແມ່ນມີຄວາມຈຳເປັນ. ແຕ່ຕ້ອງເອົາໃຈໃສ່ວ່າ: ຊົນນະບົດພວມມຸ້ງໄປເຖິງການຫັນເປັນອຸດສາຫະກຳ ແລະ ທັນສະໄໝ, ພ້ອມທັງຕ້ອງຮັກສາສີສັນວັດທະນະທຳຂອງແຕ່ລະເຂດໄວ້ໄດ້, ເສີມຂະຫຍາຍລະບົບການເມືອງຂັ້ນຮາກຖານ, ລະຫວ່າງການຊື້ນຳນຳພາຂອງຄະນະພັກທຸກຂັ້ນ ແລະ ບົດບາດເປັນເຈົ້າຂອງປະຊາຊົນກ່ວາອີກ”