(VOVWORLD) -ຕອນສວາຍວັນທີ 21 ພະຈິກ, ໃນຂອບເຂດການຢ້ຽມຢາມ ມາເລເຊຍຢ່າງເປັນທາງການ, ທ່ານເລຂາທິການໃຫຍ່ ໂຕເລີມ ໄດ້ມີການພົບປະສອງຝ່າຍຢ່າງເປັນທາງການກັບ ທ່ານນາຍົກລັດຖະມົນຕີ ມາເລເຊຍ Anwar Ibrahim.
 ການນຳສອງທ່ານໂອ້ລົມກັນ ກ່ອນເຂົ້າການພົບປະສອງຝ່າຍ (ພາບ: VOV) |
ທີ່ການພົບປະສອງຝ່າຍ, ທ່ານເລຂາທິການໃຫຍ່ ໂຕເລີມ ຕີລາຄາສູງການພັດທະນາຢ່າງຂະຫຍັນຂັນເຄື່ອນຂອງມາເລເຊຍ; ແລະ ເຊື່ອໝັ້ນວ່າ ພາຍໃຕ້ການຊີ້ນຳຂອງທ່ານນາຍົກລັດຖະມົນຕີ Anwar Ibrahim, ມາເລເຊຍ ຈະປະຕິບັດຍຸດທະສາດການພັດທະນາຮອບດ້ານໃນໄລຍະໃຫມ່ສຳເລັດຜົນ. ທ່ານເລຂາທິການໃຫຍ່ ໂຕເລີມ ຢັ້ງຢືນ: ຫວຽດນາມ ຖືເປັນສຳຄັນ ແລະໃຫ້ບຸລິມະສິດສູງໃນການຊຸກຍູ້ການພົວພັນກັບ ມາເລເຊຍ.
ສ່ວນທ່ານນາຍົກລັດຖະມົນຕີ Anwar Ibrahim ສະແດງຄວາມປະທັບໃຈຕໍ່ຫນ້າການປ່ຽນແປງຕັ້ງຫນ້າ ແລະ ຮອບດ້ານຂອງ ຫວຽດນາມ ເປັນຕົ້ນແມ່ນການພັດທະນາເສດຖະກິດ ແລະບັນດາຂະແຫນງອຸດສະຫາກຳສຳຄັນ ແລະເຊື່ອໝັ້ນວ່າ ພາຍໃຕ້ການຊີ້ນຳຂອງພັກ, ລັດ ຫວຽດນາມ ແລະ ທ່ານເລຂາທິການໃຫຍ່ ໂຕເລີມ, ຫວຽດນາມ ຈະປະຕິບັດບັນດາເປົ້າໝາຍພັດທະນາຢ່າງມີໄຊ.
 ການພົບປະສອງຝ່າຍ (ພາບ: VOV) |
ທ່ານເລຂາທິການໃຫຍ່ ໂຕເລີມ ແລະ ທ່ານນາຍົກລັດຖະມົນຕີ Anwar Ibrahim ເຫັນດີ ຍົກການພົວພັນ ຫວຽດນາມ - ມາເລເຊຍ ຂຶ້ນສູ່ລະດັບຄູ່ຮ່ວມມືຍຸດທະສາດຮອບດ້ານ.
ການນຳສອງທ່ານ ຕີລາຄາສູງເລື່ອງສອງປະເທດສົມທົບກັນ ແລະສະຫນັບສະຫນູນເຊິ່ງກັນ ແລະກັນ ຢູ່ບັນດາກົນໄກຫລາຍຝ່າຍເປັນປະຈຳ, ເປັນຕົ້ນແມ່ນ ຢູ່ ອາຊຽນ, ສປຊ, ເຫັນດີນຳກັນເປີດກວ້າງ ແລະເຮັດໃຫ້ການສົມທົບໃນບັນດາບັນຫາສາກົນໃຫ້ເລິກເຊິ່ງຂຶ້ນຕື່ມ.
ໃນຂອບເຂດລາຍການຢ້ຽມຢາມ, ຕອນບ່າຍວັນດຽວກັນ ວັນທີ 21 ພະຈິກ ຕາມເວລາທ້ອງຖິ່ນ, ຢູ່ສຳນັກງານລັດຖະສະພາ ມາເລເຊຍ ຢູ່ ກົວລາ ລຳເບີ, ທ່ານເລຂາທິການໃຫຍ່ ໂຕເລິມ ໄດ້ມີການພົບປະກັບທ່ານປະທານສະພາຕ່ຳ ມາເລເຊຍ Tan Sri Dato` Johari Bin Abdul.
ນະທີ່ນີ້, ທ່ານເລຂາທິການໃຫຍ່ ໂຕເລິມ ແລະ ທ່ານປະທານສະພາຕ່ຳ ມາເລເຊຍ Tan Sri Dato` Johari Bin Abdul ຢັ້ງຢືນວ່າ ຫວຽດນາມ ແລະ ມາເລເຊຍແມ່ນບັນດາຄູ່ຮ່ວມມືເສດຖະກິດສຳຄັນຂອງກັນ, ແບ່ງປັນຫຼາຍຜົນປະໂຫຍດ ແລະ ທັດສະນະທີ່ຄ້າຍຄືກັນກ່ຽວກັບບັນດາບັນຫາພາກພື້ນ ແລະ ສາກົນ