ທາບທາມຄຳເຫັນດ້ານການເມືອງລະຫວ່າງຫວຽດນາມແລະສະຫະພັນລັດເຊຍ
(vovworld)-ທີ່ການທາບທາມຄຳເຫັນດ້ານການເມືອງປະຈຳປີຂັ້ນຮອງລັດຖະມົນຕີການຕ່າງປະເທດລະຫວ່າງຫວຽດນາມ ແລະ ສະຫະພັນລັດເຊຍໃນວັນທີ 15/10 ຢູ່ ຮ່າໂນ້ຍ, ທ່ານຮອງລັດຖະມົນຕີການຕ່າງປະເທດຫວຽດນາມ ບຸ່ຍແທງເຊີນ ແລະ ຮອງລັດຖະມົນຕີການຕ່າງປະເທດລັດເຊຊ Igor Morgulov ໄດ້ແລກປ່ຽນ, ເປັນເອກະພາບບັນດາມາດຕະການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ໃນທຸກຂົງເຂດ.
ສອງຝ່າຍໄດ້ແລກປ່ຽນ ແລະ ສຳຫລວດກວດຄືນສະພາບການຮ່ວມມືສອງຝ່າຍໃນບັນດາຂົງເຂດ, ຊື່ງລວມມີ: ການເມືອງ ການຕ່າງປະເທດ, ເສດຖະກິດ, ການຄ້າ, ການລົງທຶນ, ວັດທະນະທຳ, ການສຶກສາ - ບຳລຸງສ້າງ, ວິທະຍາສາດເຕັກນິກ, ພະລັງງານ, ນຳ້ມັນອາຍແກສ, ເຫັນດີຊຸກຍູ້ຜັນຂະຫຍາຍບັນດາໂຄງການຮ່ວມມືຈຸດສຸມ,ສືບຕໍ່ສຳເລັດພື້ນຖານນິຕິກຳໃຫ້ແກ່ການຮ່ວມມືສອງຝ່າຍ. ສອງຝ່າຍກໍແລກປ່ຽນຄຳເຫັນກ່ຽວກັບບັນດາບັນຫາສາກົນ, ສະພາບການອາຊີ ປາຊີຟີກ ແລະ ບັນດາບັນຫາອື່ນ ທີ່ຕ່າງຝ່າຍຕ່າງມີຄວາມສົນໃຈ, ເຫັນດີສືບຕໍ່ຮັກສາມູນເຊື້ອແຫ່ງການປະສານສົມທົບຢ່າງດີງາມລະຫວ່າງສອງປະເທດ, ເພື່ອປົກປ້ອງສິດຜົນປະໂຫຍດຂອງສອງຝ່າຍໃນເວທີສາກົນ.