ໂດຍໄດ້ຮັບຄຳເຊີນຈາກທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ, ຕອນເຊົ້າວັນທີ 13 ພະຈິກ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ ພັນລະຍາໄດ້ເດີນທາງອອກຈາກຮ່າໂນ້ຍ, ໄປເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 33 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງຢູ່ສິງກະໂປ. ຮ່ວມເດີນທາງໄປໃນຄັ້ງນີ້ທ່ານນາຍົກລັດຖະມົນຕີ ຫງວຽນຊວນຟຸກ ຍັງມີທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຟ້າມບິ່ງມິງ ແລະ ເຈົ້າໜ້າທີ່ລັດຖະບານຫຼາຍທ່ານ.

        ກອງປະຊຸມສຸດຍອດ ອາຊຽນ ຄັ້ງທີ 33 ໄດ້ຈັດຕັ້ງໃນວັນທີ 11 – 15 ພະຈິກ 2018 ແມ່ນກອງປະຊຸມສຸດຍອດຄັ້ງທີ 2 ໃນປີ 2018 ໃນອາຍຸການ ສິງກະໂປ ເປັນປະທານອາຊຽນ. ດ້ວຍຫົວຂໍ້ “ສ້າງ ອາຊຽນ ໃຫ້ມີຄວາມເຂັ້ມແຂງດ້ວຍຕົນເອງ ແລະ ມີຫົວຄິດປະດິດສ້າງ”, ບັນດາການນຳ ອາຊຽນ ຈະແລກປ່ຽນກ່ຽວກັບບັນດາມາດຕະການຊຸກຍູ້ການຮ່ວມມືລະຫວ່າງ ບັນດາຝ່າຍ, ໃນນັ້ນມີການເພີ່ມທະວີການຮ່ວມມືເສດຖະກິດ, ການລົງທຶນ, ການຄ້າ, ພັດທະນາພື້ນຖານໂຄງລ່າງ, ເພີ່ມທະວີການເຊື່ອມຕໍ່, ການຮ່ວມມືຮັບມືກັບການຜັນແປຂອງເສດຖະກິດໂລກ, ປັບຕົວໃຫ້ເຂົ້າກັບການປະຕິວັດອຸດສາຫະກຳ 4.0…

        ເພື່ອກະກຽມໃຫ້ແກ່ບັນດາກອງປະຊຸມສຸດຍອດອາຊຽນ ຄັ້ງທີ 33, ປະເທດປະທານ ອາຊຽນ ສິງກະໂປ ໄດ້ສົມທົບກັບບັນດາປະເທດສະມາຊິກ ແລະ ບັນດາອົງການຂອງ ອາຊຽນ ຕັ້ງໜ້າດຳເນີນວຽກງານກະກຽມທຸກດ້ານໃນຕະຫຼອດປີ 2018.