ພາບປະກອບ
(vovworld) – ຕອນເຊົ້າວັນທີ 7/3, ຢູ່ ຮ່າໂນ້ຍ, ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ຈັດຕັ້ງກອງປະຊຸມໂດຍກົງທາງເຄືອຂ່າຍອິນເຕີແນດ ເພື່ອຮັບເອົາຄຳເຫັນປະກອບໃສ່ຮ່າງລັດຖະທຳມະນູນປີ 1992 ສະບັບປັບປຸງ ແລະ ຜັນຂະຫຍາຍແຜນການຈັດຕັ້ງຮັບເອົາຄຳເຫັນໃສ່ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ). ກ່າວຄຳເຫັນຢູ່ທີ່ນີ້, ທ່ານ ຮວີ່ນວິ້ງອ໋າຍ (Huynh Vinh Ai) ຮອງລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ, ໃຫ້ຮູ້ວ່າ, ຄຳເຫັນສ່ວນຫຼາຍທີ່ກອງປະຊຸມໄດ້ຖືວ່າຮ່າງລັດຖະທຳມະນູນໄດ້ຮັບປະກັນຫັນທັດສະນະຂອງພັກໃນໂຄງການການເມືອງ ກໍ່ຄືເອກະສານກອງປະຊຸມໃຫຍ່ພັກຊຸດທີ 11 ກ່ຽວກັບການປັບປຸງລັດຖະທຳມະນູນປີ 1992 ເປັນລະອຽດ. ທ່ານ ເລວັນຢູຍ, ຮອງຫົວໜ້າຫ້ອງການອົງການຕາງໜ້າຂອງກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ, ປະກອບຄຳເຫັນວ່າ:
“ຜ່ານການປຶກສາຫາລື, ບັນດາຄຳເຫັນໃນອົງການຂອງພວກຂ້າພະເຈົ້າ ລ້ວນແຕ່ຢືນຢັນວ່າ ພັກກອມມູນິດຫວຽດນາມ ເປັນກຳລັງນຳພາລັດສັງຄົມແມ່ນຖືກຕ້ອງ ແລະ ຈຳເປັນ. ມາດຕາ 4 ສະແດງຈີນຕະນາການປ່ຽນໃໝ່ຂອງພັກ ຢ່າງເໝາະສົມກັບສະພາບການປະຈຸບັນ, ດັ່ງນັ້ນບັນດາຜູ້ແທນຖືວ່າ, ການເພີ່ມມາດຕານີ້ແມ່ນມີຄວາມຈຳເປັນ. ບັນຫາວາງອອກແມ່ນຄວນເຮັດແຈ້ງກົນໄກໃດເພື່ອໃຫ້ປະຊາຊົນຕິດຕາມກວດກາການເຄື່ອນໄຫວຕ່າງໆຂອງການນຳພັກ ແລະ ກົນໄກໃດເພື່ອໃຫ້ພັກຮັບຜິດຊອບໜ້າທີ່ຕໍ່ປະຊາຊົນກ່ຽວກັບຂໍ້ຕົກລົງຂອງຕົນ“
ຄະນະກຳມະການຮຽບຮຽງລັດຖະທຳມະນູນປີ 1992 ສະບັບປັບປຸງ ຫາກໍ່ປະກາດເອກະສານກ່ຽວກັບການສືບຕໍ່ຜັນຂະຫຍາຍມະຕິຂອງສະພາແຫ່ງຊາດກ່ຽວກັບການຮັບເອົາຄຳເຫັນຂອງປະຊາຊົນໃສ່ຮ່າງລັດຖະທຳມະນູນປີ 1992 ສະບັບປັບປຸງ ເລີ່ມປະຕິບັດແຕ່ວັນທີ 02/02/2013 ຮອດວັນທີ 31/03/2013. ແລະ ພາຍຫລັງວັນທີ 31/03/2013 ຮອດວັນທີ 30/09/2013, ກ່ອນທີ່ຮ່າງລັດຖະທຳມະນູນປີ 1992 ສະບັບປັບປຸງ ຖືກຍື່ນສະເຫນີຕໍ່ສະພາແຫ່ງຊາດຮັບຮອງເອົາ, ປະຊາຊົນຍັງຄົງສືບຕໍ່ປະກອບຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງໄດ້.
ໃນ 2 ເດືອນກວ່າຜ່ານມາ, ມີຫລາຍອົງການ, ຫົວຫນ່ວຍ, ອົງການຈັດຕັ້ງໃນທົ່ວປະເທດໄດ້ຈັດຕັ້ງການຮັບເອົາຄຳເຫັນຈາກປະຊາຊົນໃສ່ຮ່າງລັດຖະທຳມະນູນປີ 1992 ສະບັບປັບປຸງ. ຢູ່ນະຄອນ ເກີນເທີ ໄດ້ຜັນຂະຫຍາຍປະຕິບັດການຮັບເອົາຄຳເຫັນຂອງພະນັກງານ, ສະມາຊິກພັກ ແລະ ປະຊາຊົນ ໃສ່ ຮ່າງລັດຖະທຳມະນູນປີ 1992 ສະບັບປັບປຸງ. ທີ່ກອງປະຊຸມຮັບເອົາຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງຈັດຂຶ້ນຫວ່າງແລ້ວນີ້ ຢູ່ ນະຄອນ ເກີນເທີ, ບັນດາຜູ້ແທນລ້ວນແຕ່ເຫັນດີເຫັນພ້ອມ ແລະ ເປັນເອກະພາບສູງຕໍ່ເລື່ອງຈຳເປັນຕ້ອງປັບປຸງຮ່າງລັດຖະທຳມະນູນປີ 1992 ເພື່ອສອດຄ່ອງກັບສະພາບການໃຫມ່ ແລະ ເປັນເຈົ້າການໃນການເຊື່ອມໂຍງເຂົ້າກັບສາກົນ. ຢູ່ແຂວງ ບີ່ງເຢືອງ ກໍໄດ້ກຳນົດວ່າ: ເລື່ອງຮັບເອົາຄຳເຫັນຂອງປະຊາຊົນໃສ່ຮ່າງລັດຖະທຳມະນູນປີ 1992 ສະບັບປັບປຸງແມ່ນຫນຶ່ງໃນບັນດາຫນ້າທີ່ສຳຄັນ, ແມ່ນບັ້ນດຳເນີນຊີວິດການເມືອງຢ່າງເລິກເຊິ່ງ, ກວ້າງຂວາງໃນໝູ່ພະນັກງານ, ສະມາຊິກພັກ ແລະ ໝູ່ມະຫາຊົນ. ທ່ານ ຫງວຽນແທ້ງ ຢູ່ ແຂວງ ບິ່ງເຢືອງ ສະແດງຄວາມເຫັນດີເຫັນພ້ອມ ສະຫນັບສະຫນູນ ແລະ ຕີລາຄາສູງການປັບປຸງລັດຖະທຳມະນູນປີ 1992.
“ຮ່າງລັດຖະທຳມະນູນປີ 1992 ໄດ້ເສີມຂະຫຍາຍຢ່າງມີປະສິດທິຜົນແລ້ວ ແມ່ນພື້ນຖານຄຸ້ມຄອງປະເທດຊາດ, ນຳປະເທດຊາດກ້າວຂຶ້ນ. ປະຈຸບັນ ໃນໄລຍະເຊື່ອມໂຍງເຂົ້າກັບສາກົນ ພ້ອມທັງດຶງດູດການລົງທຶນຈາກຕ່າງປະເທດ, ເພື່ອຄຸ້ມຄອງປະເທດຊາດໃຫ້ເໝາະສົມກັບທ່າອ່ຽງໃຫມ່, ເລື່ອງປັບປຸງລັດຖະທຳມະນູນແມ່ນມີຄວາມ ຈຳເປັນທີ່ສຸດ.”
 |
ກ່ຽວຂ້ອງເຖິງການປະກອບຄຳເຫັນປັບປຸງລັດຖະທຳມະນູນປີ 1992, ຕອນເຊົ້າວັນທີ 7/3 ຢູ່ ຮ່າໂນ້ຍ ຄະນະກຳມະການຊົນເຜົ່າໄດ້ຈັດຕັ້ງ ກອງປະຊຸມສຳມະນາຮັບເອົາຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງ ດ້ວຍເນື້ອໃນຈຸດສຸມແມ່ນບັນຫາຊົນເຜົ່າ ແລະ ວຽກງານຊົນເຜົ່າ. ບັນດາຄຳເຫັນທີ່ກອງປະຊຸມສຳມະນາ ລ້ວນແຕ່ຮັບຮູ້ວ່າ: ຮ່າງ ລັດຖະທຳມະນູນປີ 1992 ສະບັບປັບປຸງຄັ້ງນີ້ ໄດ້ເປີດກວ້າງ, ສະແດງໃຫ້ເຫັນບັນຫາຊົນເຜົ່າຫລາຍກວ່າ ໃນລະດັບກໍແຕກຕ່າງກັນ, ສ່ອງແສງບັນຫາຊົນເຜົ່າຢ່າງຮອບດ້ານ ແລະ ຄົບຖ້ວນພໍສົມຄວນ. ເຖິງຢ່າງໃດກໍຕາມ, ຮ່າງ ລັດຖະທຳມະນູນປີ 1992 ສະບັບປັບປຸງຄັ້ງນີ້ ຄວນກຳນົດຢ່າງຈະແຈ້ງທີ່ຕັ້ງບົດບາດຍຸດທະສາດຂອງບັນຫາຊົນເຜົ່າ ແລະ ຄວາມສາມັກຄີລະຫວ່າງບັນດາເຜົ່າ, ສິດ ແລະ ພັນທະຢ່າງສະເຫມີພາບຂອງບັນດາເຜົ່າ, ຫລັກການ, ນະໂຍບາຍແກ້ໄຂບັນຫາຊົນເຜົ່າກໍຄືເສີມຂະຫຍາຍກຳລັງແຮງພາຍໃນຂອງບັນດາເຜົ່າ. ກ່ຽວກັບນະໂຍບາຍຊົນເຜົ່າ, ທ່ານ ຫລຸ່ວັນແກວ ອະດີດຮອງຫົວຫນ້າຄະນະກຳມະການຊົນເຜົ່າ ກ່າວວ່າ:
“ຂ້າພະເຈົ້າສະເຫນີວ່າ ຄວນກຳນົດ ບັນດາຊົນເຜົ່າໃນມະຫາຄອບຄົວຊົນເຜົ່າ ຫວຽດນາມ ຕ້ອງມີຄວາມສະເຫມີພາບ, ສາມັກຄີ, ເຄົາລົບ, ຊ່ວຍເຫລືອກັນພັດທະນາກ້າວຫນ້າ. ບັນດາຫລັກການທີ່ເປັນພື້ນຖານນັ້ນ ຕ້ອງສະແດງໃນນະໂຍບາຍຊົນເຜົ່າຂອງພັກ ແລະ ລັດ, ຮຽກຮ້ອງໃຫ້ທຸກຄົນຕ້ອງປະຕິບັດເປັນຢ່າງດີ.”