(vovworld) - ໃນຂອບເຂດການຢ້ຽມຢາມ ແລະ ເຮັດວຽກຢູ່ລາວໃນລະຫວ່າງວັນທີ 24 – 30/03, ຕອນບ່າຍວັນທີ 25/03, ຢູ່ນະຄອນຫຼວງວຽງຈັນ, ຄະນະຜູ້ແທນສະມາຄົມນັກຂ່າວຫວຽດນາມ ໂດຍທ່ານ ມ້າຢ້ຽວເກືອງ, ຮອງປະທານສະມາຄົມນັກຂ່າວຫວຽດນາມ, ປະທານສະມາຄົມນັກຂ່າວນະຄອນໂຮ່ຈິມິນ ນຳໜ້າ ໄດ້ມີການເຮັດວຽກກັບທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ. ທ່ານ ມ້າຢ້ຽວເກືອງ ໄດ້ແຈ້ງໃຫ້ຊາບໝາກຜົນການເຈລະຈາກັບສະມາຄົມນັກຂ່າວລາວ ກ່ຽວກັບການຮ່ວມມືໃນປີ 2012 ຜ່ານມາ ແລະ ເນັ້ນໜັກວ່າ: ສະມາຄົມນັກຂ່າວຂອງ 2 ປະເທດ ໄດ້ສົມທົບກັນບຳລຸງສ້າງຍົກສູງວິຊາຊີບດ້ານຂ່າວສານເປັນປະຈຳ, ສົມທົບກັນໂຄສະນາບັນດາເຫດການຄືປີມິດຕະພາບຫວຽດນາມ - ລາວ ແລະ ບັນດາວັນບຸນໃຫຍ່ຂອງ 2 ປະເທດຢ່າງມີປະສິດທິຜົນ, ປະກອບສ່ວນປົກປັກຮັກສາ ແລະ ພັດທະນາສາຍພົວພັນແບບພິເສດລະຫວ່າງຫວຽດນາມ - ລາວ. ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ ໄດ້ຂອບອົກຂອບໃຈຕໍ່ການຊ່ວຍເຫຼືອຂອງສະມາຄົມນັກຂ່າວຫວຽດນາມ ທີ່ມີຕໍ່ສະມາຄົມນັກຂ່າວລາວ ຢ່າງມີປະສິດທິຜົນ, ພ້ອມທັງສະເໜີໃຫ້ 2 ຝ່າຍຈິ່ງເພີ່ມທະວີການໜູນຊ່ວຍຍົກສູງວິຊາຊີບ, ບຳລຸງສ້າງ, ສຶກສາລຸນໜຸ່ມກ່ຽວກັບສາຍພົວພັນແບບພິເສດລະຫວ່າງຫວຽດນາມ - ລາວ; ເປີດກ້ວາງຮູບແບບການແລກປ່ຽນຢ່າງຮອບດ້ານ ແຕ່ຂັ້ນສູນກາງລົງຮອດຂັ້ນທ້ອງຖິ່ນ, ໂດຍສະເພາະແມ່ນບັນດາແຂວງມີເສັ້ນຊາຍແດນຮ່ວມ ເພື່ອການຮ່ວມມືລະຫວ່າງຫວຽດນາມ - ລາວ ໃຫ້ມີຄວາມສະດວກ ແລະ ມີປະສິດທິຜົນກວ່າເກົ່າ.