(vovworld) - ຫວຽດນາມ-ຈີນສືບຕໍ່ຊຸກຍູ້ການພົວພັນຮ່ວມມືຮອບດ້ານໃນທຸກຂົງເຂດ. ນີ້ແມ່ນຄຳຢືນຢັນຂອງທ່ານນາຍົກລັດຖະມົນຕີ ຫງວຽນຊວຍຟຸກ ໃນການຕ້ອນຮັບທ່ານເອກອັກຄະລັດຖະທູດຈີນ ປະຈຳຫວຽດນາມ ໂຄງແຊ໋ວຢູງ ໃນວັນທີ 17/08. ໂດຍລະອຽດແມ່ນ, ຕາມທ່ານນາຍົກລັດຖະມົນຕີແລ້ວ, 2 ປະເທດຄວນສືບຕໍ່ຊຸກຍູ້ການຮ່ວມມືໃນຂົງເຂດການຄ້າ, ການລົງທຶນ ແລະ ບັນດາຂົງເຂດທີ່ມີທ່າແຮງຂອງແຕ່ລະປະເທດ; ພ້ອມທັງສືບຕໍ່ຍູ້ແຮງການຮ່ວມມືລະຫວ່າງໄວໜຸ່ມ, ຊາວໜຸ່ມ 2 ປະເທດ ເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງປະຊາຊົນ 2 ປະເທດ. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ທ່ານເອກອັກຄະລັດຖະທູດ ສົ່ງເສີມການເຄື່ອນໄຫວຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖິ່ນຕ່າງຂອງຈີນ ກັບຫວຽດນາມ ເພື່ອຜັນຂະຫຍາຍບັນດາເນື້ອໃນເຊິ່ງ 2 ຝ່າຍໄດ້ຕົກລົງກັນແລ້ວຢ່າງມີປະສິດທິຜົນ… ຕໍ່ໜ້າບັນດາການຜັນແປຢ່າງສັບສົນບົນທະເລຫວ່າງມໍ່ໆມານີ້, ທ່ານນາຍົກລັດຖະມົນຕີຖືວ່າ, 2 ຝ່າຍຕ້ອງປະຕິບັດຄວາມຮັບຮູ້ລວມຂອງການນຳຂັ້ນສູງ 2 ພັກ, 2 ລັດ, “ຂໍ້ຕົກລົງກ່ຽວກັບບັນດາຫຼັການພື້ນຖານຊີ້ນຳການແກ້ໄຂບັນດາບັນຫາບົນທະເລຫວຽດນາມ - ຈີນ” ຢ່າງເຂັ້ມງວດ; ຢືດໝັ້ນແກ້ໄຂການຂັດແຍ້ງກັນໂດຍສັນຕິວິທີ, ເໝາະສົມກັບກັົດໝາຍສາກົນ, ໃນນັ້ນມິສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982; ຄວບຄຸມຄວາມບໍ່ລົງລອຍກັນ, ບໍ່ປະໃຫ້ມີການກະທຳ ໃດໆທີ່ເຮັດໃຫ້ສະພາບການສັບສົນຂຶ້ນຕື່ມ; ເປີດກວ້າງການຂັດແຍ້ງກັນຢູ່ທະເລຕາເວັນອອກ; ພ້ອມກັບບັນດາປະເທດອາຊຽນ ປະຕິບັດ ຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ; ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ.
ສ່ວນທ່ານເອກອັກຄະລັດຖະທູດ ໂຄງແຊ໋ວຢູງ ຊີ້ແຈ້ງວ່າ, ພັກ ແລະ ລັດຈີນ ຍາມໃດກໍ່ປາດຖະໜາຢາກສືບຕໍ່ຍູ້ແຮງການພົວພັນລະຫວ່າງຫວຽດນາມ - ຈີນ ໃນທຸກຂົງເຂດກວ່າອີກ, ໂດຍສະເພາະແມ່ນໃນສະພາບການພົວພັນສາກົນ ແລະ ພາກພື້ນມີການຜັນແປຢ່າງສັບສົນ. ກ່ຽວກັບບັນຫາທະເລຕາເວັນອອກ, ທ່ານເອກອັກຄະລັດຖະທູດ ໂຄງແຊ໋ວຢູງ ປາດຖະໜາວ່າ 2 ຝ່າຍຈະຄວບຄຸມຄວາມບໍ່ລົງລອຍກັນກ່ຽວກັບບັນດາບັນຫາຢູ່ທະເລໃຫ້ເປັນຢ່າງດີ; ຄວບຄຸມຂໍ້ມູນຂ່າວສານໃຫ້ເປັນຢ່າງດີ; ບໍ່ປະໃຫ້ບັນດາບັນຫາດັ່ງກ່າວສົ່ງຜົນສະຖ້ອນເຖິງການພົວພັນລວມທີ່ເປັນມູນເຊື້ອລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ.