ຫວຽດນາມຮຽກຮ້ອງການລົງທຶນຈາກບັນດາວິສາຫະກິດຕຳ່ແຜ່ນຕັດຫຍິບອິນເດຍ
ກອງປະຊຸມຊຸກຍູ້ການລົງທຶນສຳລັບບັນດາບໍລິສັດຕຳ່ແຜ່ນ
ຕັດຫຍິບພາກເໜືອ ອິນເດຍ
(ພາບ: Huy Binh - TTXVN)
|
(vovworld) – ກອງປະຊຸມຊຸກຍູ້ການລົງທຶນສຳລັບບັນດາບໍລິສັດຕຳ່ແຜ່ນຕັດຫຍິບພາກເໜືອ ອິນເດຍ ຫາກໍ່ໄດ້ດຳເນີນໄປຢູ່ Ludhiana, ລັດ Punjab ຂອງ ອິນເດຍ. ນີ້ແມ່ນໜຶ່ງໃນບັນດາການເຄື່ອນໄຫວສົ່ງເສີມການຄ້າໂດຍສະຖານທູດ ຫວຽດນາມ ປະຈຳ ອິນເດຍ ສົມທົບກັບທະນາຄານ Eximbank ອິນເດຍ ຈັດຕັ້ງເພື່ອແນໃສ່ຊຸກຍູ້ການລົງທຶນຂອງ ອິນເດຍ ເຂົ້າຂົງເຂດຕຳ່ແຜ່ນຕັດຫຍິບ ຢູ່ ຫວຽດນາມ. ເຂົ້າຮ່ວມກອງປະຊຸມມີຜູ້ຕາງໜ້າຂອງວິສາຫະກິດ 30 ແຫ່ງເຊິ່ງແມ່ນສະມາຊິກຂອງສະຫະສະມາຄົມບັນດາໂຮງງານຕຳ່ແຜ່ນຕັດຫຍິບພາກເໜືອ ອິນເດຍ , ໃນນັ້ນມີວິສາຫະກິດໃຫຍ່ຫຼາຍແຫ່ງ. ກອງປະຊຸມຄັ້ງນີ້ມີເນື້ອໃນສົ່ງເສີມການລົງທຶນເຂົ້າບັນດາປະເທດຄື: ກຳປູເຈຍ, ລາວ, ມຽນມາ ແລະ ຫວຽດນາມ, ດ້ວຍຈຸດສຸມແມ່ນຮຽກຮ້ອງການລົງທຶນເຂົ້າຕະຫຼາດຕຳ່ແຜ່ນຕັດຫຍິບ ຫວຍດນາມ. ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ຫວຽດນາມ ປະຈຳ ອິນເດຍ ໂຕນຊີງແທ່ງ ໄດ້ຊີ້ແຈ້ງກາລະໂອກາດເມື່ອ ຫວຽດນາມ ເຂົ້າຮ່ວມສັນຍາຄູ່ຮ່ວມມືຂ້າມ ປາຊີຟິກ (TPP), ບັນດາວິສາຫະກິດ ຕຳ່ແຜ່ນຕັດຫຍິບ ອິນເດຍອາດຈະຜ່ານການລົງທຶນ, ຜະລິດຢູ່ ຫວຽດນາມ ເພື່ອສົ່ງເຄື່ອງຕຳແຜ່ນຕັດຫຍິບ ໄປຍັງບັນດາຕະຫຼາດແຖວໜ້າຂອງໂລກຄື ອາເມລິກາ, ຍີ່ປຸ່ນ ດ້ວຍອັດຕາພາສີແມ່ນ 0%. ບໍ່ພຽງແຕ່ເທົ່ານັ້ນ, ສັນຍາການຄ້າເສລີບາງສະບັບເຊິ່ງ ຫວຽດນາມ ໄດ້ລົງນາມແລ້ວ ແລະ ພວມເຈລະຈາຈະເປີດກາລະໂອກາດໃຫ້ແກ່ສິນຄ້າຕຳ່ແຜ່ນຕັດຫຍິບເຂົ້າບັນດາຕະຫຼາດແຖວໜ້າຂອງໂລກຄື: ສະຫະພາບເອີລົບ (EU) ແລະ ການາດາ. ທ່ານເອກອັກຄະລັດຖະທູດ ໂຕນຊີງແທ່ງ ຮຽກຮ້ອງໃຫ້ບັນດາວິສາຫະກິດ ອິນເດຍ ຕັ້ງໜ້າລົງທຶນເຂົ້າການຜະລິດຝ້າຍ, ຕຳ່ແຜ່ນຕັດຫຍິບ ແລະ ອຸດສາຫະກຳໜູນຊ່ວຍຂະແໜງຕຳ່ແຜ່ນຕັດຫຍິບ ຢູ່ ຫວຽດນາມ.