ຫວຽດນາມ-ເວເນຊູເອລາ ເປີດກ້ວາງການຮ່ວມມືໃນຫຼາຍຂົງເຂດ
ທ່ານຮອງນາຍົກລັດຖະມົນຕີ ຮ່ວາງຈຸງຫາຍ
ຕ້ອນຮັບທ່ານຮອງປະທານາທິບໍດີ ເວເນຊູເອລາ
(ພາບ: Chinhphu.vn)
(vovworld) – ວັນທີ 11/3, ທ່ານຮອງນາຍົກລັດຖະມົນຕີ ຫວຽດນາມ ຮ່ວາງຈຸງຫາຍ ໄດ້ໃຫ້ການຕ້ອນຮັບທ່ານຮອງປະທານາທິບໍດີ ເວເນຊູເອລາ Elias Joes Jaua Milano ທີ່ພວມຢູ່ຢ້ຽມຢາມ ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຫວຽດນາມ ຮ່ວາງຈຸງຫາຍ ໄດ້ສະແດງຄວາມພາກພູມໃຈເມື່ອ 2 ຝ່າຍເປັນເອກະພາບນຳກັນຕໍ່ແຜນການເປີດກ້ວາງການພົວພັນຮ່ວມມືໃນບັນດາຂົງເຂດອື່ນໆທີ່ເໝາະສົມກັບຄວາມຕ້ອງການ ແລະ ທ່າແຮງຂອງແຕ່ລະປະເທດໃນໄລຍະຈະມາເຖິງ, ພິເສດແມ່ນກ່ຽວກັບພະລັງງານນ້ຳມັນອາຍແກັດ, ກະສິກຳ-ປ່າໄມ້-ສິນໃນນ້ຳ, ອຸດສາຫະກຳປະດິດສ້າງ ແລະ ຜະລິດສິນຄ້າໃຊ້ສອຍ. ເມື່ອເນັ້ນໜັກເຖິງຄວາມສາມາດບົ່ມຊ້ອນພັດທະນາກະສິກຳຂອງ ເວເນຊູເອລາ, ທ່ານຮອງນາຍົກລັດຖະມົນຕີ ຮ່ວາງຈຸງຫາຍ ຢືນຢັນຄຳໝັ້ນສັນຍາຂອງ ຫວຽດນາມ ວ່າ: ຫວຽດນາມ ຈະສືບຕໍ່ຮ່ວມມືດ້ານກະສິກຳ ກັບ ເວເນຊູເອລາ. ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຈະແມ່ນຂອດແລກປ່ຽນບັນດາມາດຕະການທີ່ລະອຽດກັບອົງການທີ່ກ່ຽວຂ້ອງຂອງ ເວເນຊູເອລາ. ທ່ານຮອງປະທານາທິບໍດີ Elias Joes Jaua Milano ໄດ້ສົ່ງສານຂອງທ່ານປະທານາທິບໍດີ ເວເນຊູເອລາ ກ່ຽວກັບນ້ຳໃຈສາມັກຄີ, ການຮ່ວມມື 2 ປະເທດ; ແລະ ປາດຖະໜາວ່າ 2 ຝ່າຍເພີ່ມທະວີໃນບັນດາຂົງເຂດການຮ່ວມມືທີ່ມີຢູ່ແລ້ວ ແລະ ແກ້ໄຂບັນດາດ້ານທີ່ຍັງຫຍຸ້ງຍາກ ເພື່ອເປີດກ້ວາງບັນດາຂົງເຂດຮ່ວມມືໃໝ່.