ຢູ່ນະຄອນດາຫຼາດ, ແຂວງເລີມດົງຊຶ່ງແມ່ນດິນແດນແຫ່ງມວນມາລາຫຼາກຫຼາຍ ສີສັນ, ເມື່ອນ້ຳໝອກລົງມາຍາມຄ່ຳຄືນ, ຜູ້ຄົນໄປມາຢູ່ຕາມທ້ອງຖະໜົນຄ່ອຍຫຼຸດໜ້ອຍລົງນັ້ນ, ແຕ່ກໍມີແຫ່ງໜຶ່ງພັດຟົດຟື້ນມ່ວນຊື່ນຂຶ້ນ, ນັ້ນແມ່ນຕະຫຼາດມືດດາຫຼາດ. ແຕ່ດົນນານມາແລ້ວ, ແຂກທ່ອງທ່ຽວເມື່ອມາຢ້ຽມຢາມດາຫຼາດ, ກໍມັກໄປຕະຫຼາດມືດດາຫຼາດທີ່ສຸດ. ເຂົາເຈົ້າໄປ ຕະຫຼາດມືດດາຫຼາດບໍ່ພຽງແຕ່ເພື່ອຊື້ຂອງທີ່ລະນຶກເທົ່ານັ້ນ, ຫາກຍັງແມ່ນໂອກາດເພື່ອໄດ້ຊອກຮູ້ກ່ຽວກັບຈຸດວັດທະນະທຳຂອງຊາວທ້ອງຖິ່ນ.
ຕະຫຼາດມືດ, ຈຸດວັດທະນະທຳເຂດພູພຽງ
(baolamdong)
|
ເດີນຕາມເສັ້ນທາງພາໄປເຖິງໃຈກາງນະຄອນດາຫຼາດ, ຜ່ານຂົວຕັ້ງຂ້າມໜອງ ຊວນເຮືອງ ທີ່ສວຍງາມດັ່ງໃນຝັນ ແລະ ຖະໜົນ ຫງວຽນທິມິນຄາຍ ທີ່ແຈ້ງສະຫວ່າງດ້ວຍລະບົບໄຟເຍື່ອງທາງ ກໍຈະຮອດຄຸ້ມຕະຫຼາດມືດດາຫຼາດທີ່ພວມຄຶກຄື້ນມ່ວນຊື່ນ. ເມື່ອເຂົ້າມາຕະຫຼາດແຫ່ງນີ້, ເຫັນວ່າບໍ່ມີໃຜໄປຄົນດຽວ, ສ່ວນຫຼາຍມັກໄປເປັນຄູ່, ເປັນກຸ່ມປະມານ 5-6 ຄົນ. ເຂົາເຈົ້າມາຕະຫຼາດແຫ່ງນີ້, ສ່ວນຫຼາຍມັກຊອກຊື້ເຄື່ອງນຸ່ງ, ພືກຜັກ, ດອກໄມ້ຊະນິດຕ່າງໆ, ຫຼືກິນອາຫານຄ່ຳ, ບໍ່ວ່າເຍື່ອງໃດກໍມີລົດຊາດພິເສດສະເພາະຂອງໃຜຂອງມັນ. ນາງ ຮ່າຢ້ຽມມີ ຢູ່ເມືອງ ຖູດຶກ, ນະຄອນໂຮ່ຈິມິນ ພ້ອມດ້ວຍຄອບຄົວໄປທ່ອງທ່ຽວຢູ່ດາຫຼາດໃນຍາມພັກການທ້າຍອາທິດ ໃຫ້ຮູ້ວ່າ :
“ ແຕ່ລະເທື່ອເມື່ອມາຢ້ຽມຢາມດາຫຼາດ, ຂ້າພະເຈົ້າກໍລ້ວນແຕ່ໄດ້ໄປ ຕະຫຼາດມືດດາຫຼາດ, ເພາະມັນມີອັນໃດອັນໜຶ່ງທີ່ເປັນເອກະລັກສະເພາະຂອງນະຄອນດາຫຼາດ. ມາຕະຫຼາດແຫ່ງນີ້, ຂ້າພະເຈົ້າມັກຊື້ເຄື່ອງທີ່ລະນຶກ. ແລ້ວກໍມັກຊື້ພືດຜັດ, ດອກໄມ້ເມືອເປັນຂອງຕ້ອນໝູ່ເພື່ອນ ແລະ ຍາດຕິພີນ້ອງໃນຄອບຄົວ ”
ສ່ວນທ້າວ ຝ້າມບິກຢີ ແຂກທ່ອງທ່ຽວມາຈາກນະຄອນໂຮ່ຈິມິນ ເປີດເຜີຍວ່າ :
“ ນ້ອງມາທ່ອງທ່ຽວຢູ່ດາຫຼາດເປັນເທື່ອທີ 4 ແລ້ວ, ເມື່ອມາດາຫຼາດແຕ່ລະເທື່ອ, ນ້ອງກໍມີຄວາມຮູ້ສຶກປະທັບໃຈ ແລະ ມີສິ່ງດຶງດູດໃຈເຮົາ. ນອກຈາກເຄື່ອງທີ່ລະນຶກແລ້ວ, ພວກນ້ອງມັກຊື້ອາຫານພິເສດຢູ່ດາຫຼາດຄື : ກວນໝາກໄມ້, ນ້ຳໝາກໄມ້ …”
ເຖິງວ່າແມ່ນເຂດພູພຽງກໍຕາມ, ແຕ່ຕະຫຼາດມືດດາຫຼາດກໍຍັງດຶງດູດແຂກທ່ອງທ່ຽວຍ້ອນມີບັນດາເຍື່ອງອາຫານທະເລ. ອາຫານທະເລຢູ່ນີ້ໄດ້ຮັບການປຸງແຕ່ງເປັນຫຼາຍເຍື່ອງທີ່ອຸດົມສົມບູນ, ລາຄາກໍເໝາະສົມ ແລະ ແຊບທີ່ສຸດ. ອ້ານຫງວຽນດຶກຕີງ ແຂກທ່ອງທ່ຽວທີ່ມາຈາກແຂວງ ວິ້ງຟຸກ ແບ່ງປັນວ່າ :
“ຕະຫຼາດມືດດາຫຼາດມີຫຼາຍເຍື່ອງອາຫານປະເພດຈຸ່ມທີ່ແຊບທີ່ສຸດ. ນອກຈາກນັ້ນແລ້ວ ກໍຍັງມີບັນດາເຍື່ອງອາຫານຂອງພາກເໜືອ, ພາກກາງ. ອາກາດຢູ່ດາຫຼາດແມ່ນດີທີ່ສຸດ ເຮັດໃຫ້ຄົນເຮົາຮູ້ສຶກສະບາຍໃຈ, ເມື່ອໄດ້ກິນອາຫານປີ້ງຂອງດາຫຼາດກໍເຫັນວ່າ ແຊບທີ່ສຸດ, ສຳລັບເຫຼົ້າ ກໍພິເສດທີ່ສຸດ, ມີຫຼາຍຊະນິດ ”
ສຳລັບສິນຄ້າປະເພດຕ່າງໆຢູ່ ຕະຫຼາດມືດດາຫຼາດກໍມີຫຼາຍຮູບຫຼາຍສີ ແລະ ອຸດົມສົມບູນ, ລາຄາຂາຍກໍເໝາະສົມ, ໂດຍສະເພາະແມ່ນຜູ້ຂາຍເຄື່ອງ ຍາມໃດກໍຮັບໃຊ້ລູກຄ້າຢ່າງສຸດໃຈ. ນີ້ແມ່ນທຸກສິ່ງທີ່ຊາວດາຫຼາດພວມມຸ່ງໄປເຖິງເພື່ອດຶງດູດແຂກທ່ອງທ່ຽວ. ພ້ອມກັນນັ້ນ, ກໍສ້າງເງື່ອນໄຂ, ອຳນວຍຄວາມສະດວກໃຫ້ແກ່ພວກພໍ່ຄ້າ, ແມ່ຄ້າຊາວຂາຍທຳມາຄ້າຂາຍຮັບໃຊ້ແຂກທ່ອງທ່ຽວ. ນີ້ກໍແມ່ນສິ່ງທີ່ອຳນາດການປົກຄອງດາຫຼາດພວມປະຕິບັດເປັນຢ່າງດີທີ່ສຸດ. ນາງ ເລທິຮົ່ງຍຸງ ເຈົ້າຂອງຮ້ານຄ້າ ເຮືອນເລກທີ 35 A ຖະໜົນຫງວຽທີມິນຄາຍ ໃນຄຸ້ມ ຕະຫຼາດມືດດາຫຼາດ ໃຫ້ຮູ້ວ່າ :
“ ທາງອຳນາດການປົກຄອງ, ຍາມໃດກໍຫນູນຊ່ວຍ, ສົ່ງເສີມຂາວທ້ອງຖິ່ນຂາຍເຄື່ອງທີ່ມີຄຸນນະພາບ, ເປີດກ້ວາງປະເພດສິນຄ້າໃຫ້ອຸດົມສົມບູນ. ຂ້າພະເຈົ້າຂາຍສິນຄ້າບັນດາປະເພດພິເສດຂອງດາຫຼາດເຊັ່ນ: ພືດຜັກ, ໝາກໄມ້, ກວນໝາກໄມ້, ກາເຟ, ຊາ ອາຕີໂຊ… ສິນຄ້າທັງໝົດນັ້ນ ກໍລ້ວນແຕ່ຖືກຜະລິດຢູ່ທ້ອງຖິ່ນ. ໂດຍເປັນປົກກະຕິແລ້ວ, ແຂກທ່ອງທ່ຽວສ່ວນຫຼາຍມັກໄປຕະຫຼາດມືດດາຫຼາດຍາມຄ່ຳຄືນ, ສ່ວນຊາວດາຫຼາດ ກໍໄປຕະຫຼາດແຫ່ງນີ້ໃນທຸກເວລາ”
ໂດຍໄດ້ຮັບໃຊ້ທຸກໆວັນໃນອາທິດ, ຕະຫຼາດມືດດາຫຼາດນັບມື້ນັບດຶງດູດແຂກທ່ອງທ່ຽວເຂົ້າມາຢ່າງຫຼວງຫຼາຍ. ໄປ ຕະຫຼາດມືດດາຫຼາດ ບໍ່ພຽງແຕ່ເພື່ອຍ່າງເລາະຫຼິ້ນ ແລະ ຊື້ເຄື່ອງເທົ່ານັ້ນ, ແຂກທ່ອງທ່ຽວຍັງມີໂອກາດໄດ້ຊິມບັນດາເຍື່ອງອາຫານພິເສດຢູ່ຕະຫຼາດມືດດາຫຼາດອີກດ້ວຍ. ເມື່ອລາອອກຈາກນະຄອນດາຫຼາດ, ເບິ່ງຄືວ່າແຂກທ່ອງທ່ຽວບໍ່ວ່າຄົນໃດກໍລ້ວນແຕ່ໄດ້ຊື້ເອົາເຄື່ອງທີ່ລະນຶກໃຫ້ແກ່ຕົນ. ແຕ່ຄວາມປະທັບໃຈທີ່ສຸດ ແມ່ນຄວາມງາມທາງດ້ານວັດທະນະທຳ, ຈິດໃຈສະໜິດສະໜົມ ຮັກແພງແຂກຂອງປະຊາຊົນຢູ່ດິນແດນແຫ່ງນີ້.