(vovworld)- 50 ກວ່າປີທີ່ຕິດພັນກັບວິທະຍຸກະຈາຍສຽງຫວຽດນາມ, ນັກສິນລະປິນດີເດັ່ນ, ໂຄສົກ Viet Hung ໄດ້ສ້າງຄວາມປະທັບໃຈໃຫ້ແກ່ທ່ານຜູ້ຟັງວິທະຍຸກະຈາຍສຽງຫວຽດນາມ. ໂດຍໄດ້ເປັນຄວາມຊິນເຄີຍແລ້ວ, ແຕ່ລະມື້, ທ່ານຜູ້ຟັງມັກເປີດວິທະຍຸເພື່ອຮັບຟັງສຽງອ່ານທີ່ເຕັມໄປດ້ວຍອາລົມຈິດຂອງທ່ານໃນລາຍການວັນນະຄະດີ ສິລະປະ, ອ່ານເລື່ອງຍາມກາງຄືນ.
( ນັກສິນລະປິນ Viet Hung ພ້ອມກັບເມຍ)
ໃນຊຸມມື້ນີ້, ເຮືອນຫຼັງນ້ອຍໆຂອງຄອບຄົວນັກສິນລະປິນດີເດັ່ນ Viet Hung ມີເພື່ອນມິດ, ເພື່ອນຮ່ວມງານ, ຍາດຕິພີ່ນ້ອງມາແບ່ງປັນຄວາມມ່ວນຊື່ນເປັນຈຳນວນຫຼວງຫຼາຍ. ພາຍຫຼັງເກືອບ 40 ປີແຫ່ງການ ອຸທິດສ່ວນໃຫ້ແກ່ວິທະຍຸກະຈາຍສຽງແຫ່ງຊາດ. ທ່ານເປັນກຽດໄດ້ຮັບ ນາມມະຍົດ ”ນັກສິນລະປິນດີເດັ່ນ” ຈາກລັດ, ໃນໂອກາດສະເຫຼີມ ສະຫຼອງ 122 ປີ ແຫ່ງວັນຄ້າຍວັນເກີດປະທານ Ho Chi Minh ຜ່ານມາ. ເມື່ອໂອ້ລົມກັບເພື່ອນມິດ, ເພື່ອນຮ່ວມງານກ່ຽວກັບອາຊີບຂອງຕົນ, ນັກສິນລະປິນດີເດັ່ນ, ໂຄສົກ Viet Hung ເຄີຍເວົ້າວ່າ, ທ່ານໄດ້ກາຍເປັນໂຄສົກໂດຍບັງເອີນ.
”ເມື່ອເຮັດອາຊີບນີ້, ຂ້າພະເຈົ້າກໍ່ເຊັ່ນດຽວກັບ ບັນດາທ່ານຜູ້ຟັງວິທະຍຸກະຈາຍສຽງໃນໄລຍະສົງຄາມຕ້ານອາເມລິກາກູ້ຊາດ, ແມ່ນ ນິຍົມສຽງອ່ານຂອງບັນດາອາ, ອາວໂຄສົກໃນເວລານັ້ນຫຼາຍ. ດັ່ງນັ້ນຈຶ່ງຢາກເປັນໂຄສົກ. ມີເທື່ອໜຶ່ງມາຢ້ຽມຢາມລຸງ Nguyen Tho, ເມື່ອເຫັນ ຂ້າພະເຈົ້າມັກອາຊີບນີ້, ລຸງໄດ້ໃຫ້ຂ້າພະເຈົ້າອ່ານທົດລອງ. ພາຍຫຼັງຟັງຂ້າພະເຈົ້າອ່ານແລ້ວເອື້ອຍ Tuyet Mai ໂຄສົກຜູ້ມີຊື່ສຽງຂອງວິທະຍຸໄດ້ເວົ້າກັບຂ້າພະເຈົ້າວ່າ, ປະຈຸນັນນ້ອງຢາກເຮັດວຽກຢູ່ວິທະຍຸກະຈາຍສຽງເລີຍບໍ່, ເຖິງວ່າມັກເປັນໂຄສົກຫຼາຍ ແຕ່ຂ້າພະເຈົ້າພັດຕົກລົງສືບຕໍ່ໄປ ຮຽນເພື່ອໃຫ້ຈົບມະຫາວິທະຍາໄລກ່ອນ”.
ເວລານັ້ນ, ນັກສິນລະປິນດີເດັ່ນ Viet Hung ພວມຮຽນມະຫາວິທະຍາໄລ ຄົມມະນາຄົມ ຂົນສົ່ງ. ທ່ານໄດ້ໝັ້ນໝາຍວ່າພາຍຫຼັງຮຽນຈົບຈະເຂົ້າເຮັດວຽກຢູ່ວິທະຍຸກະຈາຍສຽງຫວຽດນາມ, ແຕ່ເມື່ອຮຽນຈົບມະຫາວິທະຍາໄລປີ 1969 ແລ້ວ, ນັກສິນລະປິນດີເດັ່ນ Viet Hung ກໍ່ເຊັ່ນດຽວກັບຊາວໜຸ່ມຫວຽດນາມຜູ້ອື່ນໆຕ້ອງເຂົ້າເປັນທະຫານ ໃນເວລາ 3 ປີ ແລະ ຮອດຕົ້ນປີ 1973, ທ່ານຈຶ່ງກາຍເປັນໂຄສົກຢ່າງເປັນທາງການຂອງວິທະຍຸກະຈາຍສຽງຫວຽດນາມ.
”ເຖິງວ່າຂ້າພະເຈົ້າມີທ່າໄດ້ປຽບກ່ຽວກັບນ້ຳສຽງກໍ່ຕາມ, ແຕ່ຍັງຄົງປະສົບກັບຄວາມຫຍຸ້ງຍາກຫຼາຍຢ່າງ, ເພາະວ່າຮຽນອາຊີບໜຶ່ງ ແຕ່ພັດຫັນໄປເຮັດອາຊີບອື່ນ ແລະ ເວລານັ້ນຫວຽດນາມບໍ່ທັນມີໂຮງຮຽນໃດສອນກ່ຽວກັບອາຊີບໂຄສົກເທື່ອ. ດັ່ງນັ້ນຂ້າພະເຈົ້າຕ້ອງຮຽນຕາມໂຄສົກລຸ້ນກ່ອນເທື່ອລະເລັກລະນ້ອຍ. ຕ້ອງອ່ານຄືແນວໃດອ່ານໃຫ້ຊັດເຈນໃຫ້ມ່ວນເພື່ອສ້າງຄວາມດຶງດູດໃຫ້ແກ່ຜູ້ຟັງໄດ້, ນັ້ນແມ່ນເລື່ອງຫຍຸ້ງຍາກທີ່ສຸດ.”
ໄລຍະທຳອິດ ນັກສິນລະປິນດີເດັ່ນ Viet Hung ຮັບໜ້າທີ່ອ່ານຂ່າວພະຍາກອນອາກາດ, ທີ່ອອກອາກາດໃນເວລາ 5 ໂມງເຊົ້າ. ເຖິງວ່າຖືກອ່ານລາຍການນີ້ໃນເວລາຫຼາຍປີກໍ່ຕາມ, ແຕ່ທ່ານກໍ່ບໍ່ເບື່ອໜ່າຍ, ທໍ້ຖອຍໃຈ, ຫາກຍັງຖືວ່ານີ້ແມ່ນໄລຍະເວລາເພື່ອເຝິກແອບ, ຫຼໍ່ຫຼອມ ແລະ ຮ່ຳຮຽນ. ຫຼັງຈາກນັ້ນ, ທ່ານໄດ້ອ່ານຄຳແນະນຳກ່ຽວກັບວັນນະຄະດີ ສິລະປະ, ເລື່ອງສັ້ນ. ພຽງແຕ່ໄດ້ອ່ານຄືແນວນັ້ນແຕ່ທ່ານກໍ່ຮູ້ສຶກດີໃຈຫຼາຍ.
”ເມື່ອໄດ້ອ່ານຄຳແນະນຳກ່ຽວກັບວັນນະຄະດີ ສິລະປະຄືແນວນັ້ນຂ້າພະເຈົ້າດີໃຈຫຼາຍ. ພາຍຫຼັງອ່ານແລ້ວ, ຂ້າພະເຈົ້າມັກຟັງຄືນຫຼາຍເທື່ອເພື່ອຊອກຫາວິທີອ່ານຄືແນວໃດໃຫ້ມ່ວນໃຫ້ເໝາະສົມກັບເນື້ອໃນໃຈຄວາມກວ່າ, ເພາະວ່າຄຳແນະນຳປຽບເໝືອນຄຳເຊື້ອເຊີນ. ຕ້ອງອ່ານຄືແນວໃດເພື່ອໃຫ້ຜູ້ຟັງຢາກຟັງຕໍ່. ຂ້າພະເຈົ້າຄິດວ່າຕ້ອງຮຽນເທື່ອລະເລັກ, ເທື່ອລະນ້ອຍຕ້ອງເຝິກຜົນຫຼໍ່ຫຼອມຈຶ່ງມີຄວາມຊຳນານ. ອ່ານກໍ່ຄືກັນ, ໃນເບື້ອງຕົ້ນແມ່ນອ່ານບົດສັ້ນ, ຕໍ່ມາຈຶ່ງໄດ້ອ່ານບົດຍາວ, ແລະບົດບັນທຶກ”.
ເມື່ອອ່ານບົດແຕ່ລະປະເພດ, ນັກສິນລະປິນດີເດັ່ນ Viet Hung ກໍ່ກໍ່ມີວິທີສະແດງອອກທີ່ແຕກຕ່າງກັນ. ຢາກສະແດງໃຫ້ມ່ວນ, ທ່ານຕ້ອງຮ່ຳຮຽນ, ຟັງ, ອ່ານໜັງສືພິມ ແລະ ສັງເກດຈາກພຶດຕິກຳຕົວຈິງ. ທ່ານເວົ້າວ່າສິ່ງສຳຄັນກວ່າໝູ່ແມ່ນຕ້ອງມີຄວາມຮູ້ສຶກຢ່າງເລິກເຊິ່ງຕໍ່ບົດຄວາມແຕະຖ່າຍທອດອາລົມໄດ້. ທ່ານຍັງຈື່ຈຳໄລຍະເວລາທີ່ທ່ານອ່ານໃຫ້ລາຍການກະຈາຍສຽງທີ່ສະຫງວນໃຫ້ຊາວຫວຽດນາມອາໄສຢູ່ຕ່າງປະເທດ ຂອງລະບົບລາຍການກະຈາຍສຽງພາກພາສາຕ່າງປະເທດຢູ່, ຄວາມຄິດຮອດຄິດເຖິງ, ອາລົມຈິດທັງໝົດຂອງທ່ານລ້ວນແຕ່ສະແດງອອກຜ່ານແຕ່ລະປະໂຫຍກ, ທຸກຖ້ອຍຄຳ. ເພາະວ່າທ່ານເຂົ້າໃຈໄດ້ດີຕໍ່ຄວາມຮູ້ສຶກຂອງຜູ້ດຳລົງຊີວິດຢູ່ຫ່າງໄກຈາກບ້ານເກີດເມືອງນອນ.
”ເມື່ອອ່ານໃຫ້ລາຍການກະຈາຍສຽງຮັບໃຊ້ຊາວຫວຽດນາມຢູ່ຕ່າງປະເທດ. ຂ້າພະເຈົ້າຄິດວ່າຕ້ອງສະແດງຢ່າງສຸດຈິດສຸດໃຈ, ເພາະວ່ານັ້ນແມ່ນອາລົມຈິດຂອງວິທະຍຸ, ຂອງປະຊາຊົນເຮົາທີ່ສະຫງວນໃຫ້ແຫ່ງຊາວຫວຽດນາມທີ່ພວມດຳລົງຊີວິດຢູ່ຕ່າງປະເທດ. ຕ້ອງອ່ານຄືແນວໃດເພື່ອໃຫ້ເຂົາເຈົ້າຮູ້ໄດ້ວ່າຊາວຫວຽດນາມຢູ່ພາຍໃນປະເທດຍາມໃດຄິດຮອດຄິດເຖິງເຂົາເຈົ້າ, ເຮັດໃຫ້ເຂົາເຈົ້າອ່ວາຍເມືອຫາກົກເຄົ້າເຫງົ້າກໍຂອງຕົນ.”
ຄ່ອຍຮ່ຳຮຽນເທື່ອລະເລັກ, ເທື່ອລະນ້ອຍ, ເຝິກຝົນຫຼໍ່ຫຼອມ ໂດຍບໍ່ຮູ້ອິດບໍ່ຮູ້ເມື່ອ, ມາຮອດປະຈຸບັນ, ສຽງອ່ານຂອງ ນັກສິນລະປິນດີເດັ່ນ Viet Hung ໄດ້ເຮັດໃຫ້ທ່ານຜູ້ຟັງຫຼາຍຄົນຮູ້ສຶກຕື້ນຕັນໃຈ. ບັນດາຄຳເຫັນຂອງທ່ານຜູ້ຟັງຈາກທຸກແຖບຖີ່ນຂອງປະເທດທີ່ຝາກມາໃຫ້ທ່ານ ໄດ້ກາຍເປັນກຳລັງໜູນປຸກລະດົມກຳລັງໃຈເພື່ອໃຫ້ທ່ານນັບມື້ນັບຕິດພັນກັບອາຊີບນີ້ກວ່າອີກ.
ເຖິງວ່າໄດ້ພັກກິນເບ້ຍບຳນານໄດ້ 5 ປີແລ້ວກໍ່ຕາມ, ແຕ່ທ່ານຍັງຄົງມາຫ້ອງອັດສຽງເປັນປະຈຳ, ເພາະວ່າທ່ານຜູ້ຟັງຍັງຢາກໄດ້ຮັບຟັງສຽງອ່ານຂອງທ່ານ. ສຽງອ່ານຂອງນັກສິນລະປິນດີເດັ່ນ Viet Hung ແມ່ນຂາດບໍ່ໄດ້ໃນບັນດາລາຍການອ່ານເລື່ອງຍາມກາງຄືນ, ເລື່ອງຍາວ, ວັນນະຄະດີ ສິລະປະ. ທ່ານຜູ້ຟັງຍັງລໍຖ້າຮັບຟັງສຽງອ່ານຂອງທ່ານຜ່ານຄື້ນວິທະຍຸ ແລະ ເວັບໄຊຂອງວິທະຍຸກະຈາຍສຽງຫວຽດນາມ, ນັ້ນກໍ່ແມ່ນກຳລັງໜູນເພື່ອໃຫ້ທ່ານເມົາມົວກັບອາຊີບເປັນໂຄສົກຂອງຕົນ.