 ດອນຫິນທະເລ ຢູ່ ປ່າສະຫງວນແຫ່ງຊາດ ນູຍຈົວ. (ພາບ: Đoàn Sĩ/VOV) |
ໃນໄລຍະ 3 ປີທຳອິດທີ່ປະຕິບັດມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ XIV 2020-2025, ລະດັບ GRDP ເພີ່ມຂຶ້ນສະເລ່ຍ ຂອງແຂວງໄລຍະ 2021-2023 ບັນລຸ 9,28%/ປີ, ສູງກວ່າລະດັບການເຕີບໂຕສະເລ່ຍຂອງທົ່ວປະເທດ ແລະ ເຂດແຄມທະເລທາງທິດໃຕ້ພາກກາງ. ພິເສດ ລະດັບການເຕີບໂຕ GRDP ປີ 2023 ເພີ່ມຂຶ້ນ 9,40%, ຈັດຢູ່ອັນດັບ 9/63 ແຂວງ, ນະຄອນໃນທົ່ວປະເທດ. ທ່ານ ຟ້າມວັນເຫົ້າ ຮອງເລຂາຜູ້ປະຈຳຄະນະພັກແຂວງ, ປະທານ ຄະນະກຳມະການປະຊາຊົນ ແຂວງ ນິງທ້ວນ ໃຫ້ຮູ້ວ່າ:
“ອາຍຸການກອງປະຊຸມໃຫຍ່ຄັ້ງທີ 14 ນີ້, ວຽກງານການຊີ້ນຳນຳພາຜັນຂະຫຍາຍການປະຕິບັດມະຕິກອງປະຊຸມໃຫຍ່, ຄະນະພັກແຂວງ ໄດ້ມີການປ່ຽນແປງໃຫມ່, ປ່ຽນໃຫມ່ວິທີການນຳພາ, ປະກາດໃຊ້ມະຕິເພື່ອຫັນບັນດາເປົ້າໝາຍພັດທະນາຂອງແຂວງໃຫ້ເປັນອັນລະອຽດ, ຂຸດຄົ້້ນບັນດາຄວາມສາມາດບົ່ມຊ້ອນ, ທ່າແຮງ ເພື່ອຊຸກຍູ້ການເຕີບໂຕ”.
ການພັດທະນາເສດຖະກິດທະເລ ໂດຍໄດ້ຮັບການສຸມໃສ່ຈາກແຂວງ ດ້ວຍແຜນນະໂຍບາຍສ້າງອົງປະກອບອາຊີບຂຸດຄົ້ນສິນທະເລຄືນໃຫມ່ ຕາມທິດພັດທະນາການຫາປາຢູ່ນອກຊາຍຝັ່່ງ ຕິດພັນກັບການປົກປັກຮັກສາອະທິປະໄຕເຂດທະເລໝູ່ເກາະ. ພະລັງງານ, ພະລັງງານທົດແທນສືບຕໍ່ຢັງຢືນແມ່ນກຳລັງຫນູນໃຫ້ແກ່ການເຕີບໂຕເສດຖະກິດຂອງແຂວງ. ຂະແຫນງການທ່ອງທ່ຽວພັດທະນາຢ່າງວ່ອງໄວ ແລະ ກາຍເປັນຂະແຫນງເສດຖະກິດປາຍແຫລມຂອງແຂວງເທື່ອລະກ້າວ. ບັນດາໂຄງການຈຸດສຸມ, ພື້ນຖານໂຄງລ່າງການທ່ອງທ່ຽວໄດ້ຮັບຄວາມເອົາໃຈໃສ່ລົງທຶນ, ຄຸນນະພາບການບໍລິການໄດ້ຮັບການຍົກສູງຂຶ້ນເທື່ອລະກ້າວ. ຈຳນວນແຂກທ່ອງທ່ຽວມາຢ້ຽມຢາມແຂວງ ໄດ້ເພີ່ມຂຶ່ນຢ່າງວ່ອງໄວ, ປີ 2023 ເພີ່ມຂຶ້ນທົບ 2,3 ເທົ່າເມື່ອທຽບໃສ່ປີ 2020; ລາຍຮັບເພີ່ມຂຶ້ນສູງທົບ 2,6 ເທົ່າ ເມື່ອທຽບໃສ່ປີ 2020. ທ່ານ ຫງວຽນວັນຮວ່າ, ຫົວຫນ້າພະແນກວັດທະນະທຳ, ກິລາ ແລະ ທ່ອງທ່ຽວ ແຂວງ ນິງທ້ວນ ຢືນຢັນວ່າ:
“ນັບແຕ່ຕົ້ນປີມາຮອດປະຈຸບັນ, ແຂວງ ໄດ້ສຸມໃສ່ຍູ້ແຮງການສົ່ງເສີມການທ່ອງທ່ຽວອອກສູ່ຕ່າງປະເທດຄື: ຢູ່ ຈີນ, ໄຕ້ຫວັນ, ອິນເດຍ ແລະ ບັນດາປະເທດ ເອີລົບ ຄື: ໂຮນລັງ, ເຢຍລະມັນ. ຜ່ານວຽກງານສົ່ງເສີມການໂຄສະນາການທ່ອງທ່ຽວ, ໄດ້ປະກອບສ່ວນແນະນຳພາບພົດ, ຄວາມສາມາດບົ່ມຊ້ອນ, ທ່າໄດ້ປຽບກ່ຽວກັບການທ່ອງທ່ຽວຂອງແຂວງ ນິງທ້ວນ ມາໃຫ້ນັກທ່ອງທ່ຽວຢູ່ພາຍໃນປະເທດ ກໍ່ຄື ສາກົນ, ນຳມາເຊິ່ງປະສິດທິຜົນທີ່ຕັ້ງຫນ້າ. ຈຳນວນແຂກທ່ອງທ່ຽວມາຢ້ຽມຢາມແຂວງ ນັບມື້ນັບເພີ່ມຂຶ້ນ. 8 ເດືອນຕົ້ນປີນີ້ ບັນລຸກວ່າ 3 ລ້ານເທື່ອຄົນ, ເພີ່ມຂຶ້ນ 20,6% ເມື່ອທຽບໃສ່ໄລຍະດຽວກັນຂອງປີກາຍ ແລະ ບັນລຸ 95,9% ເມື່ອທຽບໃສ່ແຜນການວາງອອກ”.
 ທ່ານ ຟ້າມວັນເຫົ້າ ຮອງເລຂາຜູ້ປະຈຳຄະນະພັກແຂວງ, ປະທານ ຄະນະກຳມະການປະຊາຊົນ ແຂວງ ນິງທ້ວນ. (ພາບ:Truyền hình Ninh Thuận) |
ພຶ້ນຖານໂຄງລ່າງແຂວງ ນິງທ້ວນ ນັບມື້ນັບຕອບສະຫນອງຄວາມຮຽກຮ້ອງຕ້ອງການການພັດທະນາ. ລັດຖະບານ ຫາກໍ່ເພີ່ມເຕີມການວາງແຜນຜັງທ່າອາກາດສະຍານ ແທ່ງເຊີນ ເຂົ້າໃນການວາງແຜນຜັງສັງລວມພັດທະນາລະບົບທ່າອາກາດສະຍານ, ສະຫນາມບິນທົ່ວປະເທດ, ບັນດາເຂດ, ກຸ່ມອຸດສາຫະກຳ ໄດ້ ແລະ ພວມເສີມຂະຫຍາຍຢ່າງມີປະສິດທິຜົນ, ດຶງດູດຫລາຍໂຄງການລົງທຶນ. ສະພາບແວດລ້ອມແຫ່ງການດຶງດູດການລົງທຶນນັບມື້ນັບສະດວກສະບາຍ. ທ່ານ ຫງວຽນງອກມິງ, ຮອງຫົວຫນ້າພະແນກແຜນການ ແລະ ການລົງທຶນແຂວງ ນິງທ້ວນ ຢືນຢັນ: “ພະແນກຍາມໃດກໍ່ເອົາໃຈໃສ່ເປັນເສນາທິການໃຫ້ຄະນະກຳມະການປະຊາຊົນແຂວງປະກາດໃຊ້ບັນດາຄຳສັ່ງ, ຮ່ວມເດີນທາງ, ຫນູນຊ່ວຍຄວາມຫຍຸ້ງຍາກໃຫ້ແກ່ວິສາຫະກິດ, ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດຢ່າງສະດວກທີ່ສຸດໃຫ້ແກ່ນັກລົງທຶນກໍ່ຄືວິສາຫະກິດ. ປີ 2023, ແຂວງນິງທ້ວນ ຢືນອັນດັບ 11/63 ແຂວງ, ນະຄອນ, ເພີ່ມຂຶ້ນ 19 ຂັ້ນເມື່ອທຽບໃສ່ປີ 2022 ແລະ ນອນໃນ top 30 ແຂວງ ມີດັດຊະນີການບໍລິຫານດີທີ່ສຸດຂອງທົ່ວປະເທດ”.
ພ້ອມກັບຜົນງານດ້ານເສດຖະກິດ, ນະໂຍບາຍເບິ່ງແຍງພັດທະນາມະນຸດຍັງຄົງໄດ້ຮັບຄວາມເອົາໃຈໃສ່ເປັນພິເສດຈາກແຂວງ. ຊີວິດທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການປັບປຸງເທື່ອລະກ້າວ, ວັດທະນະທຳ, ການສຶກສາ, ສາທາລະນະສຸກໄດ້ຮັບຄວາມເອົາໃຈໃສ່ດ້ານແຫ່ລງກຳລັງລົງທຶນ, ວັດທະນະທຳບັນດາເຜົ່າໄດ້ຮັບການອະນຸລັກຮັກສາ, ເສີມຂະຫຍາຍ. ທ່ານ ຫງວຽນວັນບິ່ງ, ຮອງຫົວຫນ້າພະແນກແຮງງານ, ທະຫານເສຍອົງຄະ ແລະ ສັງຄົມແຂວງ ນິງທ້ວນ ເນັ້ນຫນັກວ່າ:
“ອັດຕາສ່ວນຄອບຄົວທຸກຍາກຂອງ ນິງທ້ວນ ແມ່ນ ກວ່າ 14% ແລະ ພາຍຫລັງ 4 ປີ ປະຈຸບັນ ແມ່ນລົງເຫລືອພຽງ4,24%.. ທົ່ວແຂວງ ພວມຕັດສິນໃຈພະຍາຍາມຮັດແຄບຄວາມແຕກໂຕນລະຫວ່າງຜູ້ຮັ່ງມີ ແລະ ທຸກຍາກ. ຊີວິດການເປັນຢູ່ຂອງປະຊາຊົນ ໄດ້ຮັບການຍົກສູງຂຶ້ນເທື່ອລະກ້າວ”.
ໂດຍເສີມຂະຫຍາຍບັນດາໝາກຜົນທີ່ບັນລຸໄດ້, ເມື່ອຫວນຄືນໄລຍະ 49 ປີແຫ່ງວັນປົດປ່ອຍ, 32 ປີແຫ່ງວັນສ້າງຕັ້ງແຂວງຄືນໃຫມ່, ໄລຍະຈະມາເຖິງ ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ນິງທ້ວນ ຈະສືບຕໍ່ສູ້ຊົນພັດທະນາເສດຖະກິດສັງຄົມ, ຮັບປະກັນການປ້ອງກັນຊາດປ້ອງກັນຄວາມສະຫງົບ, ທົ່ວປະເທດບັນລຸຫລາຍໝາກຜົນກວ່າອີກໃນພາລະກິດແຫ່ງການພັດທະນາປະເທດຊາດໃນສະພາບການໃຫມ່.