(VOVWORLD) -ຕາແສງ ເກາະ ລອງຮ່ວາ ເມືອງ ເຈົາແທ່ງ ແຂວງ ຈ່າວີງ ຕັ້ງຢູ່ແຄມແມ່ນຳ້ ໂກ໋ຈຽນ ມຸ່ງທິດອອກສູ່ທະເລຕາເວັນອອກ ແມ່ນບ່ອນທີ່ຊີວິດການເປັນຢູ່ຂອງປະຊາຊົນຕິດພັນກັບອາຊີບກະສິກຳ ແລະ ສິນໃນນຳ້. ໃນຊຸມປີຜ່ານມາ, ປ້ອມປ້ອງກັນຊາຍແດນ ລອງຮ່ວາ ບໍ່ພຽງແຕ່ເຮັດຫລ້ອນຫນ້າທີ່ປົກປັກຮັກສາອະທິປະໄຕເຂດຊາຍແດນເທົ່ານັ້ນ ຫາກຍັງຕັ້ງຫນ້າເຂົ້າຮ່ວມການກໍ່ສ້າງຊົນນະບົດໃຫມ່ ແລະ ພັດທະນາເສດຖະກິດ ສັງຄົມ.
 ພະນັກງານ, ທະຫານປ້ອງກັນຊາຍແດນລົງຊ່ວຍປະຊາຊົນປຸກສ້າງເຮືອນຢູ່. (ພາບ:VOV) |
ຕາແສງ ເກາະ ລອງຮ່ວາ ມີກວ່າ 3.100 ຄອບຄົວ ດ້ວຍພົນລະເມືອງເກືອບ 13.000 ຄົນ. ປະຈຸບັນ ຕາແສງ ຍັງຄົງມີ 24 ຄອບຄົວທຸກຍາກ ແລະ 78 ຄອບຄົວໃກ້ຂັ້ນທຸກຍາກ. ເພື່ອຫນູນຊ່ວຍພໍ່ແມ່ປະຊາຊົນ, ປ້ອມປ້ອງກັນຊາຍແດນ ລອງຮ່ວາ ໄດ້ຜັນຂະຫຍາຍຫລາຍໂຄງການ. ພ້ອມກັນນັ້ນ ຫົວຫນ່ວຍຍາມໃດກໍ່ເອົາໃຈໃສ່ປະຕິບັດການຂົນຂວາຍມະຫາຊົນເຂົ້າຮ່ວມການປົກປັກຮັກສາອະທິປະໄຕຜືນແຜ່ນດິນ ແລະ ຄວາມໝັ້ນຄົງເຂດຊາຍແດນແຫ່ງຊາດໃນສະພາບການໃຫມ່. ທ່ານ ຫງວຽນວັນຈ່ວຽນ, ຮອງປະທານ ຄະນະກຳມະການປະຊາຊົນ ຕາແສງ ຮວ່າມີງ ໃຫ້ຮູ້ວ່າ:
“ກຳລັງທະຫານຢູ່ປ້ອມປ້ອງກັນຊາຍແດນຊື່ງຕັ້ງທັບຢູ່ບໍລິເວນຕາແສງ, ຊຸມປີຜ່ານມາ ແມ່ນກຳລັງຫລັກແຫລ່ງ, ໂຄສະນາແຜນນະໂຍບາຍ, ນະໂຍບາຍມາເຖິງປະຊາຊົນເປັນປະຈຳ ແລະ ທັນການ, ຈາກນັ້ນ ກໍ່ໄດ້ສ້າງຄວາມໄວ້ເນື້ອເຊື່ອໃຈໃນປະຊາຊົນສຳລັບກຳລັງ. ສ່ວນການເຂົ້າຮ່ວມພັດທະນາເສດຖະກິດຂອງທ້ອງຖິ່ນ, ປ້ອມຍັງມີຫລາຍຮູບແບບຢ່າງແທດຈິງ. ບັນດານັກຮົບເຂົ້າຮ່ວມພ້ອມກັບອຳນາດການປົກຄອງທ້ອງຖິ່ນເພື່ອຂົນຂວາຍ, ລະດົມກຳລັງໃຈພໍ່ແມ່ປະຊາຊົນປະຕິບັດບັນດາຮູບແບບປ້ອມປ້ອງກັນຊາຍແດນເປັນຢ່າງດີ. ຜ່ານນັ້ນ ທຸກປີ ກໍ່ໄດ້ປະກອບສ່ວນຫລຸດຜ່ອນອັດຕາຄອບຄົວທຸກຍາກຢູ່ບໍລິເວນລົງ”.
ໂດຍແມ່ນຫນຶ່ງໃນບັນດາຄອບຄົວປະສົບກັບຄວາມຫຍຸ້ງຍາກ ແລະ ໄດ້ຮັບການຫນູນຊ່ວຍຈາກທະຫານປ້ອງກັນຊາຍແດນ, ອ້າຍ ຟ້າມວັນຕຽບ ຢູ່ ບ້ານ ຮາຍຖູ ໃຫ້ຮູູ້ວ່າ:
“ຂ້າພະເຈົ້າມີຄວາມຫຍຸ້ງຍາກຫຍັງ ກໍ່ໂອ້ລົມແລກປ່ຽນກັບອ້າຍນ້ອງທະຫານປ້ອງກັນຊາຍແດນ, ພວກອ້າຍນ້ອງໄດ້ມາຊ່ວຍເຫລືອຢ່າງທັນການ. ທະຫານປ້ອງກັນຊາຍແດນມີຄວາມຮັກແພງປະຊາຊົນຫລາຍ ແລະ ປະຊາຊົນກໍ່ຮັກແພງອ້າຍນ້ອງເຊັ່ນດຽວກັນ, ມີວຽກງານໃດທີ່ຫຍຸ້ງຍາກ ພວກອ້າຍນ້ອງກໍ່ຈັດສົ່ງລົງຊ່ວຍເຫລືອປະຊາຊົນຢ່າງທັນການ”.
ທ່ານນາງ ຫງວຽນທິແວັກ, ຢູ່ ບ້ານ ແຣກເຫງື້ອ ຊື່ງແມ່ນຜູ້ສະຫນິດຕິດພັນກັບທະຫານປ້ອງກັນຊາຍແດນ ລອງຮ່ວາ ນັບແຕ່ເມື່ອຫົວຫນ່ວຍນີ້ຫາກໍ່ໄດ້ຮັບການສ້າງຕັ້ງກ່ອນນີ້ 40 ປີ, ແມ່ນຂົວຕໍ່ລະຫວ່າງທະຫານປ້ອງກັນຊາຍແດນກັບປະຊາຊົນທ້ອງຖິ່ນ. ທ່ານນາງ ຢັ້ງຢືນວ່າ ກຳລັງທະຫານປ້ອງກັນຊາຍແດນ ແມ່ນບ່ອນອີງສຳຄັນສຳລັບປະຊາຊົນທີ່ດຳລົງຊີວິດຢູ່ເກາະ. ຈາກການປູກລ້ຽງ, ກໍ່ສ້າງເສັ້ນທາງຄົມມະນາຄົມຢູ່ຊົນນະບົດ ຕະຫລອດຮອດທິວທັດສິ່ງແວດລ້ອມ ລ້ວນແຕ່ມີການຮ່ວມແຮງຮ່ວມໃຈ, ການປະກອບສ່ວນຂອງກຳລັງທະຫານປ້ອງກັນຊາຍແດນ.
 ພະນັກງານ, ນັກຮົບກຳລັງປ້ອງກັນຊາຍແດນ ລອງຮ່ວາ ໄປລາດຕາເວັນ ເຂດຊາຍແດນທະເລ. (ພາບ: Thạch Trà Vinh/VOV) |
ໄປຄຽງຄູ່ກັບບັນດາການເຄື່ອນໄຫວທາງສັງຄົມ, ປ້ອມປ້ອງກັນຊາຍແດນ ລອງຮ່ວາ ຍັງຮັບບົດບາດສຳຄັນໃນການປົກປັກຮັກສາຊັບພະຍາກອນທຳມະຊຸາດ ແລະ ໂຄສະນາກົດໝາຍໃຫ້ແກ່ຊາວປະມົງ, ສົມທົບກັບບັນດາຫນ່ວຍພັກຢູ່ ຕາແສງ ໃນການຮັບປະກັນຄວາມໝັ້ນຄົງ ຄວາມເປັນລະບຽບຮຽບຮ້ອຍ ແລະ ປ້ອງກັນ, ຕ້ານອາດຊະຍາກຳຢູ່ບໍລິເວນ. ພັນຕີ ຫງວຽນມິງລວນ, ຮອງຫົວຫນ້າປ້ອມປ້ອງກັນຊາຍແດນ ລອງຮ່ວາ ໃຫ້ຮູ້ວ່າ: ຫົວຫນ່ວຍຍາມໃດກໍ່ສົມທົບກັບອຳນາດການປົກຄອງທ້ອງຖິ່ນເປັນຢ່າງດີເພື່ອໂຄສະນາ, ຂົນຂວາຍປະຊາຊົນ; ເປົ້າໝາຍທັງຮັບປະກັນການປົກປັກຮັກສາອະທິປະໄຕເຂດຊາຍແດນທະເລ, ທັງພັດທະນາເສດຖະກິດສັງຄົມແບບຍືນຍົງ.
“ປ້ອມປ້ອງກັນຊາຍແດນ ລອງຮ່ວາ ສືບຕໍ່ປະຕິບັດບັນດາຮູບແບບທີ່ມີຢູ່ແລ້ວໃນປະຈຸບັນເປັນຢ່າງດີ, ກຳແຫນ້ນຄວາມມຸ່ງມາດປາດຖະຫນາຂອງປະຊາຊົນຢູ່ບໍລິເວນ. ຜ່ານນັ້້ນ ກໍ່ເສີມຂະຫຍາຍກຳລັງແຮງສັງລວມໃນການຄຸ້ມຄອງ, ປົກປັກຮັກສາອະທິປະໄຕ, ຄວາມໝັ້້ນຄົງເຂດຊາຍແດນແຫ່ງຊາດ, ພ້ອມກັບອົງຄະນະພັກ, ອຳນາດການປົກຄອງທ້ອງຖິ່ນ ຍົກສູງຊີວິດທາງດ້ານວັດຖຸ ແລະ ຈິດໃຈຂອງປະຊາຊົນເຂດຊາຍແດນເທື່ອລະກ້າວ ຕາມທິດນຳ ປະຊາຊົນແຕ່ລະຄົນແມ່ນເສົາຄ້ຳພ້ອມກັບກຳລັງທະຫານປ້ອງກັນຊາຍແດນຮັກສາອະທິປະໄຕ, ຄວາມໝັ້້ນຄົງເຂດຊາຍແດນ”.
ດ້ວຍບັນດາວຽກງານທີ່ແທດຈິງ, ປ້ອມປ້ອງກັນຊາຍແດນ ລອງຮ່ວາ ໄດ້ກາຍເປັນບ່ອນອີງທີ່ຫນັກແຫນ້ນໃຫ້ແກ່ປະຊາຊົນ ຕາແສງ ເກາະ ລອງຮ່ວາ. ບັນດານາຍທະຫານປ້ອງກັນຊາຍແດນ ບໍ່່ພຽງແຕ່ຮັກສາເຂດຊາຍແດນຂອງປະເທດຊາດເທົ່ານັ້ນ ຫາກຍັງປະກອບສ່ວນສ້າງຊີວິດທີ່ອີ່ມໜຳສຳລານສົມບູນພູນສຸກ, ຄວາມໝັ້ນຄົງຢູ່ເຂດຊາຍແດນທາງພາກໃຕ້ຂອງປະເທດຊາດອີກດ້ວຍ.