(vovworld) - ໂດຍແມ່ນສະມາຊິກຂອງ ອາຊຽນ, ຍາມໃດຫວຽດນາມກໍມີຄວາມຮັບຜິດຊອບ ແລະ ປະຕິບັດສຳເລັດຫນ້າທີ່ໂດຍອາຊຽນມອບໝາຍໃຫ້ ກໍຄືມານະພະຍາຍາມປະກອບສ່ວນເພື່ອນຳ ອາຊຽນ ພັດທະນາກ້າວຂຶ້ນ - ນີ້ແມ່ນເນື້ອໃນການຕອບສຳພາດຂອງທ່ານນາງ ໂຕນທິງອກເຮືອງ, ຮອງຫົວຫນ້າກົມອາຊຽນ, ສັງກັດກະຊວງການຕ່າງປະເທດ ຫວຽດນາມ ຕໍ່ນັກຂ່າວວິທະຍຸກະຈາຍສຽງແຫ່ງຊາດ ລາວ ຫວ່າງແລ້ວນີ້ ຢູ່ ຮ່າໂນ້ຍ.
ເມື່ອແບ່ງປັນກ່ຽວກັບການປະກອບສ່ວນຂອງ ຫວຽດນາມ ສຳລັບ ອາຊຽນໃນ 17 ປີຜ່ານມາ, ທ່ານນາງໂຕນທິງອກເຮືອງ, ຮອງຫົວຫນ້າກົມອາຊຽນ ໃຫ້ຮູ້ວ່າ: ຫວຽດນາມ ມີທັດສະນະວ່າ: ອາຊຽນ ມີຄວາມສາມັກຄີ, ເຂັ້ມແຂງ ແລະ ຮ່ວມສຳພັນຢ່າງແຫນ້ນແຟ້ນຈະສວມບົດບາດສຳຄັນໃນການຊຸກຍູ້ສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມືຢູ່ພາກພື້ນ, ນຳມາເຊິ່ງຜົນປະໂຫຍດລວມໃຫ້ແກ່ປະເທດສະມາຊິກທັງໝົດ. ເພາະສະນັ້ນ, ນັບແຕ່ເມື່ອກາຍເປັນສະມາຊິກຂອງ ອາຊຽນ ຢ່າງເປັນທາງການນັບແຕ່ປີ 1995 ມາຮອດປະຈຸບັນ, ຍາມໃດ ຫວຽດນາມ ກໍມີສະຕິ ຄວາມຮັບຜິດຊອບສູງ ແລະ ປະຕິບັດພັນທະຂອງປະເທດສະມາຊິກ ອາຊຽນ, ມານະພະຍາຍາມປະຕິບັດບັນດາວຽກງານຊື່ງ ອາຊຽນມອບໝາຍໃຫ້ເປັນຢ່າງດີ.
“ຫວຽດນາມ ໄດ້ມານະພະຍາຍາມຊຸກຍູ້ເພື່ອສຳເລັດແນວຄວາມຄິດສ້າງອາຊຽນ 10 ລວມມີ 10 ປະເທດຢູ່ ອາຊີຕາເວັນອອກສຽງໃຕ້,ໃນນັ້ນ ມີການປະສານສົມທົບກັບ ປະເທດລາວ ແລະ ມ້ຽນມາ ເພື່ອຮັບສອງປະເທດນີ້ເຂົ້າເປັນສະມາຊິກ ອາຊຽນ ໃນປີ 1997. ທີສອງ ຫວຽດນາມ ເປັນເຈົ້າພາບຈັດຕັ້ງກອງປະຊຸມສຸດຍອດ ອາຊຽນ 6 ຢູ່ ຮ່າໂນ້ຍ ເມື່ອປີ 1998 ສຳເລັດຜົນ, ໄດ້ມີຂໍ້ລິເລີ່ມ ແລະ ພ້ອມກັບບັນດາປະເທດສະມາຊິກ ຮັບຮອງເອົາໂຄງການດຳເນີນງານຮ່າໂນ້ຍ 1998 - 2003, ປະຕິບັດວິໄສທັດ ອາຊຽນ 2020 ກໍຄືປະກອບສ່ວນນຳອາຊຽນຜ່ານຜ່າຄວາມໄລຍະຫຍຸ້ງຍາກຈາກວິກິດການເສດຖະກິດໃນພາກພື້ນ.”
ກອງປະຊຸມສຸດຍອດ ອາຊຽນ ຄັ້ງທີ 16
ພາບ: internet
|
ໃນອາຍຸການເປັນປະທານຄະນະກຳມະການປະຈຳ ອາຊຽນ 2000 - 2001, ຫວຽດນາມ ໄດ້ຈັດຕັ້ງກອງປະຊຸມສຳຄັນຂັ້ນລັດຖະມົນຕີຄັ້ງຕ່າງໆຂອງ ອາຊຽນ ແລະ ລະຫວ່າງອາຊຽນກັບບັນດາປະເທດຄູ່ເຈລະຈາຢູ່ຮ່າໂນ້ຍ ເມ່ືອເດືອນ 7/2001 ສຳເລັດຜົນ. ຕາມທ່ານນາງ ໂຕນທິງອກເຮືອງ, ຮອງຫົວຫນ້າກົມອາຊຽນ ແລ້ວ, ການປະກອບສ່ວນທີ່ພົ້ນເດັ່ນຂອງຫວຽດນາມໃນການເຄື່ອນໄຫວຂອງອາຊຽນ ນັ້ນແມ່ນບົດບາດເປັນປະທານອາຊຽນໃນປີ 2010. ທ່ານນາງ ໂຕນທິງອກເຮືອງ ໃຫ້ຮູ້ວ່າ:
“ອາຍຸການເປັນປະທານ ອາຊຽນ 2010 ຂອງ ຫວຽດນາມ, ນັ້ນແມ່ນຈຸດເວລາບານພັບ ໄລຍະ 5 ປີ ຂອງ ອາຊຽນ ແລະ ຫົວເລື່ອງທີ່ຫວຽດນາມ ຍົກອອກມາ ນັ້ນແມ່ນຍູ້ແຮງການດຳເນີນງານເພື່ອຫັນປະຊາຄົມ ອາຊຽນ ໃນປີ 2015 ໃຫ້ປະກົດຜົນເປັນຈິງ. ດ້ວຍບົດບາດເປັນປະທານອາຊຽນ, ຫວຽດນາມ ໄດ້ພ້ອມກັບບັນດາປະເທດສະມາຊິກ ອາຊຽນ ວາງອອກຫລາຍມາດຕະການ ແລະ ລັດຖະນະໂຍບາຍສຳຄັນ, ເປີດກວ້າງ ແລະ ເຮັດໃຫ້ການພົວພັນກັບບັນດາຄູ່ເຈລະຈາພາຍນອກເລິກເຊິ່ງກວ່າອີກ ພ້ອມທັງຊຸກຍູ້ການຮ່ວມມືໃນພາກພື້ນເພື່ອຮັບມືກັບສິ່ງທ້າທາຍທີ່ພວມເກິດຂຶ້ນ. ປີ 2010 ແມ່ນປີໄດ້ຮັບການຕີລາຄາວ່າແມ່ນປີປະສົບຜົນເລັດຂອງອາຊຽນ, ອັນໄດ້ສ້າງບາດກ້າວຫັນປ່ຽນສຳຄັນໃຫ້ອາຊຽນ ນັບທັງການຮ່ວມມືພາຍໃນກຸ່ມກໍຄືການພົວພັນກັບຕ່າງປະເທດ, ປັບປຸງບົດບາດ, ທີ່ຕັ້ງໃຈກາງຂອງອາຊຽນ ຢູ່ ພາກພື້ນອີກບາດກ້າວຫນຶ່ງ.”
ໃນແຕ່ລະບາດກ້າວແຫ່ງການພັດທະນາໃຫມ່ຂອງ ອາຊຽນ, ຍາມໃດຫວຽດນາມກໍສະແດງໃຫ້ເຫັນຄວາມເປັນເຈົ້າການ, ມີຄວາມຮັບຜິດຊອບ ແລະ ມີ ຫົວຄິດປະດິດສ້າງ ພ້ອມກັບບັນດາປະເທດສະມາຊິກ ສະເຫນີແນວຄວາມຄິດ, ຂໍ້ລິເລີ່ມ ເພື່ອຫັນບັນດາທິດທາງ, ລັດຖະນະໂຍບາຍທີ່ມີລັກສະນະຍຸດທະສາດສຳລັບ ອາຊຽນ ເປັນລະອຽດຄື: ວິໄສທັດ ອາຊຽນ 2020, ຈຸດໝາຍສ້າງປະຊາຄົມ ອາຊຽນ ໃນປີ 2015, ກົດບັດ ອາຊຽນ, ວິວັດທະນາການສ້າງປະຊາຄົມ ອາຊຽນ... ທ່ານນາງໂຕນທິງອກເຮືອງ, ໃຫ້ຮູ້ວ່າ: ການປະກອບສ່ວນຂອງ ຫວຽດນາມ ໃນອາຊຽນ ໄດ້ຮັບການຮັບຮູ້ຈາກບັນດາປະເທດສະມາຊິກ:
“ນອກຈາກການປະກອບສ່ວນທີ່ກ່າວມາຂ້າງເທິງນັ້ນ, ໃນຖານະເປັນປະເທດປະສານງານການຕ່າງປະເທດຂອງ ອາຊຽນ ກັບບັນດາຄູ່ເຈລະຈາສຳຄັນຄື: ຍີປຸ່ນ, ລັດເຊຍ, ອາເມລິກາ,ອົດສະຕາລີ ແລະ ຫວ່າງແລ້ວນີ້ ແມ່ນຈີນ (2009 - 2012) ຫວຽດນາມ ບັນລຸໄດ້ຫລາຍບາດກ້າວທີ່ຕັ້ງຫນ້າ ຊື່ງໄດ້ຮັບການຮັບຮູ້ຈາກບັນດາປະເທດສະມາຊິກ ອາຊຽນ ແລະ ຄູ່ເຈລະຈາ.”
ຫວຽດນາມ ກຳນົດວ່າ ອາຊຽນ ໄດ້ ແລະ ຈະແມ່ນຫນຶ່ງໃນບັນດາເສົາຄ້ຳສຳຄັນໃນແນວທາງການຕ່າງປະເທດເປີດກ້ວາງ, ຫລາຍຮູບຫລາຍແບບ ແລະ ຫລາຍຝ່າຍ ແລະ ເປັນເຈົ້າການເຊື່ອມໂຍງເຂົ້າກັບພາກພື້ນ ແລະ ສາກົນ ຂອງຫວຽດນາມ. ກ່ຽວກັບການປະກອບສ່ວນຂອງ ຫວຽດນາມ ໃຫ້ແກ່ ອາຊຽນ ໃນໄລຍະຈະມາເຖິງ, ທ່ານນາງໂຕນທິງອກເຮືອງ ໃຫ້ຮູ້ວ່າ: ຫວຽດນາມ ຈະສືບຕໍ່ເຂົ້າຮ່ວມ ແລະ ປະກອບສ່ວນໃຫ້ແກ່ ອາຊຽນ ບົນຈິດໃຈເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບ, ໃນພາຍພາກຫນ້າ ແມ່ນພະຍາຍາມຈົນສຸດຄວາມສາມາດຂອງຕົນພ້ອມກັບບັນດາປະເທດເພື່ອນມິດໃນອາຊຽນ ປະຕິບັດຈຸດໝາຍສ້າງປະຊາຄົມອາຊຽນ ໃຫ້ສຳເລັດຜົນໃນປີ 2015.