ອາທິດຜ່ານມາ, ມີຜູ້ຟັງ, ຜູ້ອ່ານຫຼາຍທ່ານໄດ້ຝາກຈົດໝາຍ, ອີແມວ ແລະ ໂທລະສັບມາຫາລາຍການຖາມກ່ຽວກັບກອງປະຊຸມໃຫຍ່ສະຫະພັນລັດຖະສະພາສາກົນ 132 (IPU 132) ຫາກໍ່ດຳເນີນຢູ່ ຮ່າໂນ້ຍ. ນອກຈາກນັ້ນ, ທ່ານຜູ້ຟັງ, ຜູ້ອ່ານກໍ່ເອົາໃຈໃສ່ເຖິງ “ປີທ່ອງທ່ຽວແຫ່ງຊາດ ຫວຽດນາມ 2015” ຈະໄດ້ຮັບການຈັດຕັ້ງຄືແນວໃດ?. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຕອບຄຳຖາມທີ່ທ່ານຜູ້ຟັງຝາກມາເຊິ່ງກ່ຽວຂ້ອງເຖິງບັນດາເນື້ອໃນດັ່ງກ່າວ.
ເພື່ອນ ດອກຕາເວັນ, ແຂວງ ບໍ່ແກ້ວ ໄດ້ຝາກ ອີແມວ ມາຍັງລາຍການໂດຍແບ່ງປັນວ່າ: “ຜ່ານສື່ມວນຊົນ ຂ້າພະເຈົ້າໄດ້ຮູ້ວ່າ: ທ່ານນາງປະທານສະພາແຫ່ງຊາດ ລາວ ປານີ ຢາທໍ່ຕູ້ ໄດ້ຢ້ຽມຢາມ ຫວຽດນາມ ຢ່າງເປັນທາງການ ແລະ ເຂົ້າຮ່ວມກອງປະຊຸມ IPU 132. ຂ້າພະເຈົ້າຮູ້ວ່າ, IPU ຄັ້ງນີ້ໄດ້ຮັບການຈັດຕັ້ງດ້ວຍຂອບຂະໜາດໃຫຍ່ທີ່ສຸດ, ດຶງດູດການເຂົ້າຮ່ວມຂອງຜູ້ແທນກ່ວາ 1500 ທ່ານ ທີ່ມາຈາກ 5 ທະວີບ. ຜ່ານຊຸມວັນທຳອິດຂອງ IPU 132, ຂ້າພະເຈົ້າເຫັນວ່າບັນດາຜູ້ແທນສາກົນໄດ້ຕີລາຄາສູງວຽກງານຈັດຕັ້ງເຫດການນີ້ຂອງ ຫວຽດນາມ. ແຕ່ຂ້າພະເຈົ້າຢາກຮູ້ລະອຽດກ່ຽວກັບການຕີລາຄາຂອງຝ່າຍ ລາວ ຕໍ່ເຫດການສຳຄັນນີ້?”
ເພື່ອນ ດອກຕາເວັນ ທີ່ຮັກແພງ, ແຕ່ວັນທີ 28/3 – 1/4, ກອງປະຊຸມໃຫຍ່ສະຫະພັນ ລັດຖະສະພາສາກົນ 132 (IPU 132) ແລະ ບັນດາກອງປະຊຸມທີ່ກ່ຽວຂ້ອງໄດ້ດຳເນີນໄປຢູ່ ຮ່າໂນ້ຍ. ນີ້ແມ່ນຂີດໝາຍສຳຄັນໃນປະຫວັດສາດຂອງການທູດ ຫວຽດນາມ ນັບແຕ່ເມື່ອ ຫວຽດນາມ ກາຍເປັນສະມາຊິກທາງການຂອງ IPU. ເນື່ອງໃນໂອກາດນີ້, ນັກຂ່າວວິທະຍຸກະຈາຍສຽງ ຫວຽດນາມ ປະຈຳ ລາວ ໄດ້ມີບົດສຳພາດທ່ານ ດຣ ກຸແກ້ວ ອັກຄະມົນຕີ, ສະມາຊິກສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ, ຫົວໜ້າກຳມາທິການພົວພັນຕ່າງປະເທດສະພາແຫ່ງຊາດ ລາວ, ສະມາຊິກຄະນະຜູ້ແທນ ລາວ ທີ່ເຂົ້າຮ່ວມກອງປະຊຸມ IPU 132. ທ່ານໄດ້ຕີລາຄາບົດບາດຂອງ ຫວຽດນາມ ໃນ IPU ວ່າ:
ເທບສຽງທ່ານ ກຸແກ້ວ ອັກຄະມົນຕີ
ເມື່ອຕີລາຄາກ່ຽວກັບຫົວຂໍ້ຄາດໝາຍພັດທະນາແບບຍືນຍົງເຊິ່ງ ຫວຽດນາມ ໄດ້ຍົກອອກມາໃນກອງປະຊຸມຄັ້ງນີ້, ທ່ານ ດຣ ກຸແກ້ວ ອັກຄະມົນຕີ, ໃຫ້ຮູ້ວ່າ:
ເທບສຽງທ່ານ ກຸແກ້ວ ອັກຄະມົນຕີ
ໃນອາທິດ, ທ່ານ ແກ້ວມະລີ, ແຂວງ ຫົວພັນ ກໍ່ໄດ້ຝາກຈົດໝາຍມາຍັງລາຍການດ້ວຍເນື້ອໃນວ່າ: “ຂ້າພະເຈົ້າຮູ້ວ່າ, ປີ 2015 ໄດ້ຮັບການເລືອກເຟັ້ນແມ່ນປີທ່ອງທ່ຽວແຫ່ງຊາດ ຫວຽດນາມ ດ້ວຍຫົວຂໍ້ວ່າ “ເຊື່ອມຕໍ່ບັນດາມໍລະດົກໂລກ”. ຂ້າພະເຈົ້າຢາກຮູ້ບາງເຫດການວັດທະນະທຳ, ທ່ອງທ່ຽວທີ່ເປັນເອກະລັກສະເພາະໃນລາຍການນີ້ໄດ້ບໍ່?
ທ່ານ ແກ້ວມະລີ ທີ່ເຄົາລົບ, ປີທ່ອງທ່ຽວແຫ່ງຊາດ ຫວຽດນາມ ປີ 2015 ດ້ວຍຫົວຂໍ້ “ເຊື່ອມຕໍ່ບັນດາມໍລະດົກໂລກ” ໂດຍແຂວງ ແທງຮ໋ວາ ເປັນເຈົ້າພາບຈັດຕັ້ງ. ນີ້ແມ່ນກາລະໂອກາດເພື່ອໃຫ້ ຫວຽດນາມ ແນະນຳ, ໂຄສະນາບັນດາຄຸນຄ່າວັດທະນະທຳມີຮູບຮ່າງ ແລະ ບໍ່ມີຮູບຮ່າງ, ບັນດາທັດສະນີຍະພາບທີ່ເປັນເອກະລັກສະເພາະ, ເປີດກ້ວາງການພົວພັນຮ່ວມມືມິດຕະພາບ, ການເຊື່ອມໂຍງ ແລະ ພັດທະນາ, ຍົກສູງທີ່ຕັ້ງບົດບາດ, ພາບພົດຂອງປະເທດຊາດ, ຊາວ ຫວຽດນາມ ເວົ້າລວມ, ຂອງແຂວງ ແທງຮ່ວາ ເວົ້າສະເພາະກັບແຂກທ່ອງທ່ຽວຕ່າງປະເທດ. ຈະມີ 44 ເນື້ອໃນໄດ້ຮັບການຈັດຕັ້ງໃນປີທ່ອງທ່ຽວແຫ່ງຊາດ 2015 ເຊິ່ງລວມມີ: 12 ເຫດການໂດຍກະຊວງວັດທະນະທຳ - ກິລາ ແລະ ທ່ອງທ່ຽວ ເປັນເຈົ້າພາບຈັດຕັ້ງ, 12 ເຫດການໂດຍແຂວງ ແທງຮ໋ວາ ຈັດຕັ້ງ ແລະ 20 ເຫດການໂດຍ 15 ແຂວງ, ນະຄອນ ທີ່ມີມໍລະດົກໂລກຄື: ຟູ໋ທໍ້, ຮ່າໂນ້ຍ, ກວາງນີງ, ນິງບີ່ງ, ເງະອານ, ກວາງບີ່ງ, ເທື່ອທຽນເຫ້ວ, ດ່າໜັ້ງ, ນະຄອນ ໂຮ່ຈີມິນ, ເລີມດົ່ງ… ຈັດຕັ້ງ ແລະ ຈະມີ 9 ເຫດການວັດທະນະທຳ - ທ່ອງທ່ຽວດຳເນີນໄປໃນເດືອນ 4/2015, ພົ້ນເດັ່ນແມ່ນພິທີໄຂປີທ່ອງທ່ຽວແຫ່ງຊາດຈະໄດ້ຮັບການຖ່າຍທອດສົດທາງໂທລະພາບໃນເວລາ 20 ໂມງຂອງວັນທີ 3/4, ຖະໜົນດອກໄມ້ ເລເລີ້ຍ, ງານວາງສະແດງຮູບສິລະປະ “ດອກບົວໃນຊີວິດການເປັນຢູ່ຂອງວັດທະນະທຳ ຫວຽດ”…
ລາຍການໂອ້ລົມກັບເພື່ອນລາວຂອງພວກເຮົາຂໍ້ສິ້ນສຸດລົງພຽງເທົ່າ ນີ້. ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການກະລຸນາສົ່ງຈົດໝາຍມາຍັງລາຍການໂດຍຈ່າໜ້າ ຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.8256631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.