(vovworld)- ໃນຊຸມມື້ນີ້ ຢູ່ ນະຄອນຫລວງ ຮ່າໂນ້ຍ ແລະ ທ້ອງຖິ່ນຕ່າງໆໃນທົ່ວປະເທດຫວຽດນາມ ໄດ້ດຳເນີນບັນດາການເຄື່ອນໄຫວວັດທະນະທຳ, ສິລະປະ ມຸ່ງໄປເຖິງເຫດການສຳຄັນຍິ່ງຂອງປະເທດຊາດ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ. ເນື່ອງໃນໂອກາດນີ້ ຜູ້ຊົມໃນທົ່ວປະເທດ ໄດ້ຮັບເບິ່ງຮູບເງົາຫລາຍຊຸດໂດຍບັນດາຫົວຫນ່ວຍພາຍໃນປະເທດຜະລິດ ໃນຂອບເຂດບັ້ນສາຍຮູບເງົາຂ່ຳນັບຊົມເຊີຍກອງປະຊຸມໃຫຍ່ຄັ້ງທີ XII ຂອງພັກ ແລະ ເນື່ອງໃນໂອກາດສະເຫລີມສະຫລອງ 86 ປີແຫ່ງວັນສ້າງຕັ້ງພັກກອມມູນິດຫວຽດນາມ (3/2/1930-3/2/2016), ຕ້ອນຮັບປີໃຫມ່ປີວອກ 2016.
ສູນສາຍຮູບເງົາແຫ່ງຊາດ
ພາບ:chieuphimquocgia
|
ບັ້ນສາຍຮູບເງົາຂ່ຳນັບຊົມເຊີຍກອງປະຊຸມໃຫຍ່ຄັ້ງທີ XII ຂອງພັກ, ສະເຫລີມສະຫລອງ 86 ປີແຫ່ງວັນສ້າງຕັ້ງພັກກອມມູນິດຫວຽດນາມ ດຳເນີນໄປແຕ່ວັນທີ 18/1 – 5/2 ໃນທົ່ວປະເທດ. ທ່ານ ເວືອງຢູຍບຽນ, ລັດຖະມົນຕີຊ່ວຍວ່າການກະຊວງວັດທະນະທຳກິລາ ແລະ ທ່ອງທ່ຽວຫວຽດນາມໃຫ້ຮູ້ວ່າ:
“ບັ້ນສາຍຮູບເງົາຮັບໃຊ້ມະຫາຊົນ ແລະ ບັນດາຜູ້ທີ່ນິຍົມຮູບເງົາໃນທົ່ວປະເທດ ດ້ວຍບັນດາຮູບເງົາກ່ຽວກັບກິດຈະການສ້າງສາ ແລະ ພັດທະນາປະເທດຊາດໃນໄລຍະໃຫມ່. ໃນຂອບເຂດສາຍຮູບເງົາ, ຄະນະພະນັກງານ, ນັກສິລະປິນຂອງຄະນະສາຍຮູບເງົາ “ຄວາມສະຫງົບສຸກ” ຈະເຂົ້າຮ່ວມການພົບປະແລກປ່ຽນກັບຜູ້ຊົມ ຊື່ງແມ່ນນັກສຶກສາ ແລະ ກຳລັງປະກອບອາວຸດແຂວງ ບີ່ງທ້ວນ”
ໃນຕອນຄ່ຳຂອງມື້ໄຂບັ້ນສາຍຮູບເງົານັ້ນ, ກົມຮູບເງົາ ຈະແນະນຳໃຫ້ມະຫາຊົນນະຄອນຫລວງດ້ວຍ ຮູບເງົາ 2 ເລື່ອງ, ນັ້ນແມ່ນຮູບເງົາເອກະສານ “ປະເທດຊາດປ່ຽນແປງໃຫມ່” ໂດຍບໍລິສັດຜະລິດຮູບເງົາເອກະສານ ແລະ ວິທະຍາສາດສູນກາງຜະລິດ ແລະ ຮູບເງົາ “ຄວາມສະຫງົບສຸກ” ຂອງບໍລິສັດຫຸ້ນສ່ວນຮູບເງົາ ເລກ1 ຜະລິດ. ດ້ວຍເວລາ 30 ນາທີ, ຮູບເງົາ “ປະເທດຊາດປ່ຽນແປງໃຫມ່” ໄດ້ວາດພາບເຖິງໄລຍະທາງພັດທະນາ, ຜົນງານພົ້ນເດັ່ນຂອງຫວຽດນາມ ທີ່ບັນລຸໄດ້ໃນໄລຍະປ່ຽນແປງໃຫມ່ ແລະ ເຊື່ອມໂຍງ. ເນື້ອໃນຂອງຮູບເງົາໄດ້ຢືນຢັນເຖິງການຊີ້ນຳນຳພາອັນສະຫລາດສ່ອງໃສຂອງພັກກອມມູນິດຫວຽດນາມ ທີ່ໄດ້ນຳປະເທດຊາດຜ່ານຜ່າຄວາມຫຍຸ້ງຍາກລຳບາກ, ຢັ້ງຢືນທີ່ຕັ້ງບົດບາດຂອງຕົນເທື່ອລະກ້າວໃນພາກພື້ນແລະ ບົນເວທີສາກົນ. ສຳລັບຮູບເງົາ “ຄວາມສະຫງົບສຸກ” ໄດ້ສ່ອງແສງໃຫ້ເຫັນຊີວິດການເປັນຢູ່ ແລະ ການອອກແຮງງານຂອງໝູ່ບ້ານອາຊີບຜະລິດເຄື່ອງປັ້ນດິນເຜົາທີ່ທີ່ມີມາແຕ່ດົນນານຂອງຊາວເຜົ່າ ຈຳ ຢູ່ ທາງທິດໃຕ້ພາກກາງຫວຽດນາມ ແລະ ການຫັນປ່ຽນເທື່ອລະກ້າວດ້ານວິທີຄິດ, ວິທີເຮັດຂອງປະຊາຊົນຢູ່ທີ່ນີ້ ເພື່ອສ້າງສາ ແລະ ພັດທະນາເສດຖະກິດຄອບຄົວ. ບັນດາຜູ້ຊົມໄດ້ຕີລາຄາສູງເນື້ອໃນຂອງຮູບເງົາ. ດຣ ສິລະປະກຳ ຮວ່າງເຊີນ, ອະດີດ ຮອງຫົວຫນ້າສະຖາບັນວັດທະນະທຳສິລະປະ ຫວຽດນາມໄດ້ ຕີລາຄາວ່າ:
“ຮູບເງົາມີເນື້ອແທ້ຢ່າງເລິກເຊິ່ງ ແລະ ມີລັກສະນະສຶກສາຢ່າງສູງ. ຄຸນຄ່າກ່ຽວກັບການໂຄສະນາໃນຮູບເງົາ ແມ່ນຄວາມສາມັກຄີທົ່ວປວງຊົນທັງຊາດຢູ່ຫວຽດນາມ. ໂດຍຜ່ານຮູບເງົາເລື່ອງຕ່າງໆນັ້ນ ອາດຈະເຫັນໄດ້ຄວາມເອົາໃຈໃສ່ຂອງພັກທີ່ມີຕໍ່ຊົນເຜົ່າທັງໝົດ ພິເສດ ແມ່ນຊົນເຜົ່າສ່ວນຫນ້ອຍ. ທີ 2 ພາຍໃຕ້ການຊີ້ນຳນຳພາຂອງພັກ, ການປ່ຽນໃຫ່ມກ່ຽວກັບເສດຖະກິດ, ພວກເຮົາມີຫລາຍພາກສ່ວນເສດຖະກິດ ເພື່ອສາມາດພັດທະນາຂະແຫນງອາຊີບໃຫມ່, ຂະແຫນງອາຊີບປອດຄວັນຄື: ຂະແຫນງທ່ອງທ່ຽວ.”
ໃນໂອກາດນີ້ ມີຮູບເງົາຫລາຍເລື່ອງທີ່ຂຶ້ນກັບປະເພດຮູບເງົາເອກະສານ, ປະຫວັດສາດ ໂດຍບັນດານັກຜະລິດຮູບເງົາຢູ່ພາຍໃນປະເທດປະຕິບັດ ກໍໄດ້ນຳມາສາຍໃນໂອກາດນີ້. ໃນນັ້ນ ຮູບເງົາ “ເຖົ້າຈີນໃນປະເທດສະຫຍາມ" ແມ່ນຮູບເງົາເວົ້າເຖິງປະທານໂຮ່ຈິມີນເຄື່ອນໄຫວຢູ່ໄທໃນໄລຍະ ແຕ່ວັນທີ 7/1928 – 11/1929 ຢູ່ ພາກອີສານຂອງໄທ. ຮູບເງົານີ້ໄດ້ຮັບການຊົມເຊີຍຈາກຜູ້ຊົມພາຍໃນປະເທດ ແລະ ຊາວຫວຽດນາມອາໃສຢູ່ຕ່າງປະເທດເປັນຈຳນວນຫລວງຫລາຍ. ເອື້ອຍ ຫງວຽນທູຈາງ, ຜູ້ຊົມເຂົ້າຮ່ວມພິທີໄຂບັ້ນສາຍຮູບເງົາໃຫ້ຮູ້ວ່າ:
“ຂ້າພະເຈົ້າໄດ້ເບິ່ງຮູບເງົາບາງເລື່ອງທີ່ໄດ້ສາຍໃນທົ່ວປະເທດໃນໂອກາດດຳເນີນກອງປະຊຸມໃຫຍ່ຄັ້ງທີ XII ຂອງພັກ. ຕາມຂ້າພະເຈົ້າແລ້ວ ບັນດາຮູບເງົານີ້ແມ່ນມີຄຸນຄ່າໂຄສະນາສູງ ແລະ ໄດ້ຮັບການລົງທຶນຜະລິດຢ່າງໃຫຍ່ຫລວງ ດ້ວຍເນື້ອໃນກ່ຽວກັບກິດຈະການສ້າງສາ ແລະ ພັດທະນາຂອງປະເທດຊາດໃນໄລຍະໃຫມ່.”
ຮູບເງົາແຕ່ລະເລື່ອງທີ່ນຳມາສາຍໃນໄລຍະນີ້ ແມ່ນຮູບເງົາປະກອບສ່ວນສະແດງໃຫ້ເຫັນບົດບາດສຳຄັນຂອງພັກກອມມູນິດຫວຽດນາມ ແລະ ປະທານໂຮ່ຈີມີນ ພ້ອມກັນນັ້ນ ແມ່ນການເສຍສະຫລະຊີວິດຢ່າງກ້າຫານຂອງປະຊາຊົນຫວຽດນາມຜູ້ທີ່ຮັກຊາດ ໃນວິວັດການຕໍ່ສູ້ສ້າງສາ ແລະ ປົກປັກຮັກສາປະເທດຊາດ. ນີ້ແມ່ນການເຄື່ອນໄຫວມີຄວາມໝາຍແທດຈິງຂອງຜູ້ເຮັດວຽກງານສິລະປະເວົ້າລວມ ແລະ ຜູ້ຜະລິດຮູບເງົາເວົ້າສະເພາະ ເພື່ອຂ່ຳນັບຊົມເຊີຍບັນດາເຫດການສຳຄັນຂອງປະເທດຊາດໃນຊຸມມື້ນີ້.