ລຸງ ເຈີນຫິ້ວເຫ້ວ ຊາວແຂວງ ອານຢາງ
ແມ່ນຜູ້ຫຼິ້ນສະແຕມມາແຕ່ດົນນານ
|
ກໍເຊັ່ນດຽວກັນກັບຫຼາຍປະເທດໃນໂລກ, ການຫຼິ້ນສະແຕມໄດ້ພັດທະນາຢ່າງກ້ວາງຂວາງຢູ່ຫວຽດນາມ. ການຫຼິ້ນສະແຕມບໍ່ພຽງແຕ່ເພື່ອສະສົມຄວາມຮູ້ດ້ານປະຫວັດສາດວັດທະນະທຳສິລະປະເທົ່ານັ້ນ, ຫາກຍັງປະກອບສ່ວນແນະນຳ ໂຄສະນາພາບພົດປະເທດຊາດ ແລະ ຊາວຫວຽດນາມອອກສູ່ໂລກພາຍນອກອີກດ້ວຍ.
ສະມາຄົມສະແຕມຫວຽດນາມໄດ້ຮັບການສ້າງຕັ້ງຂຶ້ນກ່ອນນີ້ເຄິ່ງສະຕະວັດ ແລະ ນັບແຕ່ນັ້ນເປັນຕົ້ນມາ, ໄດ້ດຶງດູດຜູ້ເຂົ້າຮ່ວມການຫຼິ້ນສະແຕມໃນທຸກເພດທຸກໄວເປັນຈຳນວນຫຼວງຫຼາຍ, ອັນໄດ້ສ້າງຂະບວນການດຳເນີນຊີວິດວັດທະນະທຳທີ່ຟົດຟື້ນໃນທົ່ວປະເທດ. ຢູ່ຫວຽດນາມ, ມີສະຖານທີ່ຫຼິ້ນສະແຕມ
ຫຼາຍແຫ່ງ ສາມາດຕອບສະໜອງຄວາມເມົາມົວຂອງຜູ້ຫຼິ້ນສະແຕມ, ຊຶ່ງພົ້ນເດັ່ນຄືຫ້ອງວາງສະແດງສະແຕມຢູ່ເຮືອນເລກທີ 14 ຖະໜົນ ເຈີນຮຶງດ້າວ, ຮ່າໂນ້ຍ ແລະ ເຮືອນເລກທີ 18 ຖະໜົນ ດິງຕຽນຮ່ວາງ, ນະຄອນໂຮ່ຈິມິນ. ນອກຈາກນັ້ນ, ຍັງມີບັນດາສະໂມສອນສະແຕມ, ບັນດາສະຖານທີ່, ກຸ່ມນັກຫຼິ້ນສະແຕມຢູ່ບັນດາແຂວງ, ນະຄອນໃນທົ່ວປະເທດ. ນອກຈາກນັ້ນ, ຢູ່ຮ່າໂນ້ຍ, ຍັງມີແຫ່ງໜຶ່ງຖືກເອີ້ນວ່າ ຕະຫຼາດສະແຕມ, ນັ້ນແມ່ນ ເຮືອນເລກທີ 160 ຖະໜົນ ຈ້ຽວຫວຽດເວືອງ, ໃນທຸກໆຕອນເຊົ້າວັນອາທິດ, ບັນດາຜູ້ຫຼິ້ນສະແຕມ ພັດມານີ້ເພື່ອພົບປະແລກປ່ຽນກ່ຽວກັບການຫຼິ້ນສະແຕມ.
ໂດຍເອີ້ນວ່າແມ່ນຕະຫຼາດສະແຕມ, ແຕ່ທີ່ຈິງແລ້ວ, ນີ້ແມ່ນຮ້ານກາເຟນ້ອຍຢູ່ແຄມທາງ. ເຈົ້າຂອງຮ້ານແມ່ນຜູ້ຫຼິ້ນສະແຕມ. ເຖິງວ່າແມ່ນຮ້ານນ້ອຍກໍຕາມ, ແຕ່ມີຫຼາຍຄົນມານີ້ແລກປ່ຽນຊື້ຂາຍສະແຕມ. ທ່ານ ຝ້າມຮ່າວ ຜູ້ຫຼິ້ນສະແຕມໃຫ້ຮູ້ວ່າ :
“ຄຸນຄ່າຂອງສະແຕມແມ່ນນຳມາເຊິ່ງຜົນປະໂຫຍດຫຼາຍຢ່່າງ, ເພາະສະແຕມແຕ່ລະອັນປຽບເໝືອນຜະລິດຕະພັນຈິດຕະກຳທີ່ມີຫົວຄິດປະດິດສ້າງ ຊຶ່ງໄດ້ຮັບການອອກແບບຈາກຈິດຕະກອນຢ່າງລະອຽດອ່ອນ, ແລ້ວກໍຕ້ອງຜ່ານການກວດກາຈຶ່ງຈະອອກຈຳໜ່າຍ. ບໍ່ພຽງແຕ່ເຊັ່ນນັ້ນ, ພາຍຫຼັງຖືກຈຳໜ່າຍ, ສະແຕມຈະຖືກອອກຕິດໃສ່ຊອງຈົດໝາຍ ແລະ ຖືກສົ່ງໄປທົ່ວທຸກແຫ່ງ. ສະແຕມໄປຮອດໄສກໍຈະໂຄສະນາກ່ຽວກັບເຫດການບົນສະແຕມ. ຍົກຕົວຢ່າງຄື ມີບາງຄົນຍັງບໍ່ທັນໄດ້ໄປຫ້າລອງຈັກເທື່ອ, ແຕ່ຜ່ານສະແຕມ, ເຂົາເຈົ້າສາມາດຮູ້ໂລດວ່າ ອ່າວຫ້າລອງ ແມ່ນສວຍງາມຄືແນວໃດ ”
ສະແຕມມີຮູບທ່ານປະທານໂຮ່ຈິມິນເມື່ອກ່ອນນີ້
|
ການຫຼິ້ນສະແຕມຢູ່ຮ່າໂນ້ຍເຄີຍຖືກລວບລວມຕາມຫົວເລື່ອງຕ່າງໆຄື: ສະແຕມກ່ຽວກັບສັດປ່າ, ສະແຕມກ່ຽວກັບພືດພັນ, ສົງຄາມ, ທິວທັດທຳມະຊາດ....ສຳລັບ ສະແຕມຈົດໝາຍເມື່ອກ່ອນນີ້ຖືກຈຳໜ່າຍພຽງຄັ້ງດຽວ. ດັ່ງນັ້ນ, ສະແຕມຖືກເກັບມ້ຽນໄວ້ຍິ່ງດົນກໍຍິ່ງມີຄຸນຄ່າ. ໃນວົງການ ຜູ້ຫຼິ້ນສະແຕມຢູ່ຮ່າໂນ້ຍ, ລຸງ ເລດຶກເວີນແມ່ນຄົນມີຊື່ສຽງຍ້ອນມີຊຸດສະແຕມກ່ຽວກັບຫົວເລື່ອງແມ່ຍິງທີ່ມີຄ່າຫາຍາກ. ບັນດາ ສະແຕມທີ່ມີຄຸນຄ່າແມ່ນ ສະແຕມເປັນຂີດໝາຍແຫ່ງປະຫວັດສາດ, ວັດທະນະທຳເປັນພິເສດ ແລະ ຈຳໜ່າຍເປັນຈຳນວນໜ້ອຍ. ລຸງ ຫງວຽນຕ້ຽນດ້າຍ ຜູ້ຫຼິ້ນສະແຕມມາແຕ່ດົນນານຢູ່ຮ່າໂນ້ຍໃຫ້ຮູ້ວ່າ :
“ ເມື່ອເວົ້າເຖິງຄຸນຄ່າຂອງສະແຕມ ແມ່ນມີຫຼາຍຢ່າງ, ສະແຕມປຽບເໝືອນຫໍພິພິທະພັນຖືກຮັດແຄບຂອງປະເທດໜຶ່ງ, ມັນເປັນພະຍານຫຼັກຖານປະຫວັດສາດຜ່ານທຸກຍຸກສະໄໝ. ສະແຕມກໍແມ່ນຜະລິດຕະພັນຈິດຕະກຳຖືກຮັດແຄບ. ຍ້ອນເຫດນີ້ເອງ, ມັນໄດ້ດຶງດູດຄວາມເມົາມົວຂອງບັນດາຜູ້ຫຼິ້ນສະແຕມ ”
ໃນຍຸກສະໄໝເຕັກໂນໂລຢີພັດທະນາ, ການແລກປ່ຽນຂໍ້ມູນຂ່າວສານແມ່ນສາມາດປະຕິບັດໄດ້ໄວກ່ວາ. ຍ້ອນເຫດນີ້ເອງ, ຈົດໝາຍຂຽນດ້ວຍບິກຖືກຕິດ ສະແຕມເພື່ອຝາກໄປນັ້ນ ແມ່ນນັບມື້ນັບຫຼຸດໜ້ອຍລົງ. ໂດຍຜ່ານການເກັບໂຮມ ສະແຕມ, ບັນດາຜູ້ຫຼິ້ນສະແຕມໃນວັນນີ້ ບໍ່ພຽງແຕ່ສະແດງໃຫ້ເຫັນຄວາມເມົາມົວເທົ່ານັ້ນ, ຫາກຍັງສາມາດເຂົ້າໃຈກ່ຽວກັບປະຫວັດສາດ, ອະດີດຕະການຕື່ມອີກ. ດັ່ງນັ້ນ, ບັນດາຊຸດສະແຕມ ຍິ່ງມີຄວາມໝາຍກ່ວາໃນການດຳລົງຊີວິດ ແລະ ມັນກໍແມ່ນວິທີທີ່ດີທີ່ສຸດເພື່ອຮັກສາ, ໂຄສະນາບັນດາຄຸນຄາປະຫວັດສາດ, ວັດທະນະທຳຂອງຊາດຫວຽດນາມ.