ວັນທີ 11/7/1995, ທ່ານປະທານາທິບໍດີ ອາເມລິກາ Bill Clinton ຖະແຫຼງສ້າງການພົວພັນກັບ ຫວຽດນາມ ເປັນປົກກະຕິ. ຄຳຖະແຫຼງປະຫວັດສາດນັ້ນໄດ້ເປີດໄລຍະໃໝ່ໃນການພົວພັນລະຫວ່າງ 2 ປະເທດເຊິ່ງກ່ອນນີ້ເຄີຍເປັນອາຄາດບາດໝາງຂອງກັນ.
ຈາກບັນດາຄວາມຫຍຸ້ງຍາກທຳອິດ…
ພາບປະກອບ |
ກັບເມືອ ຫວຽດນາມ ໃນຊຸມວັນຂອງເດືອນ 7 ນີ້ໃນຖານະເປັນແຂກຖືກເຊີນພິເສດເພື່ອເຂົ້າຮ່ວມພິທີສະເຫຼີມສະຫຼອງ 20 ປີແຫ່ງວັນສ້າງການພົວພັນລະຫວ່າງ 2 ປະເທດເປັນປົກກະຕິ, ທ່ານອະດີດປະທານາທິບໍດີ ອາເມລິກາ Bill Clinton ໄດ້ຖືວ່າ: “ການພົວພັນລະຫວ່າງ ຫວຽດນາມ - ອາເມລິກາ ຄືໃນປະຈຸບັນແມ່ນຍ້ອນມີຄວາມມານະພະຍາຍາມອັນໃຫຍ່ຫຼວງທີ່ບໍ່ເຄີຍມີມາຂອງທັງ 2 ຝ່າຍ”. ທ່ານແບ່ງປັນວ່າ: ໃນຈຸດເວລາກ່ອນນີ້ 20 ປີ, ເມື່ອທ່ານເຕື້ອງເຖິງບັນຫາສ້າງການພົວພັນກັບ ຫວຽດນາມ ເປັນປົກກະຕິ, ມີຫຼາຍຄົນຄິດວ່ານີ້ແມ່ນແນວຄວາມຄິດທີບໍ່ສະຫຼາດ ແລະ ບໍ່ມີໃຜສາມາດຄິດເຖິງບັນດາສິ່ງທີ່ 2 ປະເທດບັນລຸໄດ້ໃນຈຸດເວລານີ້:
“ກ່ອນນີ້ 20 ປີ, ເມື່ອເວົ້າເຖິງການສ້າງການພົວພັນ ຫວຽດນາມ - ອາເມລິກາ ເປັນປົກກະຕິ ແມ່ນສິ່ງທີ່ຫຍຸ້ງຍາກທີ່ສຸດ, ພິເສດແມ່ນບັນດາຜູ້ໃນລຸ້ນຂອງພວກຂ້າພະເຈົ້າ, ບັນດາຜູ້ເຄີຍຖືກຮັບບາດເຈັບໃນສະໜາມຮົບຢູ່ ຫວຽດນາມ. ໃຜກໍຄິດວ່ານັ້ນແມ່ນສິ່ງທີ່ປ່ວງບ້າ, ແຕ່ເມື່ອເພື່ອນມິດ ຫວຽດນາມ ຮັບຮູ້ພວກຂ້າພະເຈົ້າ ແລະ ພວກຂ້າພະເຈົ້າຮັບຮູ້ບັນດາເພື່ອນມິດ ຫວຽດນາມ ໝາຍຄວາມວ່າ, ພວກເຮົາໄດ້ປົດປ່ອຍຕົນເອງ. ສ້າງການພົວພັນລະຫວ່າງ 2 ປະເທດເປັນປົກກະຕິ ໄດ້ຊ່ວຍໃຫ້ພວກເຮົາຮຳບາດແຜສົງຄາມ, ສ້າງການພົວພັນ ຊຸກຍູ້ການຮ່ວມມື.”
… ເຖິງໝາກຜົນແຫ່ງການຮ່ວມມືຢ່າງແທດຈິງ
ຫວນຄືນໄລຍະ 20 ປີຜ່ານມາ, ການພົວພັນຮ່ວມມືລະຫວ່າງຫວຽດນາມ ແລະ ອາເມລິກາ ໄດ້ລື່ນກາຍຄວາມຫວັງ. ການຄ້າ 2 ສົ້ນຈາກລະດັບ 25 ລ້ານ USD ໄດ້ເພີ່ມຂຶ້ນເຖິງ 35 ຕື້ USD. ຫວຽດນາມ ພວມກາຍເປັນໜຶ່ງໃນບັນດາຄູ່ຮ່ວມມືໃຫຍ່ສຸດຂອງອາເມລິກາ ໃນບັນດາປະເທດອາຊຽນ. ປີ 2014, ຫວຽດນາມ ໄດ້ລື່ນກາຍໄທ ເພື່ອກາຍເປັນຄູ່ສົ່ງອອກໃຫຍ່ກວ່າໝູ່ຂອງອາຊຽນ ເຂົ້າຕະຫຼາດອາເມລິກາ. ໃນຂົງເຂດລົງທຶນ, ອາເມລິກາ ພວມກາຍເປັນນັກລົງທຶນໃຫຍ່ອັນດັບທີ 7 ໃນຈຳນວນບັນດາປະເທດ ແລະ ເຂດແຄວ້ນທີ່ລົງທຶນໂດຍກົງເຂົ້າຫວຽດນາມ. ຫວຽດນາມ ແລະ ອາເມລິກາ ພວມສືບຕໍ່ບັນດາການເຈລະຈາສັນຍາການຄ້າຂ້າມປະຊີຟິກ (TPP), ຄາດວ່າ, ຈະສຳເລັດໃນທ້າຍປີ 2015. ຖ້າຫາກສັນຍາດັ່ງກ່າວໄດ້ຮັບການລົງນາມ, ບັນດາກາລະໂອກາດກ່ຽວກັບການຮ່ວມມືດ້ານການຄ້າ, ເສດຖະກິດ ແລະ ການລົງທຶນລະຫວ່າງ 2 ປະເທດຈະໄດ້ຮັບການເປີດກວ້າງ ນັບທັງລວງກວ້າງ ແລະ ລວງເລິກ. ພິເສດແມ່ນໃນຂົງເຂດການສຶກສາ, ໄດ້ມີນັກສຶກສາຫວຽດນາມ ກວ່າ 17.000 ຄົນໄດ້ໄປຮໍ່າຮຽນ ແລະ ເຮັດວຽກຢູ່ອາເມລິກາ, ຢືນອັນດັບທີ 8 ໃນຈຳນວນບັນດາປະເທດມີນັກສຶກສາຮໍ່າຮຽນຢູ່ອາເມລິກາ. ບໍ່ພຽງແຕ່ສະຫງວນບັນດານະໂຍບາຍດ້ານທຶນສຶກສາໃຫ້ແກ່ຫວຽດນາມເທົ່ານັ້ນ ໃນປີນີ, ໂຄງການຮໍ່າຮຽນ Fullbright ທີ່ມີຊື່ສຽງຂອງອາເມລິກາ ຈະສ້າງມະຫາວິທະຍາໄລ Fullbright ປອດກຳໄລແຫ່ງທຳອິດຢູ່ຫວຽດນາມ ອີກດ້ວຍ. ເມື່ອຮັບດຳລົງຕຳແໜ່ງເປັນເອກອັກຄະລັດຖະທູດອາເມລິກາ ປະຈຳຫວຽດນາມ ອາຍຸການໃໝ່ໃນເດືອນ 12 ປີ 2014, ທ່ານ Ted Ossius ໄດ້ແບ່ງປັນວ່າ “ບັນດາຊຸມປີ 90, ບໍ່ມີໃຜອາດຄິດວ່າຈະມີການພົວພັນຄູ່ຮ່ວມມືຄືແນວນັ້ນໄດ້?”.
“ຄາວນັ້ນ, ຂ້າພະເຈົ້າພວມຢູ່ຫວຽດນາມ, ເຖິງວ່າພວກຂ້າພະເຈົ້າລ້ວນແຕ່ມີຄວາມຫວັງຕໍ່ບັນດາສິ່ງດີທີ່ສຸດ, ແຕ່ພວກຂ້າພະເຈົ້າບໍ່ມີໃຜສາມາດຄາດຄະເນໄດ້ວ່າ ການພົວພັນລະຫວ່າງ 2 ປະເທດສາມາດພັດທະນາໄດ້ຄືໃນປະຈຸບັນ. ທ່ານລັດຖະມົນຕີວ່າການກະຊວງການຕ່າງປະເທດ John Kerry ໄດ້ເວົ້າຢ່າງຖືກຕ້ອງທີ່ສຸດ ເມື່ອທ່ານມາຫວຽດນາມ ໃນປີ 2014 ວ່າ, ບໍ່ມີ 2 ປະເທດໃດທີ່ມີຄວາມມານະພະຍາຍາມເຮັດໄດ້ຫຼາຍສິ່ງ, ຫຼາຍຢ່າງ ແລະ ເຮັດໄດ້ດີ ເພື່ອພະຍາຍາມສ້າງການພົວພັນ, ປ່ຽນແປງປະຫວັດສາດ ແລະ ປ່ຽນແປງອະນາຄົດໄດ້ຄື 2 ປະເທດຫວຽດນາມ ແລະ ອາເມລິກາ”.
ເພີ່ມທະວີຄວາມເຂົ້າອົກເຈົ້າໃຈ, ສ້າງຄວາມໄວ້ເນື້ອເຊື່ອໃຈ
ມັນຖືກກັບຄຳເວົ້າຂອງທ່ານເອກອັກຄະລັດຖະທູດ Ted Ossius ທີ່ວ່າ, ການພົວພັນລະຫວ່າງຫວຽດນາມ ແລະ ອາເມລິກາ ໃນໄລຍະ 20 ປີຜ່ານມາຄືດັ່ງ “ຕົ້ນໄມ້ໄດ້ຮັບການປົວລະບັດເປັນຢ່າງດີທີ່ສຸດ”, ດ້ວຍບັນດາຄວາມມານະພະຍາຍາມສຸງສຸດຂອງທັງ 2 ຝ່າຍ. ຊຸກຍູ້ຄວາມໄວ້ເນື້ອເຊື່ຶອໃຈ, ເພີ່ມທະວີຄວາມເຂົ້າໃຈເພື່ອມຸ່ງໄປສູ່ອະນາຄົດ ແມ່ນທິດນຳເຊິ່ງການນຳ 2 ປະເທດໃຫ້ບຸລິມະສິດ. ສິ່ງດັ່ງກ່າວສະແດງອອກຜ່ານການຢ້ຽມຢາມຂັ້ນສູງຫຼາຍຄັ້ງ ແລະ ສ້າງຕັ້ງບັນດາກົນໄກຮ່ວມມືຢ່າງມີປະສິດທິຜົນ. 2 ຝ່າຍໄດ້ພ້ອມກັນສ້າງການຮ່ວມມືໃນທຸກຂົງເຂດ, ໃນນັ້ນມີທັງບັນດາບັນຫາໄດ້ຮັບຖືວ່າ “ສະດຸ້ງໄວ” ຄື: ສິດທິມະນຸດ, ການປ້ອງກັນຊາດ, ການແກ້ໄຂບັນດາບັນຫາພາຍຫຼັງສົງຄາມ… ປີ 2013, ເຊິ່ງແມ່ນປີທີ່ເປັນຂີດໝາຍສຳຄັນພິເສດໃນການພົວພັນລະຫວ່າງຫວຽດນາມ ແລະ ອາເມລິກາ ເມື່ອ 2 ປະເທດສ້າງຕັ້ງການພົວພັນຄູ່ຮ່ວມມືຮອບດ້ານ, ດ້ວຍບັນດາບັນຫາໄດ້ຮັບບຸລິມະສິດ. ຕີລາຄາກ່ຽວກັບການພົວພັນນີ, ທ່ານຮອງນາຍົກລັດຖະມົນຕີ ຟ້າມບິ່ງມິງ ໃຫ້ຮູ້ວ່າ.
“ດ້ວຍແນວຄວາມຄິດມຸ່ງໄປສູ່ອະນາຄົດ, ຫວຽດນາມ ແລະ ອາເມລິກາ ໄດ້ມີຄວາມມານະພະຍາຍາມຫຼາຍຢ່າງ ເພື່ອຜ່ານຜ່າອະດີດຕະການ, ມຸ່ງໄປສູ່ອະນາຄົດ. ການພົວພັນລະຫວ່າງຫວຽດນາມ - ອາເມລິກາ ໄດ້ລື່ນກາຍຂອບເຂດ 2 ຝ່າຍ, ນັບມື້ນັບປະກອບສ່ວນສຳຄັນເຂົ້າໃນສັນຕິພາບ, ການຮ່ວມມື ແລະ ພັດທະນາຢູ່ພາກພື້ນອາຊີ - ປາຊີຟິກ ແລະ ໃນໂລກ. ການຮ່ວມມືລະຫວ່າງ 2 ປະເທດໄດ້ຊີ້ໃຫ້ເຫັນວ່າ, ສັນຕິພາບ ແລະ ຄວາມວັດຖະນາຖາວອນຢູ່ພາກພື້ນອາຊີຕາເວັນອອກສ່ຽງໃຕ້ ເວົ້າສະເພາະ ແລະ ພາກພື້ນອາຊີປາຊີຟິກ ເວົ້າລວມ ໄດ້ສ້າງເງື່ອນໄຂຫຼາຍຢ່າງ ເພື່ອຮັກສາການພົວພັນລະຫວ່າງຫວຽດນາມ ແລະ ອາເມລິກາ ໃຫ້ພັດທະນາຢ່າງສະດວກສະບາຍກວ່າອີກ”.
20 ປີຜ່ານມາ, ການພົວພັນລະຫວ່າງຫວຽດນາມ ແລະ ອາເມລິກາ ໄດ້ຮັບການສ້າງຂຶ້ນດ້ວຍຜົນແຫ່ງການຮ່ວມມືລະອຽດຫຼາຍຢ່າງ. ເປັນຂີດໝາຍເຫດການ 20 ປີແຫ່ງການສ້າງການພົວພັນລະຫວ່າງ 2 ປະເທດເປັນປົກກະຕິ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ໄປຢ້ຽມຢາມອາເມລິກາ ຢ່າງເປັນທາງການ. ນີ້ແມ່ນການຢ້ຽມຢາມເປັນຄັ້ງທຳອິດຂອງເລຂາທິການໃຫຍ່ພັກກອມມູນິດຫວຽດນາມ ເຖິງອາເມລິກາ, ເປັນຂີດໝາຍບາດກ້າວຕໍ່ໄປຂອງການພົວພັນລະຫວ່າງ 2 ປະເທດ.