ໃນຂອບເຂດການຢ້ຽມຢາມສະຫະລັດອາເມລິກາ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ມີການໂອ້ລົມຢູ່ສູນຄົ້ນຄ້ວາຍຸດທະສາດ ແລະ ສາກົນອາເມລິກາ CSIS ຢູ່ນະຄອນຫຼວງ ວໍຊິງຕັນ. ບົດກ່າວປາໄສຂອງ ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ພາດຫົວຂໍ້ວ່າ : “ການພົວພັນຫວຽດນາມ-ອາເມລິກາໃນໄລຍະພັດທະນາໃໝ່”, ໃນນັ້ນ ເນັ້ນໜັກເຖິງບັນດາຜົນປະໂຫຍດຂອງ 2 ປະເທດ ກໍຄືຍົກອອກບັນດາວຽກງານທີ່ຕ້ອງປະຕິບັດເພື່ອນຳການພົວພັນ 2 ຝ່າຍຫວຽດນາມ-ອາເມລິກາກ້າວຂຶ້ນຢ່າງບໍ່ຢຸດຢັ້ງ
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ມີການໂອ້ລົມຢູ່ສູນຄົ້ນຄ້ວາຍຸດທະສາດ ແລະ ສາກົນອາເມລິກາ CSIS |
ຂຶ້ນຕົ້ນບົດກ່າວປາໄສ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ທົບທວນຄືນບາງເຫດການກ່ຽວກັບປະຫວັດການພົວພັນຫວຽດນາມ-ອາເມລິກາ ແລະ ຖືວ່າ : ເຖິງວ່າຫວຽດນາມ ແລະ ອາເມລິກາຕ້ອງໄດ້ຜ່ານບັນດາໄລຍະທີ່ໜ້າໂສກເສົ້າ ຈົນເຖິງເວລາສ້າງການພົວພັນເປັນປົກກະຕິໃນປີ 1995 ກໍຕາມ, ແຕ່ຄວາມຫວັງຢ່າງສະເໝີຕົ້ນສະເໝີປາຍຂອງຫວຽດນາມ ແມ່ນຢາກມີສາຍພົວພັນມິດຕະພາບ ແລະ ການຮ່ວມມືອັນດີງາມກັບອາເມລິກາ.
20 ປີແຫ່ງການພົວພັນຢ່າງຕັ້ງໜ້າໃນຂອບເຂດ 2 ຝ່າຍ ແລະ ຫຼາຍຝ່າຍ
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ເນັ້ນໜັກວ່າ : ກ່ອນນີ້ 20 ປີ, ເບິ່ງຄືວ່າ ມີບໍ່ເທົ່າໃດຄົນຈະວາດນຶກໄດ້ວ່າ ດ້ວຍວິທີໃດ ທີ່ 2 ປະເທດຫວຽດນາມ ແລະ ອາເມລິກາ ອາດຈະຜ່ານຜ່າຄວາມເຈັບປວດຂອງສົງຄາມໄດ້ ເພື່ອສ້າງສາຍພົວພັນພັດທະນາຢ່າງແຂງແຮງ ແລະ ຕັ້ງໜ້າຄືໃນປະຈຸບັນ. ນັ້ນແມ່ນໝາກຜົນແຫ່ງຄວາມມານະພະຍາຍາມຂອງການນຳ ແລະ ປະຊາຊົນ 2 ປະເທດ ດ້ວຍຈິດໃຈປິດອະດີດໄວ້, ຜ່ານຜ່າຄວາມແຕກຕ່າງກັນ, ເສີມຂະຫຍາຍຄວາມຄ້າຍຄືກັນ, ມຸ່ງໄປສູ່ອະນາຄົດ. ນີ້ກໍແມ່ນຕົວຢ່າງກ່ຽວກັບຜົນສຳເລັດຂອງການພົວພັນລະຫວ່າງບັນດາປະເທດທີ່ເຄີຍເປັນຄູ່ຕໍ່ສູ້ກັນໃນອະດີດຕະການ, ມີລະບອບການເມືອງທີ່ແຕກຕ່າງກັນ, ສອດຄ່ອງກັບທ່າອຽງສັນຕິພາບ, ການຮ່ວມມືຂອງຍຸກສະໄໝ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ກ່າວວ່າ :
“ການພົວພັນຫວຽດນາມ-ອາເມລິກາໄດ້ພັດທະນາຢ່າງຕັ້ງໜ້າໃນ 20 ປີທີ່ຜ່ານມາບົນພື້ນຖານເຄົາລົບບັນດາຫຼັກການອັນເປັນພື້ນຖານຂອງກົດໝາຍສາກົນ, ນັ້ນແມ່ນເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ລະບອບການເມືອງຂອງກັນ ແລະ ຮ່ວມມືແບບຕ່າງຝ່າຍຕ່າງມີຜົນປະໂຫຍດ. ໃນຊຸມປີທີ່ຜ່ານມາ, ຫວຽດນາມ ແລະ ອາເມລິກາ ໄດ້ບັນລຸຄວາມຮັບຮູ້ລວມເທື່ອລະກ້າວກ່ຽວກັບຫຼັກການເຫຼົ່ານີ້. ນີ້ກໍແມ່ນປັດໄຈທີ່ສຳຄັນໃຫ້ແກ່ການສ້າງຄວາມເຊື່ອໝັ້ນດ້ານການເມືອງລະຫ່ວາງ 2 ປະເທດ ”
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຖືວ່າ ໃນສະຖານະການໂລກມີການຫັນປ່ຽນໄປຢ່າງວ່ອງໄວ ແລະ ສັບສົນຄືໃນປະຈຸບັນ, ຫວຽດນາມສະໜັບສະໜູນບັນດາຮູບແບບຮ່ວມມືເພື່ອພັດທະນາແບບຍືນຍົງ ແລະ ຍຸດຕິທຳ, ຕ່າງຝ່າຍຕ່າງມີຜົນປະໂຫຍດລະຫວ່າງບັນດາປະເທດ; ສະໜັບສະໜູນການພົວພັນມິດຕະພາບ, ການຮ່ວມມືຢ່າງສະເໝີພາບລະຫວ່າງບັນດາປະເທດບົນຫຼັກການເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບການເມືອງ, ບໍ່ແຊກແຊງເຂົ້າວຽກງານພາຍໃນຂອງກັນ, ແກ້ໄຂທຸກການຂັດແຍ້ງດ້ວຍມາດຕະການໂດຍສັນຕິວິທີ ສອດຄ່ອງກັບກົດບັດ ສ.ປ.ຊ ແລະ ກົດໝາຍສາກົນ.
ເຮັດໃຫ້ການພົວພັນຄູ່ຮ່ວມມືຮອບດ້ານຍິ່ງເລິກເຊິ່ງ ແລະ ອຸດົມສົມບູນຫຼາຍຂຶ້ນ
ໃນບົດປາໄສ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ສະຫງວນສ່ວນຫຼາຍເພື່ອເຕື້ອງເຖິງການພົວພັນຫວຽດນາມ-ອາເມລິກາໃນໄລຍະທີ່ຈະມາເຖິງ, ໃນນັ້ນ, ເນັ້ນໜັກວ່າ ໃນສະເພາະໜ້າ, 2 ປະເທດຕ້ອງພ້ອມກັນມານະພະຍາຍາມເຮັດໃຫ້ການພົວພັນຄູ່ຮ່ວມມືຮອບດ້ານຍິ່ງເລິກເຊິ່ງ ແລະ ອຸດົມສົມບູນຫຼາຍຂຶ້ນຢ່າງບໍ່ຢຸດຢັ້ງ, ສ້າງພື້ນຖານຍົກການພົວພັນລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່ໃນອະນາຄົດ. ຕາມທ່ານເລຂາທິການໃຫຍ່ ຫງວຽນຟູ້ຈ້ອງແລ້ວ, ກຳລັງໜູນທີ່ສຳຄັນເພື່ອຊຸກຍູ້ການພົວພັນຫວຽດນາມ-ອາເມລິກາຕາມກຳນົດທິດ ນັ້ນແມ່ນຜົນປະໂຫຍດລວມຊຶ່ງ 2 ປະເທດພ້ອມກັນແບ່ງປັນ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ກ່າວວ່າ :
“ ທີ 1. ພວກເຮົາມີຜົນປະໂຫຍດລວມໃນການເພີ່ມທະວີການຮ່ວມມື 2 ຝ່າຍຢ່າງຮອບດ້ານເພື່ອການພັດທະນາ ແລະ ວັດທະນາຖາວອນຂອງແຕ່ລະປະເທດ, ເພື່ອຄວາມຜາສຸກຂອງປະຊາຊົນ 2 ປະເທດ. ທີ 2, ພວກເຮົາມີຜົນປະໂຫຍດລວມໃນການຊຸກຍູ້ການຮ່ວມມືໃນພາກພື້ນເພື່ອປະກອບສ່ວນຮັບປະກັນສັນຕິພາບ, ສະຖຽນລະພາບ, ການຮ່ວມມື ແລະ ວັດທະນາຖາວອນຢູ່ອາຊີ-ປາຊີຟິກ, ພິເສດແມ່ນການຮັກສາສັນຕິພາບ, ຄວາມໝັ້ນຄົງ, ປອດໄພ ແລະ ເສລີພາບໃນການເດີນທະເລ, ການບິນຢູ່ທະເລຕາເວັນອອກບົນພື້ນຖານເຄົາລົບກົດໝາຍສາກົນ. ທີ 3, ພວກເຮົາກໍມີຜົນປະໂຫຍດລວມໃນການຮ່ວມມື, ສົມທົບຄວາມມານະພະຍາຍາມເພື່ອປະກອບສ່ວນໃຫ້ແກ່ບັນດາບັນຫາລວມຂອງໂລກດ້ວຍຖານະແມ່ນສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ ”
ທ່ານເລຂາທິການໃຫຍ່ ຫງວຽນຟູ້ຈ້ອງ ໄດ້ຊີ້ໃຫ້ເຫັນເນື້ອໃນ 8 ປະການ ຊຶ່ງ ຫວຽດນາມ ແລະ ອາເມລິກາຄວນປະຕິບັດເພື່ອນຳການພົວພັນ 2 ຝ່າຍກ້າວຂຶ້ນຢ່າງບໍ່ຢຸດຢັ້ງ. ນັ້ນແມ່ນ: ເພີ່ມທະວີຄວາມເຂົ້າອົກເຂົ້າໃຈກັນ, ກໍ່ສ້າງ ແລະ ປັບປຸງຄວາມໄວ້ເນື້ອເຊື່ອໃຈດ້ານການເມືອງ; ການຮ່ວມມືດ້ານເສດຖະກິດ-ການຄ້າ-ການລົງທຶນ; ການຮ່ວມມືໃນບັນດາຂົງເຂດວິທະຍາສາດ, ເຕັກໂນໂລຢີ, ການສຶກສາ, ບຳລຸງສ້າງ, ສາທາລະນະສຸກ, ສິ່ງແວດລ້ອມ; ການຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບ; ການຮ່ວມມືໃນຂົງເຂດມະນຸດສະທຳ, ພົວພັນແລກປ່ຽນປະຊາຊົນດ ບັນຫາສິດທິມະນຸດ, ການຮ່ວມມືໃນບັນດາບັນຫາພາກພື້ນ ແລະ ສາກົນ. ທ່ານກ່າວວ່າ :
“ ບັນດາບົດຮຽນໃນປະຫວັດສາດ ແລະ ບັນດາໝາກຜົນຕົວຈິງໃນ 20 ປີທີ່ຜ່ານມາ ໄດ້ສະແດງໃຫ້ເຫັນຢ່າງຈະແຈ້ງວ່າ : ນ້ຳໃຈມິດຕະພາບ ແລະ ການຮ່ວມມື ແມ່ນທິດກ້າວເດີນອັນດຽວ ແລະ ຖືກຕ້ອງຂອງການພົວພັນ 2 ຝ່າຍຫວຽດນາມ-ອາເມລິກາ, ແມ່ນຜົນປະໂຫຍດຂອງ 2 ປະເທດ, ສອດຄ່ອງກັບຜົນປະໂຫຍດຂອງປະຊາຊົນ 2 ປະເທດ, ຂອງພາກພື້ນ ແລະ ໂລກ. ບັນດາຄວາມແຕກຕ່າງກັນລະຫວ່າງ 2 ປະເທດແມ່ນສະພາບຕົວຈິງພາວະວິໄສ ແລະ ແມ່ນສິ່ງຕ້ອງເປັນໄປໃນໂລກທີ່ມີຫຼາຍຮູບຫຼາຍສີ, ເຊິ່ງໃນນັ້ນບັນດາປະຊາຊາດມີສິດຊອກຫາ, ເລືອກເຟັ້ນເສັ້ນທາງພັດທະນາສະເພາະຂອງຕົນ. ແຕ່ຄວາມຈິງໃນ 20 ປີທີ່ຜ່ານມາ, ໄດ້ໃຫ້ເຫັນວ່າ 2 ປະເທດພວກເຮົາສາມາດແບ່ງປັນຫຼາຍຜົນປະໂຫຍດທີ່ຄ້າຍຄືກັນ ແລະ ບັນດາຄວາມແຕກຕ່າງກັນ ບໍ່ອາດເປັນສິ່ງກີດຂວາງສຳລັບການພັດທະນາການພົວພັນມິດຕະພາບ ແລະ ການຮ່ວມມືຫວຽດນາມ-ອາເມລິກາ ” .
ບົດປາໄສຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ຮັບຄວາມສົນໃຈ ຕິດຕາມ ແລະ ຊົມເຊີຍຈາກຜູ້ຄົນທັງຫຼາຍ. ພາຍຫຼັງກ່າວບົດປາໄສ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງໄດ້ສົນທະນາໂດຍກົງກັບບັນດານັກຮຽນຮູ້, ນັກຄົ້ນຄ້ວາ ແລະ ນັກການທູດກ່ຽວກັບແນວທາງພັດທະນາຂອງຫວຽດນາມຊຶ່ງຈະນຳມາປຶກສາຫາລື ແລະ ຮັບຮອງເອົາທີ່ກອງປະຊຸມໃຫຍ່ຄັ້ງທີ 12 ຂອງພັກໃນຕົ້ນປີ 2016 ພ້ອມກັບບັນດາເນື້ອໃນທີ່ກ່ຽວຂ້ອງເຖິງການພົວພັນຫວຽດນາມ-ອາເມລິກາ.