(vovworld) - ນັບແຕ່ຫວຽດນາມ - ອາເມລິກາ ສ້າງການພົວພັນທາງການທູດເປັນປົກກະຕິເປັນເວລາ 20 ປີ, ການພົວພັນຫວຽດນາມ - ອາເມລິກາໄດ້ຮັບການເພີ່ມທະວີໃນຫຼາຍຂົງເຂດ, ພິເສດແມ່ນຂົງເຂດເສດຖະກິດ, ການຄ້າ ແລະ ການລົງທຶນ. ການແລກປ່ຽນດ້ານການຄ້າລະຫວ່າງສອງປະເທດໄດ້ມີບາດກ້າວເຕີບໂຕບຸກທະລຸ ແລະ ປະຈຸບັນ, ອາເມລິກາ ແມ່ນຕະຫຼາດສົ່ງອອກໃຫຍ່ສຸດຂອງຫວຽດນາມ.
ຕາມຜູ້ຊ່ຽວຊານດ້ານເສດຖະກິດ,ການສົ່ງອອກຂອງຫວຽດນາມ
ເຂົ້າຕະຫຼາດອາເມລິກາຈະເພີ່ມຂຶ້ນຢ່າງແຮງໃນຊຸມປີຕໍ່ໜ້າ
(ພາບປະກອບ: KT)
ການພົວພັນດ້ານການຄ້າລະຫວ່າງຫວຽດນາມ - ອາເມລິກາ ໃນຊຸ່ມປີຜ່ານມາໄດ້ມີບາດກ້າວພັດທະນາທີ່ດີ. ວົງເງິນການຄ້າສອງສົ້ນຍາມໃດກໍ່ຮັກສາ ແລະ ພັດທະນາ. ຖ້າຫາກວ່າປີ 2002, ວົງເງິນຂາເຂົ້າຂາອອກລະຫວ່າງຫວຽດນາມ - ອາເມລິກາບັນລຸເກືອບ 3 ຕື້ USD ເທົ່ານັ້ນ, ຮອດປີ 2014 ໄດ້ເພີ່ມຂຶ້ນທົບປະມານ 12 ເທົ່າ, ແມ່ນປະມານ 35 ຕື້ USD. ໃນນັ້ນການສົ່ງອອກຂອງຫວຽດນາມເຂົ້າອາເມລິກາ ກໍ່ເພີ່ມຂຶ້ນຢ່າງຕໍ່ເນື່ອງໃນຕະຫຼອດ 15 ປີຜ່ານມາ. ຈາກອັດຕາ 1% ຍອດມູນຄ່າສົ່ງອອກຂອງສະຫະສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ເຂົ້າອາເມລິກາໃນປີ 2000, ໄລ່ຮອດທ້າຍປີ 2014, ຫວຽດນາມກວມ 22% ຍອດມູນຄ່າສົ່ງອອກຂອງພາກພື້ນເຂົ້າຕະຫຼາດນີ້ (ເພີ່ມຂຶ້ນເກືອບ 36 ເທົ່າ). ນີ້ກໍ່ແມ່ນເທື່ອທຳອິດທີ່ຫວຽດນາມ ລື່ນກາຍບັນດາປະເທດໃນພາກພື້ນເພື່ອກາຍເປັນປະເທດສົ່ງອອກໃຫຍ່ກວ່າໝູ່ຂອງພາກພື້ນເຂົ້າຕະຫຼາດອາເມລິກາ.
ຕາມບັນດາຜູ້ຊ່ຽວຊານດ້ານເສດຖະກິດແລ້ວ, ການສົ່ງອອກຂອງຫວຽດນາມເຂົ້າອາເມລິກາ ຈະເພີ່ມຂຶ້ນຢ່າງແຮງໃນຊຸມປີຕໍ່ໄປ. ຮອດປີ 2020, ການສົ່ງອອກຂອງຫວຽດນາມ ເຂົ້າຕະຫຼາດອາເມລິກາ ຄາດວ່າບັນລຸເກືອບ 57 ຕື້ USD ແລະ ກວມກວ່າ 34% ຍອດມູນຄ່າສົ່ງອອກຂອງອາຊຽນ ເຂົ້າຕະຫຼາດນີ້. ທ່ານ ກູ່ຈີ໋ເລີ໋ຍ, ຫົວໜ້າສະຖາບັນຄົ້ນຄ້ວາທະວີບອາເມລິກາ, ໃຫ້ຮູ້ວ່າ:
“ພື້ນຖານເສດຖະກິດອາເມລິກາເລີ່ມຜ່ານຜ່າໄລຍະວິກິດການ ແລະ ກ້າວເຂົ້າສູ່ໄລຍະຟື້ນຕົວ, ພັດທະນາ. ບັນດາກາລະໂອກາດໃຫ້ແກ່ການສົ່ງອອກສິນຄ້າຫວຽດນາມເຂົ້າອາເມລິກາຈະໃຫຍ່ທີ່ສຸດເມື່ອທຽບໃສ່ຊຸມປີກ່ອນ. ຍ້ອນພື້ນຖານເສດຖະກິດອາເມລິກາພັດທະນາ, ການໃຊ້ສອຍພາຍໃນປະເທດເພີ່ມຂຶ້ນ, ສິ່ງດັ່ງກ່າວຈະໜູນຊ່ວຍໃຫ້ສິນຄ້າຫວຽດນາມສຳພັດກັບຕະຫຼາດອາເມລິກາໃນປີ 2015 ຫຼາຍກວ່າຊຸມປີກ່ອນ“.
ຄຽງຄູ່ກັບການພົວພັນດ້ານການຄ້າແລ້ວ, ອາເມລິກາ ກໍ່ແມ່ນໜຶ່ງໃນບັນດາຄູ່ຮ່ວມມືລົງທຶນໃຫຍ່ຂອງຫວຽດນາມ. ໄລ່ຮອດເດືອນ 2 ປີນີ້, ອາເມລິກາ ມີ 729 ໂຄງການລົງທຶນເຂົ້າຫວຽດນາມ, ດ້ວຍຍອດຈຳນວນທຶນແມ່ນປະມານ 11 ຕື້ USD, ຢືນອັນດັບ 7 ໃນຈຳນວນ 101 ປະເທດ ແລະ ເຂດແຄວ້ນ ທີ່ລົງທຶນໂດຍກົງເຂົ້າຫວຽດນາມ. ປະຈຸບັນ, ມີຫຼາຍກຸ່ມບໍລິສັດໃຫຍ່ຂອງອາເມລິກາ ໄດ້ມີໜ້າຢູ່ຫວຽດນາມ. ໃນນັ້ນ, 2 ກຸ່ມບໍລິສັດເຕັກໂນໂລຢີແຖວໜ້າຂອງອາເມລິກາ ແມ່ນ Intel ແລະ Microsoft ພວມມີບັນດາໂຄງການໃຫຍ່ເພື່ອຍູ້ແຮງການເຄື່ອນໄຫວລົງທຶນຢູ່ຫວຽດນາມກວ່າ, ຫັນແຫ່ງນີ້ແມ່ນສະຖານທີ່ຜະລິດສຳຄັນຂອງຕົນໃນທົ່ວໂລກ. ທ່ານນາງ Sherry Boger, ປະທານສະຫະສະມາຄົມວິສາຫະກິດອາເມລິກາ ປະຈຳຫວຽດນາມ, ຖືວ່າ ຫວຽດນາມແມ່ນແຫ່ງທີ່ດຶງດູດວົງການລົງທຶນຕ່າງປະເທດຢູ່ອາຊຽນ ທີ່ສຸດ. ຄວາມສາມາດບົ່ມຊ້ອນໃນການຮ່ວມມືດ້ານການ - ການລົງທຶນລະຫວ່າງສອງປະເທດຍັງມີຫຼາຍທີ່ສຸດ ແລະ ມີຫຼາຍກາລະໂອກາດເພື່ອຍົກວົງເງິນສອງຝ່າຍຂຶ້ນໃນໄລຍະຈະມາເຖິງ, ຜ່ານບັນດາສັນຍາການຄ້າເສລີ ກໍ່ຄືຄວາມມານະພະຍາຍາມປັບປຸງສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ.
“ສະພາແຫ່ງຊາດອາເມລິກາ ໄດ້ໃຫ້ສັດຕະຍາບັນສິດດຳເນີນການຄ້າ ເພື່ອໃຫ້ສັດຕະຍາບັນສັນຍາຄູ່ຮ່ວມມືຮ່ວມມືເສດຖະກິດຂ້າມປາຊິຟິກ (TPP) ໂດຍໄວ. ພວກຂ້າພະເຈົ້າຫວັງວ່າ, ຫວຽດນາມ ແລະ ອາເມລິກາຈະມີການການເຈລະຈາສຳເລັດຜົນ. ພວກຂ້າພະເຈົ້າສະໜັບສະໜູນ TPP ເພາະວ່າສັນຍານີ້ຈະເປັນພື້ນຖານໃຫ້ແກ່ການເຊື່ອມໂຍງໃນພາກພື້ນ, ຊຸກຍູ້ການພັດທະນາເສດຖະກິດ, ສັງຄົມ. ຮ່ວມມືໃນ TPP ຈະກາຍເປັນພື້ນຖານ ແລະ ກຳລັງໜູນໃຫ້ແກ່ການພົວພັນຄູ່ຮ່ວມມືຮອງດ້ານຫວຽດນາມ - ອາເມລິກາ. ບັນດາວິສາຫະກິດອາເມລິກາ ປາຖະໜາວ່າ, TPP ຈະຮັບການເຈລະຈາສຳເລັດຜົນໂດຍໄວ. ພ້ອນກັນນັ້ນ, ບັນດາວິສາຫະກິດອາເມລິກາ ກໍ່ໄດ້ ແລະ ພວມຊອກຫາກາລະໂອກາດລົງທຶນ, ພັດທະນາຢູ່ຫວຽດນາມ.“
ເຖິງຢ່າງໃດກໍຕາມ, ເບິ່ງສັງລວມ, ຄວາມສາມາດບົ່ມຊ້ອນ ແລະ ກາລະໂອກາດເປີດກ້ວາງການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງຫວຽດນາມ ແລະ ອາເມລິກາ ຍັງໃຫຍ່ຫຼວງທີ່ສຸດ. ສະນັ້ນ, ສັນຍາຄູ່ຮ່ວມມືຂ້າມປາຊີຟິກ (TPP) ພວມໄດ້ຮັບຄວາມລໍຖ້າຈາກປະຊາຄົມວິສາຫະກິດ 2 ຝ່າຍ. TPP ບໍ່ພຽງແຕ່ເປີດກ້ວາງກາລະໂອກາດ ກ່ຽວກັບຕະຫຼາດກ່ວາເທົ່ານັ້ນ, ຫາກຍັງຍົກລະດັບການຮ່ວມມື ລະຫວ່າງບັນດານັກລົງທຶນຂອງ ຫວຽດນາມ ແລະ ອາເມລິກາ ໃນໄລຍະຈະມາເຖິງອີກດ້ວຍ. ທ່ານ ຫວູຕ໋ຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ, ຖືວ່າ:
“ຂ້າພະເຈົ້າຄິດວ່າ ຈະມີບາດກ້າວພັດທະນາບຸກທະລຸໃນການພົວພັນລະຫວ່າງ 2 ຝ່າຍ. ພວກເຮົາຫວັງວ່າໃນໄລຍະສັ້ນ ອາເມລິກາ ຈະກາຍເປັນນັກລົງທຶນອັນດັບໜຶ່ງ ກໍຄືຄູ່ຮ່ວມມືຂາເຂົ້າ-ຂາອອກແຖວໜ້າຂອງ ຫວຽດນາມ. ປະຈຸບັນ, ພວກເຮົາພວມຢູ່ໃນວິວັດການສ້າງໂຄງປະກອບຄືນໃໝ່ ແລະ ປະຕິບັດການຫັນເປັນປະເທດອຸດສາຫະກຳ ແລະ ທັນສະໄໝ. ອາເມລິກາ ພວມກຳເອົາບັນດາເຕັກໂລໂນຊີແຖວໜ້າໃນຫຼາຍຂົງເຂດ ແລະ ຄວາມສາມາດບົ່ມຊ້ອນ ດ້ານການເງິນຂອງບັນດາວິສາຫະກິດອາເມລິກາ ໃຫຍ່ຫຼວງທີ່ສຸດ. ສະນັ້ນ, ໃນໄລຍະຈະມາເຖິງ, ທ່າອ່ຽງຂອງ ອາເມລິກາ ແມ່ນເພີ່ມທະວີການລົງທຶນເຂົ້າ ຫວຽດນາມ ໃນຂົງເຂດການເງິນ, ທະນາຄານ, ປະກັນໄພ, ກໍຄືໃນຂົງເຂດອຸດສາຫະກຳ, ຄອມພິວເຕີ, ເອເລັກໂຕນິກ, ກະສິກຳ, ການຄ້າ, ການທ່ອງທ່ຽວ… ແນ່ນອນວ່າຈະເພີ່ມຂຶ້ນຢ່າງແຮງ”.
ບັນດານັກຊ່ຽວຊານດ້ານເສດຖະກິດຄາດຄະເນວ່າ: ການຄ້າລະຫວ່າງຫວຽດນາມ-ອາເມລິກາ ໃນປີ 2015 ຈະລື່ນກາຍຕົວເລກ 35 ຕື້ USD ຂອງປີ 2014. ສາຍເຫດແມ່ນ ການເຮັດລະບຽບການປະຕິຮູບດ້ານການບໍລິຫານ, ການປັບປຸງດ້ານເຕັກນິກ, ຍົກສູງຄຸນນະພາບສິນຄ້າສົ່ງອອກຂອງຫວຽດນາມນັບມື້ນັບດີກວ່າ. ນອກນັ້ນ, ໃນໄລຍະຈະມາເຖິງ, ບັນດານັກລົງທຶນອາເມລິກາ ຈະລົງທຶນເຂົ້າຫວຽດນາມຢ່າງໃຫຍ່ຫຼວງ. ບົນພື້ນຖານແຫ່ງການພັດທະນາເສດຖະກິດລະຫວ່າງ 2 ປະເທດໃນ 20 ປີຜ່ານມາ, ພວກເຮົາສາມາດມີຄວາມປະເອີບໃຈ ຕໍ່ການພົວພັນດ້ານເສດຖະກິດ, ການຄ້າ ແລະ ການລົງທຶນ ຫວຽດນາມ-ອາເມລິກາ ແມ່ນຈະມີບາດກ້າວບຸກທະລຸໃນໄລຍະຈະມາເຖິງ.