ການພົວພັນອາເມລິກາ-ຈີນ ພວມມີບັນດາການຜັນແປທີ່ເຄັ່ງຕຶງພໍສົມຄວນ. ສາຍເຫດຂອງການແຕກແຫງຄັ້ງຫຼ້າສຸດໃນການພົວພັນລະຫວ່າງ 2 ພື້ນຖານເສດຖະກິດອັນດັບໜຶ່ງໃນໂລກ ຊຶ່ງເລີ່ມຈາກບັນດາການໂຕ້ຖຽງກັນກ່ຽວກັບບັນຫາທະເລຕາເວັນອອກ. ໃນສະພາວະທີ່ປັກກິງພວມດຳເນີນບັນດາການເຄື່ອນໄຫວບູລະນະ ກໍ່ສ້າງສ້ອມແປງ, ເຮັດໃຫ້ປ່ຽນແປງສະພາບເດີມຢູ່ເກາະຕ່າງໆໃນເຂດ ທະເລຕາເວັນອອກ, ວໍຊິງຕັນ ນັບມື້ນັບສະແດງໃຫ້ເຫັນແຈ້ງທ່າທີຂອງຕົນດ້ວຍສານຕ່າງໆທີ່ແຂງກະດ້າງ ແລະ ຍົກອອກ “ ເສັ້ນກຳນົດແດງ ” ໃນການພົວພັນກັບປັກກິງ.
ທ່ານລັດຖະມົນຕີການຕ່າງປະເທດອາເມລິກາ John Kerry ພົບປະກັບທ່ານປະທ່ານປະເທດຈີນ ສີຈີນຜີງ (ພາບ: Reuters) |
ນັບຕັ້ງແຕ່ວໍຊິງຕັນປະກາດ ແລະ ເລີ່ມປະຕິບັດນະໂຍບາຍ “ສ້າງຄວາມດຸນດຽງຄືນໃໝ່” ກ່ຽວກັບດ້ານການເມືອງ, ການທະຫານກັບອາຊີນັ້ນ, ການພົວພັນລະຫວ່າງ 2 ປະເທດມະຫາອຳນາດຍິ່ງປະສົບກັບຄວາມບໍ່ລົງລອຍກັນຫຼາຍຢ່າງ. ເຖິງວ່າ ທັງ 2 ຝ່າຍຕ່າງກໍຢືນຢັນວ່າ ການພົວພັນ 2 ຝ່າຍຍັງເປັນປັກກະຕິ, ແຕ່ເພື່ອຄວບຄຸມ ການພົວພັນ 2 ຝ່າຍກ້າວເດີນຢ່າງຖືກທິດນັ້ນ, ທັງປັກກິງ ແລະ ວໍຊິງຕັນ ຕ່າງກໍເຂົ້າໃຈວ່າ ບໍ່ງ່າຍດາຍແຕ່ຢ່າງໃດ.
ການທ້າທາຍຕໍ່ຄວາມເປັນລະບຽບຮຽບຮ້ອຍ, ຄວາມສະຫງົບປອດໄພໃນພາກພື້ນ
ເພື່ອເປັນການຢັ້ງຢືນນະໂຍບາຍຫັນປ່ຽນຈຸດສຸມໄປສູ່ອາຊີນັ້ນ, ໃນການເດີນທາງຢ້ຽມຢາມຈີນເປັນເວລາ 2 ວັນທີ່ຜ່ານມາ, ທ່ານລັດຖະມົນຕີການຕ່າງປະເທດອາເມລິກາ John Kerry ໄດ້ຢືນຢັນຄືນໃໝ່ເຖິງຄຳໝັ້ນໝາຍຢ່າງເດັດດຽວຂອງອາເມລິກາ ແມ່ນຈະປ້ອງກັນບັນດາປະເທດພັນທະມິດຂອງຕົນໃນພາກພື້ນ ແລະ ໄດ້ເລີ່ມຂີດເສັ້ນກຳນົດແດງ ສ່ວນໃດໜຶ່ງຢູ່ບັນດາເຂດທະເລທີ່ປັກກິງຖືວ່າມີອະທິປະໄຕ. ໃນການພົບປະກັບບັນດາເຈົ້າໜ້າທີ່ຂັ້ນສູງຂອງຈີນ, ທ່ານລັດຖະມົນຕີການຕ່າງປະເທດອາເມລິກາ John Kerry ໄດ້ຢືນຢັນເຖິງຄວາມຕັດສິນໃຈອັນແຮງກ້າຂອງອາເມລິກາໃນການປົກປ້ອງບັນດາຜົນປະໂຫຍດຂອງວໍຊິງຕັນ ແລະ ບັນດາປະເທດພັນທະມິດຂອງຕົນຢູ່ທະເລຕາເວັນອອກ, ພ້ອມກັນນັ້ນ ກໍຮຽກຮ້ອງປັກກິງ ຈົ່ງມີການກະທຳເພື່ອແກ້ໄຂຄວາມເຄັ່ງຕຶງຢູ່ ທະເລຕາເວັນອອກ, ເຂົ້າຮ່ວມການສົນທະນາພ້ອມກັບບັນດາປະເທດອາຊຽນ.
ແຕ່ວ່າ ແທນທີ່ພ້ອມກັນເຫັນດີເປັນເອກະສັນກ່ຽວກັບວິທີແກ້ໄຂທາງການທູດໃຫ້ແກ່ພາກພື້ນເພື່ອສາມາດກ້າວໄປເຖິງຂໍ້ຕົກລົງກັນ ແລະ ໄປສູ່ຂໍ້ກຳນົດການປະພຶດລະຫວ່າງອາຊຽນ ແລະ ຈີນນັ້ນ, ທ່ານຫວາງອີ ທ່ານລັດຖະມົນຕີການຕ່າງປະເທດຈີນ ພັດສະແດງຫຼັກໝັ້ນທີ່ແຂງກະດ້າງ ເມື່ອຖະແຫຼງວ່າ ຈີນເດັດດຽວປົກປັກຮັກສາອະທິປະໄຕຂອງຕົນ.
ອາດຈະເກີດການປະທະກັນທາງທະຫານຢູ່ ທະເລຕາເວັນອອກຫຼືບໍໍ່?
ເລື່ອງອາເມລິການັບມື້ນັບມີການກະທຳຢ່າງຂ້ຽວຂາດໃນບັນຫາ ທະເລຕາເວັນອອກ ກໍເລີ່ມມາຈາກຄວາມເຄັ່ງຕຶງທີ່ນັບມື້ນັບເພີ່ມຂຶ້ນໃນພາກພື້ນ. ກວ່າ 1 ປີທີ່ຜ່ານມາ, ເລື່ອງ ຟິລິບປີນ ຊຶ່ງແມ່ນປະເທດພັນທະມິດຂອງ ອາເມລິກາ ໄດ້ກ່າວຕຳໜິຕິຕຽນຢ່າງຕໍ່ເນືອງສຳລັບບັນດາການເຄື່ອນໄຫວບູລະນະບຽດຢຶດທະເລຂອງຈີນ, ຊຶ່ງໄດ້ດຶງດູດຄວາມສົນໃຈຈາກຫາງສຽງສາກົນ. ຟີລິບປິນ ໄດ້ກະຕຸກຊຸກຍູ້ ອາເມລິກາ ຈົ່ງມີທັດສະນະທີ່ແຂງແຮງກວ່າ ແລະ ນີ້ແມ່ນຈຸດເວລາເພື່ອໃຫ້ ອາເມລິກາບໍ່ພາດໂອກາດເພື່ອຍົກລະດັບການສົ່ງຜົນສະທ້ອນຂອງຕົນຢູ່ພາກພື້ນ. ໂດຍແມ່ນເສັ້ນທາງທະເລທີ່ສຳຄັນ, ດັ່ງນັ້ນ ບໍ່ວ່າເຫດການໃດໆທີ່ກໍ່ໃຫ້ຂາດສະຖຽນລະພາບຢູ່ ທະເລຕາເວັນອອກ ຈະສົ່ງຜົນສະທ້ອນຢ່າງໃຫຍ່ຫຼວງເຖິງຫຼາຍປະເທດໃນໂລກ, ໃນນັ້ນ ມີ ອາເມລິກາ. ປະຈຸບັນ, ທະເລຕາເວັນອອກ ໄດ້ກາຍເປັນຫົວເລື່ອງອັນດັບໜຶ່ງໃນນະໂຍບາຍຂອງ ອາເມລິກາຢູ່ອາຊີ. ກະຊວງການຕ່າງປະເທດ ອາເມລິກາ ເຄີຍຖະແຫຼງວ່າ ການແກ້ໄຂບັນດາການຂັດແຍ້ງກັນຢູ່ ທະເລຕາເວັນອອກ ແມ່ນ ບຸລິມະສິດທາງການທູດອັນດັບໜຶ່ງຂອງ ອາເມລິກາ. ອາເມລິກາມີຄວາມວິຕົກກັງວົນວ່າ ບັນດາການເຄື່ອນໄຫວບູລະນະ, ກໍ່ສ້າງສ້ອມແປງ ແລະ ຫັນເປັນການທະຫານຢູ່ ທະເລຕາເວັນອອກ ຈະແມ່ນບາດກ້າວລິເລີ່ມໃຫ້ເລື່ອງປັກກິງປະກາດເຂດປ້ອງກັນອາກາດຢູ່ແຫ່ງນີ້. ດັ່ງນັ້ນ, ອາເມລິກາຕັດສິນສົ່ງສານໃຫ້ຈີນ ແລະ ໂລກຮັບຮູ້ວ່າ ການເຄື່ອນໄຫວເມື່ອມໍ່ໆມານີ້ຂອງຈີນໄດ້ເດີນໄກເກີນໄປ.
ໃນຫຼາຍປີທີ່ຜ່ານມາ, ຄືປີລະຄັ້ງໜຶ່ງ, ອາເມລິກາລ້ວນແຕ່ຈັດສົ່ງກອງກຳປັ່ນຮົບໄປຍັງ ທະເລຕາເວັນອອກ. ພ້ອມກັບການເພີ່ມທະວີການບັນດາການຊ້ອມຮົບຮ່ວມກັບ ບັນດາປະເທດພັນທະມິດຂອງຕົນ, ການແວ່ຢາມຂອງບັນດາຝູງກຳປັ່ນຮົບຂອງ ອາເມລິກາໃນໄລຍະມໍ່ໆມານີ້ ໄດ້ເປັນສານສົ່ງເຖິງປັກກິງ, ເປັນການທ້າທາຍຕໍ່ຍຸດທະສາດເພີີ່ມທະວີອະທິປະໄຕຂອງຈີນ. ຕາມບັນດານັກສັງເກດການແລ້ວ, ໄພອັນຕະລາຍເກີດການປະທະກັນທາງທະຫານຢູ່ ທະເລລະຫວ່າງອາເມລິກາ ແລະ ຈີນ ແມ່ນອາດຈະເກີດຂຶ້ນ ເພາະນະໂຍບາຍຫັນປ່ຽນຍຸດທະສາດໄປສູ່ອາຊີ-ປາຊີຟິກຂອງປະທານາທິບໍດີອາເມລິກາ Obama ພວມສ້າງໃຫ້ມີການສູ້ຢັນກັນທີ່ບໍ່ອາດຫຼີກລ້ຽງໄດ້ລະຫວ່າງ 2 ປະເທດ.
ບັນດາຄວາມແຕກຕ່າງກັນຍາກທີ່ຈະແກ້ໄຂໄດ້
ບໍ່ພຽງແຕ່ມີທັດສະນະທີ່ແຕກຕ່າງກັນໃນບັນຫາທະເລຕາເວັນອອກເທົ່ານັ້ນ, ອາເມລິກາ ແລະ ຈີນຍັງຄ້າງຄາໃນຫຼາຍດ້ານອີກ ຄືຈາກການຄ້າ, ສິດທິມະນຸດຕະຫຼອດຮອດຄວາມປອດໄພທາງເຄືອຂ່າຍອິນເຕິເນັດ… ເພາະສະນັ້ນ, ພ້ອມກັບການຮ່ວມມືໃນຂົງເຂດປ່ຽນແປງດິນຟ້າອາກາດ, ສ.ປ.ປ. ເກົາຫຼີ ແລະ ໂຄງການນິວເຄຼຍຂອງອີຣານນັ້ນ, ບັນດາຄວາມແຕກຕ່າງກັນທີ່ຍັງບໍ່ທັນຖືກຮັດແຄບ ຍັງຄົງແມ່ນຈຸດພິເສດໃນການພົວພັນອາເມລິກາ-ຈີນ. ທີ່ການພົບປະກັບທ່ານລັດຖະມົນຕີການຕ່າງປະເທດອາເມລິກາ John Kerry , ທ່ານປະທ່ານປະເທດຈີນ ສີຈີນຜີງໄດ້ຢືນຢັນຄວາມຫວັງຢາກພັດທະນາການພົວພັນລະຫວ່າງຈີນ-ອາເມລິກາໃຫ້ຂຶ້ນສູ່ລະດັບສູງໃໝ່. ໂດຍອີງໃສ່ທ່າອຽງຂົນຂວາຍຂອງພື້ນຖານການເມືອງ ແລະ ເສດຖະກິດໂລກ, ການຮ່ວມມືລະຫວ່າງ 2 ປະເທດມະຫາອຳນາດແມ່ນຕ້ອງເປັນໄປ. ແຕ່ແງ່ຫວັງຂອງສາຍສຳພັນນີ້ ຈະຖືກຮັດແໜ້ນ ແລະ ມີຄວາມອົບອຸ່ນເຖິງລະດັບໃດ ພັດຂຶ້ນກັບການແກ້ໄຂຄວາມແຕກຕ່າງກັນດ້ວຍລະດັບໃດ, ໂດຍສະເພາະ ເມື່ອອາເມລິກາຍັງບໍ່ທັນປ່ຽນແປງຍຸດທະສາດຫັນໄປສູ່ອາຊີ ແລະ ສະຖຽນລະພາບໃນພາກພື້ນນີ້ ແມ່ນຜົນປະໂຫຍດທີ່ຫຼັກແຫຼ່ງຂອງວໍຊິງຕັນ.