(vovworld)- ໃນຊຸມມື້ມໍ່ມານີ້, ອາເມລິກາ ແລະ ຝ່າຍຕາເວັນຕົກ ກ່າວຫາລັດເຊຍຢ່າງລຽນຕິດກ່ຽວກັບເລື່ອງລັດເຊຍພວມກໍ່ສ້າງສູນການທະຫານຢູ່ ຊີຣີ. ໃນຂະນະນັ້ນ, ເປັນຄັ້ງທຳອິດ ລັດເຊຍ ຍອມຮັບວ່າບໍ່ເຄີຍປົກປິດການມີຫນ້າຂອງກຳລັງທະຫານຢູ່ປະເທດຕາເວັນອອກກາງຈັກເທື່ອ. ຊີຣີ ກາຍເປັນແນວຮົບສູ້ຢັນໃຫມ່ ລະຫວ່າງ ລັດເຊຍ ແລະ ອາເມລິກາຢ່າງເປັນທາງການ.
ວັນທີ 15/9, ອາເມລິກາ ສືບຕໍ່ ຕຳນິຕິຕຽນ ລັດເຊຍ ໄດ້ຜັນຂະຫຍາຍລົດຖັງຫລາຍຄັນ ເຖິງສະຫນາມບິນແຫ່ງຫນຶ່ງຢູ່ ຊີຣີ, ເພື່ອຊ່ວຍອຳນາດການປົກຄອງປະເທດນີ້ ຕ້ານຄືນອົງການກະບົດລັດອິດສະລາມຂະຫນາມນາມເອງ (IS). ກ່ອນຫນ້ານັ້ນ ທຳນຽບ 5 ແຈ ຂອງອາເມລິກາ ໄດ້ຮັບຮູ້ວ່າ ຜ່ານການວິໄຈບັນດາພາບຖ່າຍທາງດາວທຽມໃຫ້ເຫັນວ່າ ມີເຮືອບິນຢ່າງຫນ້ອຍສຸດ 7 ລຳ ຂົນສົ່ງ Condor ຂອງລັດເຊຍ ໄດ້ບິນຈາກລັດເຊຍ ເຖິງ ຊີຣີ ຜ່ານເຂດນ່ານຟ້າ ອີຣານ ແລະ ອີຣັກ. ນອກນັ້ນ ມີລົດຖັງ T90 6 ຄັນ, ລູກປືນໃຫຍ່ 15 ລູກ, ລົດຫຸ່ມເກາະ 35 ຄັນ ແລະ ທະຫານເຮືອສູ້ຮົບທາງບົກ 200 ຄົນ ໄດ້ມີຫນ້າ ຢູ່ ສະຫນາມບິນ ຢູ່ມໍ່ກັບນະຄອນ Latakia, ຊື່ງແມ່ນກຳແພງປ້ອງກັນຂອງປະທານາທິບໍດີ ຊີຣີ Bashar al Assad. ວົງການເຈົ້າຫນ້າທີ່ ອາເມລິກາ ຖືວ່າ: ການກະທຳນີ້ ຂອງມົດສະກູ ແມ່ນສ່ວນຫນຶ່ງຂອງ ບັ້ນຮົບປີນຂັ້ນໄດການທະຫານ ເພື່ອສ້າງຕັ້ງຖານທີ່ໝັ້ນການທະຫານຍຸດທະສາດຢູ່ຊີຣີ.
ລັດຖະມົນຕີການຕ່າງປະເທດລັດເຊຍ Sergei Lavrov
ແລະ ລັດຖະມົນຕີການຕ່າງປະເທດ ອາເມລິກາ John Kerry
|
ຄວາມເຄັ່ງຕຶງໃຫມ່ໃນການພົວພັນລະຫວ່າງ ອາເມລິກາ ແລະ ລັດເຊຍ
ເຖິງວ່າ ອາເມລິກາ ເລັ່ງລັດບັນດາປະເທດມໍ່ກັບ ຊີຣີ ຄື: ອີຣັກ ແລະ ອີຣານ ຫ້າມບໍ່ໃຫ້ຍົນຂອງລັດເຊຍ ບິນຜ່ານເຂດນ່ານຟ້າ, ແຕ່ເກືອບຄືວ່າບັນດາຄຳຮຽກຮ້ອງ ຈາກ ວໍຊິງຕັນ ລ້ວນແຕ່ໄດ້ຮັບຄວາມສົນໃຈຈາກບັນດາປະເທດ. ຖ້ຽວບິນຫວ່າງແລ້ວນີ້ ຂອງລັດເຊຍ ຂົນສົ່ງເຄື່ອງຊ່ວຍເຫລືອມະນຸດສະທຳທີ່ຈຳເປັນກວ່າ 80 ໂຕນ ໃຫ້ແກ່ການສ້າງຕັ້ງຄ້າຍຫລີ້ໄພຢູ່ທີ່ນີ້ໄດ້ ໄປເຖິງ ຊີຣີ ຢ່າງປອດໄພ ສິ່ງດັ່ງກ່າວສະແດງໃຫ້ເຫັນວ່າ ສຽງເວົ້າຂອງອາເມລິກາ ແມ່ນບໍ່ມີຄວາມໝາຍ. ສຳລັບ ມົດສະກູ, ໂດຍບໍ່ຫົວຊາຕໍ່ບັນດາຄຳກ່າວເຕືອນຈາກ ຝ່າຍວໍຊິງຕັນ, ມົດສະກູ ຖະແຫລງການຫນູນຊ່ວຍດ້ານການທະຫານໃຫ້ອຳນາດການປົກຄອງ Damas ແມ່ນການເຄື່ອນໄຫວປົກກະຕິ ແລະ ໄດ້ຮັບການປະຕິບັດໂດຍອີງໃສ່ສັນຍາທີ່ໄດ້ຮັບການລົງນາມໃນຫລາຍປີຜ່ານມາລະຫວ່າງສອງປະເທດ. ໃນຂະນະນັ້ນ, ຊີຣີ ກໍໄດ້ອອກສຽງປະຕິເສດບັນດາຄຳກ່າວຫາຂອງ ອາເມລິກາ ສຳລັບ ລັດເຊຍ ແມ່ນການເສກສັນປັ້ນແຕ່ງ.
ຄວາມຈິງ, ການມີຫນ້າຂອງກຳລັງທະຫານ ລັດເຊຍ ຢູ່ ຊີຣີ ແມ່ນມີມາແຕ່ດົນນານແລ້ວ. ນັບແຕ່ປີ 1971, ລັດເຊຍ ໄດ້ເຊົ່າຖານທີ່ໝັ້ນທະຫານເຮືອຂະຫນາດນ້ອຍຢູ່ ນະຄອນກຳປັ່ນ Tartus ຂອງຊີຣີ ແລະ ມາຮອດປະຈຸບັນ ນີ້ແມ່ນຖານທີ່ໝັ້ນທະຫານເຮືອແຫ່ງຫນຶ່ງດຽວຂອງ ມົດສະກູ ຢູ່ ທະເລເມດີເຕຮາເນຍ. ໄລຍະຕົ້ນປີ, ອາເມລິກາ ແລະ ຝ່າຍຕາເວັນຕົກ ມີຄວາມວິຕົກກັງວົນເມື່ອປະທານາທິບໍດີ Assad ຖະແຫລງວ່າ ລັດເຊຍ ອາດຈະກໍ່ສ້າງຖານທີ່ໝັ້ນການທະຫານແຫ່ງໃຫຍ່ກວ່າຢູ່ Tartus.
ລັດເຊຍ ແມ່ນປະເທດໃກ້ຊິດສະຫນິດສະຫນົມກັບອຳນາດການປົກຄອງຂອງປະທານາທິບໍດີ Assad ໃນ ໃນຕະຫລອດ 4 ປີເຄິ່ງ ແຫ່ງການຜັນແປຂອງປະເທດນີ້ ເມື່ອ ອຳນາດການປົກຄອງ ຊີຣີ ຕ້ອງປະເຊີນຫນ້າກັບຂະບວນການລຸກຮຶ້ຂຶ້ນຂອງຝ່າຍຄ້ານ ແລະ ນັບທັງບັນດາອົງການກໍ່ການຮ້າຍ. ສະນັ້ນ ການຫນູນຊ່ວຍ ຊີຣີ ໃນການຕໍ່ສູ້ຕ້ານພວກກະບົດ IS ທີ່ພວມເຄື່ອນໄຫວຢ່າງແຮງຢູ່ປະເທດນີ້ ຜ່ານການຫນູນຊ່ວຍກຳລັງການທະຫານ, ຍຸດທະພັນ ແມ່ນສ່ວນຫນຶ່ງໃນແຜນການຮ່ວມມືດ້ານການທະຫານທີ່ຍາວນານຂອງ ມົດສະກູ ແລະ Damascus. ເຖິງຢ່າງໃດກໍຕາມ, ດ້ວຍທັດສະນະຂອງ ອາເມລິກາ ບໍ່ວ່າ ໃນຄວາມມານະພະຍາຍາມໃດເພື່ອຫນູນຊ່ວຍໃຫ້ອຳນາດການປົກຄອງ Assad ກໍ ສາມາດເຮັດໃຫ້ຂາດສະຖຽນລະພາບ ແລະ ເປັນທີ່ຈະແຈ້ງວ່າ ລັດເຊຍ ພວມກະກຽມໃຫ້ການແຊກແຊງດ້ານການທະຫານ ພາຍໃຕ້ຮູບການ ຍູ້ໃຫ້ IS ຖອຍໄປ.
ກຳລັງທະຫານປະສົມໃຫມ່ ຕ້ານ IS ໂດຍລັດເຊຍ ນຳຫນ້າ ໃກ້ຈະໄດ້ຮັບການສ້າງຕັ້ງຂຶ້ນ
ໃນຫລາຍປີຜ່ານມາ, ລັດເຊຍ ແລະ ອາເມລິກາ ມີຄວາມບໍ່ລົງລອຍກັນຢ່າງເລິກເຊິ່ງກ່ຽວກັບບັນຫາ ຊີຣີ. ໃນຂະນະທີ່ລັດເຊຍ ສະຫນັບສະຫນູນ ລັດຖະບານ ຊີຣີ ແລະ ສະຫນອງ ອາວຸດໃຫ້ປະເທດນີ້ ແຕ່ອາເມລິກາ ພັດຢາກ ປັດເຂ່ຍປະທານາທິບໍດີ Assad. ແຕ່ໃນໄລຍະ 4 ປີຜ່ານມາ ສົງຄາມ ຢູ່ ຊີຣີ ບໍ່ທັນມີສັນຍານສິ້ນສຸດເທື່ອ ອັນ ໄດ້ສະແດງໃຫ້ເຫັນຄວາມບໍ່ລົງລອຍກັນຂອງບັນດາປະເທດມະຫາອຳນາດໃນການຢຸດຕິສະພາບໃຊ້ຄວາມຮຸນແຮງຢູ່ປະເທດນີ້. ມາຮອດປະຈຸບັນ, ນະໂຍບາຍຂອງ ອາເມລິກາ ແລະ ຝ່າຍຕາເວັນຕົກ ເພື່ອໂຄ່ນລົ້ມອຳນາດການປົກຄອງ Assad ຖືກປະລາໄຊຢ່າງສິ້ນເຊິງ ເຖິງວ່າໄດ້ນຳໃຊ້ຫລາຍມາດຕະການລົງໂທດດ້ານເສດຖະກິດ, ການບຸກໂຈມຕີທາງອາກາດ, ການອົບຮົມກຳລັງຝ່າຍຄ້ານລຸກຮື້ຂຶ້ນ. ນັບແຕ່ເມື່ອເກີດເສິກກາງເມືອງໃນປີ 2011, ບັນດາການປະທະກັນຢູ່ ຊີຣີ ໄດ້ເຮັດໃຫ້ມີຢ່າງຫນ້ອຍສຸດ 240.000 ເສຍຊີວິດ. ຄຽງຄູ່ກັນນັ້ນ ຄວາມຕັດສິນໃຈໂຄ່ນລົ້ມອຳນາດການປົກຄອງ B. Assad ຂອງ ອາເມລິກາ ແລະ ຝ່າຍຕາເວັນຕົກ ໄດ້ກາຍເປັນຫນຶ່ງໃນບັນດາສາຍເຫດກໍ່ໃຫ້ເກີດວິກິດການອົບພະຍົບຄັ້ງໃຫຍ່ສຸດ ນັບແຕ່ພາຍຫລັງສົງຄາມໂລກຄັ້ງທີ 2 ຢູ່ ຊີຣີ.
ຫວ່າງແລ້ວນີ້, ຢູ່ ເວທີປາໄສເສດຖະກິດ Vladivostok, ມົດສະກູ ໄດ້ສະເຫນີສ້າງຕັ້ງກຳລັງທະຫານປະສົມສາກົນໃຫມ່ ເພື່ອຕ້ານ IS ແທນໃຫ້ກຳລັງທະຫານປະສົມປະຈຸບັນ ໂດຍ ອາເມລິກາ ນຳຫນ້າ. ກຳລັງທະຫານປະສົມ ໂດຍລັດເຊຍ ສະເຫນີ ຈະລວມມີ: ຕວກກີ, ອາຣັບບີຊາອະດີດ, ຈໍແດນ ແລະ ເປັນຕົ້ນມີການເຂົ້າຮ່ວມຂອງ ອຳນາດການປົກຄອງ Damascus. ໃນສະພາບການນັ້ນ, ເລື່ອງ ລັດເຊຍ ຫນູນຊ່ວຍຢ່າງຫລວງຫລາຍໃຫ້ລັດຖະບານ ຊີຣີ ໃນຊຸມມື້ຜ່ານມາ ອາດຈະແມ່ນບາດກ້າວເບື້ອງຕົ້ນທີ່ຈຳເປັນເພື່ອສ້າງຕັ້ງກຳລັງທະຫານປະສົມຕ້ານ IS ທີ່ມີປະສິດທິຜົນຢູ່ປະເທດນີ້.
ຕາມການສັງເກດຂອງວົງການນັກໄຈ້ແຍກແລ້ວ, ການມີຫນ້າຂອງ ລັດເຊຍ ຢູ່ ຊີຣີ ຈະບໍ່ຊ່ວຍຕີໃຫ້ IS ປະລາໄຊ ແຕ່ສາມາດຊ່ວຍປົກປ້ອງອຳນາດການປົກຄອງຂອງ ທ່ານ B. Assad ພ້ອມທັງ ຊ່ວຍ ມົດສະກູ ມີຜົນສະທ້ອນຕື່ມອີກຢູ່ ຕາເວັນອອກກາງ. ໃນຂະນະນັ້ນ ອາເມລິກາ ນັບມື້ນັບສະແດງໃຫ້ເຫັນຄວາມອ່ອນຍົນໃນການຊ່ວງເສງຍາດເອົາທີ່ຕັ້ງຢູ່ພາກພື້ນນີ້. ເລື່ອງເຫັນດີເຂົ້າຮ່ວມບັ້ນຮົບຢູ່ຊີຣີຂອງລັດເຊຍ ໃນແມ່ນສະແດງໃຫ້ເຫັນຄວາມມານະພະຍາຍາມໂຄ່ນລົ້ມ ອຳນາດການປົກຄອງ B. Assad ຂອງ ວໍຊິງຕັນ ຖືກປະລາໄຊ. ສະນັ້ນ ຍາກທີ່ ຈະມີການຮ່ວມມືລະຫວ່າງສອງປະເທດມະຫາອຳນາດທີ່ສູ້ຢັນກັນໃນການຕໍ່ສູ້ຕ້ານ IS ຢູ່ ຊີຣີ ໃນໄລຍະຈະມາເຖິງໄດ້.