ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພວມທຳການຢ້ຽມຢາມ ແລະ ເຮັດວຽກຢູ່ຈີນ ເພື່ອເຂົ້າຮ່ວມກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນ ແລະ ງານຕະຫຼາດນັດຈີນ-ອາຊຽນຄັ້ງທີ 13. ໃນສະພາວະທີ່ປະຊາຄົມເສດຖະກິດອາຊຽນໄດ້ຮັບການສ້າງຕັ້ງຂຶ້ນນັ້ນ, ມີກາລະໂອກາດຮ່ວມມືຫຼາຍຢ່າງພວມຖືກເປີດກ້ວາງໃຫ້ແກ່ທັງຈີນ ແລະ ອາຊຽນເວົ້າລວມ ແລະ ແຕ່ລະປະເທດເວົ້າສະເພາະ, ໃນນັ້ນມີຫວຽດນາມ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຢ້ຽມຊົມຮ້ານວາງສະແດງສິນຄ້າຂອງຫວຽດນາມ |
ຫວຽດນາມ ແລະ ຈີນໄດ້ສ້າງການພົວພັນເປັນປົກກະຕິເມື່ອເດືອນ 11/1991 ນັ້ນແຕ່ນັ້ນເປັນຕົ້ນມາ, ການຄ້າ ແລະ ການລົງທຶນລະຫວ່າງ 2 ປະເທດໄດ້ຮັບການຟື້ນຟູຢ່າງວ່ອງໄວ ແລະ ນັບມື້ນັບຂະຫຍາຍຕົວ.
ບັນດາຕົວເລກທີ່ເປັນໜ້າປະທັບໃຈ
25 ປີທີ່ຜ່ານມາ, ຍອດວົງເງິນການຄ້າຂອງຫວຽດນາມກັບຈີນໄດ້ເພີ່ມຂຶ້ນທົບເກືອບ 2000 ເທົ່າ, ຈາກລະດັບກວ່າ 30 ລ້ານ USD ເມື່ອປີ 1991 ໄດ້ເພີ່ມຂຶ້ນເຖິງກວ່າ 66 ຕື້ USD ໃນປີ 2015. ໄລ່ມາຮອດທ້າຍເດືອນ 7/2015, ຈີນຍາມໃດກໍແມ່ນຄູ່ຄ້າລາຍໃຫຍ່ກວ່າໝູ່ຂອງຫວຽດນາມ, ສ່ວນຫວຽດນາມໃນປະຈຸບັນ ໄດ້ກາຍເປັນຄູ່ຄ້າລາຍໃຫຍ່ແຖວໜ້າຂອງຈີນຢູ່ອາຊີຕາເວັນອອກສ່ຽງໃຕ້. 2 ຝ່າຍພວມຕັດສິນໃຈນຳໃຊ້ບັນດາມາດຕະການທີ່ມີປະສິດທິຜົນເພື່ອຊຸກຍູ້ການຄ້າ 2 ຝ່າຍໃຫ້ພັດທະນາຢ່າງດຸ່ນດຽງ, ຍືນຍົງ, ສູ້ຊົນຍົກວົງເງິນການຄ້າ 2 ຝ່າຍໃຫ້ບັນລຸ 100 ຕຶ້ USD ໃນປີ 2017. ທາງດ້ານການລົງທຶນ, ຈີນພວມມີ 1500 ໂຄງການລົງທຶນຢູ່ຫວຽດນາມ ດ້ວຍຍອດທຶນຈົດທະບຽນແມ່ນເກືອບ 11 ຕື້ USD ຢືນອັນດັບທີ 9 ໃນຍອດຈຳນວນ 116 ປະເທດ ແລະ ເຂດແຄ້ວນທີ່ເຂົ້າ ມາລົງທຶນຢູ່ຫວຽດນາມ. ການລົງທຶນຂອງຈີນຢູ່ຫວຽດນາມສືບຕໍ່ເພີ່ມຂຶ້ນຢ່າງວ່ອງໄວນັບທັງທາງດ້ານປະລີມານ, ຂອບຂະໜາດ ແລະ ບໍລິເວນລົງທຶນ.
ບັນດາກາລະໂອກາດໃໝ່
ໃນສະພາບການໃໝ່, ພື້ນຖານເສດຖະກິດຈີນພວມບືນຕົວຂຶ້ນກາຍເປັນໜຶ່ງໃນບັນດາພື້ນຖານແຖວໜ້າໃນໂລກ. ການທີ່ປະຊາຄົມອາຊຽນໄດ້ຮັບການສ້າງຕັ້ງຂຶ້ນເມື່ອທ້າຍປີ 2015ໄດ້ ແລະ ພວມສ້າງທ່ວງທ່າໃຫ້ແກ່ການພົວພັນເສດຖະກິດ ອາຊຽນ - ຈີນພັດທະນາຢ່າງແຂງແຮງ. ຫວຽດນາມກໍພວມເຊື່ອມໂຍງດ້ານເສດຖະກິດຢ່າງກ້ວາງເລິກດ້ວຍການເຂົ້າຮ່ວມສັນຍາການຄ້າເສລີຫຼາຍສະບັບ. ມາຮອດປະຈຸບັນ, ຫວຽດນາມໄດ້ເຂົ້າຮ່ວມສັນຍາການຄ້າເສລີ 12 ສະບັບ ແລະ ພວມເຈລະຈາສັນຍາການຄ້າອື່ນໆອີກ 4 ສະບັບ, ໃນນັ້ນມີສັນຍາຄູ່ຮ່ວມມືເສດຖະກິດຮອບດ້ານພາກພື້ນຊຶ່ງມີການເຂົ້າຮ່ວມຂອງບັນດາປະເທດສະມາຊິກອາຊຽນ ແລະ ຈີນ. ໃນມໍ່ໆມານີ້, ທະນາຄານໂລກໄດ້ຈັດສະພາບແວດລ້ອມແຫ່ງການລົງທຶນດຳເນີນທຸລະກິດຂອງຫວຽດນາມເພີ່ມຂຶ້ນ 3 ຂັ້ນ, ຢືນອັນດັບທີ 5 ໃນ 10 ປະເທດອາຊຽນ ແລະ ສູ້ຊົນໃນປີ 2017, ຫວຽດນາມຈະຖືກຈັດເຂົ້າໃນກຸ່ມອາຊຽນ - 4 . ທັງໝົດເຫຼົ່ານັ້ນ, ພວມໝັ້ນໝາຍເປີດກາລະໂອກາດຮ່ວມມືໃໝ່ຫຼາຍຢ່າງ.
ໂດຍແມ່ນປະເທດບ້ານໃກ້ເຮືອນຄຽງທີ່ມີການພົວພັນເສດຖະກິດຢ່າງໃກ້ຊິດກັບຈີນ, ພ້ອມທັງແມ່ນສະມາຊິກທີ່ຕັ້ງໜ້າໃນອາຊຽນ, ຫວຽດນາມພວມຊຸກຍູ້ການພົວພັນຮ່ວມມືແບບຕ່າງຝ່າຍຕ່າງມີຜົນປະໂຫຍດກັບຈີນໃຫ້ແຂງແຮງ, ນັບທັງຂອບເຂດ 2 ຝ່າຍ ແລະ ຫຼາຍຝ່າຍ. ເພາະສະນັ້ນ, ຫວຽດນາມຍາມໃດກໍຕັ້ງໜ້າເຂົ້າຮ່ວມບັນດາຂອບການຮ່ວມມືທີ່ສຳຄັນຄື ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນ ແລະ ງານຕະຫຼາດນັດຈີນ-ອາຊຽນເປັນຕົ້ນ. ນຳໜ້າຄະນະຜູ້ແທນຫວຽດນາມທີ່ເຂົ້າຮ່ວມບັນດາການເຄື່ອນໄຫວນີ້, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ມີການພົບປະສົນທະນາກັບບັນດາການນຳວິສາຫະກິດແຖວໜ້າຂອງຈີນ, ພ້ອມທັງຢືນຢັນນະໂຍບາຍຢ່າງສະເໝີຕົ້ນສະເໝີປາຍຂອງຫວຽດນາມໃນການຮຽກຮ້ອງບັນດານັກລົງທຶນຕ່າງປະເທດ, ໃນນັ້ນມີນັກລົງທຶນຈີນ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກ່າວວ່າ :
“ ພວກຂ້າພະເຈົ້າສູ້ຊົນສ້າງ ສະພາບແວດລ້ອມແຫ່ງການລົງທຶນດຳເນີນທຸລະກິດຢ່າງເປີດອົກເປີດໃຈ ແລະ ໂປ່ງໃສໃຫ້ແກ່ວິສາຫະກິດທຸກແຫ່ງດ້ວຍທິດນຳຖືຜົນສຳເລັດຂອງນັກລົງທຶນແມ່ນຜົນສຳເລັດຂອງຫວຽດນາມ. ພວກຂ້າພະເຈົ້າກຳນົດແຈ້ງທິດກ້າວເດີນ ນັ້ນແມ່ນກໍ່ສ້າງລັດຖະບານໂປ່ງໃສ່, ປັບປຸງເພື່ອພັດທະນາ, ກະທຳຢ່າງຂ້ຽວຂາດ, ຮັບໃຊ້ປະຊາຊົນ ແລະ ວິສາຫະກິດ. ສຸມໃສ່າສ້າງລະບອບລະບຽບການໃຫ້ສົມບູນແບບ, ຍູ້ແຮງການປະຕິຮູບລະບຽບການບໍລິຫານເພື່ອຍົກສູງຄວາມສາມາດແກ່ງແຍ້ງ. ແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ພັດທະນາວິສາຫະກິດ, ຊຸກຍູ້ການເລີ່ມຕົ້ນສ້າງອາຊີບ ”
ການມີໜ້າຂອງວິສາຫະກິດແຖວໜ້າຂອງຈີນນັບຮ້ອຍແຫ່ງ ແມ່ນປະກົດການທີ່ມີຊີວິດຊີວາແຫ່ງຄວາມສົນໃຈຂອງນັກລົງທຶນຈີນເມື່ອເຂົ້າມາຫວຽດນາມ. ບັນດາຂົງເຂດກໍ່ສ້າງພື້ນຖານໂຄງລ່າງ, ຕຳແຜ່ນຕັດຫຍິບ, ທະນາຄານ, ໂທລະຄົມມະນາຄົມ, ຄົມມະນາຄົມ, ເຕັດໂນໂລຢີຂໍ້ມູນຂ່າວສານ, ພະລັງງານ, ທ່ອງທ່ຽວ… ໄດ້ຮັບຄວາມສົນໃຈທີ່ສຸດຈາກບັນດາລົງທຶນຈີນ. ແຕ່ທັດສະນະຂອງຫວຽດນາມກໍຖືກ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຢືນຢັນວ່າ ຫວຽດນາມຕີລາຄາສູງກຳລັງບົ່ມຊ້ອນທາງດ້ານເຕັກໂນໂລຢີຂອງບັນດານັກລົງທຶນຈີນ, ແຕ່ບໍ່ຮັບຮູ້ເຕັກໂນໂລຢີທີ່ຫຼ້າຫຼັງເພື່ອຮັກສາສິ່ງແວດລ້ອມ. ພ້ອມກັນນັ້ນ, ຫວຽດນາມກໍມີຄວາມຫວັງໃຫ້ບັນດານັກລົງທຶນຈີນເຂົ້າມາລົງທຶນໃນຂົງເຂດພະລັງງານຊຶ່ງແມ່ນຂົງເຂດທີ່ຫວຽດນາມພວມມີຄວາມຕ້ອງການສູງ. ກ່ຽວກັບຂົງເຂດນີ້, ທ່ານ ເຈີນຕ້ວນແອງ, ລັດຖະມົນຕີກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ :
“ ຈີນກໍແມ່ນປະເທດມີຄວາມສາມາດສູງທາງດ້ານເຕັກໂນໂລຢີກ່ຽວກັບບັນດາແຫຼ່ງພະລັງງານ ແລະ ນັບທັງບັນດາເຕັກໂນໂລຢີພວມສືບຕໍ່ມີການປັດປຸງ ແລະ ຍົກສູງປະສິດທິຜົນ, ຫຼຸດຜ່ອນຄ່າໃຊ້ຈ່າຍທາງດ້ານພາຫະນະ ກໍຄືຄ່າໃຊ້ຈ່າຍໃນການຜະລິດໄຟຟ້າ ”
ໂດຍແມ່ນສະມາຊິກທີ່ຕັ້ງໜ້າຂອງປະຊາຄົມອາຊຽນ, ຫວຽດນາມຍາມໃດກໍຖືເປັນສຳຄັນ ແລະ ສະໜັບສະໜູນການຮ່ວມມື ອາຊຽນ - ຈີນ, ພ້ອມແລ້ວເສີມຂະຫຍາຍບົດບາດເປັນຂົວເຊື່ອມຕໍ່ລະຫວ່າງ ອາຊຽນ ແລະ ຈີນ, ພ້ອມກັບບັນດາປະເທດອາຊຽນຊຸກຍູ້ການຮ່ວມມືໃນບັນດາຂົງເຂດໃຫ້ແຂງແຮງ, ຮັກສາສັນຕິພາບ, ສະຖຽນລະພາບ, ແກ້ໄຂຄວາມແຕກຕ່າງກັນເພື່ອຜົນປະໂຫຍດຂອງບັນດາຝ່າຍເພື່ອຮັບປະກັນການເຄື່ອນໄຫວຮ່ວມມືເສດຖະກິດ-ການຄ້າໄດ້ຮັບການຜັນຂະຫຍາຍຢ່າງລຸລວງ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ການຮ່ວມມື, ພັດທະນາ ແລະ ວັດທະນາຖາວອນລວມຂອງພາກພື້ນ. ຕໍ່ໜ້າບັນດາກາລະໂອກາດໃໝ່, ຫວຽດນາມພວມຕັ້ງໜ້າພ້ອມກັບຈີນຍາດແຍ່ງກາລະໂອກາດເພື່ອຊຸກຍູ້ການຮ່ວມມືເສດຖະກິດການຄ້າ ຫວຽດນາມ-ຈີນໃນໄລຍະທີ່ຈະມາເຖິງ.