(vovworld)- ໃນຫລາຍປີຜ່ານມາ, ພັກ, ລັດ ແລະ ທົ່ວປວງຊົນ ຍາມໃດກໍເອົາໃຈໃສ່, ເບິ່ງແຍງດູແລ, ປົວແປງ ແລະ ຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ. ຄວາມເອົາໃຈໃສ່ນັ້ນແມ່ນສະແດງຜ່ານບັນດານະໂຍບາຍລະອຽດ ໃນການເບິ່ງແຍງດູແລ ຊີວິດປະຈຳວັນຂອງບັນດາຄອບຄົວນັກຮົບເສຍສະຫລະຊີວິດເພື່ອຊາດ, ທະຫານເສຍອົງຄະ, ທະຫານເຈັບປ່ວຍ, ແມ່ນວຽດນາມ ວິລະຊົນ, ຜູ້ມີຄຸນງາມຄວາມດີ. ພ້ອມກັນນັ້ນແມ່ນບັນດາການເຄື່ອນໄຫວຕອບບຸນແທນຄຸນໄດ້ຮັບການປະຕິບັດໃນທົ່ວປະເທດ.
ປະຈຸບັນ ທົ່ວປະເທດ ໄດ້ຮັບຮູ້ ຜູ້ມີຄຸນງາມຄວາມດີ ແມ່ນເກືອບ 8,8 ລ້ານຄົນ, ກວມປະມານ 10% ຈຳນວນພົນລະເມືອງ. ໃນຊຸມປີຜ່ານມາ, ພັກ ແລະ ລັດ ໄດ້ປະກາດໃຊ້ຫລາຍແຜນນະໂຍບາຍ, ນະໂຍບາຍ ແລະ ຈັດຕັ້ງການປະຕິບັດບັນດານະໂຍບາຍ ສຳລັບຜູ້ມີຄຸນງາມຄວາມດີຕໍ່ການປະຕິວັດ ຢ່າງທັນການ, ມີປະສິດທິຜົນ.
ປະຕິບັດນະໂຍບາຍສຳລັບຜູ້ມີຄຸນງາມຄວາມດີຕໍ່ການປະຕິວັດຢ່າງມີປະສິດທິຜົນ
ປີ 2013, ນາຍົກລັດຖະມົນຕີ ໄດ້ປະກາດໃຊ້ ຄຳສັ່ງກ່ຽວກັບການສຳຫລວດການປະຕິບັດນະໂຍບາຍບຸລິມະສິດສຳລັບຜູ້ມີຄຸນງາມຄວາມດີຕໍ່ການປະຕິວັດທົ່ວປະເທດໃນໄລຍະ 2 ປີ ຄື ປີ 2014-2015. ໂດຍປະຕິບັດຄຳສັ່ງຂອງນາຍົກລັດຖະມົນຕີ, ຄະນະປະຈຳ ຄະນະກຳມະການສູນກາງແນວໂຮມປະເທດຊາດຫວຽດນາມໄດ້ເປັນເຈົ້າການສົມທົບກັບກະຊວງແຮງງານ ທະຫານເສຍອົງຄະ ແລະສັງຄົມ ລົງນາມ, ຜັນຂະຫຍາຍໂຄງການ. ເລື່ອງປະຕິບັດນະໂຍບາຍສຳລັບຜູ້ມີຄຸນງາມຄວາມດີຕໍ່ການປະຕິວັດ ແມ່ນຖືກກັບເປົ້າໝາຍ, ມີນະໂຍບາຍພຽງພໍ ແລະ ທັນກັບເວລາ, ຄວາມຄືບຫນ້າ. ບັນດານະໂຍບາຍສຳລັບ 7 ກຸ່ມເປົ້າໝາຍຜູ້ມີຄຸນງາມຄວາມດີ ນັ້ນແມ່ນ ນັກຮົບເສຍສະຫລະຊີວິດເພື່ອຊາດ ແລະ ຄອບຄົວ ນັກຮົບເສຍສະຫລະຊີວິດເພື່ອຊາດ, ແມ່ຫວຽດນາມ ວິລະຊົນ, ທະຫານເຈັບປ່ວຍ, ທະຫານເສຍອົງຄະ, ຜູ້ເຄື່ອນໄຫວໃນການຕໍ່ຕ້ານ ຖືກຕິດທາດພິດເຄມີ, ຜູ້ມີຄຸນງາມຄວາມດີຊ່ວຍເຫລືອການປະຕິວັດ, ອະດີດຊາວຫນຸ່ມຕະລຸມບອນ ໄດ້ຮັບການສຳຫລວດຮອບດ້ານ, ລະອຽດ, ເປີດເຜີຍ ແລະ ກະຈ່າງແຈ້ງ ຈາກຂັ້ນຕາແສງ, ເມືອງ, ເທດສະບານ ໂດຍມີການເອົາໃຈໃສ່ຈາກປະຊາຊົນເປັນຈຳນວນຫລວງຫລາຍ. ວຽກງານນີ້ ໄດ້ປະກອບສ່ວນເຮັດໃຫ້ຜູ້ມີຄຸນງາມຄວາມດີຕໍ່ການປະຕິວັດ ກໍຄື ຜູ້ພວມປະຕິບັດວຽກງານປົກປັກຮັກສາປະເທດຊາດມີຄວາມພຶງພໍໃຈ. ທີ່ການເຮັດວຽກກັບກະຊວງແຮງງານ ທະຫານເສຍອົງຄະ ແລະ ສັງຄົມ ແລະ ກົມນະໂຍບາຍ, ກົມໃຫຍ່ການເມືອງກອງທັບປະຊາຊົນ ຫວຽດນາມໃນຕອນບ່າຍວັນທີ 25/7 ຢູ່ ຮ່າໂນ້ຍ, ທ່ານ ຫງວຽນທ້ຽນເຍີນ, ປະທານ ຄະນະກຳມະການສູນກາງແນວໂຮມປະເທດຊາດຫວຽດນາມ ສະເຫນີວ່າ:
“ການສຳຫລວດທົ່ວປະເທດໃນຄັ້ງຜ່ານມາແມ່ນມີປະສິດທິຜົນ. ຈຳນວນຜູ້ບໍ່ທັນໄດ້ຊົມໃຊ້ລະບອບນະໂຍບາຍ ມາຮອດປະຈຸບັນແມ່ນແກ້ໄຂໄດ້ 62% ແລ້ວ, ສູ້ຊົນ ຮອດວັນທີ 30/8 ຈະສຳເລັດການແກ້ໄຂນະໂຍບາຍໃຫ້ຜູ້ມີຄຸນງາມຄວາມດີທີ່ບໍ່ທັນໄດ້ຮັບ ເງິນຊົມໃຊ້ ແລະ ສູ້ຊົນແກ້ໄຂໃຫ້ສຳເລັດໃນປີນີ້.”
ພ້ອມກັນນັ້ນ, ພັກ ແລະ ລັດ ໄດ້ມີໂຄງການສ້າງແຜນຮ່າງກຳນົດລາຍຊື່ອັດຖິນັກຮົບເສຍສະຫລະຊີວິດເພື່ອຊາດ ແລະ ແຜນຮ່າງນີ້ ມອບໃຫ້ກະຊວງແຮງງານ ທະຫານເສຍອົງຄະ ແລະ ສັງຄົມເປັນເຈົ້າພາບ ແລະ ປະຕິບັດ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີ ວ່າການກະຊວງແຮງງານ ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ:
“ມາຮອດປະຈຸບັນ, ສະມາຄົມຄອບຄົວນັກຮົບທີ່ເສຍສະຫຼະຊີວິດ ໄດ້ສະໜອງຂໍ້ມູນໃຫ້ພວກຂ້າພະເຈົ້າກ່ຽວກັບ 8 ພັນກໍລະນີນັກຮົບທີ່ເສຍສະຫຼະຊີວິດເພື່ອຊາດ ແຕ່ບໍ່ທັນຮູ້ຊື່. ພວກຂ້າພະເຈົ້າໄດ້ເອົາແຊນຂອງກວ່າ 8 ພັກກໍລະນີດັ່ງກ່າວ ສົມທົບກັບ 3 ສະຖາບັນຂອງກະຊວງປ້ອງກັນປະເທດ, ກະຊວງຕຳຫຼວດ ແລະ ສະຖາບັນວິທະຍາສາດຫວຽດນາມ ຄົ້ນຄ້ວາໄຈ້ແຍກ, ແນໃສ່ກຳນົດຊື່ຂອງນັກຮົບທີ່ເສຍສະຫຼະຊີວິດເພື່ອຊາດໂດຍໄວ“.
ບັນດາການເຄື່ອນໄຫວຕອບບຸນແທນຄູນສະແດງໃຫ້ເຫັນມູນເຊື້ອ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນຳ້“
ພ້ອມກັບບັນດານະໂຍບາຍລະອຽດ, ການເຄື່ອນໄຫວຕອບບຸນແທນຄຸນບັນດາທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ ໄດ້ຮັບການດຳເນີນໄປໃນທົ່ວປະເທດ. ເນື່ອງໃນໂອກາດສະເຫຼີມສະຫຼອງ 68 ປີ ແຫ່ງວັນທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ (27/7/1947-27/7/2015), ບັນດາການນຳພັກ, ລັດ, ສະພາແຫ່ງຊາດ, ລັດຖະບານ ແລະ ແນວໂຮມປະເທດຊາດຫວຽດນາມ ໄດ້ລົງຢື້ຢາມຖາມຂ່າວ, ລະດົມກຳລັງໃຈ, ມອບຂອງຂວັນບັນດາທະຫານເສຍອົງຄະ, ຜູ້ມີຄຸນງາມຄວາມດີ, ຄອບຄົວນັກຮົບທີ່ເສຍສະຫຼະຊີວິດເພື່ອຊາດ; ຖະຫວາຍທູບທຽນອາໄລຫາບັນດານັກຮົບວິລະຊົນທີ່ໄດ້ເສຍສະຫຼະຊີວິດເພື່ອຊາດ. ຕອນຄຳ່ວັນທີ 26/7, ຢູ່ຮ່າໂນ້ຍ ໄດ້ດຳເນີນລາຍການພົບປະແລກປ່ຽນ, ສະແດງສິລະປະ “ຈົດຈຳບຸນຄຸນທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດຕະຫຼອດໄປ”. ຢູ່ທີ່ນີ້, ບັນດາຜູ້ເຂົ້າຮ່ວມ ໄດ້ຮັບຟັງບົດເພງປະຕິວັດ ແລະ ຊົມຮູບເງົາສາລະຄະກ່ຽວກັບວຽກງານຊອກຫາ, ເຕົ້າໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດຂອງບັນດາກອງຊອກຫາ,
ທ້ອນໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດ. ພັນເອກ ຫງວຽນວັນຮູຍ, ຫົວໜ້າກອງຊອກຫາ, ທ້ອນໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດ, ສັງກັດກົມການເມືອງທະຫານເຂດ 2, ໃຫ້ຮູ້ວ່າ:
“ໃນວຽກງານຊອກຫາ, ທ້ອນໂຮມອັດຖິນັກຮົບທີ່ເສຍສະຫຼະຊີວິດເພື່ອຊາດ, ກ່ອນອື່ນໝົດພວກຂ້າພະເຈົ້າຕ້ອງຊອກຫາ, ກຳນົດຂໍ້ມູນຂ່າວກ່ຽວກັບບ່ອນທີ່ຝັງບັນດານັກຮົບທີ່ເສຍສະຫຼະຊີວິດເພື່ອຊາດ ໃນສະໄໝຕ້ານຝລັ່ງ ແລະ ອາເມລິກາ ຈາກບັນດາກົມກອງເຂົ້າຮ່ວມການສູ້ຮົບ, ຈາກຄອບຄົວນັກຮົບທີ່ເສຍສະຫຼະຊີວິດເພື່ອຊາດ, ຈາກເພື່ອນຮ່ວມກົມກອງຂອງບັນດານັກຮົບທີ່ເສຍສະຫຼະຊີວິດເພື່ອຊາດ“.
ແລະກໍ່ໃນຕອນຄຳ່ວັນທີ 26/7, ຢູ່ສຸສານບັນດານັກຮົບທີ່ເສຍສະຫຼະຊີວິດເພື່ອຊາດແຫ່ງຕ່າງໆໃນທົ່ວປະເທດ, ກໍ່ຈັດຕັ້ງພິທີຖະຫວາຍທູບທຽນອາໄລຫາບັນດານັກຮົບທີ່ເສຍສະຫຼະຊີວິດເພື່ອຊາດ.
ຂະບວນການຕອບບຸນແທນຄຸນບັນດາທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ, ການສົ່ງເສີມ, ເບິ່ງແຍງຜູ້ທີ່ມີຄຸນງາມຄວາມດີ ໄດ້ຮັບການພັດທະນາຢ່າງເລິກເຊິ່ງ, ກວ້າງຂວາງ ຈາກຂັ້ນສູນກາງ ລົງຂັ້ນທ້ອງຖີ່ນ, ໝູ່ບ້ານ, ເຂດຊຸມຊົນ, ດ້ວຍການກະທຳອັນສູງສົ່ງຫຼາຍຢ່າງ ແລະ ໄດ້ຮັບປະສິດທິຜົນຢ່າງແທ້ຈິງ, ອັນໄດ້ກາຍເປັນໜ້າທີ່ຮັບຜິດຊອບຂອງທົ່ວສັງຄົມ, ເຕັມໄປດ້ວຍວັດທະນະທຳອັນດີງາມຂອງຊາດຫວຽດນາມ.