( vovworld ) – ກອງປະຊຸມຄັ້ງທີ 5 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 11 ໄດ້ຕົກລົງບັນດາບັນຫາສຳຄັນທີ່ກ່ຽວຂ້ອງເຖິງ ນະໂຍບາຍ, ກົດໝາຍກ່ຽວກັບທີ່ດິນ. ຕາມນັ້ນແລ້ວ, ນະໂຍບາຍ, ກົດໝາຍກ່ຽວກັບທີ່ດິນສືບຕໍ່ໄດ້ຮັບການສ້າງໃຫ້ສົມບູນແບບ ຕາມທິດຕອບສະໜອງຄວາມຕ້ອງການຈັດແບ່ງໃຫ້ເໝາະສົມກ່ວາ, ນຳໃຊ້ທີ່ດິນຖືກຕ້ອງຕາມຈຸດປະສົງ, ປະຢັດ ແລະ ມີປະສິດທິຜົນ, ຮັບປະກັນຜົນປະໂຫຍດໃນສະເພາະໜ້າ ແລະ ຍາວນານ, ປົກປັກຮັກສາສິ່ງແວດລ້ອມຊີວະພາບ. ຕໍ່ໄປແມ່ນບົດຂຽນຂອງນັກຂ່າວ Thu Hoa ທີ່ມີຫົວຂໍ້ວ່າ: “ປັບປຸງນະໂຍບາຍ, ກົດໝາຍ ກ່ຽວກັບທີ່ດິນໃຫ້ເໝາະສົມກັບ ສະພາບຕົວຈິງ“
(ພາບ:thanhnien.com.vn)
ຕາມທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ແລ້ວ, ກອງປະຊຸມສູນກາງພັກຮັບຮູ້ໄດ້ວ່າ: ທີ່ດິນ, ການຄຸ້ມຄອງ ແລະ ນຳໃຊ້ທີ່ດິນ ບໍ່ພຽງແຕ່ແມ່ນບັນຫາເສດຖະກິດອັນກ້ວາງຂວາງ, ສັບສົນເທົ່ານັ້ນ, ຫາກຍັງແມ່ນບັນຫາການເມືອງສັງຄົມທີ່ສຳຄັນຍິ່ງ, ສະດຸ້ງໄວ້, ກ່ຽວຂ້ອງເຖິງເລື່ອງຮັກສາຜົນງານຂອງການປະຕິວັດໄວ້ຢ່າງໝັ້ນຄົງ, ການຕໍ່ສູ້ຂອງຊາດ, ການຕໍ່ສູ້ຂອງຊົນຊັ້ນອີກດ້ວຍ. ກອງປະຊຸມຄັ້ງທີ 5 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 11 ໄດ້ສະຫງວນເວລາສ່ວນຫຼາຍເພື່ອປຶກສາຫາລືຢ່າງລະອຽດ ແລະ ເລິກເຊິ່ງກ່ຽວກັບບັນຫານີ້. ສູນກາງພັກຢືນຢັນວ່າ: ໃນການປະຕິບັດມະຕິກອງປະຊຸມໃຫ່ຍສູນກາງພັກຄັ້ງທີ 7 ຊຸດທີ 9 ເປັນເວລາເກືອບ 10 ປີ, ຫວຽດນາມ ບັນລຸໄດ້ຫຼາຍຜົນງານທີ່ຕັ້ງໜ້າ, ປະກອບສ່ວນຂຸດຄົ້ນ ແລະ ເສີມຂະຫຍາຍຊັບພະຍາກອນທີ່ດິນຢ່າງມີປະສິດທິຜົນ, ຮັບໃຊ້ໃຫ້ແກ່ພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝ. ໂດຍຜ່ານການປະຕິບັດມະຕິ, ນະໂຍບາຍ, ກົດໝາຍວ່າດ້ວຍທີ່ດິນໄດ້ຮັບການສ້າງສຳເລັດເທື່ອລະກ້າວ; ບັນດາສິດຂອງຜູ້ນຳໃຊ້ທີ່ດິນໄດ້ຮັບການເປີດກ້ວາງ ແລະ ຮັບປະກັນ. ແຕ່ເຖິງຢ່າງໃດກໍ່ຕາມ, ວຽກງານຄຸ້ມຄອງລັດກ່ຽວກັບທິ່ດິນຍັງມີຫຼາຍສິ່ງຄົງຄ້າງ. ໂດຍອິງໃສ່ພຶດຕິກຳຕົວຈິງ, ປ້າ Nguyen Thi Thanh ຢູ່ເມືອງ Gia Loc ແຂວງ Hai Duong ສະແດງຄວາມເຫັນວ່າ:
“ຂ້າພະເຈົ້າເຫັນວ່າ, ກົດໝາຍວ່າດ້ວຍທີ່ດິນຍັງມີບັນດາຂໍ້ກຳນົດທີ່ບໍ່ຈະແຈ້ງ, ບໍ່ເປັນເອກະພາບ, ອີກຢ່າງໜື່ງ, ປະຈຸບັນ, ພະນັກງານມີສະຕິຄວາມຮັບຮູ້ບໍ່ເຖິງຖອງ ແລະ ມີບາງພາກສ່ວນຂາດຄວາມຮັບຜິດຊອບ. ຂ້າພະເຈົ້າສະເໜີໃຫ້ມີການປັບປຸງກົດໝາຍວ່າດ້ວຍທີ່ດິນຄືແນວໃດໃຫ້ເໝາະສົມກັບສະພາບຕົວຈິງ, ເພື່ອໃຫ້ປະຊາຊົນບໍ່ປະສົບກັບຄວາມຫຍຸ້ງຍາກໃນວິວັດການປະຕິບັດ“.
ການນຳພັກ, ລັດ ເຂົ້າຮ່ວມພິທີໄຂວາລະປະຊຸມຂອງສະພາແຫ່ງຊາດ ປຶກສາຫາລືກ່ຽວກັບບັນຫາທີ່ດິນ
(ພາບ: dantri.com.vn)
ທີ່ກອງປະຊຸມຄັ້ງທີ 5 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 11, ບັນດາຜູ້ນຳໄດ້ເຫັນດີເປັນເອກະສັນນຳກັນໂດຍຖືວ່າ: ທີ່ດິນແມ່ນຊັບພະຍາກອນທຳມະຊາດຂອງຊາດທີ່ລ້ຳຄ່າທີ່ສຸດ, ຮັບໃຊ້ການຜະລິດເປັນພິເສດ, ແມ່ນແຫຼ່ງດຳລົງຊີວິດຂອງປະຊາຊົນ, ແມ່ນຊັບສົມບັດ, ແມ່ນແຫຼ່ງກຳລັງທີ່ໃຫ່ຍຫຼວງຂອງປະເທດຊາດ. ຕາມນັ້ນແລ້ວ, ທີ່ດິນແມ່ນຂຶ້ນກັບການຄອບຄອງຂອງທົ່ວປວງຊົນ ໂດຍລັດເປັນຜູ້ຕາງໜ້າເຈົ້າຂອງກຳມະສິດ ແລະ ເປັນເອກະພາບໃນການຄຸ້ມຄອງ. ທ່ານເລຂາທິການໃຫ່ຍ Nguyen Phu Trong ໄດ້ຮຽກຮ້ອງໃຫ້ກຳນົດຢ່າງຈະແຈ້ງ, ລະອຽດກ່ວາສຳລັບບັນດາສິດຂອງຜູ້ຕາງໜ້າເຈົ້າຂອງກຳມະສິດ ແລະ ສິດເອກະພາບຄຸ້ມຄອງຂອງລັດ, ພິເສດແມ່ນໃນການຕົກລົງການວາງແຜນກຳນົດ, ແຜນການນຳໃຊ້ທີ່ດິນ, ຕົກລົງລາຄາທີ່ດິນ, ມອບສິດນຳໃຊ້ທີ່ດິນ ແລະ ຖອນທີ່ດິນຄືນ ເພື່ອນຳໃຊ້ເຂົ້າໃນບັນດາຈຸດປະສົງປ້ອງກັນຊາດ ປ້ອງກັນຄວາມສະຫງົບ, ຮັບໃຊ້ໃຫ້ແກ່ຜົນປະໂຫຍດແຫ່ງຊາດ, ຜົນປະໂຫຍດສ່ວນລວມ ແລະ ບັນດາໂຄງການພັດທະນາເສດຖະກິດ-ສັງຄົມຕາມການກຳນົດຂອງກົດໝາຍ. ທ່ານເລຂາທິການໃຫ່ຍ Nguyen Phu Trong ເນັ້ນໜັກວ່າ:
“ອາດເວົ້າໄດ້ວ່າ, ຈຸດໃໝ່ໃນກອງປະຊຸມຄັ້ງນີ້, ນັ້ນແມ່ນພວກເຮົາມີສິຕິຄວາມຮັບຮູ້ຢ່າງຈະແຈ້ງກ່ວາ ແລະ ກຳນົດຢ່າງລະອຽດກ່ວາ ກ່ຽວກັບຄວາມແຕກຕ່າງກັນລະຫວ່າງກຳມະສິດທີ່ດິນ ແລະ ສິດນຳໃຊ້ທີ່ດິນ; ສິດ ແລະ ຄວາມຮັບຜິດຊອບຂອງລັດ ຕໍ່ສິດ ແລະ ພັນທະຂອງຜູ້ນຳໃຊ້ທີ່ດິນສຳລັບດິນແຕ່ລະປະເພດ. ສິດນຳໃຊ້ທີ່ດິນກໍ່ແມ່ນຊັບສົມບັດປະເພດ 1 ແລະ ສິນຄ້າພິເສດ ແຕ່ບໍ່ແມ່ນກຳມະສິດ. ຜູ້ນຳໃຊ້ທີ່ດິນຕ້ອງມີພັນທະປະຕິບັດກົດໝາຍທີ່ດິນ, ຕ້ອງຈົດທະບຽນສິດນຳໃຊ້ທີ່ດິນ, ນຳໃຊ້ທີ່ດິນຖືກຕ້ອງຕາມຈຸດປະສົງ, ປະຕິບັດການວາງແຜນນຳນົດ ແລະ ປະຕິບັດຕາມຂໍ້ຕົກລົງຖອນທີ່ດິນຄືນຂອງລັດ“
(ພາບ:tintuc.vibonline.com.vn)
ທ່ານເລຂາທິການໃຫ່ຍ Nguyen Phu Trong ໄດ້ໃຫ້ການຊີ້ນຳຈົ່ງຮີບເຮັ່ງຄົນຄ້ວາ ປັບປຸງ, ເພີ່ມເຕີມກົດໝາຍວ່າດ້ວຍທີ່ດິນ ແລະ ສ້າງກົດໝາຍກ່ຽວກັບທີ່ດິນໃຫ້ສົມບູນແບບ ເພື່ອແກ້ໄຂບັນດາຂໍ້ຈຳກັດ, ຄວາມອ່ອນດ້ອຍທີ່ຍັງຄົງຄ້າງໃນປະຈຸບັນໂດຍໄວ, ຕອບສະໜອງຄວາມຮຽກຮ້ອງຕ້ອງການຈັດແບ່ງເໝາະສົມ, ນຳໃຊ້ທີ່ດິນຖືກຕ້ອງຕາມຈຸດປະສົງ, ປະຢັດ ແລະ ມີປະສິດທິຜົນ, ຮັບປະກັນຜົນປະໂຫຍດໃນສະເພາະໜ້າ ແລະ ຍາວນານ, ປົກປັກຮັກສາສິ່ງແວດລ້ອມຊີວະພາບ. ກ່ຽວກັບບັນຫານີ້, ທ່ານ Tran Quang Huy ອາຈານສອນຢູ່ມະຫາວິທະຍາໄລກົດໝາຍຮ່າໂນ້ຍ ໃຫ້ຄຳເຫັນວ່າ:
“ຂ້າພະເຈົ້າຖືວ່າ, ເລື່ອງປັບປຸງກົດໝາຍວ່າດ້ວຍທີ່ດິນປີ 2003 ແມ່ນຈຳເປັນທີ່ສຸດ. ຕາມທັດສະນະຂອງຂ້າພະເຈົ້າແລ້ວ, ພວກເຮົາຕ້ອງເອົາໃຈໃສ່ເຖິງບັນຫາກຳມະສິດ, ມີການຈຳແນກລະຫວ່າງກຳມະສິດທີ່ດິນທົ່ວປວງຊົນ ກັບ ສິດນຳໃຊ້ທີ່ດິນຂອງຜູ້ນຳໃຊ້ທີ່ດິນ. ບັນຫາກຳມະສິດຕ້ອງມີຄວາມເປັນເອກະພາບລະຫວ່າງລັດຖະທຳມະນູນ, ກົດໝາຍວ່າດ້ວຍທີ່ດິນ ແລະ ບັນດາຂໍ້ກຳນົດຂອງປະມວນກົດໝາຍອາຍາ“
ຕໍ່ໜ້າຄວາມຮຽກຮ້ອງຂອງຊີວິດສັງຄົມ, ເລື່ອງປັບປຸງນະໂຍບາຍ, ກົດໝາຍກ່ຽວກັບທີ່ດິນຍັງໄປຕາມທິດຍົກສູງຄຸນນະພາບ ແລະ ປົກປັກຮັກສາທິ່ດິນຜະລິດກະສິກຳ, ຄ້ຳປະກັນສະບຽງອາຫານແຫ່ງຊາດ, ຮັກສາສະຖຽນລະພາບດ້ານການເມືອງ-ສັງຄົມ ແລະ ພັດທະນາແບບຍືນຍົງ. ຄະນະບໍລິຫານງານສູນກາງພັກ ຊີ້ນຳລັດຖະບານ ຕ້ອງສືບຕໍ່ຍື່ນສະເໜີຕໍ່ສະພາບແຫ່ງຊາດສ້າງກອບກົດໝາຍການປະຕິບັດການມອບທີ່ດິນ, ໃຫ້ຄອບຄົວຊາວກະສິກອນ, ສ່ວນບຸກຄົນເຊົ່າທີ່ດິນກະສິກຳ ສຳເລັດ ເພື່ອສົ່ງເສີມຊາວກະສິກຳຕິດພັນກັບທົ່ງນາ ແລະ ອຸ່ນອ່ຽນໃຈລົງທຶນເຂົ້າໃນການຜະລິດ. ພ້ອມກັນນັ້ນ, ເປີດກ້ວາງການກຳນົດຮັບການມອບໂອນສິດນຳໃຊ້ທີ່ດິນກະສິກຳ ເໝາະສົມກັບເງື່ອນໄຂລະອຽດຂອງແຕ່ລະເຂດ, ແຕ່ລະໄລຍະ, ສ້າງບັນດາເຂດຜະລິດເປັນສິນຄ້າໃຫ່ຍໃນຂົງເຂດກະສິກຳເທື່ອລະກ້າວ, ຕອບສະໜອງຄວາມຮຽກຮ້ອງຕ້ອງການຂອງພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝ.