(vovworld) - ວັນທີ 20/10, ກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຫວຽດນາມ ຊຸດທີ 14 ຈະໄຂຂຶ້ນຢູ່ ຮ່າໂນ້ຍ. ເພື່ອກະກຽມໃຫ້ກອງປະຊຸມຄັ້ງນີ້, ກ່ອນນັ້ນ, ການພົບປະກັບຜູ້ມີສິດເລືອກຕັ້ງຂອງບັນດາສະມາຊິກສະພາແຫ່ງຊາດ (ສສຊ) ຄັ້ງຕ່າງໆໄດ້ຮັບການຈັດຕັ້ງໃນທົ່ວປະເທດ. ບັນດາການພົບປະນັບມື້ນັບສະແດງໃຫ້ເຫັນບັນຍາກາດປະຊາທິປະໄຕ, ກົງໄປກົງມາ, ບໍ່ຈຳກັດຫົວຂໍ້ການປຶກສາຫາລື, ເປີດກ້ວາງພາກສ່ວນຜູ້ເຂົ້າຮ່ວມ. ທີ່ບັນດາການພົບປະ, ໄດ້ບັນດາ ສສຊ ຮັບເອົາ, ອະທິບາຍບັນດາຂໍ້ສະເໜີສຸດຈິດສຸດໃຈຂອງຜູ້ມີສິດເລືອກຕັ້ງ ແລະ ຈະສົ່ງເຖິງສະພາແຫ່ງຊາດຊຸດນີ້.
ຕາມກົດໝາຍແລ້ວ, ສສຊ ແມ່ນຜູ້ຕາງໜ້າໃຫ້ເຈດຈຳນົງ, ຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງ, ປະຊາຊົນໃນທົ່ວປະເທດ ແລະ ເປັນບ່ອນທີ່ໄດ້ເລືອກຕົນເອງ, ຕ້ອງມີການພົວພັນຢ່າງແໜ້ນແຟ້ນກັບ ຜູ້ມີສິດເລືອກຕັ້ງ, ສ່ອງແສງບັນດາຄຳເຫັນ, ຂໍ້ສະເໜີຂອງ ຜູ້ມີສິດເລືອກຕັ້ງເຖິງສະພາແຫ່ງຊາດ ແລະ ບັນດາອົງການລັດທີ່ກ່ຽວຂ້ອງຢ່າງຖືກຕ້ອງ. ດັ່ງນັ້ນ, ສສຊ ຕ້ອງພົບປະກັບຜູ້ມີສິດເລືອກຕັ້ງຈຶ່ງມີເງື່ອນໄຂເພື່ອປະຕິບັດໜ້າທີ່, ສິດອຳນາດຂອງຕົນ. ການເຄື່ອນໄຫວພົບປະກັບຜູ້ມີສິດເລືອກຕັ້ງຂອງ ສສຊ ໄດ້ຮັບການດຳເນີນດ້ວຍຫຼາຍຮູບແບບຄື: ຈັດຕັ້ງກອງປະຊຸມພົບປະກັບຜູ້ມີສິດເລືອກຕັ້ງ, ພົບປະກັບສ່ວນບຸກຄົນ ແລະ ກຸ່ມຜູ້ມີສິດເລືອກຕັ້ງ.
ເປີດກ້ວາງເປົ້າໝາຍຜູ້ມີສິດເລືອກຕັ້ງເຂົ້າຮ່ວມການພົບປະກັບສສຊ
ການພົບປະກັບຜູ້ມີສິດເລືອກຕັ້ງເກືອບທັງໝົດຂອງຄະນະ ສະມາຊິກສະພາແຫ່ງຊາດ ຄັ້ງນີ້ລ້ວນແຕ່ໄດ້ຮັບການຈັດຕັ້ງຢູ່ຂັ້ນຕາແສງ, ເທດສະບານ ແທນທີ່ໄດ້ຮັບການຈັດຕັ້ງຢູ່ສຳນັກງານຂອງເມືອງຄືໄລຍະກ່ອນນີ້. ດັ່ງນັ້ນ, ຜູ້ມີສິດເລືອກຕັ້ງ ເຂົ້າຮ່ວມບັນດາການພົບປະໄດ້ຮັບການເປີດກ້ວາງ, ດຶງດູດຄວາມສົນໃຈຂອງຜູ້ມີສິດເລືອກຕັ້ງຈຳນວນຫຼາຍ. ສະເລ່ຍ, ການພົບປະແຕ່ລະຄັ້ງ ມີຜູ້ມີສິດເລືອກຕັ້ງປະມານ 200 ຄົນ, ຕາງໜ້າໃຫ້ປະຊາຊົນໃນບໍລິເວນເຂົ້າຮ່ວມ ແລະ ປະກອບຄຳເຫັນຫຼາຍຢ່າງ. ຄຽງຂ້າງບັນດາບັນຫາມະຫາພາກຂອງປະເທດຊາດຄື: ວຽກງານສ້າງກົດໝາຍ, ປົກປັກຮັກສາສິ່ງແວດລ້ອມແບບຍືນຍົງ, ພັດທະນາເສດຖະກິດ, ຫຼາຍບັນຫາກ່ຽວກັບການດຳລົງຊີວິດຂອງປະຊາຊົນໃນທ້ອງຖິ່ນທີ່ຜູ້ມີສິດເລືອກຕັ້ງມີຄວາມສົນໃຈ, ແລະຍົກຄຳເຫັນຄື: ການລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ, ກໍ່ສ້າງຊົນນະບົດໃໝ່, ວຽກງານພະນັກງານ, ການປັບໃໝລົງໂທດຕໍ່ກໍລະນີລະເມີດຄວາມເປັນລະບຽບຮຽບຮ້ອຍໃນການກໍ່ສ້າງ, ນະໂຍບາຍໜູນຊ່ວຍການພັດທະນາບັນດາເຂດກະເສດສຸມ, ແນະນຳອາຊີບ ແລະ ບຳລຸງສ້າງວິຊາຊີບໃຫ້ຜູ້ອອກແຮງງານເຂດຊົນນະບົດ.
ຮັບເອົາຄວາມເຫັນປະກອບຫຼາຍທີ່ສຸດແລະອະພິປາຍຢ່າງລະອຽດ
ສິ່ງທີ່ໜ້າຮັບຮູ້ຜ່ານການພົບປະກັບຜູ້ມີສິດເລືອກຕັ້ງຄັ້ງນີ້ແມ່ນບັນດາສະມາຊິກສະພາແຫ່ງຊາດແລະ ອຳນາດການປົກຄອງຂັ້ນຮາກຖານໄດ້ຮັບຮອງ ແລະ ຕອບຄຳຖາມ, ບັນດາຄຳເຫັນສ່ອງແສງ, ຂໍ້ສະເໜີຂອງ ຜູ້ມີສິດເລືອກຕັ້ງກ່ຽວຂ້ອງໂດຍກົງເຖິງທ້ອງຖິ່ນທັນທີທີ່ການພົບປະຄື: ວຽກງານຫລຸດຜ່ອນຄວາມທຸກຍາກແບບຍືນຍົງ, ວິວັດທະນາການກໍ່ສ້າງຊົນນະບົດໃໝ່, ວຽກງານພະນັກງານ. ບັນດາຄຳຕອບທີ່ຈະແຈ້ງຂອງສະມາຊິກສະພາແຫ່ງຊາດຢູ່ການພົບປະກັບ ຜູ້ມີສິດເລືອກຕັ້ງ ໄດ້ຮັບການຮັບຮູ້, ຕີລາຄາສູງ. ທ່ານ ເງາະຢູຍຫຽນ, ຮອງຫົວໜ້າຄະນະສະເພາະກິດສະມາຊິກສະພາແຫ່ງຊາດນະຄອນ ຮ່າໂນ້ຍ ໃຫ້ຮູ້ວ່າ: ເພື່ອຍົກສູງການເຄື່ອນໄຫວພົບປະກັບຜູ້ມີສິດເລືອກຕັ້ງ, ຄະນະສະມາຊິກສະພາແຫ່ງຊາດນະຄອນ ຮ່າໂນ້ຍ ສະເໜີຕໍ່ຄະນະກຳມະການປະຊາຊົນນະຄອນ ຈັດແບ່ງການນຳຄະນະກຳມະການປະຊາຊົນນະຄອນ ແລະ ພະແນກ, ຂະແໜງເຂົ້າຮ່ວມການພົບປະກັບຜູ້ມີສິດເລືອກຕັ້ງ, ແນວໂຮມປະເທດຊາດທຸກຂັ້ນຕ້ອງເຊື້ອເຊີນພາກສ່ວນຜູ້ມີສິດເລືອກຕັ້ງຢ່າງຄົບຖ້ວນ, ສ້າງເງື່ອນໄຂສະດວກເພື່ອໃຫ້ຜູ້ມີສິດເລືອກຕັ້ງມີຄວາມປາດຖະໜາເຂົ້າຮ່ວມກອງປະຊຸມ. ຄະນະສະມາຊິກສະພາແຫ່ງຊາດນະຄອນກໍ່ໄດ້ຈັດຕັ້ງພົບປະກັບຜູ້ມີສິດເລືອກຕັ້ງຕາມຫົວເລື່ອງສະເພາະຕາມຮ່າງລາຍການ, ເນື້ອໃນກອງປະຊຸມ. ນີ້ແມ່ນວິທີເຮັດໃໝ່ ເພື່ອແນໃສ່ຮັບຟັງຄວາມເຫັນຂອງຜູ້ມີສິດເລືອກຕັ້ງ ກ່ຽວກັບບັນດາຮ່າງກົດໝາຍທີ່ໃກ້ຈະຍື່ນສະເໜີຕໍ່ສະພາແຫ່ງຊາດ, ເພື່ອກຳເອົາພຶດຕິກຳຕົວຈິງ, ຈາກນັ້ນເຂົ້າຮ່ວມການປະກອບຄວາມເຫັນເພື່ອກໍ່ສ້າງກົດໝາຍໃຫ້ໃກ້ຊິດຕິດແທດກັບການດຳລົງຊີວິດ.
ທ່ານ ໂດຢູຍເທື່ອງ, ອະດີດຮອງປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ, ໃຫ້ຂໍ້ສັງເກດວ່າ, ນອກຈາກເລື່ອງພົບປະກັບຜູ້ມີສິດເລືອກຕັ້ງ ກ່ອນ ແລະ ຫຼັງກອງປະຊຸມຕາມຫົວໜ່ວຍເລືອກຕັ້ງເປັນຕົ້ນແລ້ວ, ການພົບປະຕາມຂໍ້ສະເໜີແນະຂອງສະມາຊິກສະພາແຫ່ງຊາດ, ການພົບປະຕາມຫົວເລື່ອງສະເພາະ, ການພົບປະຢູ່ນອກຫົວໜ່ວຍເລືອກຕັ້ງ, ການພົບປະຕາມເປົ້າໝາຍນັ້ນ ແມ່ນບັນດາສັນຍາທີ່ຕັ້ງໜ້າ
“ເລື່ອງສະຫຼຸບເພື່ອຍົກສູງຄຸນນະພາບການເຄື່ອນໄຫວພົບປະກັບຜູ້ມີສິດເລືອກຕັ້ງ ແມ່ນບັນຫາສຳຄັນເພື່ອໃຫ້ໃກ້ຊິດຕິດແທດກັບສະພາບຕົວຈິງ, ຫຼີກເວັ້ນລັກສະນະເປັນຮູບການ ແລະ ຍົກສູງຄຸນນະພາບ. ນີ້ແມ່ນພື້ນຖານເພື່ອເພີ່ມເຕີມເອກະສານນິຕິກຳທີ່ມີຄຸນຄ່າຍາວນານໃຫ້ແກ່ການເຄື່ອນໄຫວພົບປະກັບຜູ້ມີສິດເລືອກຕັ້ງຂອງສະມາຊິກສະພາແຫ່ງຊາດ“
ໃນຂະນະນັ້ນ, ຕາມທ່ານ ບູ່ຍງວຽນສູ໋ຍ, ຮອງຫົວໜ້າຄະນະຂົນຂວາຍປະຊາຊົນ, ຄະນະປະຈຳສະພາແຫ່ງຊາດແລ້ວ, ໃນໄລຍະຈະມາເຖິງ, ເພື່ອຍົກສູງປະສິດທິຜົນການເຄື່ອນໄຫວພົບປະກັບຜູ້ມີສິດເລືອກຕັ້ງ, ຈຳເປັນຕ້ອງປະກາດໃຊ້ມະຕິລະຫວ່າງຄະນະປະຈຳສະພາແຫ່ງຊາດ, ລັດຖະບານ ແລະ ຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ເພື່ອໃຫ້ສະມາຊິກສະພາແຫ່ງຊາດຮັບຟັງຄວາມເຫັນ, ຂໍ້ສະເໜີຈາກຜູ້ມີສິດເລືອກຕັ້ງໄດ້ຫຼາຍ.
“ຕ້ອງມີຂໍ້ກຳນົດກ່ຽວກັບການພົບປະກັບຜູ້ມີສິດເລືອກຕັ້ງຄືກ່ອນທີ່ຈັດກອງປະຊຸມ, ພາຍຫຼັງກອງປະຊຸມ, ພົບປະຕາມຂົງເຂດ, ຫົວເລື່ອງສະເພາະ ແລະ ຕາມກຸ່ມຜູ້ມີສິດເລືອກຕັ້ງ, ພົບປະຢູ່ບ່ອນພັກພາອາໄສ, ບ່ອນປະຕິບັດງານແມ່ນຕ້ອງວາງອອກສຳລັບຜູ້ສະມາຊິກສະພາແຫ່ງຊາດ. ເມື່ອເຮັດໄດ້ຄືແນວນັ້ນ, ແມ່ນສາມາດຈັດຕັ້ງການພົບປະຢູ່ຫຼາຍບ່ອນ, ລົງບໍລິເວນຫຼາຍແຫ່ງກວ່າເພື່ອຮັບຟັງຄຳເຫັນຂອງຜູ້ມີສິດເລືອກຕັ້ງ ແລະ ປະຊາຊົນໃນທົ່ວປະເທດໄດ້ຫຼາຍກວ່າ”.
ການສ້າງຄວາມສະໜິດຕິດພັນກັບຜູ້ມີສິດເລືອກຕັ້ງບໍ່ພຽງແຕ່ແມ່ນໜ້າທີ່ຂອງສະມາຊິກສະພາແຫ່ງຊາດ ຖືກກົດໝາຍກຳນົດເທົ່ານັ້ນ, ຫາກຍັງແມ່ນຄວາມຮຽກຮ້ອງຕ້ອງການທີ່ຈຳເປັນເພື່ອໃຫ້ສະມາຊິກສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດກຳແໜ້ນໄດ້ສະພາບຕົວຈິງຄວາມມຸ່ງມາດປາດຖະໜາເຈດຈຳນົງຕົວຈິງຂອງປະຊາຊົນ, ເຮັດຫຼ້ອນໜ້າທີ່ເປັນຕົວແທນໃຫ້ທັດສະນະ, ເຈດຈຳນົງ, ຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງ. ຄຳເຫັນຂອງຜູ້ມີສິດເລືອກຕັ້ງແມ່ນໜຶ່ງໃນບັນດາຊ່ອງຂໍ້ມູນສຳຄັນທີ່ຂາດບໍ່ໄດ້ໃນວິວັດທີ່ສະມາຊິກສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດ ປະຕິບັດໜ້າທີ່.
ດ້ວຍບັນດາການປ່ຽນແປງໃໝ່ໃນການເຄື່ອນໄຫວພົບປະກັບຜູ້ມີສິດເລືອກຕັ້ງໃນໄລຍະຜ່ານມາ, ບັນດາສະມາຊິກສະພາແຫ່ງຊາດຈະສ່ອງແສງຄຳເຫັນຂອງຜູ້ມີສິດເລືອກຕັ້ງເຖິງບັນດາອົງການທີ່ກ່ຽວຂ້ອງຢ່າງທັນການ ກໍຄືສ່ອງແສງໃນບັນດາເວທີປາໄສຂອງສະພາແຫ່ງຊາດ. ສິ່ງດັ່ງກ່າວໄດ້ເພີ່ມທະວີປະສິດທິຜົນການເຄື່ອນໄຫວຂອງສະພາແຫ່ງຊາດ, ເພື່ອໃຫ້ສະພາແຫ່ງຊາດເຄື່ອນໄຫວເພື່ອຜົນປະໂຫຍດຂອງປະຊາຊົນຢ່າງແທ້ຈິງ.