(vovworld) ວັນທີ 12/8, ເປັນເທື່ອທຳອິດທີ່ຫວຽດນາມ ເປັນເຈົ້າພາບຈັດກອງປະຊຸມປຶກສາຫາລືກ່ຽວກັບນະໂຍບາຍການຕ່າງປະເທດຫຼາຍຝ່າຍ, ກອງປະຊຸມເພື່ອແນໃສ່ປຶກສາຫາລືບັນດາມາດຕະການຍົກລະດັບການຕ່າງປະເທດຫຼາຍຝ່າຍຂອງຫວຽດນາມຂຶ້ນຕື່ມ, ເພີ່ມທະວີການປະກອບສ່ວນຂອງຫວຽດນາມ ດ້ວຍຄວາມເອົາໃຈໃສ່ລວມຂອງສາກົນ ແລະ ພາກພື້ນ, ສະແດງໃຫ້ເຫັນຄວາມມານະພະຍາຍາມຂອງຫວຽດນາມທີ່ຢາກປະກອບສ່ວນຫຼາຍກວ່າອີກໃນສະພາບການໂລກປະຈຸບັນ.
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກ່າວປາໄສໃນກອງປະຊຸມ
(ພາບ: dantri.com.vn)
ກອງປະຊຸມດ້ວຍການເຂົ້າຮ່ວມຂອງຜູ້ຕາງໜ້າບັນດາກະຊວງ, ຂະແໜງການ, ທ້ອງຖີ່ນ ແລະ ນັກຮຽນຮູ້ສາກົນເກືອບ 200 ທ່ານ, ໃນນັ້ນມີຜູ້ອຳນວຍການໃຫຍ່ອົງການການຄ້າໂລກ (WTO) Pascal Lamy, ອະດີດຮອງເລຂາທິການໃຫຍ່ ສປຊ Jayantha Dhanapala,… ພ້ອມນັ້ນ, ການມີໜ້າຂອງທ່ານນາຍົກລັດຖະມົນຕີ ຫງວຽນເຕິ໋ນຢຸງ ໃນວາລະໄຂກອງປະຊຸມ, ໄດ້ສະແດງໃຫ້ເຫັນຄວາມສຳຄັນ ແລະ ຄວາມເອົາໃຈໃສ່ຂອງລັດຖະບານຫວຽດນາມ ກໍ່ຄືສາກົນສຳລັບເຫດການນີ້.
ບົດຮຽນຈາກການຕ່າງປະເທດຫຼາຍຝ່າຍ
ໄລຍະຜ່ານມາ, ໂດຍຜັນຂະຫຍາຍແຜນນະໂຍບາຍເຊື່ອມໂຍງກັບສາກົນຢ່າງແຮງ, ຫວຽດນາມ ໄດ້ຫັນຈາກການເຂົ້າຮ່ວມເຫດການຕ່າງໆໄປສູ່ໄລຍະເປັນເຈົ້າການ, ຕັ້ງໜ້າສະເໜີຂໍ້ລິເລີ່ມ ແລະ ປະກອບສ່ວນຢ່າງແທ້ຈິງ ດ້ວຍຄວາມຮັບຜິດຊອບສູງໃນບັນດາບັນຫາຄວາມໝັ້ນຄົງ, ການພັດທະນາລວມຂອງພາກພື້ນ ແລະ ໂລກ. ຢູ່ພາກພື້ນ, ຫວຽດນາມ ໄດ້ເສີມຂະຫຍາຍບົດບາດເປັນປະເທດສະມາຊິກທີ່ມີຄວາມຮັບຜິດຊອບ, ປະກອບສ່ວນຍູ້ແຮງການກໍ່ສ້າງປະຊາຄົມອາຊຽນ: ປັບປຸງຄວາມສາມັກຄີ ແລະ ເພີ່ມທະວີບົດບາດເປັນໃຈກາງຂອງອາຊຽນໃນບັນດາບັນຫາພາກພື້ນ. ຢູ່ໂລກ, ຫວຽດນາມ ຕົກລົງເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ, ໄດ້ຮັບເລືອກຕັ້ງເຂົ້າໃນສະພາສິດທິມະນຸດ ສປຊ ດ້ວຍຈຳນວນບັດສະໜັບສະໜູນສູງສຸດ, ໄດ້ຮັບເລືອກເປັນປະທານສະພາຜູ້ວ່າການອົງການພະລັງງານປາລະມະນູສາກົນ (IAEA) ແລະ ເປັນຄັ້ງທຳອິດທີ່ໄດ້ຮັບເລືອກເຂົ້າຄະນະກຳມະການລະຫວ່າງລັດຖະບານຂອງສົນທິສັນຍາ 1972 ກ່ຽວກັບມໍລະດົກໂລກຂອງອົງການ UNESCO, ອັນໄດ້ຍົກອິດທິພົນຊື່ສຽງ ແລະ ທີ່ຕັ້ງຂອງຫວຽດນາມ ຢູ່ໃນໂລກຂຶ້ນ.
ເດືອນ 3 ປີນີ້, ຜູ້ອຳນວຍການອົງການພັດທະນາ ສປຊ ທ່ານນາງ Helen Clark, ທັງເປັນປະທານກຸ່ມບັນດາປະເທດພັດທະນາຂອງ ສປຊ ເລືອກຫວຽດນາມແມ່ນສະຖານທີ່ຈັດກອງປະຊຸມບັນດາຫົວໜ້າຜູ້ຕາງໜ້າປະເທດຕ່າງໆໃນພາກພື້ນ ເພື່ອປຶກສາຫາລືກ່ຽວກັບການເຕີບໂຕເສດຖະກິດຢ່າງໝັ້ນຄົງນັ້ນ ບໍ່ແມ່ນເລື່ອງບັງເອີນ. ຢູ່ທີ່ນີ້ ທ່ານນາງ Helen Clark ໄດ້ເນັ້ນໜັກວ່າ:
“ບົດລາຍງານພັດທະນາມະນຸດປີ 2013 ຂອງ UNDP, ດ້ວຍຫົວຂໍ້ວ່າ “ການຟື້ນຕົວຢູ່ທາງທິດໃຕ້: ຄວາມກ້າວໜ້າຂອງມະນຸດໃນໂລກຫຼາຍຮູບຫຼາຍແບບ“ໄດ້ຮັບຮູ້ຫວຽດນາມ ແມ່ນໜຶ່ງໃນບັນດາປະເທດທີ່ຂະຫຍັນຂັນເຂື່ອນ ແລະ ປະສົບຜົນສຳເລັດ ດ້ວຍຄວາມກ້າວໜ້າໃນການການພັດທະນາມະນຸດ. ຜົນງານດ້ານເສດຖະກິດ ແລະ ສັງຄົມຂອງຫວຽດນາມໄດ້ປະກອບສ່ວນປັບປຸງຊີວິດການເປັນຢູ່ຂອງປະຊາຊົນຫຼາຍຄົນ. “
ຕາມທ່ານເອກອັກຄະລັດຖະທູດ, ຫົວໜ້າຜູ້ຕາງໜ້າຫວຽດນາມປະຈຳ ສປຊ ເລຮ່ວາຍຈຸງ ແລ້ວ, ບັນດາຜົນງານໃນການປະຕິບັດຄາດໝາຍສະຫັດສະວັດຂອງ ສປຊ, ຫຼືບັນດາການປະກອບສ່ວນຢ່າງຕັ້ງໜ້າຂອງຫວຽດນາມໃນວິວັດການປະຕິຮູບ ສປຊ ໄລຍະຜ່ານມານັ້ນ, ໄດ້ເຮັດໃຫ້ສຽງເວົ້າຂອງຫວຽດນາມໃນບັນດາບັນຫາໃຫຍ່ຂອງໂລກມີຄວາມສຳຄັນກວ່າ:
“ສປຊ ພວມດຳເນີນ 3 ຂະບວນການພ້ອມກັນ. ທີໜຶ່ງແມ່ນ, ສຳຫຼວດກວດກາວີວັດການປະຕິບັດຄາດໝາຍພັດທະນາສະຫັດສະວັດເຖິງປີ 2015. ຈະມີກອງປະຊຸມຂັ້ນສູງທີ່ວາງອອກລາຍການພັດທະນາສະຫັດສະວັດໃໝ່. ທີສອງແມ່ນ: ສ້າງບັນດາຄາດໝາຍເພື່ອພັດທະນາຢ່າງໝັ້ນຄົງ. ທີສາມແມ່ນ, ສ້າງລາຍການພັດທະນາຫຼັງປີ 2015. ທັງສາມຂົງເຂດດັ່ງກ່າວຫວຽດນາມ ລ້ວນແຕ່ມີທ່າແຮງ. ແລະ ສປຊ ໄດ້ຕີລາຄາສູງ, ແລະ ຫວັງວ່າພວກເຮົາຈະແບ່ງປັນບົດຮຽນນຳກັນ“.
ສ້າງວິໄສທັດໄລຍະຍາວກ່ຽວກັບວຽກງານການຕ່າງປະເທດຫຼາຍຝ່າຍ
ບໍ່ພຽງແຕ່ຕັ້ງໜ້າເຂົ້າຮ່ວມໃນບັນດາກົນໄກຮ່ວມມືຫຼາຍຝ່າຍ: ໃນວິໄສທັດໄລຍະຍາວ, ຫວຽດນາມ ກໍ່ໄດ້ສ້າງແຜນສັງລວມໃຫ້ແກ່ເລື່ອງເປັນເຈົ້າພາບຈັດກອງປະຊຸມສຸດຍອດ APEC ປີ 2017, ສະໝັກຮັບເລືອກຕັ້ງເຂົ້າກຳມະກາບໍ່ປະຈຳການຂອງສະພາຄວາມໝັ້ນຄົງ ສປຊ ອາຍຸການ 2020-2021 ເທື່ອລະກ້າວ. ທີ່ກອງປະຊຸມຂອງຂະແໜງການທູດຫວຽດນາມ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ, ຊີ້ແຈ້ງວ່າ:
“ຕ້ອງຄົ້ນຄິດວິທີ, ມາດຕະການເພື່ອເສີມຂະຫຍາຍທີ່ຕັ້ງໃນປະຈຸບັນກໍ່ຄືບັນດາກົນໄກ, ເວທີປາໄສຮັບໃຊ້ບັນດາຄາດໝາຍຄວາມໝັ້ນຄົງ, ການພັດທະນາປະເທດຊາດໃຫ້ດີກວ່າ. ບໍ່ພຽງແຕ່ເປັນເຈົ້າການ, ຕັ້ງໜ້າເຂົ້າຮ່ວມເທົ່ານັ້ນ, ຫາກຍັງປະກອບສ່ວນກໍ່ສ້າງບັນດາຂອບເຂດໃນເວທີປາໄສພາກພື້ນ ແລະ ສາກົນ ເຊິ່ງຫວຽດນາມ ມີຜົນປະໂຫຍດອີກດ້ວຍ, ຜ່ານນັ້ນຍົກສູງທີ່ຕັ້ງຂອງຫວຽດນາມໃນພາກພື້ນ ແລະ ໃນໂລກ“.
ດ້ວຍເລື່ອງເປັນເຈົ້າການຈັດກອງປະຊຸມຄັ້ງນີ້, ແນ່ນອນວ່າຫວຽດ ນາມ ຈະມີບົດຮຽນຕື່ມອີກເພື່ອວາງແຜນກຳນົດ ແລະ ຜັນຂະຫຍາຍການຕ່າງປະເທດຫຼາຍຝ່າຍ, ເພີ່ມທະວີການປະກອບສ່ວນຂອງຫວຽດນາມ ເຂົ້າໃນຄວາມເອົາໃຈໃສ່ລວມຂອງສາກົນ ແລະ ພາກພື້ນ, ໂດຍສະເພາະແມ່ນໃນໄລຍະ 5-10 ປີຈະມາເຖິງ, ເມື່ອຫວຽດນາມ ຮັບໜ້າທີ່ສຳຄັນຫຼາຍຢ່າງຂອງສາກົນ.