ນັກສິລະປິນດີເດັ່ນ Thanh Ngoan ພ້ອມກັບບັນດານັກສິລະປິນທຳການສະແດງຂັບສຳໃນລາຍການສະແດງຂັບສຳລົດໄຟຟ້າຢູ່ຫໍພິພິທະພັນຫວຽດນາມທີ່ນະຄອນຫຼວງຮ່າໂຮ້ຍ (ພາບ: vanhoadoisong)
|
ຂັບສຳແມ່ນປະເພດການສະແດງສິລະປະພື້ນເມືອງທີ່ເປັນເອກະລັກ ສະເພາະ ຊຶ່ງໄດ້ມີມາແຕ່ດົນນານຢູ່ບັນດາແຂວງທາງພາກເໜືອຫວຽດນາມ . ສະເພາະຢູ່ຮ່າໂນ້ຍ, ມີປະເພດສິລະປະຂັບສຳພິເສດ ຊຶ່ງບໍ່ອາດຫາໄດ້ຢູ່ແຫ່ງໃດໃນປະເທດຫວຽດນາມ, ນັ້ນແມ່ນ “ຂັບສຳລົດໄຟຟ້າ”. ພາຍຫຼັງບໍ່ປະກົດຕົວເປັນເວລາ 20 ປີ, ເປັນຄັ້ງທຳອິດທີ່ປະເພດສິລະປະຂັບສຳນີ້ໄດ້ປະກົດຕົວຄືນໃໝ່ເພື່ອແນະນຳໃຫ້ແກ່ມວນຊົນຮ່າໂນ້ຍຜ່ານລາຍການ “ ຂັບສຳລົດໄຟຟ້າ-ວັດທະນະທຳຕາມທ້ອງຖະໜົນທີ່ນະຄອນຮ່າໂນ້ຍ ” ຊຶ່ງຫາກໍຖືກຈັດຂຶ້ນຢູ່ຫໍພິພິທະພັນຫວຽດນາມທີ່ຮ່າໂນ້ຍໃນຊຸມມື້ທ້າຍເດືອນ 10 ທີ່ຜ່ານມາ.
ສິລະປະຂັບສຳໄດ້ກຳເນີດຂຶ້ນ, ຄົງຕົວແລະ ຂະຫຍາຍຕົວໂດຍຕິດພັນກັບ ການເຄື່ອນໄຫວຂອງລົດໄຟຟ້າຮ່າໂນ້ຍໃນໄລຍະ 1900 -1992. ສະຖານີລົດໄຟຟ້າຖືກຕັ້ງຢູ່ ເບີໂຮ່ (ແຄມໜອງຮ່ວານກ໋ຽມ) . ຈາກສະຖານີແຫ່ງນີ້, ມີສາຍລົດໄຟຟ້າໄປຍັງແຫ່ງຕ່າງໆໃນຮ່າໂນ້ຍຄື ອຽນຟຸ, ຕະຫຼາດເບື້ອຍ, ເກົາໄຢ, ຮ່າດົງ, ຫວ້ອງ ແລະ ອື່ນໆ. ບັນດາຖ້ຽວລົດໄຟຟ້າໄດ້ກາຍເປັນເວທີສະແດງທີ່ດີສຳລັບ ສິລະປະຂັບສຳຊຶ່ງແມ່ນປະເພດສິລະປະພື້ນເມືອງໂດຍຄົນພິການມັກສະແດງເພື່ອຫາເງິນລ້ຽງຊີບ. ນັກສິລະປິນ Xuan Hoach , ຜູ້ໄດ້ສຸມຈິດສຸມໃຈກັບສິລະປະຂັບສຳ ໃຫ້ຮູ້ວ່າ :
“ ຢູ່ເທິງລົດໄຟຟ້າ, ເຖິງວ່າມີສຽງລົບກວນເນືອງນັນຫຼາຍກໍຕາມ, ແຕ່ສຽງຂັບສຳຍັງຄົງດັງກ້ອງກັງວານຂຶ້ນເທິງຕູ້ລົດໄຟຟ້າ. ບັນດາທຳນອງຂັບສຳທັງໝົດລ້ວນແຕ່ໄດ້ຮັບການສະແດງຢູ່ຕາມຖ້ຽວລົດໄຟຟ້າ. ບັນດາທຳນອງເພງມີຄວາມໃກ້ຊິດສະໜິດສະໜົມກັບທຸກໆຄົນ, ເມື່ອໄດ້ຮັບຟັງແລ້ວ, ກໍສາມາດຈືໄດ້ ແລະ ເບິ່ງຄືວ່າ ມັນໄດ້ຊຶມເລິກໃນຈິດໃຈຂອງຜູ້ຟັງ ”
ລົດໄຟຟ້າ ແລະ ຂັບສຳລົດໄຟຟ້າ ຍັງຝັງເລິກ
ໃນຄວາມຊົງຈຳຂອງຊາວຫວຽດນາມທຸກໆຄົນ
|
ມາຊົມລາຍການ “ ຂັບສຳລົດໄຟຟ້າ-ວັດທະນະທຳຕາມທ້ອງຖະໜົນທີ່ນະຄອນ ຮ່າໂນ້ຍ ” ໂດຍຫໍພິພິທະພັນແມ່ຍິງຫວຽດນາມສົມທົບກັບສະມາຄົມມໍລະດົກຈັດຂຶ້ນນັ້ນ, ຜູ້ຊົມທັງຫຼາຍໄດ້ເຫັນສິ່ງທີ່ເປັນເອກະລັກສະເພາະຊຶ່ງມີຄວາມແຕກຕ່າງກັບ ສິລະປະຂັບສຳພື້ນເມືອງ ຈາກເນື້ອໃນ, ເຄື່ອງດົນຕີ, ຕະຫຼອດຮອດຊຸດອາພອນຂອງຜູ້ສະແດງ. ນັກສິລະປິນດີເດັ່ນ Thanh Ngoan, ຮອງຜູ້ອຳນວຍການໂຮງລະຄອນແຈວຫວຽດນາມໃຫ້ຮູ້ວ່າ :
“ ປະຈຸບັນ, ສິລະປະຂັບສຳບໍ່ແມ່ນສິ່ງແປກປະຫຼາດອີກແລ້ວ, ສິລະປະຂັບສຳໄດ້ເຂົ້າສູ່ຊີວິດຂອງຊາວນະຄອນຫຼວງຮ່າໂນ້ຍ ແລະ ໄດ້ຊ່ວຍຄົນເຮົາວາດພາບໄດ້ເຖິງບັນຍາກາດ, ວັດທະນະທຳຂອງຮ່າໂນ້ຍໃນສະຕະວັດກ່ອນ. ພວກຂ້າພະເຈົ້າຫວັງວ່າກຸ່ມນັກສິລະປິນຂັບສຳນີ້ ຈະມີການປະກອບສ່ວນຂອງຖັນແຖວນັກສິລະປິນລຸ່ນໃໝ່, ແຕ່ພ້ອມກັນນັ້ນກໍຕ້ອງມີການເຂົ້າຮ່ວມຂອງບັນດາຜູ້ສຸມຈິດສຸມໃຈ. ພວກຂ້າພະເຈົ້າກໍມີຄວາມຫວັງຢາກຮັກສາປະເພດສິລະປະນີ້ເອົາໄວ້ ”
ຕະຫຼອດເກືອບສະຕະວັດທີ່ຜ່ານມາ, ຂັບສຳລົດໄຟຟ້າ ໄດ້ກາຍເປັນເຍື່ອງອາຫານທາງດ້ານຈິດໃຈ, ເປັນຂີດໝາຍຢ່າງເລິກເຊິ່ງໃນຈິດໃຈຂອງຊາວນະຄອນ ຫຼວງແຕ່ລະຄົນ, ມັນຕິດພັນກັບຄວາມຊົງຈຳກ່ຽວກັບສຽງຂອງລົດໄຟຟ້າ. ລາຍການ “ ຂັບສຳລົດໄຟຟ້າ-ວັດທະນະທຳຕາມທ້ອງຖະໜົນທີ່ນະຄອນຮ່າໂນ້ຍ ” ກໍປຽບເໝືອນຄຳຕັກເຕືອນກ່ຽວກັບອະດີດຕະການ. ນັກສິລະປິນດີເດັ່ນ Hoang Anh Tu ສັງກັດໂຮງມະໂຫລະສົບ ທັງລອງ ເວົ້າວ່າ :
“ ຜ່ານລາຍການນີ້, ພວກຂ້າພະເຈົ້າຢາກໂຄສະນາກ່ຽວກັບ ສິລະປະຂັບສຳຊຶ່ງແມ່ນປະເພດສິລະປະດົນຕີຕາມທ້ອງຖະໜົນ ເພື່ອຊ່ວຍໃຫ້ທຸກໆຄົນເຫັນໄດ້ເຖິງຄວາມງາມຂອງຮ່າໂນ້ຍໃນເມື່ອກ່ອນ. ນັ້ນແມ່ນຈຸດວັດທະນະທຳໄດ້ຮັບການເຊີດຊູຜ່ານສຽງເພງເພື່ອສະແດງໃຫ້ເຫັນຄວາມຮັກແພງມະນຸດ ແລະ ຊີວິດຂອງຊາວຮ່າໂນ້ຍຄາວນັ້ນ ”.