(ສະຫະກອນພວມຮັກສາຮູບແບບລ້ຽງເຜິ້ງປະມານ 1.000 ຝູງ)

        ໃນຊຸມປີມໍ່ໆມານີ້, ຊາວກະສິກອນຢູ່ຕາແສງ ຝົງລາຍ, ເມືອງ ທ້ວນເຈົາ, ແຂວງ ເຊີນລາ, ໄດ້ລົງທຶນພັດທະນາອາຊີບລ້ຽງເຜິ້ງເອົານ້ຳເຜິ້ງຕາມຮູບແບບຮ່ວມສຳພັນ. ໂດຍໝູນໃຊ້ສະພາບແວດລ້ອມທຳມະຊາດ ດ້ວຍແຫຼ່ງອາຫານທີ່ອຸດົມສົມບູນ, ການລ້ຽງເຜິ້ງໄດ້ປະກອບສ່ວນສ້າງວິທີຫາເງິນລ້ຽງຊີບ, ຊ່ວຍໃຫ້ປະຊາຊົນຢູ່ທີ່ນີ້ສ້າງຄວາມຮັ່ງມີ.

        ຢູ່ຕາແສງ ຝົງລາຍ, ອາຊີບລ້ຽງເຜິ້ງໄດ້ມີກ່ອນນີ້ເປັນເວລາຫຼາຍປີແລ້ວ, ແຕ່ສ່ວນຫຼາຍແມ່ນລ້ຽງແບບປ່ອຍຕາມທຳມະຊາດ. ໃນຊຸມປີມໍ່ໆມານີ້, ບົນພື້ນຖານທ່າແຮງແມ່ນມີປ່າໄມ້, ຕົ້ນໄມ້ກິນໝາກ, ບັນດາຄອບຄົວລ້ຽງເຜິ້ງໄດ້ຮ່ວມສຳພັນກັນ, ສ້າງຕັ້ງສະຫະກອນ ເຜິ້ງຝົງລາຍ, ດ້ວຍ 13 ສະມາຊິກ. ແທນທີ່ລ້ຽງເຜິ້ງຕາມຮູບແບບຍ່ອຍກະແຈກກະຈາຍ, ບັນດາຄອບຄົວສະຫະກອນໄດ້ຈັດການລ້ຽງເຜິ້ງຕາມແຜນການ. ບົນພື້ນຖານເຊັນສັນຍາຈຳໜ່າຍ, ສະຫະກອນຈັດແຜນການໃຫ້ແກ່ບັນດາຄອບຄົວເພື່ອຜະລິດ. ສະນັ້ນ, ມາຮອດປະຈຸບັນ ສະຫະກອນພວມຮັກສາຮູບແບບລ້ຽງເຜິ້ງປະມານ 1.000 ຝູງ, ດ້ວຍລາຍຮັບໃນແຕ່ລະປີປະມານ 2,5 ຕື້ດົ່ງ (100.000 USD). ທ່ານ ຫງວຽນວັນແທັ່ງ, ຫົວໜ້າສະຫະກອນ ເຜິ້ງຝົງລາຍ, ເມືອງ ທ້ວນເຈົາ, ແຂວງ ເຊີນລາ, ໃຫ້ຮູ້ວ່າ:

        “ສະມາຊິກສະຫະກອນທັງໝົດໄດ້ມີຫຼາຍປະສົບການໃນການລ້ຽງເຜິ້ງ, ນີ້ແມ່ນຈຸດດີ ແລະ ແມ່ນທ່າແຮງຂອງສະຫະກອນ. ພາຍຫຼັງສ້າງຕັ້ງ ສະຫະກອນກໍ່ໄດ້ຜະລິດຕາມມາດຕະຖານ Vietgap. ສະຫະກອນໄດ້ສ້າງເຄື່ອງໝາຍການຄ້າ, ກາໝາຍສິນຄ້າ… ມາຮອດປະຈຸບັນ, ຜະລິດຕະພັນຂອງສະຫະກອນ ເຜິ້ງຝົງລາຍໄດ້ມີໜ້າຢູ່ຕະຫຼາດ ແລະ ມີຫຼາຍຄົນຮູ້ຈັກເຖິງ”.

(ຄຸນນະພາບຂອງນ້ຳເຜິ້ງໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ)

        ດ້ວຍຮູບແບບລ້ຽງເຜິ້ງແບບທຳມະຊາດ, ການເກັບ ແລະ ຮັກສານ້ຳເຜິ້ງໄດ້ປະຕິບັດຖືກຕາມຂັ້ນຕອນ, ປະລິມານ ແລະ ຄຸນນະພາບຂອງນ້ຳເຜິ້ງໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ. ຜູ້ບໍລິໂພກຫຼາຍຄົນໄດ້ຕີລາຄາສູງຜະລິດຕະພັນນ້ຳເຜິ້ງຂອງສະຫະກອນ, ຍ້ອນຄວາມຫວານ, ຫອມ, ສີກໍ່ງາມຕາ. ຄອບຄົວທ່ານ ຟ້າມຊວັນເຊີນ ແມ່ນໜຶ່ງໃນບັນດາຄອບຄົວທຳອິດທີ່ລ້ຽງເຜິ້ງຢູ່ຕາແສງ ຝົງລາຍ, ເມືອງ ທ້ວນເຈົາ, ແຂວງ ເຊີນລາ. ດ້ວຍປະສົບການເປັນເວລາ 20 ປີ, ທ່ານ ເຊີນ ໃຫ້ຮູ້ວ່າ ອາຊີບລ້ຽງເຜິ້ງບໍ່ຮຽກຮ້ອງຕ້ອງມີເງິນທຶນຫຼາຍ, ເຖິງຢ່າງໃດກໍ່ຕາມ ເພື່ອບັນລຸປະລິມານ ແລະ ຄຸນນະພາບດີທີ່ສຸດ, ຜູ້ລ້ຽງເຜິ້ງຕ້ອງລ້ຽງຕາມແຕ່ລະໄລຍະ ແລະ ແຕ່ລະລະດູການ, ພິເສດແມ່ນຂັ້ນຕອນຜະລິດນ້ຳເຜິ້ງຕາມມາດຕະຖານ ການປະຕິບັດການຜະລິດກະສິກຳດີຢູ່ ຫວຽດນາມ (VietGap).

        “ການປະຕິບັດຕາມ VietGap ສິ່ງແວດລ້ອມຕ້ອງສະອາດ. ເມື່ອໂຕເຜິ້ງໄປກິນເກສອນຕ້ອງຮັບປະກັນມາດຕະຖານແຍກເຜິ້ງອອກຈາກຢາ, ສີດຢາໃສ່ໝາກໄມ້ ແລະ ຢານຳໃຊ້ເພື່ອປົວພະຍາດໃຫ້ແກ່ຝູງເຜິ້ງ, ແຫຼ່ງນ້ຳເຜິ້ງຕ້ອງສະອາດ”.

        ເພື່ອສະໜອງໃຫ້ແກ່ຕະຫຼາດຜະລິດຕະພັນນ້ຳເຜິ້ງທີີ່ຮັບປະກັນດ້ານຄຸນນະພາບ, ສະຫະກອນໄດ້ເຜີຍແຜ່ຄວາມຮັບຮູ້ກ່ຽວກັບຂັ້ນຕອນຜະລິດຕາມມາດຕະຖານ VietGap; ຝຶກອົບຮົມວິທີກັນພະຍາດ, ເຕັກນິກການເກັບ, ປຸງແຕ່ງ ແລະ ເກັບຮັກສາຜະລິດຕະພັນນ້ຳເຜິ້ງ… ທ່ານ ຫງວຽນວັນຕວັນ, ສະມາຊິກສະຫະກອນ ເຜິ້ງຝົງລາຍ, ແບ່ງປັນວ່າ:

        “ພາຍຫຼັງການເກັບ, ຜະລິດຕະພັນນ້ຳເຜິ້ງຂອງສະຫະກອນພວກຂ້າພະເຈົ້າໄດ້ແຍກນ້ຳອອກ. ຫຼັງຈາກນັ້ນ, ໄດ້ບັນຈຸໃສ່ໃນແກ້ວ, ຕິດສະແຕັມຕົ້ນກຳເນີດ. ກ່ອນນີ້, ຜະລິດຕະພັນໄດ້ຮັບການຢັ້ງຢືນບັນລຸມາດຕະຖານ VietGap ແລ້ວ, ມາຮອດປະຈຸບັນ ແມ່ນບັນລຸ OCOP 4 ດາວ. ປະຈຸບັນ, ຜະລິດຕະພັນໄດ້ຂາຍຢູ່ພາຍໃນປະເທດ ແລະ ເມື່ອຄົ້ນຫາຕົ້ນກຳເນີດຜະລິດຕະພັນກໍ່ງ່າຍ, ປະຊາຊົນມີຄວາມອຸ່ນອ່ຽນໃຈເມື່ອນຳໃຊ້ຜະລິດຕະພັນຂອງພວກຂ້າພະເຈົ້າ”.

        ຄິດສະເລ່ຍແຕ່ລະປີ, ສະຫະກອນໄດ້ເກັບນ້ຳເຜິ້ງ 60 ໂຕນ. ພໍ່ຄ້າຊາວຂາຍໄດ້ເກັບຊື້ຜະລິດຕະພັນຂອງສະຫະກອນເປັນສ່ວນຫຼາຍ ແລະ ໄດ້ຈຳໜ່າຍຢ່າງກວ້າງຂວາງຢູ່ບັນດາຮ້ານຂາຍຍ່ອຍຢູ່ຫຼາຍທ້ອງຖິ່ນໃນທົ່ວປະເທດ. ພາຍຫຼັງເຄື່ອນໄຫວເປັນເວລາກວ່າ 5 ປີ, ສະຫະກອນ ເຜິ້ງຝົງລາຍ ໄດ້ກາຍເປັນສະຫະກອນດີເດັ່ນກ່ຽວກັບການພັດທະນາການລ້ຽງເຜິ້ງເອົານ້ຳເຜິ້ງໃນບໍລິເວນເມືອງ ທ້ວນເຈົາ; ສ້າງເປັນຜະລິດຕະພັນກະສິກຳດີເດັ່ນຂອງທ້ອງຖິ່ນ ແລະ ກາຍເປັນຜະລິດຕະພັນກະສິກຳດີເດັ່ນຂັ້ນແຂວງ.

        ການລ້ຽງເຜິ້ງຕາມຮູບແບບຮ່ວມສຳພັນ, ເຮັດເປັນລະບົບການຜະລິດ, ປຸງແຕ່ງ ແລະ ຈຳໜ່າຍໄດ້ຊຸກຍູ້ອາຊີບລ້ຽງເຜິ້ງເອົານ້ຳເຜິ້ງຢູ່ຕາແສງ ຝົງລາຍ ເວົ້າສະເພາະ ແລະ ການຜະລິດກະສິກຳຢູ່ແຂວງ ເຊີນລາ ເວົ້າລວມ, ພັດທະນາຕາມທິດຍືນຍົງ, ນຳມາເຊິ່ງມູນຄ່າສູງ, ຊ່ວຍໃຫ້ຊາວກະສິກອນສ້າງຄວາມຮັ່ງມີ, ພັດທະນາແບບຍືນຍົງ.