ປະເພນີຕົບກົ້ນກັນຂອງຊາວເຜົ່າມົ້ງໄດ້ຮັບການຟື້ນຟູ
|
ໃນຊຸມມື້ນີ້, ຊາວເຜົ່າມົ້ງຢູ່ບັນດາແຂວງເຂດພູດອຍທາງທິດເໜືອ, ພວມເບີກບານມ່ວນຊື່ນຕ້ອນຮັບບຸນປີໃໝ່ປະຈຳຊາດ (ໝາຍເຖິງບຸນເຕັດ) ປີມະເມຍ 2014. ພາຍຫຼັງພິທີບູຊາທີ່ຖືກຈັດຂຶ້ນໃນແຕ່ລະຄອບຄົວ, ແຕ່ຮຸ່ງເຊົ້າວັນທີ 1/1/2014, ຢູ່ຕາມຫົນທາງສາຍຕ່າງໆທີ່ພາໄປເຖິງໃຈກາງບັນດາຕາແສງ ລ້ວນແຕ່ເຕັມໄປດ້ວຍສີສັນຫຼາກຫຼາຍຂອງຊຸດອາພອນປະຈຳເຜົ່າທີ່ສວຍງາມ. ໃຕ້ແສງແດດຍາມລະດູບານໃໝ່ທີ່ອົບອຸ່ນ, ພວກບາວສາວຊາວເຜົ່າມົ້ງໄດ້ຊັກຊວນກັນໄປຫຼິ້ນບຸນຢູ່ເຂດຕ່າງໆ.
ຂະບວນຄົນພາກັນຫຼັ່ງໄຫຼມາຮອດໃຈກາງຕາແສງ ເຄົ້າວາຍ, ກ້ານຈູຟິ່ນ, ລຸ້ງປູ ເມືອງແມວຫວາກ ຄ່ອຍໆຫລາຍຂຶ້ນ, ໃນນັ້ນມີເພື່ອນໜຸ່ມຫຼາຍຄົນໄດ້ມາຈາກເມືອງດົງວັນຢູ່ຄຽງຂ້າງ. ເຂົາເຈົ້າຕ່າງກໍນຸ່ງຊຸດອາພອນປະຈຳເຜົ່າທີ່ສວຍງາມ ແລະ ພ້ອມກັນເຂົ້າຮ່ວມການລະຫຼິ້ນພື້ນເມືອງຄື : ໂຍນໝາກຄອນ, ດຶງເຊືອກ, ຂັບກ້ຽວ, ຟ້ອນແຄນ.... ທ່ານດົກວຽດແທ່ງ ປະທານຄະນະກຳມະການປະຊາຊົນຕາແສງ ລຸ້ງປູ ເມືອງ ແມວຫວາກ ໃຫ້ຮູ້ວ່າ :
“ ການຈັດຕັ້ງບຸນເຕັດຂອງຊາວເຜົ່າມົ້ງໃນບໍລິເວນຕາແສງ ລຸ້ງປູ ແມ່ນແຜນນະໂຍບາຍໃຫຍ່ຂອງແຂວງກໍຄືຂອງເມືອງ. ພວກຂ້າພະເຈົ້າພະຍາຍາມຮັບປະກັນໃຫ້ພໍ່ແມ່ປະຊາຊົນໃນຕາແສງໄດ້ຕ້ອນຮັບບຸນເຕັດຢ່າງເບີກບານມ່ວນຊື່ນ”
ໂດຍມີຄວາມແຕກຕ່າງກັບທຸກໆປີ, ງານບຸນລະດູບານໃໝ່ປີນີ້ ເບິ່ງຄືວ່າມີຄວາມມ່ວນຊື່ນກ່ວາທຸກໆປີ ຂະນະທີ່ເປັນຄັ້ງທຳອິດ ປະເພນີຕົບກົ້ນກັນ ຂອງຊາວເຜົ່າມົ້ງໄດ້ຮັບການຟື້ນຟູ. ນີ້ໄດ້ຮັບຖືວ່າແມ່ນຈຸທີ່ພົ້ນເດັ່ນ, ສ້າງຄວາມປະທັບໃຈໃນງານບຸນ. ສຳລັບຊາວເຜົ່າມົ້ງແລ້ວ, ບໍ່ພຽງແຕ່ແມ່ນການລະຫຼິ້ນໃນຊຸມມື້ຕົ້ນລະດູບານໃໝ່ເທົ່ານັ້ນ, ຫາກຍັງແມ່ນຈຸດວັດທະນະທຳທີ່ເປັນເອກະລັກສະເພາະຂອງປະຊາຊົນບັນດາເຜົ່າອີກດ້ວຍ. ນີ້ກໍແມ່ນໂອກາດເພື່ອໃຫ້ຄູ່ບາວສາວໄດ້ພົບກັນ ແລະ ຕັກສິນຈະກາຍເປັນຄູ່ສົມລົດໄດ້ຫຼືບໍ່ ?
ນາງ ຢາງທິຢື ຢູ່ບ້ານຕາລຸ່ງອາ, ຕາແສງຕາລຸ່ງ ເມືອງແມວຫວກໃຫ້ຮູ້ວ່າ:
“ປະເພນີຕົບກົ້ນກັນ, ຂ້າພະເຈົ້າໄດ້ຍິນພໍ່ແມ່ເວົ້າໃຫ້ຟັງແລ້ວ, ແລະ ປະຈຸບັນໄດ້ຮັບການຟື້ນຟູ, ດັ່ງນັ້ນ ຂ້າພະເຈົ້າດີໃຈຫຼາຍ. ຂ້າພະເຈົ້າຫວັງວ່າ ປະເພນີນີ້ຈະໄດ້ຮັບການຮັກສາໄວ້ ເພື່ອໃຫ້ພວກບາວສາວມີໂອກາດເຈິກັນ, ເປັນຕົ້ນແມ່ນໃນຍາມລະດູບານໃໝ່ ”
ການຟື້ນຟູ ຈຸດວັດທະນະທຳທີ່ເປັນເອກະລັກສະເພາະຂອງ ຊາວເຜົ່າມົ້ງ ບໍ່ພຽງແຕ່ເພື່ອອະນຸລັກຮັກສາຄຸນຄ່າວັດທະນະທຳພື້ນເມືອງເທົ່ານັ້ນ, ຫາກຍັງເປັນການໂຄສະນາແນະນຳຮີດຄອງປະເພນີຂອງຊາວທ້ອງຖິ່ນໃຫ້ແກ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ທ່ານຫງວຽນຈີ້ເທືອ່ງ ຮອງເລຂາພັກເມືອງ, ປະທານຄະນະກຳມະການປະຊາຊົນເມືອງແມວຫວາກ ໃຫ້ຮູ້ວ່າ :
“ ປີນີ້ທາງເມືອງໄດ້ຊີ້ນຳຂະແໜງວິຊາຊີບຂຶ້ນແຜນການ ແລະ ເຊື້ອເຊີນບັນດານັກວິຊາການຢູ່ພະແນກວັດດທະນະທຳລົງມາຊ່ວຍຟື້ນຟູ ປະເພນີຕົບກົ້ນກັນ ຊຶ່ງແມ່ນຄວາມງາມດ້ານ ວັດທະນະທຳທີ່ເປັນເອກະລັກສະເພາະຂອງ ຊາວເຜົ່າມົ້ງ. ປີນີ້ທາງເມືອງຕົກລົງຈັດຕັ້ງ ແລະ ໄລຍະຕໍ່ໄປຈະໂຄສະນາຂົນຂວາຍປະຊາຊົນຟື້ນຟູ ປະເພນີຕົບກົ້ນຊຶ່ງແມ່ນສີສັນວັດທະນະທຳຂອງ ຊາວເຜົ່າມົ້ງ” .