(vovworld)-ສະໂມສອນເດີນກາຕາຍຕື(ໝາຍເຖິງການຮ້ອງເພງພື້ນເມືອງຂອງຊາວພາກໃຕ້) ຢູ່ ບັນດາຕາແສງຂຶ້ນກັບເມືອງເກາະ ຟູກວກ ຖືກກຳເນີດຈາກສຽງຂັບຮ້ອງຂອງບັນດາຊາວປະມົງທີ່ທຳມາຫາກິນຢູ່ທີ່ນີ້. ເມື່ອມີເວລາຫວ່າງ, ເຂົາເຈົ້າໄດ້ພ້ອມກັນເດີນກາຕາຍຕືເພື່ອເຮັດໃຫ້ຄວາມອິດເມື່ອຍຫາຍໄປພາຍຫລັງເຮັດວຽກຢ່າງລຳບາກກາກກຳ ແລະ ຫລຸດຜ່ອນຄວາມຄິດຮອດຄິດເຖິງຄອບຄົວ. ໃນລາຍການສາລະຄະດີພາກນີ້, ພວກເຮົາຂໍແນະນຳບົດຂອງນັກຂ່າວ ລາມຮຽວທີ່ພາດຫົວເລື່ອງວ່າ: ພະລັງຊີວິດຂອງສິລະປະເດີນກາຕາຍຕືຢູ່ເຂດໝູ່ເກາະທີ່ຫ່າງໄກ.
ເດີນກາຕາຍຕື ໄດ້ຊ່ວຍໃຫ້ປະຊາຊົນບັນເທົາຄວາມອິດເມື່ອຍ
ພາບ:binhphuoc.com.vn
|
ໃນເວລາກວ່າ 10 ປີມານີ້, ເຮືອນຂອງລຸງ ເລເຈື່ອງຢາງ ຢູ່ ຕາແສງ ໂຖເຈົາ ເມືອງເກາະ ຟູກວກ ຍາມໃດກໍຟົດຟື້ນມ່ວນຊື່ນ ດ້ວຍສຽງຮ້ອງລຳທຳເພງ, ສຽງຫົວ. ບັນດາສະມາຊິກໃນສະໂມສອນ ເດີນກາຕາຍຕື ໂຖເຈົາ ມາເຕົ້າໂຮມກັນຢູ່ທີ່ນີ້ເພື່ອກະກຽມງານພົບປະແລກປ່ຽນສິລະປະພ້ອມກັບທະຫານ, ຮັບໃຊ້ໃຫ້ແກ່ພໍ່ແມ່ປະຊາຊົນທີ່ດຳລົງຊີວິດຢູ່ເທິງເກາະ. ລຸງ ເລເຈື່ອງຢາງ, ຜູ້ສ້າງຕັ້ງສະໂມສອນເດີນກາຕາຍຕື ໂຖເຈົາ ເລົ່າສູ່ຟັງວ່າ:
“ໃນຄາວນັ້ນ ຊີວິດທາງດ້ານຈິດໃຈແມ່ນຂາດແຄນຫລາຍ ສະນັ້ນ ຂ້າພະເຈົ້າສ້າງຕັ້ງສະໂມສອນນີ້ເພື່ອນຳເອົາອາຫານດ້ານຈິດໃຈມາໃຫ້ທຸກຄົນ. ຂ້າພະເຈົ້າ ມີຄວາມເມົາມົວກັບເດີນກາຕາຍຕືມາແຕ່ຄາວຍັງນ້ອຍ, ສະນັ້ນ ຈຶ່ງພ້ອມກັບບັນດາຜູ້ນິຍົມເດີນກາຕາຍຕືຝືກແອບທຸກມື້ເພື່ອກະກຽມໃຫ້ງານພົບປະແລກປ່ຽນ. ຂ້າພະເຈົ້າຮູ້ສຶກເປັນກຽດທີ່ສຸດເມື່ອ UNESSO ຮັບຮູ້ເດີນກາຕາຍຕືເປັນມໍລະດົກບໍ່ມີຮູບຮ່າງ.”
ສະມາຊີກຂອງສະໂມສອນເດີນກາຕາຍຕືໂຖເຈົາແມ່ນບັນດາຊາວປະມົງ, ຊາວກະສິກອນ, ບັນດາພະນັກງານຕາແສງ, ຜູ້ອາຍຸສູງ.. ທຳນອງເພງທີ່ອ່ອນຊອນຂອງເດີນກາຕາຍຕື ໄດ້ຊ່ວຍໃຫ້ປະຊາຊົນບັນເທົາຄວາມອິດເມື່ອຍພາຍຫລັງໄປຫາປາຢູ່ທະເລມາເປັນເວລາຫລາຍມື້.
ເດີນກາຕາຍຕື ແມ່ນອາຫານທາງດ້ານຈິດໃຈທີ່ຂາດບໍ່ໄດ້ຂອງປະຊາຊົນພາກໃຕ້
ພາບ:internet
|
ກໍເຊັ່ນດຽວກັນກັບຢູ່ເກາະ ໂຖເຈົາ, ເດີນກາຕາຍຕື ໄດ້ເຮັດໃຫ້ຊີວິດທາງດ້ານຈິດໃຈຂອງປະຊາຊົນໃນເກາະ ຟູກວກ ອຸດົມສົມບູນຂຶ້ນຕື່ມ. ນອກນັ້ນ, ສິລະປະເດີນກາຕາຍຕື ຍັງກາຍເປັນຜະລິດຕະພັນພິເສດຢູ່ເຂດໝູ່ເກາະແລະໄດ້ຮັບຄວາມນິຍົມຈາກນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຢາມເກາະ ຟູກວກເປັນຈຳນວນຫລວງຫລາຍ. ສະໂມສອນ ເດີນກາຕາຍຕື ມີສະມາຊິກກວ່າ 30 ຄົນ ແລະ ອາທິດຫນຶ່ງຈັດການເຄື່ອນໄຫວສິລະປະເຖິງ 4 ຄັ້ງ. ປ້າ ຮ່າກີມແທງ, ອາຍຸ 70 ປີ, ຫົວຫນ້າສະໂມສອນ ເດີນກາຕາຍຕື ຟູກວກ ໃຫ້ຮູ້ວ່າ:
“ເຖິງວ່າຢູ່ເຂດໝູ່ເກາະທີ່ຫ່າງໄກກໍ່ຕາມ ແຕ່ຂະບວນການ ເດີນກາຕາຍຕື ພັດທະນາທີ່ສຸດ. ຢູ່ທີ່ນີ້ຍັງຂາດບັນດາລາຍການລະຫລິ້ນບັນເທິງ ແຕ່ ເດີນກາຕາຍຕື ໄດ້ສ້າງຄວາມນິຍົມໃຫ້ແກ່ຫຼາຍຄົນ. ບາງລາຍການສະແດງ, ມີສະມາຊິກສະໂມສອນພຽງ 1,2 ຄົນຮ້ອງເພງເທົ່ານັ້ນ ສ່ວນຍັງເຫລືອແມ່ນນັກທ່ອງທ່ຽວມາຮ້ອງເພງນຳ.”
ແຕ່ດົນນານມາແລ້ວ, ເດີນກາຕາຍຕື ແມ່ນອາຫານທາງດ້ານຈິດໃຈທີ່ຂາດບໍ່ໄດ້ຂອງປະຊາຊົນພາກໃຕ້ຫວຽດນາມ. ຍ້ອນມີບັນດາສະໂມສອນ ເດີນກາຕາຍຕື ຄືຂອງລຸງຢາງ, ປ້າແທງ ຫລືສະໂມສອນອື່ນຢູ່ ຟູກວກ, ເດີນກາຕາຍຕື ນັບມື້ນັບແຜ່ຂະຫຍາຍໃນໝູ່ປະຊາຊົນ. ປະກອບສ່ວນອະນຸລັກຮັກສາມໍລະດົກວັດທະນະທຳບໍ່ມີຮູບຮ່າງທີ່ຕາງຫນ້າຂອງມວນມະນຸດ, ກໍຄືຮັກສາຄຸນຄ່າວັດທະນະທຳອັນລຳ້ຄ່າໃນຊີວິດດ້ານຈິດໃຈຂອງປະຊາຊົນພາກໃຕ້ເວົ້າສະເພາະ, ປະຊາຊົນຫວຽດນາມ ແລະ ມວນມະນຸດເວົ້າລວມ.