(vovworld)- ພາຍຫຼັງສອງປີແຫ່ງການປະຕິບັດຂະບວນການກໍ່ສ້າງຊົນນະບົດໃໝ່, ຕວຽນກວາງ ເຊິ່ງແມ່ນແຂວງໜຶ່ງຢູ່ເຂດພູດອຍທາງພາກເໜືອຫວຽດນາມ ສາມາດບັນລຸໄດ້ໝາກຜົນທີ່ສຳຄັນ, ພິເສດແມ່ນແຜນຮ່າງກໍ່ສ້າງທາງຄົມມະນະຄົມຊົນນະບົດດ້ວຍເບຕົງໄດ້ຮັບການຜັນຂະຫຍາຍສຳເລັດຜົນພໍສົມຄວນ. ດ້ວຍທິດນຳທີ່ວ່າ: ”ລັດ ແລະ ປະຊາຊົນພ້ອມກັນເຮັດ”. ແຜນນະໂຍບາຍກໍ່ສ້າງທາງຄົມມະນາຄົມດ້ວຍເບຕົງຢູ່ແຂວງຕວຽນກວາງ ໄດ້ກາຍເປັນຂະບວນການທີ່ໄດ້ຮັບການສະໜັບສະໜູນຈາກປະຊາຊົນເປັນຈຳນວນຫຼວງຫຼາຍ ແລະ ຜັນຂະຫຍາຍຢ່າງຕັ້ງໜ້າ.
ການກໍ່ສ້າງທາງຄົມມະນາຄົມດ້ວຍເບຕົງຢູ່ແຂວງຕວຽນກວາງ
(ພາບ: google.com.vn)
ຕວຽນກວາງແມ່ນແຂວງພູດອຍ, ພູມສັນຖານທຸລະກັນດານ, ດ້ວຍ 80% ຈຳນວນພົນລະເມືອງແມ່ນຊົນເຜົ່າສ່ວນໜ້ອຍ, ເສດຖະກິດຕົ້ນຕໍແມ່ນອິງໃສ່ກະສີກຳ ແລະ ປ່າໄມ້, ດັ່ງນັ້ນຊີວິດຂອງປະຊາຊົນຍັງປະສົບກັບຄວາມຫຍຸ້ງຍາກຫຼາຍ. ພາຍຫຼັງສອງປີແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ແຂວງຕວຽນກວາງ ໄດ້ເລືອກເຟັ້ນວິວັດການປະຕິບັດທີ່ເໝາະສົມ, ນັ້ນແມ່ນຮ່ວມແຮງກໍ່ສ້າງທາງຄົມມະນາຄົມຊົນນະບົດ, ຖືວ່ານີ້ແມ່ນບາດກ້າວບຸກທະລຸ, ສ້າງປະຖົມປັດໃຈໃຫ້ແກ່ການເປີດກວ້າງການຜະລິດ, ດຳເນີນທຸລະກິດ, ຈໍລະຈອນສິນຄ້າ, ຮັບໃຊ້ໃຫ້ແກ່ການຫັນເປັນທ້ອງຖີ່ນອຸດສາຫະກຳ ແລະ ທັນສະໄໝ. ອຳນາດການປົກຄອງແຂວງຕວຽນກວາງ ໄດ້ປະຕິບັດແຜນນະ ໂຍບາຍກໍ່ສ້າງທາງເບຕົງຢູ່ເຂດຊົນນະບົດຕາມທິດນຳທີ່ວ່າ ”ລັດ ແລະ ປະຊາຊົນພ້ອມກັນເຮັດ”. ຕາມນັ້ນແລ້ວ, ລັດໜູນຊ່ວຍຊີມັງ, ທໍ່ລະບາຍນ້ຳດ້ວຍເບຕົງ ແລະ ຄ່າຄຸ້ມຄອງ. ນອກນັ້ນ, ລັດຍັງແນະນຳກ່ຽວກັບການອອກແບບ, ໜູນຊ່ວຍຄ່າຂົນສົ່ງຊີມັງ ແລະ ທໍ່ລະບາຍນ້ຳດ້ວຍເບຕົງເຖິງໃຈກາງຕາແສງ. ສ່ວນປະຊາຊົນປະກອບແຮງງານ, ຊື້ຫີນ, ດິນຊາຍ ແລະ ຕິດຕາມກວດກາຄຸນນະພາບກິດຈະກຳ. ຜ່ານວິວັດແຫ່ງການປະຕິບັດ, ມີຫຼາຍຕາແສງຢູ່ຕວຽນກວາງ ໄດ້ມີວິທີປະຕິບັດຢ່າງມີຫົວຄິດປະດິດສ້າງ. ຕາແສງອີລາ ຂຶ້ນກັບນະຄອນຕວຽນກວາງ ໄດ້ມີວິທີປະຕິບັດໃໝ່. ທ່ານ Nguyen Manh Hung, ປະທານຕາແສງອີລາ, ໃຫ້ຮູ້ວ່າ:
”ຢູ່ຕາແສງອີລາ ຂອງພວກຂ້າພະເຈົ້າມີທາງສຳຄັນສາຍໜຶ່ງຍາວກວ່າ 1 ກມ, ແຕ່ບໍ່ໄປຜ່ານເຂດຊຸມຊົນ. ຖ້າຫາກລະດົມການຊ່ວຍເຫຼືອຈາກປະຊາຊົນມັນຈະເກີນກຳລັງຂອງເຂົາເຈົ້າ. ຕໍ່ໜ້າຄວາມຫຍຸ້ງຍາກນັ້ນ, ຄະນະກຳມະການແນວໂຮມປະເທດຊາດຕາແສງໄດ້ຮຽກຮ້ອງສະໜັບ ສະໜູນຄັງກໍ່ສ້າງທາງ ແລະ ໃນກອງປະຊຸມ, ພະນັກງານ ແລະ ປະຊາຊົນທົ່ວຕາແສງໄດ້ຕັ້ງຊື່ໃຫ້ທາງສາຍນີ້ວ່າ ”ເສັ້ນທາງສາມັກຄີ”. ພາຍຫຼັງ 3 ເດືອນແຫ່ງການໂຄສະນາ, ຂົນຂວາຍ, ປະຊາຊົນປະກອບເງິນໄດ້ 160 ລ້ານດົ່ງ ແລະ ເສັ້ນທາງດັ່ງກ່າວກໍ່ໄດ້ຮັບການກໍ່ສ້າງສຳເລັດ”
ການກໍ່ສ້າງທາງຄົມມະນາຄົມດ້ວຍເບຕົງຢູ່ແຂວງຕວຽນກວາງ
(ພາບ: google.com.vn)
ບ້ານໂຮ່ ຂຶ້ນກັບຕາແສງຍືຮ໋ານ, ເມືອງອຽນເຊີນ ແມ່ນຕາແສງໃນເຂດພູດອຍທີ່ຍັງປະສົບກັບຄວາມຫຍຸ້ງຍາກຫຼາຍ. ແຕ່ດ້ວຍຄວາມສາມັກຄີສະໜິດຕິດພັນເຊິ່ງກັນ ແລະ ກັນ, ບັນດາຄອບຄົວໃນໝູ່ບ້ານໄດ້ສະໝັກໃຈເຂົ້າຮ່ວມການກໍ່ສ້າງທາງຄົມມະນາຄົມ, ຄອບຄົວທີ່ຮັ່ງມີຊ່ວຍເຫຼືອໃຫ້ຄອບຄົວທີ່ທຸກຍາກ. ດ້ວຍສະຕິເປັນແບບຢ່າງ, ບັນດາພະນັກງານບ້ານໂຮ່, ຈາກເລຂາຄະນະພັກ ຕະຫຼອດຮອດເຈົ້າບ້ານ, ຫົວໜ້າແນວໂຮມປະເທດຊາດບ້ານ ໄດ້ສະໝັກໃຈກໍ່ສ້າງທາງໄລຍະຍາວກວ່າ, ສ່ວນບັນດາຄອບຄົວທີ່ທຸກຍາກ ໂດຍອີງຕາມເງື່ອນໄຂລະອຽດສາມາດປະກອບສ່ວນກໍ່ສ້າງທາງຊາວ, ສາມສິບແມັດ.. ທ່ານ Pham Van Chuc, ຫົວໜ້າບ້ານຍືຮ໋ານ, ໃຫ້ຮູ້ວ່າ:
”ໃນເບື້ອງຕົ້ນວຽກງານນີ້ປະສົບກັບຄວາມຫຍຸ້ງຍາກຫຼາຍ, ແຕ່ທາງບ້ານໄດ້ຈັດການປະຊຸມກັບປະຊາຊົນ, ໂຄສະນາຂົນຂວາຍ ແລະ ໄດ້ຮັບການສະໜັບສະໜູນຈາກເຂົາເຈົ້າ. ບັນດາຄອບຄົວມີລາຍຮັບສູງ ພ້ອມແລ້ວທີ່ຈະປະກອບຫຼາຍກວ່າບັນດາຄອບຄົວທີ່ມີລາຍຮັບຕ່ຳ”
ການກໍ່ສ້າງທາງຄົມມະນາຄົມດ້ວຍເບຕົງຢູ່ແຂວງຕວຽນກວາງ
(ພາບ: google.com.vn)
ກໍ່ເຊັ່ນດຽວກັບບ້ານໂຮ່, ບ້ານໝໍແຈ໋, ຕາແສງເຕິນຈ່າວ, ເມືອງເຢືອງເຊີນ, ປະຊາຊົນຢູ່ທີ່ນີ້ສ່ວນຫຼາຍແມ່ນຄົນຊົນເຜົ່າສ່ວນໜ້ອຍ. ຍ້ອນເຂົາເຈົ້າດຳລົງຊີວິດແບບກະແຈກກະຈາຍ ແລະ ເສດຖະກິດດ້ອຍພັດທະນາ ດັ່ງນັ້ນການກໍ່ສ້າງທາງຍັງປະສົບກັບຄວາມຫຍຸ້ງຍາກຫຼາຍ. ຕໍ່ໜ້າສະພາບຕົວຈິງນີ້, ອຳນາດການປົກຄອງພ້ອມກັບປະຊາຊົນໄດ້ປຶກສາຫາລືຢ່າງປະຊາທິປະໄຕ ແລະ ຕົກລົງກໍ່ສ້າງແຕ່ລະຕອນເທື່ອລະກ້າວ ແລະ ສູ້ຊົນພາຍຫຼັງ 3 ປີ ຈະກໍ່ສ້າງສຳເລັດ. ດ້ວຍວິທີເຮັດຄືດັ່ງກ່າວ, ຢູ່ຕວຽນກວາງ ໄດ້ປະກົດມີບາງຕາແສງທີ່ດີເດັ່ນກ່ຽວກັບການກໍ່ສ້າງທາງຄົມມະນາຄົມຢູ່ເຂດຊົນນະບົດ. ທາງຄົມມະນາຄົມດ້ວຍເບຕົງໄດ້ສ້າງເງື່ອນໄຂພັດທະນາການຜະລິດສິນຄ້າ, ເປີດກວ້າງຮູບແບບລ້ຽງສັດ, ປູກຜັກ, ສ້າງເງື່ອນໄຂໃຫ້ບັນດາຄອບຄົວຊາວກະສີກອນນຳເອົາເຄື່ອງຈັກມາຮັບໃຊ້ການຜະລິດ. ພ້ອມທັງສ້າງເງື່ອນໄຂສະດວກໃຫ້ລູກຫຼານໄປໂຮງຮຽນ, ຍູ້ແຮງການພົວພັນແລກປ່ຽນ, ຍົກສູງຊີວິດທາງດ້ານວັດທະນະທຳ. ບັນດາປັດໃຈນີ້ພວມສ້າງປະຖົມປັດໃຈໃຫ້ແກ່ການກໍ່ສ້າງຊົນນະບົດໃໝ່ຕາມບັນດາມາດຕະຖານທີ່ໄດ້ວາງອອກໃຫ້ສຳເລັດ. ເຖິງວ່າໝາກຜົນທີ່ໄດ້ຮັບຢູ່ແຕ່ລະແຫ່ງຈະແຕກຕ່າງກັນກໍ່ຕາມ, ແຕ່ໂສມໜ້າຢູ່ເຂດຊົນນະບົດໄດ້ຮັບການປັບປຸງດີພໍສົມຄວນເທື່ອລະກ້າວ. ໝາກຜົນດັ່ງກ່າວຈະປະກອບສ່ວນຊ່ວຍໃຫ້ຄະນະຊີ້ນຳການກໍ່ສ້າງຊົນນະບົດໃໝ່ສູນກາງປັບປຸງບັນດາກົນໄກ, ນະໂຍບາຍຢ່າງເໝາະສົມ, ຕອບສະໜອງຈຸດໝາຍກໍ່ສ້າງຊົນນະບົດໃໝ່ໃນໄລຍະປະຈຸບັນ ແລະ ໃນຊຸ່ມປີຕໍ່ໜ້າ.