(vovworld)- ການບຳລຸງສ້າງ, ເຝິກອົບຮົມໃຫ້ແກ່ຊາວກະສິກອນ ເພື່ອຖ່າຍທອດຄວາມກ້າວໜ້າທາງດ້ານເຕັກນິກວິທະຍາສາດ, ສ້າງແບບວິທີພັດທະນາການຜະລິດ ແລະ ຈັດຕັ້ງການຜັນຂະຫຍາຍ. ຄວາມຈິງແລ້ວ, ຮູບແບບການຜະລິດສິນຄ້າຖືກຖືວ່າ ແມ່ນບັນດາວຽກງານຈຳເປັນຕ້ອງເຮັດຢ່າງຮີບດ່ວນ ເພື່ອແກ້ໄຂໜຶ່ງໃນຈຳນວນ 19 ມາດຕະຖານໃນການກໍ່ສ້າງຊົນນະບົດໃໝ່, ແນໃສ່ຫັນປ່ຽນໂຄງປະກອບແຮງງານ, ຍົກສູງລາຍຮັບໃຫ້ແກ່ປະຊາຊົນ. ນີ້ກໍຖືວ່າແມ່ນແຫຼ່ງກຳລັງທີ່ສຳຄັນ, ”ເພີ່ມກຳລັງ”ເພື່ອເຮັດໃຫ້ການກໍ່ສ້າງຊົນນະບົດໃໝ່ຢູ່ຫວຽດນາມປະສົບຜົນສຳເລັດ.
ແນະນຳວິທີລ້ຽງເຜີ້ງ
(ພາບ: nongnghiep.vn )
ຕາມແຜນຮ່າງ ”ບຳລຸງສ້າງວິຊາຊີບໃຫ້ແກ່ຄົນງານຢູ່ເຂດຊົນນະບົດເຖິງປີ 2020” (ແຜນຮ່າງ 1956) ກ່ຽວກັບການບຳລຸງສ້າງວິຊາຊີບໃຫ້ແກ່ຄົນງານຢູ່ເຂດຊົນນະບົດ, ໄລຍະ 2011-2015 ແລ້ວ, ຈະມີຊາວກະສີກອນ 1,6 ລ້ານຄົນໄດ້ຮັບການບຳລຸງສ້າງດ້ານວິຊາຊີບດ້ານກະເສດ. ປະຈຸບັນ, ສູນສົ່ງເສີມກະສິກຳແຫ່ງຊາດໄດ້ປະຕິບັດການສອນວິຊາຊີບດ້ານກະເສດທົດລອງຢູ່ 11 ຕາແສງທີ່ເປັນແບບຢ່າງໃນການກໍ່ສ້າງຊົນນະບົດໃໝ່ ແລະ ເຫັນວ່າບັນລຸໄດ້ ປະສິດທິຜົນສູງ. ທີ່ກອງປະຊຸມສະຫຼຸບວຽກງານສອນວິຊາຊີບດ້ານກະເສດທົດລອງຢູ່ 11 ຕາແສງທີ່ເປັນແບບຢ່າງໃນການກໍ່ສ້າງຊົນນະບົດໃໝ່ ນັ້ນ, ສູນສົ່ງເສີມກະສິກຳແຫ່ງຊາດໃຫ້ຮູ້ວ່າ ຊາວກະສິກອນເກືອບທັງໝົດໄດ້ເຂົ້າຮ່ວມການຮຽນວິຊາຊີບດ້ານກະເສດ ແລະ ໄດ້ຮູ້ວິທີນຳໃຊ້ວິທະຍາສາດເຕັກນິກເຂົ້າໃນການຜະລິດກະສິກຳ. ໃນໄລຍະຈະມາເຖິງ, ສູນສົ່ງເສີມກະສິກຳແຫ່ງຊາດໄດ້ມີແຜນການເປີດກວ້າງການບຳລຸງສ້າງວິຊາຊີບດ້ານກະເສດໃນທົ່ວປະເທດ, ກ່ອນອື່ນໝົດແມ່ນຢູ່ 60 ເມືອງທີ່ທຸກຍາກໃນທົ່ວປະເທດ. ຕາມທ່ານນາງ Ha Thuy Hanh, ຮອງຜູ້ອຳນວຍການສູນສົ່ງເສີມກະສິກຳແຫ່ງຊາດແລ້ວ, ແຜນຮ່າງບຳລຸງສ້າງວິຊາຊີບໃຫ້ແກ່ຄົນງານຢູ່ເຂດຊົນນະບົດຂອງລັດຖະ ບານມີລັກສະນະສັງຄົມສູງທີ່ສຸດ ກ່ຽວກັບການຈັດຕັ້ງການບຳລຸງສ້າງວິຊາຊີບ. ທ່ານນາງ Ha Thuy Hanh, ເວົ້າວ່າ:
”ຕາມຂໍ້ຕົກລົງເລກທີ 1956, ປະຈຸບັນມີ 4 ໝວດວິຊາຊີບຕົ້ນຕໍທີ່ໄດ້ຮັບການບຳລຸງສ້າງໃຫ້ແກ່ຊາວກະສີກອນ, ນອກນັ້ນກະຊວງກະສິກຳ ແລະ ພັດທະນາຊົນນະບົດໄດ້ປະກາດໃຊ້ລາຍຊື່ 71 ວິຊາຊີບດ້ານກະເສດໃຫ້ແກ່ຄົນງານຢູ່ເຂດຊົນນະລບົດ ເພື່ອໃຫ້ຊາວກະສີກອນມີເອກະສານກໍ່ຄືບັນດາແຂວງມີນະໂຍບາຍອັນລະອຽດໃນການບຳລຸງສ້າງວິຊາຊີບໃຫ້ແກ່ຊາວກະສີກອນ… ນອກນັ້ນ, ພວກເຮົາກໍ່ໄດ້ແນະນຳທິດເພື່ອໃຫ້ປະຊາຊົນເລືອກເຟັ້ນອາຊີບໃຫ້ຖືກຕ້ອງ ເພື່ອມີລາຍຮັບພາຍຫຼັງທີ່ນຳໃຊ້ບົດຮຽນຈາກການຮຳ່ຮຽນເຂົ້າໃນການຜະລິດກະສິກຳ ”
ສອນວິທີປູກຕົ້ນກາເຟ
(ພາບ: agroviet.gov.vn )
ຫວ່າງແລ້ວນີ້, ຕາແສງ Thuy Huong, ເມືອງ Chuong My, ນະຄອນ Ha Noi ມີຊາວກະສີກອນ 90 ຄົນໄດ້ຮຽນວິຊາຊີບດ້ານກະເສດ ດ້ວຍ 3 ອາຊີບທີ່ແຕກຕ່າງກັນນັ້ນແມ່ນ: ການປູກຕົ້ນໄມ້ກິນໝາກ, ນຳໃຊ້ເຄື່ອງຈັກໃນການຜະລິດກະສິກຳ ແລະ ການລ້ຽງ, ປູກສິນໃນນ້ຳ. ທ່ານ Dang Dinh Vinh ຢູ່ບ້ານ Phu Ben, ແມ່ນຜູ້ປະກອບອາຊີບປູກຕົ້ນໄມ້ກິນໝາກມາແຕ່ດົນນານແລ້ວ ແລະ ຫາກໍ່ເຂົ້າຮ່ວມຊຸດຮຽນກ່ຽວກັບວິທີການປູກຕົ້ນໄມ້ກິນໝາກ, ໃຫ້ຮູ້ວ່າ:
”ເຮົາປູກຕົ້ນໄມ້ກໍ່ຕ້ອງຮູ້ຕື່ມກ່ຽວກັບຕົ້ນໄມ້ປະເພດນັ້ນ, ຍິ່ງຮູ້ຫຼາຍເທົ່າໃດກໍ່ຍິ່ງດີ. ກ່ອນນີ້ມີຫຼາຍອັນຍັງບໍ່ຮູ້, ພຽງປູກຕົ້ນໄມ້ລ້າໆເທົ່ານັ້ນ. ປະຈຸບັນມີຄວາມຮູ້ແລ້ວກໍ່ອຸ່ນອ່ຽນໃຈທຳການຜະລິດກວ່າ”.
ຢູ່ຕາແສງ Tan Thong Hoi, ເມືອງ Cu Chi, ນະຄອນ ໂຮ່ຈີມິນ, ຊາວກະສີກອນກໍ່ໄດ້ຮັບການຮຽນວິຊາຊີບດ້ານກະເສດ. ບັນດາຊຸດຮຽນນີ້ ໂດຍສູນສົ່ງເສີມກະສິກຳແຫ່ງຊາດມອບໃຫ້ສູນສົ່ງເສີມກະສິກຳນະຄອນໂຮ່ຈີມິນປະຕິບັດ. ຄວາມຈິງໃຫ້ເຫັນວ່າ, ພາຍຫຼັງເຂົ້າຮ່ວມຊຸດຮຽນວິຊາຊີບດ້ານກະເສດ, ຊາວກະສີກອນໄດ້ມີການຫັນປ່ຽນຫຼາຍຢ່າງໃນການຜະລິດ. ປ້າ Le Thi Ngoc Xuan, ຢູ່ບ້ານ Trung, ຕາແສງ Tan Thong, ເມືອງ Cu Chi, ເຂົ້າຮ່ວມຊຸກຮຽນເຕັກນິກລ້ຽງສັດ ແລະ ສັດຕະວະແພດ, ໃຫ້ຮູ້ວ່າ:
”ການຮຽນນີ້ມີປະສິດທະຜົນສູງທີ່ສຸດ, ເພາະວ່າເມື່ອບໍ່ທັນໄດ້ຮຽນ ເຮົາພຽງແຕ່ເຮັດຕາມແບບຮູ້ອັນໃດ, ເຮັດອັນນັ້ນ. ແຕ່ພາຍຫຼັງໄດ້ຮຳ່ຮຽນ, ເຮົາລ້ຽງງົວ, ລ້ຽງໝູກໍ່ດີກວ່າ, ພ້ອມທັງຮູ້ວິທີປິ່ນປົວພະຍາດໃຫ້ສັດຢ່າງທັນການອີກ”.
ໃນໄລຍະຈະມາເຖິງ, ສູນສົ່ງເສີມກະສິກຳແຫ່ງຊາດ, ຈະຍູ້ແຮງການສອນວິຊາຊີບໃຫ້ໄດ້ຫຼາຍ, ພິເສດ, ການບຳລຸງສ້າງຈະຕິດພັນກັບວິສາຫະກິດ ເພື່ອແກ້ໄຂຄວາມຮຽກຮ້ອງຕ້ອງການດ້ານວຽກເຮັດງານທຳໃຫ້ແກ່ຊາວກະສີກອນ, ກໍ່ຄືຄວາມຕ້ອງການແຮງງານຂອງວິສາຫະກິດ. ເຮັດວຽກງານນີ້ໄດ້ດີ ພ້ອມກັບການນຳໃຊ້ວິທະຍາສາດ, ເຕັກໂນໂລຢີເຂົ້າໃນການຜະລິດກະສິກຳ, ຊົນນະບົດ. ນີ້ຈະແມ່ນທິດທາງທີ່ມີປະສິດທິຜົນທີ່ສຸດໃນຂະບວນວິວັດແຫ່ງການກໍ່ສ້າງຊົນນະບົດໃໝ່ຢູ່ຫວຽດນາມ.