(vovworld) - ໂດຍປະຕິບັດໂຄງການ ”ກໍ່ສ້າງຊົນນະບົດໃໝ່” ໄລຍະຜ່ານມາ, ແຂວງ ນິງທ້ວນ ໄດ້ສູມໃສ່ກໍ່ສ້າງທາງຄົມມະນາຄົມຢູ່ເຂດຊົນນະບົດ, ສະຖານີສູບນ້ຳ, ກໍ່ສ້າງຄອງເໝືອງຢ່າງຖາວອນ ເພື່ອຮັບໃຊ້ໃຫ້ແກ່ການຜະລິດ ແລະ ລະດົມທຸກແຫຼ່ງກຳລັງໃນສັງຄົມເພື່ອລົງທຶນກໍ່ສ້າງຕະຫຼາດ, ໂຮງຮຽນ, ຫໍວັດທະນະທຳ... ຮັບໃຊ້ໃຫ້ແກ່ຊີວິດຂອງປະຊາຊົນ. ບົດຂຽນ ”ແຂວງນິງທ້ວນ ກໍ່ສ້າງຊົນນະບົດໃໝ່” ຂອງ Jasi ນັກຂ່າວ ວິທະຍຸກະຈາຍສຽງຫວຽດນາມ ປະຈຳນະຄອນ ໂຮ່ຈີມິນ, ໄດ້ຮັບຮູ້ບັນດາຄວາມມານະພະຍາຍາມຂອງອຳນາດການປົກຄອງ ແລະ ປະຊາຊົນນິງທ້ວນໃນການກໍ່ສ້າງຊົນນະບົດໃໝ່.
ທາງເຂົ້າບ້ານວັດທະນະທຳ ເຈື່ອງແຊງ, ຕາແສງເຢືອກເຮົ້າ, ເມືອງນິງເຟືອກ ສະອາດສວຍງາມ
(ພາບ: baoninhthuan.com.vn)
ໂດຍປະຕິບັດທິດນຳທີ່ວ່າ ”ລັດ ແລະ ປະຊາຊົນພ້ອມກັນເຮັດ”, ມາຮອດປະຈຸບັນມີຫຼາຍທ້ອງຖີ່ນໃນແຂວງນິງທ້ວນ ໄດ້ສຸມໃສ່ເຂົ້າໃນການບຸລະນະສ້ອມແປງ ແລະ ກໍ່ສ້າງທາງຄົມມະນາຄົມລະຫວ່າງຕາແສງ, ລະຫວ່າງບ້ານຫຼາຍສາຍ, ສ້າງເງື່ອນໄຂສະດວກໃຫ້ປະຊາຊົນເປີດກວ້າງ ແລະ ພັດທະນາການຜະລິດ. ສະເພາະປີ 2011, ແຂວງ ນິງທ້ວນ ໄດ້ລົງທຶນເກືອບ 2 ຕຶ້ດົ່ງເພື່ອກໍ່ສ້າງທາງເບຕົງໃນໝູ່ບ້ານໃຫ້ຕາແສງຍິນເຊີນ, ເມືອງນິງເຊີນ ແລະ ຕາແສງຊວນຫາຍ, ເມືອງນິງຫາຍ, ກໍ່ສ້າງຄອງເໝືອງຢູ່ຕາແສງເຟືອກທ້າຍ, ເມືອງນິງເຟືອກ. ມາຮອດປະຈຸບັນ, ບັນດາກິດຈະກຳໄດ້ກໍ່ສ້າງສຳເລັດ ແລະ ນຳເຂົ້າໃຊ້ການແລ້ວ. ແລະກໍ່ໃນປີ 2011, ທາງແຂວງໄດ້ລົງທຶນກໍ່ສ້າງພື້ນຖານໂຄງລ່າງທີ່ຈຳເປັນຄື: ທາງຄົມມະນາຄົມ, ຊົນລະປະທານ, ສາທາລະນະສຸກ, ການສຶກສາ ແລະ ບັນດາກິດຈະກຳຮັບໃຊ້ຊີວິດຂອງປະຊາຊົນ; ບຸກເບີກເນື້ອທີ່ດິນທຳການຜະລິດໃນທົ່ວແຂວງເກືອບ 2000 ເຮັກຕາ... ດ້ວຍຍອດມູນຄ່າເກືອບ 55 ຕຶ້ດົ່ງ. ຄຽງຂ້າງການລົງທຶນຂອງລັດ, ປະຊາຊົນຢູ່ທີ່ນີ້ຍັງຕັ້ງໜ້າປະກອບເຫື່ອແຮງ, ທຶນຮອນ, ທີ່ດິນເພື່ອກໍ່ສ້າງພື້ນຖານໂຄງລ່າງ. ທ່ານ Le Ngoc Dung, ປະທານຕາແສງເຟືອກທ້ວນ, ເມືອງນິງທ້ວນ, ໃຫ້ຮູ້ວ່າ:
”ເວົ້າລວມແລ້ວ, ປະຊາຊົນເຫັນອົກເຫັນໃຈ ແລະ ສະໜັບສະໜູນແຜນນະໂຍບາຍກໍ່ສ້າງຊົນນະບົດໃໝ່, ປະຈຸບັນບັນດາເສັ້ນທາງຄົມມະນາຄົມໃນເຂດຊົນນະບົດໄດ້ຮັບການກໍ່ສ້າງສຳເລັດໂດຍພື້ນຖານແລ້ວ ອັນໄດ້ຮັບປະກັນໃຫ້ແກ່ການໄປມາຂອງປະຊາຊົນ. ນອກຈາກງົບປະມານຂອງລັດ, ປະຊາຊົນກໍ່ໄດ້ບໍລິຈາກເງິນຕື່ມອີກເພື່ອກໍ່ສ້າງບັນດາກິດຈະກຳໃຫ້ດີກວ່າ. ປະຊາຊົນມີຄວາມຕັ້ງໜ້າທີ່ສຸດໃນຂະບວນການ ”ລັດ ແລະ ປະຊາຊົນພ້ອມກັນເຮັດ”.
ນອກຈາກການລົງທຶນກໍ່ສ້າງພື້ນຖານໂຄງລ່າງ, ແຂວງນິງທ້ວນ ຍັງເອົາໃຈໃສ່ເຖິງການປ່ຽນແປງປະເພນີທຳການຜະລິດ, ນຳໃຊ້ບັນດາຄວາມກ້າວໜ້າດ້ານວິທະຍາສາດເຕັກນິກ ເພື່ອລຸດຜ່ອນລາຍຈ່າຍໃນການຜະລິດກະສີກຳ, ເພີ່ມສະມັດຕະພາບ, ຄູນຄ່າຜະລິດຕະພັນ, ເພີ່ມລາຍຮັບ. ພົ້ນເດັ່ນຄືຮູບແບບຮ່ວມສຳພັນລະຫວ່າງ (ຊາວກະສີກອນ, ນັກວິທະຍາສາດ, ນັກທຸລະກິດ ແລະ ລັດ) ”ຄຸ້ມຄອງທົ່ງນາຕາມທິດມີປະສິດທິຜົນ ແລະ ໝັ້ນຄົງ” ຢູ່ຕາແສງເຟືອກທ້າຍ, ເມືອງນິງເຟືອກ... ອັນໄດ້ນຳມາເຊິ່ງສະມັດຕະພາບ, ຄູນນະພາບຜະລິດຕະພັນສູງ, ຫຼຸດຜ່ອນສະພາບມົນລະພິດສິ່ງແວດລ້ອມ. ແຂວງນິງທ້ວນ ມີ 9 ຕາແສງ ໄດ້ສ້າງການຮ່ວມສຳພັນຜະລິດຢ່າງມີປະສິດທິຜົນ ໂດຍຜ່ານບັນດາລາຍການ, ໂຄງການຊ່ວຍເຫຼືອຂອງຕ່າງປະເທດ. ຕົວຢ່າງຄືຮ່ວມສຳພັນລ້ຽງແບ້, ແກະ ຢູ່ຕາແສງເຍິນຫາຍ, ເມືອງນິງຫາຍ; ຮ່ວມສຳພັນປູກຜັກສະອາດຢູ່ອານຫາຍ, ເມືອງນິງເຟືອກ.... ທ່ານ Nguyen Huu Duc, ຫົວໜ້າຄະນະຊີ້ນຳໂຄງການ ”ກໍ່ສ້າງຊົນນະບົດໃໝ່” ຢູ່ຕາແສງເຟືອກເຮົ້າ, ເມືອງນິງເຟືອກ, ໃຫ້ຮູ້ວ່າ:
” ຫວ່າງແລ້ວນີ້, ຕາແສງເຟືອກເຮົ້າກໍ່ໄດ້ນຳໃຊ້ຄວາມກ້າວໜ້າດ້ານວິທະຍາສາດເຕັກນິກເຂົ້າໃນການຜະລິດ. ຕໍ່ມາສະເໜີໃຫ້ທຸກຂັ້ນ, ທຸກຂະແໜງການທະວີຄູນຮູບແບບກໍ່ສ້າງຊົນນະບົດໃໝ່ຢູ່ເຟືອກເຮົ້າ, ໂດຍສະເພາະແມ່ນຮູບການຈັດຕັ້ງການຜະລິດຕົ້ນເຂົ້ານາທາມຢູ່ນິງທ້ວນ ອອກສູ່ທ້ອງຖີ່ນຕ່າງໆ”.
ໃນ 2 ປີຜ່ານມາ, ແຂວງນິງທ້ວນ ໄດ້ຈັດຕັ້ງການສອນວິຊາຊີບ 285 ຊຸດ, ດ້ວຍຜູ້ເຂົ້່າຮ່ວມກວ່າ 8.500 ຄົນ. ໃນນັ້ນບຳລຸງສ້າງບັນດາຂະແໜງກະສີກຳ, ອຸດສາຫະກຳ ແລະ ການບໍລິການກວມກວ່າ 45%. ທ່ານ Nguyen Xuan Hoa, ຮອງປະທານຜູ້ປະຈຳການຄະນະກຳມະການປະຊາຊົນແຂວງນິງທ້ວນ, ຮອງຫົວໜ້າຄະນະຊີ້ນຳໂຄງການ ”ກໍ່ສ້າງຊົນນະບົດໃໝ່” ແຂວງນິງທ້ວນ, ໃຫ້ຮູ້ບັນດາມາດຕະການຄົບຊຸດວ່າ:
”ໜຶ່ງໃນບັນດາຈຸດສຸມຂອງໂຄງການກໍ່ສ້າງຊົນນະບົດໃໝ່ນັ້ນແມ່ນ ນອກຈາກວຽກງານໂຄສະນາ, ຂົນຂວາຍ ເພື່ອໃຫ້ປະຊາຊົນຕອບສະໜອງການກໍ່ສ້າງຊົນນະບົດໃໝ່ແລ້ວ, ວຽກງານບຳລຸງສ້າງ, ຈັດຕັ້ງການຜະລິດຄືນໃໝ່ກໍ່ແມ່ນໜຶ່ງໃນບັນດາຈຸດສຸມ, ຈັດຕັ້ງການຜະລິດໄປຄຽງຄູ່ກັບການບຳລຸງສ້າງຈະຍົກສູງຄວາມຮັບຮູ້ຂອງປະຊາຊົນ, ຍົກສູງກຳລັງຄວາມສາມາດຂອງອຳນາດການປົກຄອງທ້ອງຖີ່ນ, ໜູນຊ່ວຍປະຊາຊົນໃນວຽກງານຈັດຕັ້ງການຜະລິດ, ການບຳລຸງສ້າງຄືນໃໝ່, ແລະ ມີຄວາມຮັບຮູ້ກ່ຽວກັບການກໍ່ສ້າງຊົນນະບົດໃໝ່”.
ໄລ່ມາຮອດຈຸດເວລານີ້, ແຂວງນິງທ້ວນ ພຽງແຕ່ມີ 15/47 ຕາແສງບັນລຸ 5 ມາດຕະຖານເທົ່ານັ້ນ, ໃນນັ້ນສ່ວນຫຼາຍແມ່ນສູມໃສ່ບັນດາມາດຕະຖານຄື: ໄຟຟ້າ, ໄປສະນີ, ລະບົບການເມືອງ ແລະ ຄວາມສະຫງົບ, ຄວາມເປັນລະບຽບຮຽບຮ້ອຍ, ສ່ວນມາດຕະຖານອື່ນໆແມ່ນບັລຸອັນຕາສ່ວນຕ່ຳ. ຕາມແຜນການແລ້ວ, ຮອດທ້າຍປີ 2015 ແຂວງນິງທ້ວນ ສູ້ຊົນໃຫ້ມີ 11 ຕາແສງບັນລຸມາດຕະຖານຊົນນະບົດໃໝ່. ໃນປີ 2012 ນີ້, ນິງທ້ວນ ສືບຕໍ່ປັບປຸງ ແລະ ພັດທະນາບັນດາສະຫະກອນ, ຍູ້ແຮງການນຳໃຊ້ບັນດາຄວາມກ້າວໜ້າດ້ານວິທະຍາສາດ ເຕັກນິກເຂົ້າໃນການຜະລິດ, ທະວີຄູນ ແລະ ເຜີຍແຜ່ບັນດາຮູບແບບການຜະລິດຄູ້ມຄອງທົ່ງນາຢ່າງມີປະສິດທິຜົນ ບົນພື້ນຖານປະສານສົມທົບບັນດາໂຄງການ, ສະຫະກອນ, ຮ່ວມສຳພັນການຜະລິດ, ຍົກສູງລາຍຮັບໃຫ້ແກ່ປະຊາຊົນ.