vovworld)- ການຢ້ຽມຢາມສະຫະພັນລັດເຊຍຢ່າງເປັນທາງການຂອງທ່ານ ເລຂາທິການໃຫຍ່ ພັກກອມມູນິດຫວຽດນາມ ຫງວຽນຟູຈ້ອງ ໄດ້ສິ້ນສຸດເມື່ອວັນທີ 25/11 ຜ່ານມາ ເປັນຂີດໝາຍໃຫມ່ໃນການເພີ່ມທະວີ, ປັບປຸງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ຫວຽດນາມ ແລະ ສະຫະພັນລັດເຊຍ. ພ້ອມກັບການລົງນາມໃນເອກະສານຮ່ວມມືສຳຄັນ 9 ສະບັບ, ການຮ່ວມມືກ່ຽວກັບດ້ານເສດຖະກິດ ແລະ ການຄ້າ ລະຫວ່າງສອງປະເທດ ໂດຍການນຳສອງປະເທດຢືນຢັນວ່າ ແມ່ນຂົງເຂດຄວນໄດ້ຮັບການຊຸກຍູ້ໃນໄລຍະຈະມາເຖິງ. ບົດຂຽນຂອງ ທູຮ່ຽນ ນັກຂ່າວວິທະຍຸກະຈາຍສຽງຫວຽດນາມ ທີ່ພາດຫົວຂໍ້ວ່າ: “ການຮ່ວມມືເສດຖະກິດການຄ້າລະຫວ່າງ ຫວຽນດາມ ແລະ ລັດເຊຍ.”
ການພົວພັນລະຫວ່າງຫວຽດນາມ ແລະລັດເຊຍ ໃນຊຸມປີມໍ່ໆມານີ້ ມີບາດກ້າວຫັນປ່ຽນຢ່າງຕັ້ງຫນ້າ ເມື່ອສອງຝ່າຍລ້ວນແຕ່ມີຄວາມຕ້ອງການພັດທະນາການພົວພັນດ້ວຍລະດັບຍຸດທະສາດຍາວນານ. ປີ 2012, ຫວຽດນາມ ແລະ ລັດເຊຍ ໄດ້ຕົກລົງຍົກການພົວພັນລະຫວ່າງສອງປະເທດຂຶ້ນສູ່ລະດັບຄູ່ຮ່ວມມືຍຸດທະສາດຮອບດ້ານ, ເປັນຂີດໝາຍໃຫມ່ເຮັດໃຫ້ການພົວພັນເລິກເຊິ່ງກວ່າ ແລະ ຊຸກຍູ້ການຮ່ວມມືລະຫວ່າງສອງປະເທດບັນລຸປະສິດທິຜົນຢ່າງແທດຈິງ. ໃນນັ້ນ ການຮ່ວມມືດ້ານເສດຖະກິດແມ່ນຫນຶ່ງໃນບັນດາຈຸດເດັ່ນ ແລະ ແມ່ນທິດບຸລິມະສິດພັດທະນາ. ກ່າວຄຳເຫັນທີ່ກອງປະຊຸມຫວ່າງແລ້ວນີ້ ຂອງຄະນະກຳມະການລະຫວ່າງລັດຖະບານສະຫະພັນລັດເຊຍ ຢູ່ ຮ່າໂນ້ຍ, ທ່ານຮອງນາຍົກລັດຖະມົນຕີ ລັດເຊຍ I. Shuvalov ເນັ້ນຫນັກວ່າ:
“ຫວຽດນາມ ແມ່ນຄູ່ຮວມມືທີ່ເປັນມູນເຊື້ອມາແຕ່ດົນນານຂອງລັດເຊຍ ແລະ ພວກຂ້າພະເຈົ້າ ກໍຖືຫວຽດນາມ ແມ່ນຫນຶ່ງໃນບັນດາບຸລິມະສິດໃນນະໂຍບາຍການຕ່າງປະເທດຂອງລັດເຊຍ. ພວກຂ້າພະເຈົ້າຢາກຢືນຢັນຄືນວ່າ: ທຸກການບຸລິມະສິດຊື່ງສອງປະເທດໄດ້ເປັນເອກະພາບ ແມ່ນຖືກຕ້ອງ ແລະ ພວກເຮົາຄວນມານະພະຍາຍາມເພື່ອຜັນຂະຫຍາຍ.”
ເວທີປາໄສວິສາຫະກິດຫວຽດນາມ-ລັດເຊຍ
ພາບປະກອບ:vov
|
ໃນ 2 ປີມານີ້, ການຮ່ວມມືລະຫວ່າງ ລັດເຊຍ ແລະ ຫວຽດນາມ ພັດທະນາດ້ວຍລະດັບດີພໍສົມຄວນ. ວົງເງິນການຄ້າສອງສົ້ນເພີ່ມຂຶ້ນຫລາຍສົມຄວນ. ວົງເງິນການຄ້າສອງສົ້ນປີ 2012 ບັນລຸ 3,8 ຕື້ USD, ປີ2013 ບັນລຸເກືອບ 4 ຕື້ USD. ບັນດາປະເພດສິນຄ້າສົ່ງອອກຂອງຫວຽດນາມ ໄປຍັງ ລັດເຊຍ ສ່ວນຫລາຍແມ່ນ ໂທລະສັບ, ຄອມພິວເຕີ, ເຄື່ອງຕ່ຳແຜ່ນຕັດຫຍິບ, ເກີບຫນັງ ແລະ ສິນໃນນ້ຳ… ປະຈຸບັນ ລັດເຊຍ ມີ 92 ໂຄງການລົງທຶນຢູ່ຫວຽດນມ, ດ້ວຍຍອດຈຳນວນທຶນຈົດທະບຽນກວ່າ 2 ຕື້ USD. ກົງກັນຂ້າມ, ຫວຽດນາມ ກໍລົງທຶນ 17 ໂຄງການຢູ່ ລັດເຊຍ ດ້ວຍຍອດຈຳນວນເງິນລົງທຶນແມ່ນ 2,5 ຕື້ USD, ສຸມໃສ່ຕົ້ນຕໍເຂົ້າໃນຂົງເຂດນ້ຳມັນອາຍແກສ, ທະນາຄານ, ການຄ້າ… ພ້ອມກັບຄວາມຄືບຫນ້າໃນການພົວພັນສອງຝ່າຍ, ການເຈລະຈາສັນຍາການຄ້າເສລີ FTA ລະຫວ່າງຫວຽດນາມ ແລະ ສຳພັນທະມິດພາສີ ຊື່ງລວມມີ: ລັດເຊຍ, ເບລາຣຸດ ແລະ ກາຊັກສະຖານ ພວມດຳເນີນບັນດາການປະຊຸມສຸດທ້າຍ ແລະ ຄາດວ່າຈະລົງນາມຢ່າງເປັນທາງການໃນຕົ້ນປີຈະມາເຖິງ. ນີ້ຈະແມ່ນເຫດການສ້າງເງື່ອນໄຂໃຫ້ການຈໍລະຈອນສິນຄ້າ, ບໍລິການ ແລະ ການລົງທຶນຂອງສອງປະເທດຢ່າງສະດວກກວ່າ, ຫລຸດຜ່ອນລາຍຈ່າຍການພົວພັນຕິດຕໍ່ໃຫ້ແກ່ບັນດາວິສາຫະກິດ, ຊຸກຍູ້ການເຕີບໂຕເສດຖະກິດ, ການຄ້າລະຫວ່າງສອງຝ່າຍຢ່າງໝັ້ນຄົງກວ່າ.
ໃນຂອບເຂດເພີ່ມທະວີການຮ່ວມມືກ່ຽວກັບດ້ານເສດຖະກິດ, ຫວຽດນາມ ແລະ ລັດເຊຍ ພວມສືບຕໍ່ເປີດກວ້າງການຮ່ວມມືໃນຂົງເຂດພະລັງງານ. ຄຽງຄູ່ກັບເລື່ອງ ບໍລິສັດຮ່ວມທຸລະກິດນຳ້ມັນອາຍແກສ Vietsovpetro ສືບຕໍ່ເຄື່ອນໄຫວຢ່າງມີປະສິດທິຜົນ, ບັນດາບໍລິສັດຮ່ວມທຸລະກິດຄື: Rusvietpetro, Gazpromviet ແລະ Vietgazprom ໄດ້ຮັບການສ້າງຕັ້ງຫວ່າງແລ້ວນີ້ ພວມຕັ້ງຫນ້າຮ່ວມມືສຳຫລວດ, ຂຸດຄົ້ນນ້ຳມັນອາຍແກສຢູ່ຫວຽດນາມ, ລັດເຊຍ ແລະ ປະເທດທີ 3. ບັນຫາຫນຶ່ງອີກເປັນຫນ້າສົນໃຈ ນັ້ນແມ່ນ ລັດເຊຍ ເຊີນຫວຽດນາມເຂົ້າຮ່ວມບໍ່ວ່າບັນດາໂຄງການນ້ຳມັນອາຍແກສໃດຢູ່ເຂດນ້ຳແດນດິນລັດເຊຍ ກໍຄືເຂົ້າຮ່ວມບັນດາລາຍການພັດທະນາເສດຖະກິດສັງຄົມຢູ່……. Siberi ຕາເວັນອອກ. ສອງຝ່າຍກໍພວມຍູ້ໄວຄວາມຄືບຫນ້າການກໍ່ສ້າງໂຮງງານໄຟຟ້ານິວເຄຼຍ ນີງທ້ວນ 1 ແລະ ສ້າງຕັ້ງໂຄງການສູນຄົ້ນຄ້ວາວິທະຍາສາດເຕັກໂນໂລຊີນິວເຄຼຍ ຢູ່ ຫວຽດນາມ, ນຳບັນດາໂຄງການນີ້ກາຍເປັນສັນຍາລັກແຫ່ງນ້ຳໃຈມິດຕະພາບບົນພື້ນຖານການຮ່ວມມືຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດ.
ໄລຍະຜ່ານມາ, ຫວຽດນາມ ແລະ ລັດເຊຍ ກໍບັນລຸໄດ້ສັນຍາຫລາຍສະບັບໃນການສົ່ງອອກຜະລິດຕະພັນກະເສດ, ສິນໃນນ້ຳ, ອາຫານປຸງແຕ່ງໄປຍັງລັດເຊຍ. ພ້ອມກັບນະໂຍບາຍມຸ່ງໄປສູ່ທິດຕາເວັນອອກ, ລັດເຊຍ ພວມມີທ່າອ່ຽງນຳເຂົ້າບັນດາຜະລິດຕະພັນກະເສດ, ສິນໃນນ້ຳ ຈາກບັນດາປະເທດ ອາຊີ ແລະ ອາຊີຕາເວັນອອກສ່ຽງໃຕ້. ນີ້ກໍແມ່ນກາລະໂອກາດເພື່ອໃຫ້ບັນດາປະເພດຜະລິດຕະພັນກະເສດ, ເປັນຕົ້ນແມ່ນສິນໃນນ້ຳຂອງຫວຽດນາມ ເຂົ້າຮ່ວມຕະຫລາດລັດເຊຍ ຢ່າງແຮງ ແລະ ເປີດຕະຫລາດເຖິງປະເທດອື່ນ. ທ່ານ ເຈືອງດີງແຮ່, ເລຂາທິການ ສະຫະພັນປຸງແຕ່ງ ແລະ ສົ່ງອອກສິນໃນນ້ຳ ຫວຽດນາມ (VASEP) ໃຫ້ຮູ້ວ່າ:
“ຕະຫລາດລັດເຊຍ ຍັງມີຈຸດພິເສດອີກ ນັ້ນແມ່ນລັດເຊຍ ຍັງພົວພັນດ້ານການຄ້າກັບບັນດາປະເທດສະມາຊິກໃນສຳພັນທະມິດພາສີ ຊື່ງລວມມີ: ລັດເຊຍ, ເບລາຣຸດ ແລະ ກາຊັກສະຖານ. ນີ້ແມ່ນຕະຫລາດໃຫຍ່, ມີຄວາມສາມາດບົ່ມຊ້ອນໃຫ້ແກ່ສິນໃນນ້ຳຫວຽດນາມ. ພ້ອມກັບເລື່ອງແທນໃຫ້ບັນດາປະເພດຜະລິດຕະພັນກະເສດ, ສິນໃນນ້ຳ ຊື່ງລັດເຊຍ ພວມນຳເຂົ້າຈາກປະເທດຈຳນວນຫນຶ່ງໃນໄລຍະມໍ່ໆມານີ້. ນີ້ກໍແມ່ນໂອກາດເພື່ອໃຫ້ການສົ່ງອອກສິນຄ້າຂອງຫວຽດນາມ ເຂົ້າຕະຫລາດລັດເຊຍ ເພີ່ມຂຶ້ນໃນໄລຍະຈະມາເຖິງ.”
ການພົວພັນລະຫວ່າງຫວຽດນາມ ແລະ ສະຫະພັນລັດເຊຍ ໄດ້ມີພື້ນຖານອັນດີງາມໃນອະດີດຕະການ. ໃນການຢ້ຽມຢາມລັດເຊຍຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟູຈ້ອງ ຄັ້ງນີ້, ບັນດາການນຳສອງປະເທດ ສືບຕໍ່ຢືນຢັນການພົວພັນຄູ່ຮ່ວມມືຍຸດທະສາດຮອບດ້ານ ແມ່ນພື້ນຖານເພື່ອຊຸກຍູ້ການພົວພັນຮ່ວມມືໃນທຸກຂົງເຂດ. ໃນຄວາມສົນໃຈລວມນັ້ນ, ການຮ່ວມມືກ່ຽວກັບດ້ານເສດຖະກິດ, ການຄ້າລະຫວ່າງສອງປະເທດພວມໃນກາລະໂອກາດພັດທະນາ, ເຂົ້າສູ່ລວງເລິກ ແລະ ບັນລຸປະສິດທິຜົນຢ່າງແທດຈິງໃນໄລຍະຈະມາເຖິງ.