(ພາບປະກອບ: TTXVN)

        ກວ່າ 10 ປີຜ່ານມາ, ຂະແໜງງອຸດສາຫະກຳເຄິ່ງຊັກນຳໄຟຟ້າທົ່ວໂລກໄດ້ເພີ່ມຂຶ້ນ 14% ໃນແຕ່ລະປີ, ບັນລຸລາຍຮັບເກືອບ 600 ຕື້ USD ໄລ່ຮອດປີ 2023. ຂະແໜງເຄິ່ງຊັກນຳໄຟຟ້າໄດ້ຮັບຄວາມຫວັງວ່າຈະສືບຕໍ່ບັນລຸການເຕີບໂຕຢ່າງແຮງ, ຢູ່ລະດັບ 1.000 ຕື້ USD ໃນປີ 2030.

ທ່ານ ຫວໍຊວັນຮ່ວາຍ, ຮອງຫົວໜ້າສູນນະວັດຕະກຳແຫ່ງຊາດ (ພາບ: NIC)

        ຢູ່ ຫວຽດນາມ, ດ້ວຍຄວາມຕັດສິນໃຈດ້ານການເມືອງສູງ, ສະພາບແວດລ້ອມແຫ່ງການລົງທຶນ, ດຳເນີນທຸລະກິດສະດວກ, ກຳລັງແຮງງານມີຄຸນນະພາບສູງ, ມີການພົວພັນຄູ່ຮ່ວມມືຍຸດທະສາດຮອບດ້ານກັບເກືອບທຸກປະເທດທີ່ມີຂະແໜງອຸດສາຫະກຳເຄິ່ງຊັກນຳໄຟຟ້າພັດທະນາ, ມີນັກຊ່ຽວຊານຫຼາຍທ່ານຢືນຢັນວ່າ, ຫວຽດນາມ ມີທ່າສະດວກຢ່າງໃຫຍ່ຫຼວງເພື່ອຢືນຢັນທີ່ຕັ້ງໃນຂະແໜງອຸດສາຫະກຳເຄິ່ງຊັກນຳໄຟຟ້າທົ່ວໂລກ. ທ່ານ ຫວໍຊວັນຮ່ວາຍ, ຮອງຫົວໜ້າສູນນະວັດຕະກຳແຫ່ງຊາດ (NIC), ກະຊວງແຜນການ ແລະ ການລົງທຶນ ຫວຽດນາມ, ຖືວ່າ:

        “ໃນໄລຍະຜ່ານມາ, ມີຫຼາຍປະທານກຸ່ມບໍລິສັດໃຫຍ່ໃນໂລກໄດ້ມາ ຫວຽດນາມ, ຄື: CEO ຂອງ Nvidia, Lam Research, Global Foundary, ຫຼື ບັນດາບໍລິສັດຜະລິດເຄື່ອງອຸປະກອນເຄິ່ງຊັກນຳໄຟຟ້າ, ຫຸ້ມຫໍ່ກວດກາເຄິ່ງຊັກນຳໄຟຟ້າ, ຄື: Coherent, Amkor, Intel.. ລ້ວນແຕ່ມີໜ້າຢູ່ ຫວຽດນາມ. ສິ່ງດັ່ງກ່າວຊີ້ໃຫ້ເຫັນວ່າ, ຫວຽດນາມ ພວມມີລະບົບນິເວດຂະແໜງອຸດສາຫະກຳເຄິ່ງຊັກນຳໄຟຟ້າດີທີ່ສຸດ, ນີ້ແມ່ນປັດໄຈເພື່ອໃຫ້ບັນດາວິສາຫະກິດໃນໂລກເຂົ້າມາ ຫວຽດນາມ. ພິເສດ, ດ້ວຍການຫັນປ່ຽນຂອງລະບົບສະໜອງຂະແໜງອຸດສາຫະກຳເຄິ່ງຊັກນຳໄຟຟ້າໃນໂລກນັ້ນ, ຫວຽດນາມ ແມ່ນໜຶ່ງໃນບັນດາປະເທດທີ່ໄດ້ຮັບການຄັດເລືອກ ແລະ ມີໂອກາດຫຼາຍຢ່າງເພື່ອເຂົ້າຮ່ວມລະບົບສະໜອງນີ້ຢ່າງເລິກເຊິ່ງກວ່າ”.

        ເພື່ອກຳແໜ້ນ ແລະ ຫັນໂອກາດນີ້ໃຫ້ປະກົດຜົນເປັນຈິງ, ລັດຖະບານ ຫວຽດນາມ ໄດ້ປະກາດໃຊ້ຍຸດທະສາດພັດທະນາຂະແໜງອຸດສາຫະກຳເຄິ່ງຊັກນຳໄຟຟ້າ ຫວຽດນາມ ຮອດປີ 2030 ແລະ ວິໄສທັດຮອດປີ 2050. ຕາມນັ້ນແລ້ວ, ຍຸດທະສາດມີ 3 ໄລຍະດ້ວຍ 5 ເປົ້າໝາຍລະອຽດ, ລວມມີ: ສຸມໃສ່ສ້າງກົນໄກ, ນະໂຍບາຍພິເສດສະເພາະຮັບປະກັນການແກ່ງແຍ້ງກັບບັນດາປະເທດຢູ່ພາກພື້ນ; ສ້າງພື້ນຖານໂຄງລ່າງໄຟຟ້າ, ນ້ຳ, ຄົມມະນາຄົມ, ສາຍໄຍແກ້ວນຳແສງ, ເຕັກໂນໂລຊີຂໍ້ມູນຂ່າວສານຢ່າງຄົບຊຸດ; ພັດທະນາແຫຼ່ງຊັບພະຍາກອນມະນຸດທີ່ມີຄຸນນະພາບສູງໃຫ້ແກ່ຂະແໜງ.

        ພາຍໃຕ້ແງ່ມູມຂອງປະຊາຄົມວິສາຫະກິດ, ທ່ານ ຫງວຽນວິງກວາງ, ຫົວໜ້າບໍລິສັດຫຸ້ນສ່ວນເຄິ່ງຊັກນຳໄຟຟ້າ ກຸ່ມບໍລິສັດເຕັກໂນໂລຊີ FPT (FPT Semiconductor), ແບ່ງປັນວ່າ:

        “ນີ້ເປັນຄັ້ງທຳອິດທີ່ບັນດາບໍລິສັດເຄິ່ງຊັກນຳໄຟຟ້າໄດ້ເຕື້ອງເຖິງ, ໄດ້ຮັບການໜູນຊ່ວຍຢ່າງສຸດຂີດຈາກລັດຖະບານ ແລະ ມີຫຼາຍຈຸດໃໝ່ໃນຍຸດທະສາດທີ່ຫາກໍ່ປະກາດໃຊ້ຂອງລັດຖະບານ. ໂດຍເປັນບໍລິສັດເຂົ້າຮ່ວມ, FPT ມີຄວາມປິຕິຊົມຊື່ນ, ເຫັນວ່າ ນີ້ແມ່ນໂອກາດທີ່ດີໃຫ້ແກ່ ຫວຽດນາມ ເວົ້າລວມ ແລະ ບັນດາບໍລິສັດ ຫວຽດນາມ, ເວົ້າສະເພາະແມ່ນ ອາດຈະເຂົ້າຮ່ວມຢ່າງເລິກເຊິ່ງກວ່າ, ພັດທະນາເປັນຢ່າງດີກວ່າ, ຜ່ານນັ້ນ, ກໍ່ສາມາດຍົກລະດັບ ຫວຽດນາມ ເຂົ້າຮ່ວມລະບົບສະໜອງເຄິ່ງຊັກນຳໄຟຟ້າທົ່ວໂລກ”.

        ມາຮອດປະຈຸບັນ, ກ່ຽວກັບດ້ານພື້ນຖານໂຄງລ່າງ, ຫວຽດນາມ ພວມຄ່ອຍໆກໍ່ສ້າງໃຫ້ສົມບູນແບບຕອບສະໜອງໃຫ້ແກ່ການພັດທະນາຂອງຂະແໜງອຸດສາຫະກຳເຄິ່ງຊັກນຳໄຟຟ້າ. ພ້ອມກັນນັ້ນ, ກໍ່ມີບັນດານະໂຍບາຍໜູນຊ່ວຍ, ໃຫ້ບຸລິມະສິດດ້ານພາສີ, ດ້ານທຶນຮອນໃຫ້ແກ່ບັນດາວິສາຫະກິດເຕັກໂນໂລຊີສູງ. ພິເສດ, ເອົາໃຈໃສ່ບຳລຸງສ້າງ, ພັດທະນາແຫຼ່ງຊັບພະຍາກອນມະນຸດຂະແໜງອຸດສາຫະກຳເຄິ່ງຊັກນຳໄຟຟ້າ, ເປົ້າໝາຍຮອດປີ 2030, ຫວຽດນາມ ຈະມີນັກວິສາວະກອນກວ່າ 50.000 ຄົນໃນຂົງເຂດນີ້.

        ໂດຍຕີລາຄາສູງຕໍ່ຄວາມຕັດສິນໃຈຂອງລັດຖະບານ ຫວຽດນາມ, ມີຫຼາຍນັກຊ່ຽວຊານ, ຄູ່ຮ່ວມມືສາກົນຢືນຢັນຈະຮ່ວມເດີນທາງພ້ອມກັບ ຫວຽດນາມ ປະຕິບັດເປົ້າໝາຍກາຍເປັນຕ່ອງໂສ້ໃນລະບົບສະໜອງເຄິ່ງຊັກນຳໄຟຟ້າທົ່ວໂລກ. ທ່ານນາງ Linda Tan, ປະທານສະຫະສະມາຄົມເຄິ່ງຊັກນຳໄຟຟ້າທົ່ວໂລກ ພາກພື້ນ ອາຊີຕາເວັນອອກສ່ຽງໃຕ້, ໃຫ້ຮູ້ວ່າ:

        “ຕະຫຼາດເຄິ່ງຊັກນຳໄຟຟ້າຂອງ ຫວຽດນາມ ໄດ້ຮັບການຄາດຄະເນວ່າຈະບັນລຸ 31,39 ຕື້ USD ໃນປີ 2029 ດ້ວຍລະດັບເຕີບໂຕຄວບຄູ່ແຕ່ລະປີແມ່ນ 11,84% ໃນໄລຍະແຕ່ປີ 2024 ຮອດປີ 2029. ໃນສະພາບລັດຖະບານ ຫວຽດນາມ ພວມຍູ້ແຮງການພັດທະນາຂະແໜງເຄິ່ງຊັກນຳໄຟຟ້າຜ່ານບັນດານະໂຍບາຍ ກໍຄືຍຸດທະສາດ, ພວກຂ້າພະເຈົ້າໃຫ້ຄຳໝັ້ນສັນຍາພັດທະນາຖັນແຖວນັກຊ່ຽວຊານລຸ້ນຕ່າງໆທີ່ມີທັກສະຜ່ານບັນດາໂຄງການຮອບດ້ານ, ບຳລຸງສ້າງທັກສະໃຫ້ແກ່ແຫຼ່ງຊັບພະຍາກອນຮັບໃຊ້ຂະແໜງຄືນໃໝ່”.

        ອຸດສາຫະກຳເຄິ່ງຊັກນຳໄຟຟ້າແມ່ນຂະແໜງອຸດສາຫະກຳສວມບົດບາດສຳຄັນ, ເປັນພື້ນຖານກຳນົດຮູບແບບການພັດທະນາຂອງຫຼາຍຂົງເຂດທີ່ແຕກຕ່າງກັນໃນພື້ນຖານເສດຖະກິດທົ່ວໂລກ. ຄວາມຕັດສິນໃຈດ້ານການເມືອງ ພ້ອມກັບວິໄສທັດອັນຍາວໄກ, ມີຍຸດທະສາດ ຈະແມ່ນພື້ນຖານສຳຄັນເພື່ອໃຫ້ ຫວຽດນາມ ລະດົມທຸກແຫຼ່ງກຳລັງ, ປະຕິບັດການຫັນບັນດາເປົ້າໝາຍນຳ ຫວຽດນາມ ກາຍເປັນສ່ວນໜຶ່ງທີ່ສຳຄັນໃນລະບົບສະໜອງເຄິ່ງຊັກນຳໄຟຟ້າທົ່ວໂລກເປັນເທື່ອລະກ້າວ.