(vovworld) – ໄລຍະທາງພັດທະນາໃໝ່ສຳລັບພື້ນຖານເສດຖະກິດຫວຽດນາມ ໄດ້ເລີ່ມປະຕິບັດຢ່າງໝັ້ນຄົງ ໃນຂະນະທີ່ລະດັບເຕີບໂຕ GDP ຂອງຫວຽດນາມ ໃນປີ 2015 ບັນລຸ 6,5%, ຫວຽດນາມ ໄດ້ສຳເລັດການເຈລະຈາ ແລະ ເຂົ້າຮ່ວມສັນຍາການຄ້າເສລີຫຼາຍສະບັບ, ເຂົ້າຮ່ວມປະຊາຄົມເສດຖະກິດອາຊຽນ… ໃນຈຸດເວລາກ້າວເຂົ້າສູ່ປີ 2016, ໄປພ້ອມກັບບັນດາກາລະໂອກາດພັດທະນາ, ພື້ນຖານເສດຖະກິດຫວຽດນາມ ກໍປະເຊີນໜ້າກັບບັນດາສິ່ງທ້າທາຍໃໝ່. ບົດຂຽນຂອງນັກຂ່າວ ວິ້ງຟອງ, ຈູງທຸຍ, ເລ້ຮັ່ງ ດ້ວຍຫົວຂໍ້ວ່າ “ຫວຽດນາມ ເລີ່ມປະຕິບັດໄລຍະພັດທະນາໃໝ່”
ສິ້ນສຸດປີ 2015, ຫວຽດນາມ ໄດ້ມີຂ່າວດີ, ຂ່າວມ່ວນຢ່າງລຽນຕິດຄື: ສັນຍາການຄ້າເສລີຫວຽດນາມ - ສ.ເກົາຫຼີ (VKFTA) ເລີ່ມມີຜົນສັກສິດ, ສັນຍາການຄ້າຫວຽດນາມ - ສະຫະພາບເອີລົບ (EVFTA) ໄດ້ຮັບການລົງນາມຢ່າງເປັນທາງການ, ສັນຍາຄູ່ຮ່ວມມືຂ້າມປາຊີຟິກ (TPP) ສິ້ນສຸດການເຈລະຈາ ແລະ ກະກຽມລົງນາມ. ວັນທີ 31/12, ເຊິ່ງແມ່ນວັນສຸດທ້າຍຂອງປີ 2015, ປະຊາຄົມເສດຖະກິດອາຊຽນ (AEC) ໄດ້ຮັບການສ້າງຕັ້ງຂຶ້ນຢ່າງເປັນທາງການ, ໄດ້ເປັນຂີດໝາຍບາດລ້ຽວໃນການເຊື່ອມໂຍງຢ່າງຮອບດ້ານລະຫວ່າງບັນດາພື້ນຖານເສດຖະກິດອາຊີຕາເວັນອອກສ່ຽງໃຕ້, ໃນນັ້ນມີຫວຽດນາມ, ມຸ່ງໄປເຖິງເປົ້າໝາຍຊຸກຍູ້ການພັດທະນາເສດຖະກິດຢ່າງສະເໝີພາບ, ສ້າງຕັ້ງເຂດເສດຖະກິດມີກຳລັງແກ່ງແຍ່ງສູງ, ສາມາດເຊື່ອມໂຍງເຂົ້າພື້ນຖານເສດຖະກິດທົ່ວໂລກຢ່າງຮອບດ້ານ.
ເພາະສະນັ້ນ, ເລື່ອງເຂົ້າຮ່ວມບັນດາສັນຍາ FTA, TPP ແລະ AEC ຈະນຳມາເຊິ່ງກາລະໂອກາດເພື່ອພັດທະນາ, ສ້າງວຽກເຮັດງານທຳໃໝ່ໃຫ້ແຮງງານນັບລ້້ານຄົນ, ຍົກສູງລາຍຮັບ ແລະ ປະກອບສ່ວນ ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກໃຫ້ຫວຽດນາມ. ຍິ່ງໄປກວ່ານັ້ນແມ່ນ ກາລະໂອກາດເພີ່ມການສົ່ງອອກ, ດຶງດູດການລົງທຶນຈາກຕ່າງປະເທດ, ສ້າງພື້ນຖານເສດຖະກິດຄືນໃໝ່ ແລະ ຍົກສູງກຳລັງແກ່ງແຍ່ງ, ເປີດແງ່ຫວັງອັນໃຫຍ່ຫຼວງສຳລັບການຟື້ນຟູ ແລະ ການເຕີບໂຕຂອງພື້ນຖານເສດຖະກິດແບບຍືນຍົງ. ສະນັ້ນ, ບັນດານະໂຍບາຍພັດທະນາເສດຖະກິດຂອງຫວຽດນາມ ໃນປີ 2016 ແມ່ນມຸ່ງໄປເຖິງການແກ້ໄຂບັນດາບັນຫາກ່ຽວຂ້ອງເຖິງການເຊື່ອມໂຍງ. ນັກຊ່ຽວຊານດ້ານເສດຖະກິດ ເລດັງແຢງ ຄາດຄະເນວ່າ.
“ປີ 2016, ຫວຽດນາມ ຈະສືບຕໍ່ວິວັດທະນາການສ້າງພື້ນຖານເສດຖະກິດຄືນໃໝ່. ຫວຽດນາມ ຈະເລີ່ມຕົ້ນມີການແກ່ງແຍ່ງຢູ່ຕະຫຼາດພາຍໃນປະເທດຢ່າງແຮງ. ນີ້ແມ່ນສິ່ງທ້າທາຍໃຫຍ່ຫຼວງທີ່ສຸດໃນການແກ່ງແຍ່ງ. ຊາວຫວຽດນາມ ຍາມໃດກໍຍ້ອມຮັບຕໍ່ສິ່ງທ້າທາຍ ແລະ ຍາມໃດກໍ່ບືນຕົວຂຶ້ນເພື່ອຮັບມືກັບສິ່ງທ້າທາຍນັ້ນຢ່າງແຮງ. ສະນັ້ນ, ຂ້າພະເຈົ້າຫວັງວ່າ, ປີ 2016 ຈະແມ່ນປີທີ່ຫວຽດນາມ ມີການປະຕິຮູບດ້ານລະບອບລະບຽບການຢ່າງແຮງ ແລະ ສືບຕໍ່ຍົກສູງກຳລັງແກ່ງແຍ່ງ ແລະ ຈະແກ່ງແຍ່ງຢ່າງມີປະສິດທິຜົນກັບບັນດາສິນຄ້າຂອງປະເທດຕ່າງໆ”.
ເປັນທີ່ຈະແຈ້ງແລ້ວວ່າ, ເລື່ອງຫວຽດນາມ ເຂົ້າຮ່ວມບັນດາສັນຍາ FTA, TPP ແລະ AEC ແມ່ນບາດກ້າວແຫ່ງການເຊື່ອມໂຍງສຳຄັນຂອງພື້ນຖານເສດຖະກິດຫວຽດນາມ ເວົ້າລວມ, ວິສາຫະກິດເວົ້າສະເພາະ ເຂົ້າກັບພື້ນຖານເສດຖະກິດຂອງພາກພື້ນ ແລະ ສາກົນ. ສະນັ້ນ, ພ້ອມກັບບັນດານະໂຍບາຍຂອງລັດຖະບານ, ບົດບາດເປັນເຈົ້າການຂອງວິສາຫະກິດແມ່ນປັດໃຈສຳຄັນ ເຮັດໃຫ້ເພີ່ມທະວີກຳລັງແກ່ງແຍ່ງຂອງພື້ນຖານເສດຖະກິດ. ທ່ານດ.ຣ ຫວໍຈິ໋ແທ່ງ, ອະດີດຮອງຫົວໜ້າສະຖາບັນຄົ້ນຄວ້າຄຸ້ມຄອງເສດຖະກິດສູນກາງ ຖືວ່າ.
“ຖ້າຫາກພວກເຮົາມີການປະຕິຮູບເປັນຢ່າງດີ, ຫວຽດນາມ ຈະກາຍເປັນສະຖານທີ່ດູດດຶ່ມທີ່ສຸດຂອງນັກລົງທຶນຕ່າງປະເທດ. ເມື່ອເປັນເຊັ່ນນັ້ນແລ້ວ ແນ່ນອນຈະຕ້ອງມີການແກ່ງແຍ່ງ, ແຕ່ເມື່ອເວົ້າເຖິງລະບົບການຕອບສະໜອງ ແລະ ເຄືອຂ່າຍ ນີ້ແມ່ນກາລະໂອກາດໜຶ່ງດຽວໃຫ້ແກ່ວິສາຫະກິດຫວຽດນາມ ເຂົ້າຮ່ວມລະບົບການຕອບສະໜອງ ແລະ ເຄືອຂ່າຍນີ້. ຄວາມຫຍຸ້ງຍາກຫຼາຍທີ່ສຸດ, ສິ່ງທ້າທາຍກໍ່ໃຫຍ່ຫຼວງທີ່ສຸດ, ແຕ່ພວກເຮົາຕ້ອງມີໄຫວພິບຈຶ່ງສາມາດພັດທະນາຢ່າງໄວກວ່າ”.
ປີ 2015, ຫວຽດນາມ ບັນລຸລະດັບເຕີບໂຕ GDP 6,5%, ແມ່ນສູງກວ່າໝູ່ໃນໄລຍະ 5 ປີຜ່ານມາ ແລະ ລື່ນກາຍແຜນການທີ່ໄດ້ວາງອອກແມ່ນ 6,2%. ໃນໄລຍະ 5 ປີິຈະມາເຖິງ, ເພີື່ອຮັກສາລະດັບເຕີບໂຕຈາກ 6,5% - 7% ໃຫ້ໄດ້ນັ້ນ, ຫວຽດນາມ ໄດ້ ແລະ ພວມຜັນຂະຫຍາຍນະໂຍບາຍເສດຖະກິດທີ່ກະຈ່າວແຈ້ງ, ເປີດເຜີຍຂໍ້ມູນຂ່າວສານ, ປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ປະຕິຮູບພື້ນຖານເສດຖະກິດ. ທ່ານ ຫງວຽນດິງກຸງ, ຫົວໜ້າສະຖາບັນຄົ້ນຄວ້າ, ຄຸ້ມຄອງເສດຖະກິດສູນກາງຖືວ່າ.
“ປີ 2016, ເສດຖະກິດຫວຽດນາມ ສືບຕໍ່ຕົວຢ່າງຊັກຊ້າ ແຕ່ມີຄວາມແນ່ນອນ. ເສດຖະກິດມະຫາພາກສືບຕໍ່ມີສະຖຽນລະພາບ, ພິເສດແມ່ນລາຄາບັນດາວັດຖຸສົ້ນເຂົ້າສືບຕໍ່ມີລາຄາຕ່ຳໄປເລື່ອຍໆ. ສະພາບແວດລ້ອມແຫ່ງການດຳເນີນທຸລະກິດຕາມທະນາຄານໂລກ, ເສດຖະກິດຫວຽດນາມ ປີ 2016 ຈະເພີ່ມຂຶ້ນຫຼາຍຂັ້ນ, ປີ 2015 ໄດ້ເພີ່ມ 3 ຂັ້ນແລ້ວ ແຕ່ປີ 2016 ຈະໃຫ້ເພີ່ມຂຶ້ນໄດ້ອີກ 10 ຂັ້ນ”.
ສະນັ້ນ, ບັນດາຄຸນຄ່າຈາກກາລະໂອກາດ ແລະ ສິ່ງທ້າທາຍຂອງການເຊື່ອມໂຍງເສດຖະກິດທົ່ວໂລກຂອງຫວຽດນາມ ໃນປີ 2016 ແມ່ນໄດ້ຮັບການຮັບຮູ້ຢ່າງຄົບຖ້ວນ. ຄວາມຮຽກຮ້ອງຕ້ອງການເປັນຕາຍນັ້ນແມ່ນສ້າງບັນດາກຳລັງໜູນເຕີບໂຕເສດຖະກິດໃໝ່. ປະຕິຮູບພື້ນຖານເສດຖະກິດ, ປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ່ງຕ້ອງແມ່ນບັນດາບາດກ້າວກະກຽມຢ່າງລອບຄອບທີ່ຖ້ວນຂອງຫວຽດນາມ ເພື່ອເລີ່ມເຄື່ອນໄຫວໄລຍະພັດທະນາໃໝ່, ໄລຍະເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກຢ່າງໝັ້ນຄົງ.