ທ່ານ ເລື່ອງວັນກວິ່ງ (ຜູ້ເບື້ອງຂວາມື) ຜູ້ອຳນວຍການສະຫະກອນຕົ້ນໄມ້ກິນໝາກ ເມືອງຊາງ, ແຂວງ ເຊີນລາ (ພາບ: VOV)

ໜຶ່ງໃນບັນດາວິທີເຮັດທີ່ມີປະສິດທິຜົນເພື່ອຊຸກຍູ້ການພັດທະນາເສດຖະກິດກະສິກຳເຊິ່ງແຂວງ ເຊີນລາ ຜັນຂະຫຍາຍ ນັ້ນແມ່ນການຂົນຂວາຍສ້າງຕັ້ງບັນດາສະຫະກອນກະສິກຳ, ພັດທະນາກະສິກຳເທື່ອລະກ້າວຕາມທິດທັນສະໄໝ, ປູກຝັງສະເພາະສິນຄ້າລວມສູນ, ມີຂອບຂະໜາດໃຫຍ່; ຍູ້ແຮງການໝູນໃຊ້ວິທະຍາສາດ, ເຕັກໂນໂລຢີສູງ, ກ້າວໜ້າເຂົ້າໃນການຜະລິດ ສ້າງບາດກ້າວບຸກທະລຸໃນຂົງເຂດກະສິກຳ. ທ່ານ ເລື່ອງວັນກວິ່ງ, ຜູ້ອຳນວຍການສະຫະກອນຕົ້ນໄມ້ກິນໝາກ ເມື່ອງຊາງ, ແຂວງ ເຊີນລາ, ໃຫ້ຮູ້ວ່າ:

“ສະຫະກອນພວກຂ້າພະເຈົ້າໄດ້ຮັບການສ້າງຕັ້ງຂຶ້ນເມື່ອປີ 2017, ທຳອິດມີສະມາຊິກ 14 ຄອບຄົວ, ແຕ່ປັດຈຸບັນໄດ້ເພີ່ມຂຶ້ນເປັນ 30 ຄອບຄົວແລ້ວ. ຕອນທີ່ຍັງບໍ່ທັນສ້າງຕັ້ງສະຫະກອນ, ຊາວກະສິກອນປູກຝັງແບບກະແຈກກະຈາຍ, ຂະໜາດນ້ອຍ, ສະນັ້ນ ບໍ່ມີການເຊື່ອມຕໍ່ກ່ຽວກັບເຕັກນິກບົວລະບັດ ແລະ ຊອກຫາຕະຫຼາດຈຳໜ່າຍຜະລິດຕະພັນ. ເມື່ອສະຫະກອນໄດ້ຮັບການສ້າງຕັ້ງຂຶ້ນມາ, ພວກຂ້າພະເຈົ້າ ໄດ້ເຊື່ອມຕໍ່ກັນ, ພ້ອມກັນຊອກຮູ້, ຖອດຖອນບົດຮຽນປະສົບການໃນການບົວລະບັດຕົ້ນໄມ້ ເພື່ອມີປະສິດທິຜົນ ແລະ ເຊື່ອມຕໍ່ກັບຫຼາຍຕະຫຼາດກວ່າເກົ່າ”.

ຮອດເດືອນ ມິຖຸນາ 2025, ທົ່ວແຂວງ ເຊີນລາ ມີ ກວ່າ 900 ສະຫະກອນທີ່ພວມເຄື່ອນໄຫວ, ໃນນັ້ນມີເກືອບ 650 ສະຫະກອນກະສິກຳ, ກວມເອົາອັດຕາສ່ວນກວ່າ 70%. ທ່ານ ດິງກາວເຄວ, ປະທານສະພາບໍລິຫານ ບໍລິສັດຫຸ້ນສ່ວນອາຫານສົ່ງອອກ ດົ່ງຢາວ, ແຂວງ ເຊີນລາ ໃຫ້ຮູ້ວ່າ:

“ພວກຂ້າພະເຈົ້າໄດ້ປະຕິບັດການເຊື່ອມຕໍ່ເປັນຫຼາຍຮູບແບບ, ໃນນັ້ນ, ສ່ວນຫຼາຍແມ່ນສຸມໃສ່ບັນດາສະຫະກອນຜະລິດກະສິກຳ ແລະ ບັນດາສະຫະກອນແບບໃໝ່. ບົນພື້ນຖານນັ້ນ, ກໍສ້າງບັນດາເຂດວັດຖຸດິບໂດຍພື້ນຖານ, ຮັບປະກັນຜົນປະໂຫຍດທີກົມກຽວໃຫ້ພໍ່ແມ່ຊາວກະສິກອນ, ບັນດາສະຫະກອນ ແລະ ວິສາຫະກິດ”.

ປັດຈຸບັນ, ສະຫະກອນກະສິກຳຢູ່ ເຊີນລາ ສ່ວນຫຼາຍໄດ້ໝູນໃຊ້ວິທະຍາສາດເຕັກນິກ, ການຜະລິດຕາມມາດຕະຖານ VietGAP, GlobalGAP; ສ້າງລະຫັດເຂດປູກ;… ມີຫຼາຍຮູບແບບການຜະລິດໄດ້ນຳມາເຊິ່ງປະສິດທິຜົນດ້ານເສດຖະກິດສູງ, ດ້ວຍລາຍຮັບແຕ່ລະປີບັນລຸນັບຕື້ດົ່ງ/ເຮັກຕາ, ເຊັ່ນ: ໝາກໝັ້ນ, ອາໂວກາໂດ, ໝາກພັບກອບ, ໝາກໄມ້ປະເພດງີມ… ປັດຈຸບັນ, ໃນທົ່ວແຂວງ ມີເນື້ອທີ່ປູກຕົ້ນໄມ້ກິນໝາກກວ່າ 20.000 ເຮັກຕາ ໄດ້ມີລະຫັດເຂດປູກ ເພື່ອສົ່ງອອກບັນດາຕະຫຼາດທີ່ຕ້ອງການຄຸນນະພາບສູງ ເຊັ່ນ: ຈີນ, ອາເມລິກາ, ຍີ່ປຸ່ນ, ສ.ເກົາຫຼີ. ທ່ານ ເຈິ່ນວັນງອກ, ຜູ້ອຳນວຍການສະຫະກອນການບໍລິການກະສິກຳ ຮຶງລົກ, ຕາແສງ ຈຽງເຄືອງ ເຊິ່ງເປັນໜຶ່ງໃນບັນດາເຂດປູກໝາກລຳໄຍໃຫຍ່ສຸດຂອງແຂວງເຊີນລາ ໃຫ້ຮູ້ວ່າ:

“ທາງແຂວງ ໄດ້ຈັດຊຸດຝຶກອົບຮົມໃຫ້ບັນດາສະຫະກອນ, ນັບແຕ່ຂັ້ນຕອນການບົວລະບັດ ແລະ ຮອບວຽນການນຳໃຊ້ວິທະຍາສາດ - ເຕັກນິກ ເພື່ອໃຫ້ແຕກດອກອອກຜົນ. ຫຼັງຈາກນັ້ນ, ບັນດາສະຫະກອນຈະເຜີຍແຜ່ໃຫ້ປະຊາຊົນ. ຈາກນັ້ນ,ປະຊາຊົນ ແລະ ສະຫະກອນມີການເຊື່ອມຕໍ່, ປະສານສົມທົບກັນເພື່ອໃຫ້ເຄື່ອງໝາຍການຄ້າໝາກລຳໄຍ ນ້ຳມ໊າມີຄຸນນະພາບດີກວ່າ. ພ້ອມດຽວກັນນັ້ນ, ທາງແຂວງ ກໍໜູນຊ່ວຍບັນດາຄອບຄົວຊາວກະສິກອນປ່ຽນແປງໃໝ່ເຕັກໂນໂລຢີປຸງແຕ່ງ ທີ່ປອດສານພິດ. ຈາກນັ້ນ, ໝາກລຳໄຍຂອງແຂວງຈິ່ງໄດ້ຮັບຄວາມນິຍົມຢູ່ຫຼາຍປະເທດ”.

ໃນຊຸມປີມໍ່ໆມານີ້, ເຊີນລາ ສືບຕໍ່ຮັກສາຖານະບົດບາດແມ່ນອູ່ຕົ້ນໄມ້ກິນໝາກໃຫຍ່ທີ່ສຸດຢູ່ພາກເໜືອ ຫວຽດນາມ, ຢືນອັນດັບທີ 2 ໃນທົ່ວປະເທດ ແລະ ໄດ້ຮັບການຕີລາຄາວ່າ “ເປັນປະກົດການດ້ານເສດຖະກິດກະສິກຳ” ຂອງທັງປະເທດ. ທ່ານ ຫງວຽນແທັ່ງກົງ, ຮອງປະທານຄະນະກຳມະການປະຊາຊົນແຂວງ ເຊີນລາ ໃຫ້ຮູ້ວ່າ ເຊີນລາ ພວມສູ້ຊົນເພື່ອໃຫ້ຍອດຜະລິດຕະພັນຂະແໜງກະເສດ, ເຄື່ອງປ່າຂອງດົງ, ສິນໃນນ້ຳໃນບໍລິເວນແຂວງ ບັນລຸກວ່າ 8.870 ຕື້ ດົ່ງ (ກວ່າ 3,38 ລ້ານ USD) ໃນປີ 2025, ເພີ່ມຂຶ້ນ 4,9% ເມື່ອທຽບໃສ່ປີ 2024.

“ປີ 2025, ເຊີນລາ ໄດ້ສ້າງ 28 ຄາດໝາຍເສດຖະກິດສັງຄົມ, ໃນນັ້ນ ຄາດໝາຍຂອງຂະແໜງກະສິກຳແມ່ນຈະແຈ້ງທີ່ສຸດ. ໃນນັ້ນ, ສູ້ຊົນບັນລຸ 350 ຕ່ອງໂສ້ການຜະລິດທີ່ປອດໄພ; ມີຜະລິດຕະພັນ OCOP ປະມານ 250 ຢ່າງ; 15 ເຂດກະສິກຳໝູນໃຊ້ເຕັກໂນໂລຢີສູງ ແລະ ສູ້ຊົນນຳເອົາເນື້ອທີ່ປູກຕົ້ນໄມ້ກິນໝາກ 84.000 ເຮັກຕາເຂົ້າໃນການຜະລິດດ້ວຍຂອບຂະໜາດໃຫຍ່, ການຜະລິດສະອາດກວມອັດຕາໜ້ອຍສຸດແມ່ນ 60% ຂອງເນື້ອທີ່ທັງໝົດ. ພ້ອມດຽວກັນນັ້ນ, ກໍປະຕິບັດສຳເລັດໂຄງການສ້າງ ເຊີນລາ ໃຫ້ກາຍເປັນສູນປຸງແຕ່ງຜະລິດຕະພັນກະເສດຂອງເຂດພູດອຍທາງພາກເໜືອ ຫວຽດນາມ”.

ໃນໄລຍະຈະມາເຖິງ, ແຂວງ ເຊີນລາ ຍັງສືບຕໍ່ສຸມໃສ່ພັດທະນາກະສິກຳຕາມທິດໝູນໃຊ້ເຕັກໂນໂລຢີສູງ, ກະສິກຳສະອາດ, ກະສິກຳອິນຊີ ຕິດພັນກັບການຫັນເປັນດີຈີຕອນໃນການຜະລິດ, ປຸງແຕ່ງ ແລະ ຈຳໜ່າຍຜະລິດຕະພັນ. ທາງແຂວງ ກໍເພີ່ມທະວີການສ້າງ ແລະ ພັດທະນາເຄື່ອງໝາຍການຄ້າຜະລິດຕະພັນກະເສດ ເຊີນລາ, ເປີດກວ້າງຕະຫຼາດຈຳໜ່າຍຕື່ມອີກ. ໄປຄຽງຄູ່ກັນນັ້ນ, ບັນດານະໂຍບາຍໜູນຊ່ວຍກ່ຽວກັບທຶນຮອນ, ວິທະຍາສາດ, ເຕັກໂນໂລຢີ, ທີ່ດິນ… ກໍຈະສືບຕໍ່ໄດ້ຮັບການຜັນຂະຫຍາຍ, ປະກອບສ່ວນປະຕິບັດສຳເລັດເປົ້າໝາຍບັນລຸລະດັບເຕີບໂຕຍອດຜະລິດຕະພັນພາຍໃນບໍລິເວນແຂວງ (GRDP) ໃຫ້ໄດ້ 8% ໃນປີ 2025 ຕາມແຜນການທີ່ໄດ້ຮັບມອບໝາຍ./.