 លោកប្រធានរដ្ឋ លឿង គឿង រួមជាមួយថ្នាក់ដឹកនាំខេត្ត Gyeongsangbuk បានចូលរួមពិធីចុចប៊ូតុងដើម្បីចាប់ផ្ដើមនិមិត្តសញ្ញានៃកិច្ចសហប្រតិបត្តិការមិត្តភាពឆ្ពោះទៅអនាគត។ រូបថត៖ VOV |
ថ្លែងនៅក្នុងពិធីនេះ លោកប្រធានរដ្ឋ លឿង គឿង បានរំលឹកឡើងវិញនូវទំនាក់ទំនងប្រវត្តិសាស្ត្រពិសេសរវាងប្រជាជាតិទាំងពីរ នៅពេលដែលចាប់ពីសតវត្សរ៍ទី១២ ដល់សតវត្សរ៍ទី ១៣ កូនចៅនៃរាជវង្ស Ly របស់វៀតណាមបានមកតាំងទីលំនៅ និងរួមចំណែកដល់ការសាងសង់តំបន់ដីនេះ និងវិមាន Ly Thai To (លីថៃតូ) - ស្តេចបង្កើតរាជវង្ស Ly របស់វៀតណាមក្នុងសតវត្សរ៍ទី១១ ត្រូវបានសង់នៅស្រុក Bonghwa ខេត្ត Gyeongsangbuk ដែលជាសក្ខីភាពនៃចំណងវប្បធម៌និងប្រវត្តិសាស្ត្រដ៏រឹងមាំរវាងប្រទេសទាំងពីរ។ លោកប្រធានរដ្ឋ លឿង គឿង បានសង្កត់ធ្ងន់ថា «ទិវាវៀតណាម» មិនត្រឹមតែជាឱកាសមួយដើម្បីឧទ្ទេសនាមអំពីប្រទេសជាតិ ប្រជាជន ប្រវត្តិសាស្ត្រ និងវប្បធម៌វៀតណាមដល់មិត្តភក្តិកូរ៉េខាងត្បូងប៉ុណ្ណោះទេ ថែមទាំងបញ្ជាក់ពីទំនាក់ទំនងជិតស្និទ្ធ និងការយោគយល់គ្នាទៅវិញទៅមក ដែលជាមូលដ្ឋានគ្រឹះដើម្បីលើកកម្ពស់កិច្ចសហប្រតិបត្តិការប្រកបដោយចីរភាពរវាងប្រទេសទាំងពីរនៅក្នុងយុគសម័យថ្មីនៃការអភិវឌ្ឍ។ លោកប្រធានរដ្ឋ លឿង គឿង បានសង្កត់ធ្ងន់ថា៖ «ឈានដល់យុគសម័យថ្មី វៀតណាម និងកូរ៉េខាងត្បូងកំពុងប្រឈមមុខនឹងឱកាសដ៏អស្ចារ្យជាច្រើន ដើម្បីអភិវឌ្ឍន៍ទំនាក់ទំនងឡើងដល់កម្ពស់ថ្មីមួយ ដែលកាន់តែទូលំទូលាយ ស៊ីជម្រៅ និងមានប្រសិទ្ធភាពជាង ទាក់ទងនឹងនយោបាយ សេដ្ឋកិច្ច វប្បធម៌ និងការផ្លាស់ប្ដូររវាងប្រជាជន និងប្រជាជន។ ខ្ញុំជឿជាក់ថា «ទិវាវៀតណាម» នៅទីក្រុងក្យុងជូ នឹងបើកទំព័រថ្មីមួយក្នុងកិច្ចសហប្រតិបត្តិការរវាងមូលដ្ឋាននានានៃប្រទេសទាំងពីរ ហើយទីក្រុង Gyeongju ស័ក្តិសមនឹងក្លាយជា «ទីក្រុងតភ្ជាប់មិត្តភាព» ដែលតំណភ្ជាប់នៃកិច្ចសហប្រតិបត្តិការវប្បធម៌-ទេសចរណ៍-ឧស្សាហកម្មរវាងវៀតណាម និងតំបន់ភាគអាគ្នេយ៍នៃកូរ៉េខាងត្បូង រួមចំណែកពង្រឹងមិត្តភាព និងកិច្ចសហប្រតិបត្តិការអភិវឌ្ឍន៍រវាងមូលដ្ឋាន និងតំបន់នានានៃប្រទេសទាំងពីរ វៀតណាម និងកូរ៉េខាងត្បូង»។
ក្នុងឱកាសនេះ លោកប្រធានរដ្ឋ លឿង គឿង និងអភិបាលខេត្ត Gyeongsangbuk លោក Lee Cheol Woo បានផ្លាស់ប្ដូរវត្ថុអនុស្សាវរីយ៍ជាគំរូនៃស្គរសំរិទ្ធ Dong Son របស់វៀតណាម និងកណ្តឹងបុរាណក្នុងសម័យ Silla របស់កូរ៉េខាងត្បូង។ ក្នុងពេលជាមួយគ្នានេះ លោកប្រធានរដ្ឋ រួមជាមួយថ្នាក់ដឹកនាំខេត្ត Gyeongsangbuk បានចូលរួមពិធីចុចប៊ូតុងដើម្បីចាប់ផ្ដើមនិមិត្តសញ្ញានៃកិច្ចសហប្រតិបត្តិការមិត្តភាពឆ្ពោះទៅអនាគត៕
