អគារមួយរងការបាញ់កាំជ្រួចមីស៊ីលរបស់រុស្ស៊ី នៅក្រុង Kramatorsk ប្រទេសអ៊ុយក្រែន ថ្ងៃទី ៣១ ខែ កក្កដា ឆ្នាំ ២០២៥។ (រូបថត៖ REUTERS/Inna Varenytsia)
ថ្លែងនៅឯក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី ៣១ ខែកក្កដា អ្នកការទូតជាន់ខ្ពស់របស់សហរដ្ឋអាមេរិក លោក John Kelley បាននិយាយថា វាដល់ ពេលហើយសម្រាប់ទាំងរុស្ស៊ី និងអ៊ុយក្រែនធ្វើការចរចា ដើម្បីសម្រេចបានកិច្ច ព្រមព្រៀងឈប់បាញ់មួយ និងឆ្ពោះទៅរកសន្តិភាពប្រកបដោយនិរន្តរភាព។ លោក Kelley ក៏បានរំលឹកឡើងវិញថា ប្រធានាធិបតីអាមេរិក លោក Donald Trump បាន ស្នើឱ្យភាគីទាំងពីរបញ្ចប់ការងារនេះត្រឹមថ្ងៃទី ៨ ខែសីហា ព្រមទាំងបញ្ជាក់ថា អាមេរិក ត្រៀមខ្លួនរួចជាស្រេចអនុវត្តន៍វិធានការបន្ថែម ដើម្បីធានាសន្តិភាព។
មុននោះ លោកប្រធានាធិបតី Trump ធ្លាប់បានព្រមានថា អាមេរិកនឹងដាក់ ទណ្ឌកម្មបន្ថែមលើរុស្ស៊ី និងប្រទេសដែលទិញទំនិញនាំចេញរបស់រុស្ស៊ី ប្រសិនបើ ប្រទេសនេះមិនអាចសម្រេចបានកិច្ចព្រមព្រៀងបញ្ឈប់ជម្លោះជាមួយអ៊ុយក្រែនក្នុង ពេលឆាប់ៗនេះ៕