 ទិដ្ឋភាពនៃកិច្ចប្រជុំ។ រូបថត៖ congly.vn |
យោងតាមអនុរដ្ឋមន្ត្រី លោក Nguyen Hoang Hiep ចាប់តាំងពីដើមឆ្នាំមក វៀតណាមបានជួបប្រទះគ្រោះមហន្តរាយធម្មជាតិចំនួន ២០ ប្រភេទ ដែលក្នុងនោះមានព្យុះចំនួន ៦ បានវាយប្រហារដោយផ្ទាល់មកលើដីគោក។ មកទល់នឹងពេលនេះ គ្រោះធម្មជាតិបានសម្លាប់មនុស្ស២៣៨នាក់ មនុស្សជិត៤០០នាក់រងរបួស និងបង្កការខូចខាតទ្រព្យសម្បត្តិគិតជាទឹកប្រាក់ប្រមាណជាង៣៥.០០០ពាន់លានដុង (ប្រហែល១.៣ពាន់លានដុល្លារ)។ ផ្ទះរាប់រយពាន់ខ្នងបានដួលរលំ និងត្រូវបានជន់លិច; ដំណាំរាប់ពាន់ហិកតាត្រូវបានទឹកលិចលង់, សាលារៀន ស្ថានីយ៍ពេទ្យ និងកន្លែងសាធារណៈជាច្រើនត្រូវបានខូចខាតយ៉ាងធ្ងន់ធ្ងរ។ ខ្យល់ព្យុះ Matmo បានបណ្តាលឱ្យមានភ្លៀងធ្លាក់ខ្លាំង និងទឹកជំនន់ធ្ងន់ធ្ងរនៅក្នុងខេត្តភាគខាងជើងជាច្រើន។ បច្ចុប្បន្ន វៀតណាមកំពុងផ្តោតលើការជំនះពុះពារផលវិបាកបណ្តាលពីព្យុះទីហ្វុង Matmo។ ប៉ុន្តែ ធនធានក្នុងស្រុកនៅមានកម្រិតនៅឡើយ ហើយកិច្ចសហប្រតិបត្តិការរបស់សហគមន៍អន្តរជាតិគឺត្រូវការជាចាំបាច់ក្នុងស្មារតីមនុស្សធម៌ និងការចែករំលែក។
ចូលរួមកិច្ចប្រជុំនេះ លោកស្រី Pauline Tamesis អ្នកសម្របសម្រួលនៃអង្គការសហប្រជាជាតិប្រចាំនៅវៀតណាម សហប្រធាននៃភាពជាដៃគូកាត់បន្ថយហានិភ័យគ្រោះមហន្តរាយបានអំពាវនាវឱ្យដៃគូអភិវឌ្ឍន៍សម្របសម្រួល និងដាក់ពង្រាយវិធានការលឿនបំផុត និងមានប្រសិទ្ធភាពបំផុតសម្រាប់ប្រជាជននៅតំបន់រងគ្រោះដោយទឹកជំនន់។
នៅចុងបញ្ចប់នៃកិច្ចប្រជុំ គណៈប្រតិភូបានឯកភាពគ្នាក្នុងការរៀបចំក្រុមការងារអង្កេតដើម្បីវាយតម្លៃការខូចខាតជាក់ស្តែងនៅតាមមូលដ្ឋានក្នុងរយៈពេលប៉ុន្មានថ្ងៃខាងមុខនេះ។ លទ្ធផលទាំងនេះនឹងជាមូលដ្ឋានសម្រាប់កៀងគរ និងបែងចែកជំនួយអន្តរជាតិទាន់ពេលវេលា និងប្រកបដោយប្រសិទ្ធភាព ជួយប្រជាជននៅតំបន់រងគ្រោះដោយទឹកជំនន់ជម្នះលើការលំបាក និងស្ថិរភាពជីវភាពរស់នៅប្រចាំថ្ងៃ៕
