គណៈប្រតិភូ VOV ថតរូបជាមួយអគ្គលេខាធិការ ABU លោក Ahmed Nadeem (ប្រុសឈរកណ្តាល) (រូបថត៖ VOV)

ព្រឹត្តិការណ៍នេះ ដោយស្ថានីយ៍វិទ្យុនិងទូរទស្សន៍ជាតិម៉ុងហ្គោលីរៀបចំឡើង មានការចូលរួមពីគណៈប្រតិភូជិត ៣០០ នាក់មកពី ៦៥ ប្រទេស ដោយផ្តោតលើប្រធានបទ៖ ទំនួលខុសត្រូវសំខាន់របស់ប្រព័ន្ធផ្សព្វផ្សាយក្នុងការការពារបេតិកភណ្ឌវប្បធម៌ និងជាតិ។ គណៈប្រតិភូវិទ្យុសម្លេង វៀតណាម (VOV) ដឹកនាំដោយលោក Nguyen Van Chi អនុលេខាទទួលបន្ទុកនៃគណៈកម្មាធិការបក្ស វិទ្យុសម្លេងវៀតណាមបានអញ្ជើញចូលរួមព្រឹត្តិការណ៍នេះ។

គណៈប្រតិភូ VOV ថតរូបជាមួយលោកស្រី Gerel Gankhuyay អគ្គនាយកវិទ្យុ និងទូរទស្សន៍ម៉ុងហ្គោលី ដែលជាម្ចាស់ផ្ទះនៃមហាសន្និបាត ABU ឆ្នាំ ២០២៥ (ស្ត្រីឈរកណ្តាល) (រូបថត៖ VOV)
ប៉ុន្មានឆ្នាំមកនេះ មហាសន្និបាត ABU គឺជាវេទិកាអន្តរជាតិដ៏សំខាន់មួយ ដែលតភ្ជាប់ស្ថាប័នវិទ្យុ ទូរទស្សន៍ និងប្រព័ន្ធផ្សព្វផ្សាយក្នុងតំបន់ និងជុំវិញពិភពលោក រួមចំណែកលើកកម្ពស់កិច្ចសហប្រតិបត្តិការ ការផ្លាស់ប្តូរ និងការអភិវឌ្ឍវិទ្យុ ទូរទស្សន៍ និងប្រព័ន្ធផ្សព្វផ្សាយ ដើម្បីពិភពលោកសន្តិភាព វឌ្ឍនភាព និងការអភិវឌ្ឍ។ បច្ចុប្បន្ន ABU មានសមាជិកចំនួន ២៤០ រួមទាំងភ្នាក់ងារវិទ្យុ និងទូរទស្សន៍មកពី ៦៥ ប្រទេស និងតំបន់ជុំវិញពិភព លោក។ ក្នុងនាមជាសមាជិកដ៏យូរលង់របស់ ABU សម្លេង វៀតណាមតែងតែចូលរួមសកម្មភាព ABU ក្នុងលក្ខណៈសកម្ម និងការទទួលខុសត្រូវ។

អញ្ជើញថ្លែងនៅក្នុងព្រឹត្តិការណ៍នេះ អនុប្រធាន ABU លោក Inoue Tatsuhiko បានសង្កត់ធ្ងន់ថា តាមរយៈការប្រើប្រាស់បច្ចេកវិទ្យាថ្មី និងការរួមចំណែករបស់ស្ថានីយ៍វិទ្យុ និងទូរទស្សន៍ ភ្នាក់ងារប្រព័ន្ធផ្សព្វផ្សាយអាចបង្កើនទំនុកចិត្តរបស់អ្នកទស្សនា និងបំពេញបេសកកម្មពិសេសចំពោះសង្គម។ តំបន់អាស៊ីប៉ាស៊ីហ្វិក ជាតំបន់ដែលមានវប្បធម៌ និងប្រពៃណីប្លែកៗ។ បេសកកម្មនិងគោលការណ៍ប្រតិបត្តិការរបស់ ABU គឺដើម្បីភ្ជាប់ភាពរឹងមាំដ៏សម្បូរបែបនៃស្ថានីយ៍សមាជិកនៅក្រោមដំបូលរួម និងបង្កើត "ការរួបរួមក្នុងភាពចម្រុះ"។

ក្នុងក្របខ័ណ្ឌនៃមហាសន្និបាត (១១-១៥/០៩) សកម្មភាពសម្បូរបែបជាច្រើនបានកើតឡើង រួមទាំងវេទិកាភាពជាអ្នកដឹកនាំប្រព័ន្ធផ្សព្វផ្សាយនិងវគ្គពិភាក្សាដើម្បីចែករំលែកបទពិសោធន៍ក្នុងការសម្របខ្លួនទៅនឹងការផ្លាស់ប្តូរបច្ចេកវិទ្យា; ទស្សនៈស្តីពីការកសាងខ្លឹមសារផ្សាយ ដែលអាចរួមចំណែកដល់ការអភិរក្សវប្បធម៌...។ ជាពិសេសនៅយប់ថ្ងៃទី ១៤ ខែកញ្ញា (ម៉ោងក្នុងស្រុក) នឹងជាពិធីប្រគល់ពានរង្វាន់ ABU។ វិទ្យុសម្លេង វៀតណាមមានស្នាដៃចំនួន ២ នៅក្នុងជុំចុងក្រោយនៃពានរង្វាន់ ABU ២០២៥៕