លើសពីនេះ ភាគីទាំងពីរនឹងបន្តរួមដំណើរ និងសម្របសម្រួលគ្នាប្រកបដោយប្រសិទ្ធភាពក្នុងបរិបទដែលប្រទេសហ្វីលីពីនកាន់តំណែងជាប្រធានអាស៊ាន និងវៀតណាមចាប់ផ្តើមអនុវត្តគោលនយោបាយការបរទេសក្នុងស្មារតី និងទិសដៅថ្មីបន្ទាប់ពីមហាសន្និបាតលើកទី១៤ នៃបក្សកុម្មុយនិស្តវៀតណាម។ ក្នុងឱកាសនេះ អ្នកយកព័ត៌មាននៃវិទ្យុវៀតណាមទទួលបន្ទុកតំបន់អាស៊ានបានធ្វើបទសម្ភាសន៍ជាមួយលោក ឡៃ ថៃ ប៊ិញ ឯកអគ្គរដ្ឋទូតវៀតណាមប្រចាំនៅហ្វីលីពីន អំពីសសរស្តម្ភសំខាន់នៃទំនាក់ទំនងរវាងប្រទេសទាំងពីរ។
យោងតាមឯកអគ្គរដ្ឋទូត ឡៃ ថៃ ប៊ិញ រយៈពេល ៥០ ឆ្នាំចាប់តាំងពីវៀតណាម និងហ្វីលីពីនបានបង្កើតទំនាក់ទំនងការទូតឆ្លុះបញ្ចាំងយ៉ាងច្បាស់អំពីភាពចាស់ទុំ និងស៊ីជម្រៅនៃទំនាក់ទំនងទ្វេភាគី។ ពីមូលដ្ឋាននៃកិច្ចសហប្រតិបត្តិការដំបូង ប្រទេសទាំងពីរបានបង្កើតភាពជាដៃគូយុទ្ធសាស្ត្រជាបន្តបន្ទាប់ ដោយពង្រីកកិច្ចសហប្រតិបត្តិការលើវិស័យជាច្រើន។ កិច្ចសហប្រតិបត្តិការនយោបាយ និងការទូតនៅតែជាសសរស្តម្ភដ៏សំខាន់ ដោយផ្តោតលើការពង្រឹងទំនុកចិត្តនយោបាយ ការផ្លាស់ប្តូរកម្រិតខ្ពស់ និងការសម្របសម្រួលយ៉ាងជិតស្និទ្ធនៅក្នុងវេទិកាតំបន់ និងអន្តរជាតិ។ កិច្ចសហប្រតិបត្តិការលើវិស័យសមុទ្រ សន្តិសុខ និងការពារជាតិត្រូវបានសង្កត់ធ្ងន់កាន់តែខ្លាំងឡើង ដែលឆ្លុះបញ្ចាំងពីផលប្រយោជន៍រួមរបស់ប្រទេសជាប់ឆ្នេរសមុទ្រទាំងពីរ។ ភាគីទាំងពីរនឹងបង្កើនការសម្របសម្រួលគ្នាក្នុងការធានាសន្តិសុខ និងសុវត្ថិភាពសមុទ្រ ការអនុវត្តច្បាប់សមុទ្រ ការទប់ស្កាត់និងគ្រប់គ្រងឧប្បត្តិហេតុនៅលើសមុទ្រ។
ពាណិជ្ជកម្មទ្វេភាគីត្រូវបានពង្រីកដោយឥតឈប់ឈរ ហើយកំពុងឆ្ពោះទៅរកគោលដៅ ១០ ពាន់លានដុល្លារអាមេរិក ក្នុងនោះ វៀតណាមដើរតួនាទីយ៉ាងសំខាន់ក្នុងការធានាប្រភពផ្គត់ផ្គង់អង្ករប្រកបដោយស្ថិរភាពសម្រាប់ហ្វីលីពីន។ ទន្ទឹមនឹងនោះ កិច្ចសហប្រតិបត្តិការវិនិយោគទ្វេភាគីបានកត់ត្រាការអភិវឌ្ឍថ្មីៗ ជាពិសេសក្នុងវិស័យអាកាសចរណ៍ ផលិតកម្ម បច្ចេកវិទ្យាព័ត៌មាន ថាមពល និងសេវាកម្ម។ នៅឆ្នាំ ២០២៥ វៀតណាមបានវិនិយោគជាង ៩០ លានដុល្លារអាមេរិកនៅប្រទេសហ្វីលីពីន ខណៈដែលប្រទេសហ្វីលីពីនបានវិនិយោគជាង ២០០ លានដុល្លារអាមេរិកចូលវៀតណាម។
ក្នុងបរិបទនៃការផ្លាស់ប្តូររវាងប្រជាជន និងប្រជាជនត្រូវបានយកចិត្តទុកដាក់កាន់តែខ្លាំង កិច្ចសហប្រតិបត្តិការក្នុងវិស័យទេសចរណ៍ វប្បធម៌ និងការអប់រំរវាងវៀតណាម និងហ្វីលីពីនបានបង្ហាញពីវឌ្ឍនភាពគួរឱ្យកត់សម្គាល់។ ការពង្រីកជើងហោះហើរត្រង់ និងសកម្មភាពផ្លាស់ប្តូរវប្បធម៌ បានរួមចំណែកធ្វើឲ្យស៊ីជម្រៅថែមទៀតនូវការយល់ដឹងគ្នាទៅវិញទៅមក និងចំណងមិត្តភាពរវាងប្រជាជននៃប្រទេសទាំងពីរ ដោយបង្កើតមូលដ្ឋានសង្គមដ៏រឹងមាំសម្រាប់ទំនាក់ទំនងទ្វេភាគី។ ឯកអគ្គរដ្ឋទូត ឡៃ ថៃ ប៊ិញ បានវាយតម្លៃថា៖ “វៀតណាម និងហ្វីលីពីនមានទំនាក់ទំនងទេសចរណ៍ល្អណាស់។ ដោយផ្អែកលើការផ្លាស់ប្តូររវាងប្រជាជននិងប្រជាជន លក្ខខណ្ឌធម្មជាតិ វប្បធម៌ និងម្ហូបអាហារដ៏សម្បូរបែបរបស់វៀតណាម បានទាក់ទាញភ្ញៀវទេសចរហ្វីលីពីនមួយចំនួនធំមកកាន់វៀតណាម ហើយហ្វីលីពីននៅតែជាទីផ្សារទេសចរណ៍បរទេសដែលចំណាយច្រើនបំផុតមួយនៅវៀតណាម។ ទាក់ទងនឹងវិស័យផ្សេងទៀត ដូចជាវប្បធម៌ និងការអប់រំ និស្សិតវៀតណាមជាច្រើនដែលបានសិក្សានៅប្រទេសហ្វីលីពីនទទួលបានជោគជ័យ ហើយខ្ញុំជឿជាក់ថាវិស័យផ្សេងទៀត ទាំងចាស់ និងថ្មី ក៏នឹងមានសក្តានុពលដ៏អស្ចារ្យនាពេលខាងមុខ ផងដែរ។ ទោះជាយ៉ាងណាក៏ដោយ ប្រការនេះទាមទារឱ្យភាគីទាំងពីរខិតខំប្រឹងប្រែងឱ្យអស់ពីសមត្ថភាពដើម្បីប្រែក្លាយសក្តានុពលទៅជាការពិត”។
ក្រៅពីវិស័យប្រពៃណី កិច្ចសហប្រតិបត្តិការវិទ្យាសាស្ត្រ បច្ចេកវិទ្យា និងការផ្លាស់ប្តូរឌីជីថលកំពុងលេចចេញជាទិសដៅយុទ្ធសាស្ត្រថ្មីមួយ។ ប្រទេសទាំងពីរបានឯកភាពគ្នាជំរុញការផ្លាស់ប្តូរបទពិសោធន៍ក្នុងការអភិវឌ្ឍសេដ្ឋកិច្ចឌីជីថល រដ្ឋបាលឌីជីថល នវានុវត្តន៍ និងការអនុវត្តបច្ចេកវិទ្យាក្នុងការគ្រប់គ្រង ផលិតកម្មនិងសេវាកម្ម។ នេះត្រូវបានចាត់ទុកជាមូលដ្ឋានគ្រឹះដ៏សំខាន់សម្រាប់លើកកម្ពស់សមត្ថភាពប្រកួតប្រជែងរបស់ជាតិ បង្កើនភាពធន់នៃសេដ្ឋកិច្ច និងការសម្របខ្លួនទៅនឹងនិន្នាការអភិវឌ្ឍន៍ថ្មីៗនៅក្នុងតំបន់ និងពិភពលោក។
នៅក្នុងតំបន់ វៀតណាម និងហ្វីលីពីនចែករំលែកផលប្រយោជន៍ក្នុងការរក្សាសាមគ្គីភាពអាស៊ាន លើកកម្ពស់មជ្ឈភាពរបស់អាស៊ាន ក៏ដូចជាជំរុញការសន្ទនា ការកសាងទំនុកចិត្ត និងការដោះស្រាយបញ្ហាប្រឈមក្នុងតំបន់ដោយសន្តិវិធី ដោយផ្អែកលើច្បាប់អន្តរជាតិ។ ឯកអគ្គរដ្ឋទូត ឡៃ ថៃ ប៊ិញ ជឿជាក់ថា នៅឆ្នាំ២០២៦ សកម្មភាពរំលឹកខួបលើកទី ៥០ ទិវាបង្កើតទំនាក់ទំនងការទូតរវាងវៀតណាម និងហ្វីលីពីន នឹងក្លាយជាមូលដ្ឋានគ្រឹះដ៏សំខាន់សម្រាប់ប្រទេសទាំងពីរដើម្បីបន្តសហការ បំពេញបន្ថែមឲ្យគ្នាទៅវិញទៅមក និងធ្វើការឆ្ពោះទៅរកគោលដៅខ្ពស់ជាងមុន នៅក្នុងបរិយាកាសតំបន់ និងអន្តរជាតិដែលមានការប្រែប្រួលជាច្រើន។ ឯកអគ្គរដ្ឋទូត ឡៃ ថៃ ប៊ិញ បាននិយាយថា៖ "មូលដ្ឋានទីមួយគឺការអភិវឌ្ឍយ៉ាងឆាប់រហ័ស និងវិជ្ជមាននៃទំនាក់ទំនងទ្វេភាគីដោយផ្អែកលើផលប្រយោជន៍ពិតប្រាកដរបស់ភាគីទាំងពីរ។ ទីពីរគឺ ឆ្នាំនេះជាខួបលើកទី ៥០ ទិវាបង្កើតទំនាក់ទំនងការទូតរវាងវៀតណាម និងហ្វីលីពីន ហើយទីបីគឺហ្វីលីពីនកំពុងកាន់តំណែងជាប្រធានអាស៊ាន។ ដូច្នេះហើយ កិច្ចសហប្រតិបត្តិការ ក៏ដូចជាសកម្មភាពរំលឹកខួបអនុស្សាវរីយ៍ នឹងផ្សារភ្ជាប់ទៅនឹងសសរស្តម្ភទាំងបីនេះ។ វៀតណាម និងហ្វីលីពីននឹងបន្តសម្របសម្រួលយ៉ាងជិតស្និទ្ធ ជំរុញកិច្ចសហប្រតិបត្តិការក្នុងក្របខ័ណ្ឌអាស៊ាន មិនត្រឹមតែរវាងប្រទេសទាំងពីរប៉ុណ្ណោះទេ ប៉ុន្តែថែមទាំងទាក់ទងនឹងសន្តិភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងពិភពលោកទៀតផង”។
ឯកអគ្គរដ្ឋទូត ឡៃ ថៃប៊ិញ បានបញ្ជាក់ថា ដោយក្រឡេកមើលលើរយៈពេល ៥០ ឆ្នាំកន្លងមកនេះ ទំនាក់ទំនងវៀតណាម-ហ្វីលីពីនបានលើសពីក្របខ័ណ្ឌនៃកិច្ចសហប្រតិបត្តិការទ្វេភាគី ដើម្បីក្លាយជាភាពជាដៃគូដ៏ស៊ីជម្រៅ ជាក់ស្តែង និងយូរអង្វែង។ សមិទ្ធផលទាំងនេះមិនត្រឹមតែនាំមកនូវអត្ថប្រយោជន៍ជាក់ស្តែងដល់ប្រជាជននៃប្រទេសទាំងពីរប៉ុណ្ណោះទេ ប៉ុន្តែថែមទាំងរួមចំណែកជាវិជ្ជមានដល់សន្តិភាព ស្ថិរភាព និងការអភិវឌ្ឍនៅអាស៊ីអាគ្នេយ៍ទៀតផង៕
