លោកអគ្គលេខាបក្ស តូ ឡឹម ទទួលជួបឯកអគ្គរដ្ឋទូតសហរដ្ឋអាមេរិកលោក Marc Knapper។ (រូបថត៖ VNA)

នៅក្នុងជំនួបនេះ លោកអគ្គលេខាបក្ស បានអះអាងថា វៀតណាមជានិច្ចកាលចាត់ទុកសហរដ្ឋ
អាមេរិកជាដៃគូយុទ្ធសាស្ត្រចម្បង ហើយមានបំណងចង់សហការយ៉ាងជិតស្និទ្ធជាមួយសហរដ្ឋអាមេរិក ដើម្បីអភិវឌ្ឍន៍ទំនាក់ទំនងទ្វេភាគីឱ្យកាន់តែរីកចម្រើនថែមទៀត។ លោកអគ្គលេខាបក្សបានទទួលស្គាល់ការខិតខំប្រឹងប្រែងរបស់ឯកអគ្គរដ្ឋទូត Marc Knapper និងបុគ្គលិកនៃស្ថានទូតអាមេរិកក្នុងការជំរុញ និងអនុវត្តប្រកបដោយប្រសិទ្ធភាពនូវកិច្ចព្រមព្រៀងជាន់ខ្ពស់ និងខ្លឹមសារសហប្រតិបត្តិការក្នុងក្របខ័ណ្ឌនៃទំនាក់ទំនងដៃគូយុទ្ធសាស្ត្រលើគ្រប់ជ្រុងជ្រោយវៀតណាម - អាមេរិក។ វៀតណាមជានិច្ចកាលយកចិត្តទុកដាក់ បង្កើតបរិយាកាសវិនិយោគអំណោយផល គាំទ្រសហគ្រាសបរទេសនិយាយរួម និងសហរដ្ឋអាមេរិកនិយាយដោយឡែក ក្នុងការពង្រីកកិច្ចសហប្រតិបត្តិការ និងវិនិយោគនៅវៀតណាម រក្សាសន្ទុះអភិវឌ្ឍន៍ទំនាក់ទំនងសេដ្ឋកិច្ចប្រកបដោយតុល្យភាព ភាពសុខដុមរមនា និងកំណើនប្រកបដោយចីរភាព។

ចំណែកលោកឯកអគ្គរដ្ឋទូត Marc Knapper ក៏បានអះអាងដែរថា រដ្ឋបាលប្រធានាធិបតី Trump មានការគោរពយ៉ាងខ្លាំងចំពោះភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-អាមេរិក។ ប្រទេសវៀតណាមដោយមាន “ភាពរឹងមាំ ឯករាជ្យ វិបុលភាព និងភាពធន់” គឺជាការរួមចំណែកជាវិជ្ជមានដល់សន្តិភាព និងស្ថិរភាពក្នុងតំបន់ និងពិភពលោក ហើយជាប្រការដែលសហរដ្ឋអាមេរិកគាំទ្រជានិច្ច។ លោកឯកអគ្គរដ្ឋទូតបានចាត់ទុកថា ទីផ្សារវៀតណាមកំពុងបើកឱកាសជាច្រើនសម្រាប់ផលិតផល និងសេវាកម្មរបស់អាមេរិក ហើយលោកនឹងខិតខំអនុវត្តន៍ប្រកបដោយប្រសិទ្ធភាពនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរលើគ្រប់វិស័យនាពេលខាងមុខ៕